শ্রীমদ্বাল্মীকীয রামাযণে অযোধ্যাকাংডম্ ।
অথ চতুঃসপ্ততিতমস্সর্গঃ ।
তাং তথা গর্হযিত্বা তু মাতরং ভরতস্তদা ।
রোষেণ মহতাঽবিষ্টঃ পুনরেবাব্রবীদ্বচঃ ॥ 1 ॥
রাজ্যাদ্ভ্রংশস্ব কৈকেযি নৃশংসে দুষ্টচারিণি ।
পরিত্যক্তা চ ধর্মেণ মা মৃতং রুদতী ভব ॥ 2 ॥
কিন্নু তেঽদূষযদ্রাজা রামো বা ভৃশধার্মিকঃ ।
যযোর্মৃত্যুর্বিবাসশ্চ ত্বত্কৃতে তুল্যমাগতৌ ॥ 3 ॥
ভ্রূণহত্যামসি প্রাপ্তা কুলস্যাস্য বিনাশনাত্ ।
কৈকেযি নরকং গচ্ছ মা চ ভর্তু স্সলোকতাম্ ॥ 4 ॥
যত্ত্বযা হীদৃশং পাপং কৃতং ঘোরেণ কর্মণা ।
সর্বলোকপ্রিযং হিত্বা মমাপ্যাপাদিতং ভযম্ ॥ 5 ॥
ত্বত্কৃতে মে পিতা বৃত্তো রামশ্চারণ্যমাশ্রিতঃ ।
অযশো জীবলোকে চ ত্বযাঽহং প্রতিপাদিতঃ ॥ 6 ॥
মাতৃরূপে মমামিত্রে নৃশংসে রাজ্যকামুকে ।
ন তেঽহ মভিভাষ্যোঽস্মি দুর্বৃত্তে পতিঘাতিনি ॥ 7 ॥
কৌসল্যা চ সুমিত্রা চ যাশ্চান্যা মম মাতরঃ ।
দুঃখেন মহতাঽবিষ্টাস্ত্বাং প্রাপ্য কুলদূষিণীম্ ॥ 8 ॥
ন ত্বমশ্বপতেঃ কন্যা ধর্মরাজস্য ধীমতঃ ।
রাক্ষসী তত্র জাতাঽসি কুলপ্রধ্বংসিনী পিতুঃ ॥ 9 ॥
যত্ত্বযা ধার্মিকো রামো নিত্যং সত্যপরাযণঃ ।
বনং প্রস্থাপিতো দুঃখাত্পিতা চ ত্রিদিবং গতঃ ॥ 10 ॥
যত্প্রধানাঽসি তত্পাপং মযি পিত্রা বিনাকৃতে ।
ভ্রাতৃভ্যাং চ পরিত্যক্তে সর্বলোকস্য চাপ্রিযে ॥ 11 ॥
কৌসল্যাং ধর্মসংযুক্তাং বিযুক্তাং পাপনিশ্চযে ।
কৃত্বা কং প্রাপ্স্যসে ত্বদ্য লোকং নিরযগামিনি ॥ 12 ॥
কিং নাববুধ্যসে ক্রূরে নিযতং বংধুসংশ্রযম্ ।
জ্যেষ্ঠং পিতৃসমং রামং কৌসল্যাযাঽত্মসংভবম্ ॥ 13 ॥
অঙগপ্রত্যঙগজঃ পুত্রো হৃদযাচ্চাপি জাযতে ।
তস্মাত্প্রিযতমো মাতুঃ প্রিযা এব তু বাংধবাঃ ॥ 14 ॥
অন্যদা কিল ধর্মজ্ঞা সুরভি স্সুরসম্মতা ।
বহমানৌ দদর্শোর্ব্যাং পুত্রৌ বিগতচেতসৌ ॥ 15 ॥
তাবর্ধদিবসে শ্রাংতৌ দৃষ্ট্বা পুত্রৌ মহীতলে ।
রুরোদ পুত্রশোকেন বাষ্পপর্যাকুলেক্ষণা ॥ 16 ॥
অধস্তাদ্ব্রজতস্তস্যাঃ সুররাজ্ঞো মহাত্মনঃ ।
বিংদবঃ পতিতা গাত্রে সূক্ষ্মা স্সুরভিগংধিনঃ ॥ 17 ॥
ইংদ্রোঽপ্যশ্রুনিপাতং তং স্বগাত্রে পুণ্যগংধিনম্ ।
সুরভিং মন্যতে দৃষ্ট্বা ভূযসীং তাং সুরেশ্বরঃ ॥ 18 ॥
নিরীক্ষমাণ শ্শক্রস্তাং দদর্শ সুরভিং স্থিতাম্ ।
আকাশে বিষ্ঠিতাং দীনাং রুদংতীং ভৃশদুঃখিতাম্ ॥ 19 ॥
তাং দৃষ্ট্বা শোকসংতপ্তাং বজ্রপাণির্যশস্বিনীম্ ।
ইংদ্রঃ প্রাংজলিরুদ্বিগ্ন স্সুররাজোঽব্রবীদ্বচঃ ॥ 20 ॥
ভযং কচ্ছিন্ন চাস্মাসু কুতশ্চিদ্বিদ্যতে মহত্ ।
কুতোনিমত্তশ্শোকস্তে ব্রূহি সর্বহিতৈষিণি ॥ 21 ॥
এবমুক্তা তু সুরভি স্সুররাজেন ধীমতা ।
প্রত্যুবাচ ততো ধীরা বাক্যং বাক্যবিশারদা ॥ 22 ॥
শাংতং পাপং ন বঃ কিংচিত্কুতশ্চিদমরাধিপঃ ।
অহং মগ্নৌ তু শোচামি স্বপুত্রৌ বিষমে স্থিতৌ ॥ 23 ॥
এতৌ দৃষ্ট্বা কৃশৌ দীনৌ সূর্যরশ্মিপ্রতাপিতৌ ।
বাধ্যমানৌ বলীবর্ধৌ কর্ষকেণ সুরাধিপ ॥ 24 ॥
মমকাযাত্প্রসূতৌ হি দুঃখিতৌ ভারপীডিতৌ ।
যৌ দৃষ্ট্বা পরিতপ্যেঽহং নাস্তি পুত্রসমঃ প্রিযঃ ॥ 25 ॥
যস্যাঃ পুত্রসহস্রৈস্তু কৃত্স্নং ব্যাপ্তমিদং জগত্ ।
তাং দৃষ্ট্বা রুদতীং শক্রো ন সুতান্মন্যতে পরম্ ॥ 26 ॥
সদাঽপ্রতিমবৃত্তাযাঃ লোকধারণকাম্যযা ।
শ্রীমত্যা গুণনিত্যাযা স্স্বভাবপরিচেষ্টযা ॥ 27 ॥
যস্যাঃ পুত্রসহস্রাণি সাঽপি শোচতি কামধুক্ ।
কিং পুনর্যা বিনা রামং কৌসল্যা বর্তযিষ্যতি ॥ 28 ॥
একপুত্রা চ সাধ্বী চ বিবত্সেযং ত্বযা কৃতা ।
তস্মাত্ত্বং সততং দুঃখং প্রেত্য চেহ চ লপ্স্যসে ॥ 29 ॥
অহং হ্যপচিতিং ভ্রাতুঃ পিতুশ্চ সকলামিমাম্ ।
বর্ধনং যশসশ্চাপি করিষ্যামি ন সংশযঃ ॥ 30 ॥
অনাযযিত্বা তনযং কৌসল্যাযা মহাবলম্ ।
স্বযমেব প্রবেক্ষ্যামি বনং মুনিনিষেবিতম্ ॥ 31 ॥
ন হ্যহং পাপসংকল্পে পাপে পাপং ত্বযা কৃতম্ ।
শক্তো ধারযিতুং পৌরৈরশ্রুকংঠৈ র্নিরীক্ষিতঃ ॥ 32 ॥
সা ত্বমগ্নিং প্রবিশ বা স্বযং বা দংডকান্বিশ ।
রজ্জুং বধান বা কংঠে ন হি তেঽন্যত্পরাযণম্ ॥ 33 ॥
অহমপ্যবনীং প্রাপ্তে রামে সত্যপরাক্রমে ।
কৃতকৃত্যো ভবিষ্যামি বিপ্রবাসিতকল্মষঃ ॥ 34 ॥
ইতি নাগ ইবারণ্যে তোমরাংকুশচোদিতঃ ।
পপাত ভুবি সংকৃদ্ধো নিশ্শ্বসন্নিব পন্নগঃ ॥ 35 ॥
সংরক্তনেত্র শ্শিথিলাংভরস্তদা বিধূতসর্বাভরণঃ পরংতপঃ ।
বভূব ভূমৌ পতিতো নৃপাত্মজশ্শচীপতেঃ কেতুরিবোত্সবক্ষযে ॥ 36 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে চতুঃসপ্ততিতমস্সর্গঃ ॥
