শ্রীমদ্বাল্মীকীয রামাযণে বালকাংডম্ ।
অথ চতুঃষষ্টিতমস্সর্গঃ ।
সুরকার্যমিদং রংভে কর্তব্যং সুমহত্ত্বযা ।
লোভনং কৌশিকস্যেহ কামমোহসমন্বিতম্ ॥ 1 ॥
তথোক্তা সাঽপ্সরা রাম সহস্রাক্ষেণ ধীমতা ।
ব্রীডিতা প্রাংজলির্বাক্যং প্রত্যুবাচ সুরেশ্বরম্ ॥ 2 ॥
অযং সুরপতে ঘোরো বিশ্বামিত্রো মহামুনিঃ ।
ঘোরমুত্সৃজতে ক্রোধং মযি দেব ন সংশযঃ ॥ 3 ॥
ততো হি মে ভযং দেব প্রাসাদং কর্তুমর্হসি ।
এবমুক্তস্তযা রাম রংভযা ভীতযা তদা ॥ 4 ॥
তামুবাচ সহস্রাক্ষো বেপমানাং কৃতাংজলিম্ ।
মাভৈষী রংভে ভদ্রং তে কুরুষ্ব মম শাসনম্ ॥ 5 ॥
কোকিলো হৃদযগ্রাহী মাধবে রুচিরদ্রুমে ।
অহং কংদর্পসহিত স্স্থাস্যামি তব পার্শ্বতঃ ॥ 6 ॥
ত্বং হি রূপং বহুগুণং কৃত্বা পরমভাস্বরম্ ।
তমৃষিং কৌশিকং রংভে ভেদযস্ব তপস্বিনম্ ॥ 7 ॥
সা শ্রুত্বা বচনং তস্য কৃত্বা রূপমনুত্তমম্ ।
লোভযামাস ললিতা বিশ্বামিত্রং শুচিস্মিতা ॥ 8 ॥
কোকিলস্য চ শুশ্রাব বল্গু ব্যাহরতঃ স্বনম্ ।
সংপ্রহৃষ্টেন মনসা তত এনামুদৈক্ষত ॥ 9 ॥
অথ তস্য চ শব্দেন গীতেনাপ্রতিমেন চ ।
দর্শনেন চ রংভাযা মুনিস্সংদেহমাগতঃ ॥ 10 ॥
সহস্রাক্ষস্য তত্কর্ম বিজ্ঞায মুনিপুংগবঃ ।
রংভাং ক্রোধসমাবিষ্ট শ্শশাপ কুশিকাত্মজঃ ॥ 11 ॥
যন্মাং লোভযসে রংভে কামক্রোধজযৈষিণম্ ।
দশবর্ষসহস্রাণি শৈলী স্থাস্যসি দুর্ভগে ॥ 12 ॥
ব্রাহ্মণ স্সুমহাতেজা স্তপোবলসমন্বিতঃ ।
উদ্ধরিষ্যতি রংভে ত্বাং মত্ক্রোধকলুষীকৃতাম্ ॥ 13 ॥
এবমুক্ত্বা মহাতেজা বিশ্বামিত্রো মহামুনিঃ ।
অশক্নুবন্ ধারযিতুং ক্রোধং সংতাপমাগতঃ ॥ 14 ॥
তস্য শাপেন মহতা রংভা শৈলী তদাঽভবত্ ।
বচশ্শৃত্বা চ কংদর্পো মহর্ষেস্স চ নির্গতঃ ॥ 15 ॥
কোপেন স মহাতেজাস্তপোঽপহরণে কৃতে ।
ইংদ্রিযৈরজিতৈ রাম ন লেভে শাংতিমাত্মনঃ ॥ 16 ॥
বভূবাস্য মনশ্চিংতা তপোঽপহরণে কৃতে ।
নৈব ক্রোধং গমিষ্যামি ন চ বক্ষ্যে কথংচন ॥ 17 ॥
অথবা নোচ্ছবসিষ্যামি সংবত্সরশতান্যপি ।
অহং বিশোষযিষ্যামি হ্যাত্মানং বিজিতেংদ্রিযঃ ॥ 18 ॥
তাবদ্যাবদ্ধি মে প্রাপ্তং ব্রাহ্মণ্যং তপসাঽঽর্জিতম্ ।
অনুচ্ছবসন্নভুংজান স্তিষ্ঠেযং শাশ্বতীস্সমাঃ ॥ 19 ॥
ন হি মে তপ্যমানস্য ক্ষযং যাস্যংতি মূর্তযঃ ।
এবং বর্ষসহস্রস্য দীক্ষাং স মুনিপুংগবঃ ॥ 20 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে চতুঃষষ্টিতমস্সর্গঃ ॥
