শ্রীমদ্বাল্মীকীয রামাযণে অযোধ্যাকাংডম্ ।
অথ চতুরশীতিতমস্সর্গঃ ।
ততো নিবিষ্টাং ধ্বজিনীং গংগামন্বাশ্রিতাং নদীম্ ।
নিষাদরাজো দৃষ্ট্বৈব জ্ঞাতীন্সংত্বরিতোঽঽব্রবীত্ ॥ 1 ॥
মহতীযমিতস্সেনা সাগরাভা প্রদৃশ্যতে ।
নাস্যাংতমধিগচ্ছামি মনসাপি বিচিংতযন্ ॥ 2 ॥
যথা তু খলু দুর্বুদ্ধির্ভরত স্স্বযমাগতঃ ।
স এষ হি মহাকাযঃ কোবিদারধ্বজো রথে ॥ 3 ॥
বংধযিষ্যতি বা দাশানথবাঽস্মান্বধিষ্যতি ।
অথ দাশরথিং রামং পিত্রা রাজ্যাদ্বিবাসিতম্ ॥ 4 ॥
সংপন্নাং শ্রিযমন্বিচ্ছন্স্তস্য রাজ্ঞ স্সুদুর্লভাম্ ।
ভরতঃ কৈকযীপুত্রো হংতুং সমধিগচ্ছতি ॥ 5 ॥
ভর্তাচৈব সখাচৈব রামো দাশরথির্মম ।
তস্যার্থকামাস্সন্নদ্ধা গংগাঽনূপে প্রতিষ্ঠত ॥ 6 ॥
তিষ্ঠংতু সর্বে দাশাশ্চ গংগামন্বাশ্রিতা নদীম্ ।
বলযুক্তা নদীরক্ষা মাংসমূলফলাশনাঃ ॥ 7 ॥
নাবাং শতানাং পংচানাং কৈবর্তানাং শতং শতম্ ।
সন্নদ্ধানাং তথা যূনাং তিষ্ঠংত্বিত্যভ্যচোদযত্ ॥ 8 ॥
যদাঽঽদুষ্টস্তু ভরতো রামস্যেহ ভবিষ্যতি ।
সেযং স্বস্তিমতী সেনা গংগামদ্য তরিষ্যতি ॥ 9 ॥
ইত্যুক্ত্বোপাযনং গৃহ্য মত্স্যমাংসমধূনি চ ।
অভিচক্রাম ভরতং নিষাদাধিপতির্গুহঃ ॥ 10 ॥
তমাযাংতং তু সংপ্রেক্ষ্য সূতপুত্রঃ প্রতাপবান্ ।
ভরতাযাঽচচক্ষেঽথ বিনযজ্ঞো বিনীতবত্ ॥ 11 ॥
এষ জ্ঞাতিসহস্রেণ স্থপতিঃ পরিবারিতঃ ।
কুশলো দংডকারণ্যে বৃদ্ধো ভ্রাতুশ্চ তে সখা ॥ 12 ॥
তস্মাত্পশ্যতু কাকুত্স্থ ত্বাং নিষাদাধিপো গুহঃ ।
অসংশযং বিজানীতে যত্র তৌ রামলক্ষ্মণৌ ॥ 13 ॥
এতত্তু বচনং শ্রুত্বা সুমংত্রাদ্ভরত শ্শুভম্ ।
উবাচ বচনং শীঘ্রং গুহঃ পশ্যতু মামিতি ॥ 14 ॥
লব্ধ্বাঽভ্যনুজ্ঞাং সংহৃষ্টো জ্ঞাতিভিঃ পরিবারিতঃ ।
আগম্য ভরতং প্রহ্বো গুহো বচনমব্রবীত্ ॥ 15 ॥
নিষ্কুটশ্চৈব দেশোঽযং বংচিতাশ্চাপি তে বযম্ ।
নিবেদযামস্তে সর্বে স্বকে দাসকুলে বস ॥ 16 ॥
অস্তি মূলং ফলংচৈব নিষাদৈস্সমুপাহৃতম্ ।
আর্দ্রং চ মাংসং শুষ্কং চ বন্যং চোচ্চাবচং মহত্ ॥ 17 ॥
আশংসে স্বাশিতা সেনা বত্স্যতীমাং বিভাবরীম্ ।
অর্চিতো বিবিধৈঃ কামৈ শ্শ্ব স্সসৈন্যো গমিষ্যসি ॥ 18 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে চতুরশীতিতমস্সর্গঃ ॥
