শ্রীমদ্বাল্মীকীয রামাযণে অরণ্যকাংডম্ ।
অথ চতুর্বিংশস্সর্গঃ ।
আশ্রমং প্রতি যাতে তু খরে খরপরাক্রমে ।
তানেবৌত্পাতিকান্রামস্সহ ভ্রাত্রা দদর্শ হ ॥ 1 ॥
তানুত্পাতান্মহোঘোরানুত্থিতান্রোমহর্ষণান্ ।
প্রজানামহিতাংদৃষ্ট্বা রামো লক্ষ্মণমব্রবীত্ ॥ 2 ॥
ইমান্পশ্য মহাবাহো সর্বভূতাপহারিণঃ ।
সমুত্থিতান্মহোত্পাতান্সংহর্তুং সর্বরাক্ষসান্ ॥ 3 ॥
অমী রুধিরধারাস্তু বিসৃজংতঃ খরস্বনাঃ ।
ব্যোম্নি মেঘা বিবর্তংতে পরুষা গর্দভারুণাঃ ॥ 4 ॥
সধূমাশ্চ শরাস্সর্বে মম যুদ্ধাভিনংদিনঃ ।
রুক্মপৃষ্ঠানি চাপানি বিচেষ্টংতে চ লক্ষ্মণ ॥ 5 ॥
যাদৃশা ইহ কূজংতি পক্ষিণঃ বনচারিণঃ ।
অগ্রতো নো ভযং প্রাপ্তং সংশযো জীবিতস্য চ ॥ 6 ॥
সংপ্রহারস্তু সুমহান্ভবিষ্যতি ন সংশযঃ ।
অযমাখ্যাতি মে বাহুস্স্ফুরমাণো মুহুর্মুহুঃ ॥ 7 ॥
সন্নিকর্ষে তু ন শ্শূর জযং শত্রোঃ পরাজযম্ ।
সপ্রভং চ প্রসন্নং চ তব বক্ত্রং হি লক্ষ্যতে ॥ 8 ॥
উদ্যতানাং হি যুদ্ধার্থং যেষাং ভবতি লক্ষ্মণ ।
নিষ্প্রভং বদনং তেষাং ভবত্যাযুঃ পরিক্ষযঃ ॥ 9 ॥
রক্ষসাং নর্দতাং ঘোরশ্শ্রূযতে চ মহাধ্বনিঃ ।
আহতানাং চ ভেরীণাং রাক্ষসৈঃ ক্রূরকর্মভিঃ ॥ 10 ॥
অনাগতবিধানং তু কর্তব্যং শুভমিচ্ছতা ।
আপদং শংকমানেন পুরুষেণ বিপশ্চিতা ॥ 11 ॥
তস্মাদ্গৃহীত্বা বৈদেহীং শরপাণির্ধনুর্ধরঃ ।
গুহামাশ্রয শৈলস্য দুর্গাং পাদপসংকুলাম্ ॥ 12 ॥
প্রতিকূলিতুমিচ্ছামি ন হি বাক্যমিদং ত্বযা ।
শাপিতো মম পাদাভ্যাং গম্যতাং বত্স মা চিরম্ ॥ 13 ॥
ত্বং হি শূরশ্চ বলবান্হন্যাহ্যেতান্ন সংশযঃ ।
স্বযং তু হংতুমিচ্ছামি সর্বানেব নিশাচরান্ ॥ 14 ॥
এবমুক্তস্তু রামেণ লক্ষ্মণস্সহ সীতাযা ।
শরানাদায চাপং চ গুহাং দুর্গাং সমাশ্রযত্ ॥ 15 ॥
তস্মিন্প্রবিষ্টে তু গুহাং লক্ষ্মণে সহ সীতযা ।
হংত নির্যুক্তমিত্যুক্ত্বা রামঃ কবচমাবিশত্ ॥ 16 ॥
স তেনাগ্নি নিকাশেন কবচেন বিভূষিতঃ ।
বভূব রাম স্তিমিরে বিধূমোঽগ্নিরিবোত্থিতঃ ॥ 17 ॥
স চাপমুদ্যম্য মহচ্ছরানাদায বীর্যবান্ ।
বভূবাবস্থিতস্তত্র জ্যাস্বনৈঃ পূরযংদিশঃ ॥ 18 ॥
ততো দেবাস্সগংধর্বাস্সিদ্ধাশ্চ সহ চারণৈঃ ।
সমেযুশ্চ মহাত্মানো যুদ্ধদর্শনকাংক্ষিণঃ ॥ 19 ॥
ঋষযশ্চ মহাত্মানো লোকে ব্রহ্মর্ষিসত্তমাঃ ।
সমেত্য চোচুস্সহিতা অন্যোন্যং পুণ্যকর্মণঃ ॥ 20 ॥
স্বস্তি গোব্রাহ্মণেভ্যোঽস্তু লোকানাং যেঽভিসংগতাঃ ।
জযতাং রাঘবো যুদ্ধে পৌলস্ত্যান্ রজনীচরান্ ॥ 21 ॥
চক্রহস্তো যথা যুদ্ধে সর্বানসুর পুংগবান্ ।
এবমুক্ত্বা পুনঃ প্রোচুরালোক্য চ পরস্পরম্ ॥ 22 ॥
চতুর্দশ সহস্রাণি রক্ষসাং ভীমকর্মণাম্ ।
একশ্চ রামো ধর্মাত্মা কথং যুদ্ধং ভবিষ্যতি ॥ 23 ॥
ইতি রাজর্ষযস্সিদ্ধাস্সগণাশ্চ দ্বিজর্ষভাঃ ।
জাতকৌতূহলাস্তস্থুর্বিমানস্থাশ্চ দেবতাঃ ॥ 24 ॥
আবিষ্টং তেজসা রামং সংগ্রামশিরসি স্থিতম্ ।
দৃষ্ট্বা সর্বাণি ভূতানি ভযাদ্বিব্যথিরে তদা ॥ 25 ॥
রূপমপ্রতিমং তস্য রামস্যাক্লিষ্টকর্মণঃ ।
বভূব রূপং ক্রুদ্ধস্য রুদ্রস্যেব পিনাকিনঃ ॥ 26 ॥
ততো গংভীরনির্হ্রাদং ঘোরবর্মাযুধধ্বজম্ ।
অনীকং যাতুধানানাং সমংতাত্প্রত্যদৃশ্যত ॥ 27 ॥
সিংহনাদং বিসৃজতামন্যোন্যমভিগর্জতাম্ ।
চাপানি বিস্ফারযতাং জৃংভতামপ্যভীক্ষ্ণশঃ ॥ 28 ॥
বিপ্রঘুষ্টস্বনানাং চ দুংধুভীংশ্চাপি নিঘ্নতাম্ ।
তেষাং সুতুমুলশ্শব্দঃ পূরযামাস তদ্বনম্ ॥ 29 ॥
তেন শব্দেন বিত্রস্তাশ্বাপদা বনচারিণঃ ।
দুদ্রুবুর্যত্র নিশ্শব্দং পৃষ্ঠতো ন ব্যলোকযন্ ॥ 30 ॥
তত্ত্বনীকং মহাঘোরং রামং সমুপসর্পত ।
ধৃতনানাপ্রহরণং গংভীরং সাগরোপমম্ ॥ 31 ॥
রামোঽপি চারযংশ্চক্ষুস্সর্বতো রণপংডিতঃ ।
দদর্শ খরসৈন্যং তদ্যুদ্ধাভিমুখমুত্থিতম্ ॥ 32 ॥
বিতত্য চ ধনুর্ভীমং তূণ্যাশ্চোদ্ধৃত্য সাযকান্ ।
ক্রোধমাহারযত্তীব্রং বধার্থং সর্বরক্ষসাম্ ॥ 33 ॥
দুষ্প্রেক্ষ্যস্সোঽভবত্কৃদ্ধো যুগাংতাগ্নিরিব জ্বলন্ ।
তং দৃষ্ট্বা তেজসাবিষ্টং প্রাদ্রবন্বনদেবতাঃ ॥ 34 ॥
তস্য ক্রুদ্ধস্য রূপং তু রামস্য দদৃশে তদা ।
দক্ষস্যেব ক্রতুং হংতুমুদ্যতস্য পিনাকিনঃ ॥ 35 ॥
আবিষ্টং তেজসা রামং সংগ্রামশিরসি স্থিতম্ ।
দৃষ্ট্বা সর্বাণি ভূতানি ভযার্তানি প্রদুদ্রুবুঃ ॥ 36 ॥
তত্কার্মুকৈরাভরণৈর্ধ্বজৈশ্চ তৈর্বর্মভিশ্চাগ্নিসমানবর্ণৈঃ ।
বভূব সৈন্যং পিশিতাশনানাং সূর্যোদযে নীলমিবাভ্রবৃংদম্ ॥ 37 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাংডে চতুর্বিংশস্সর্গঃ ॥
