অযোধ্যাপুরনেতারং মিথিলাপুরনাযিকাম্ ।
রাঘবাণামলংকারং বৈদেহানামলংক্রিযাম্ ॥1॥
রঘূণাং কুলদীপং চ নিমীনাং কুলদীপিকাম্ ।
সূর্যবংশসমুদ্ভূতং সোমবংশসমুদ্ভবাম্ ॥2॥
পুত্রং দশরথস্যাদ্যং পুত্রীং জনকভূপতেঃ ।
বশিষ্ঠানুমতাচারং শতানংদমতানুগাম্ ॥3॥
কৌসল্যাগর্ভসংভূতং বেদিগর্ভোদিতাং স্বযম্ ।
পুংডরীকবিশালাক্ষং স্ফুরদিংদীবরেক্ষণাম্ ॥4॥
চংদ্রকাংতাননাংভোজং চংদ্রবিংবোপমাননাম্ ।
মত্তমাতংগগমনং মত্তহংসবধূগতাম্ ॥5॥
চংদনার্দ্রভুজামধ্যং কুংকুমার্দ্রকুচস্থলীম্ ।
চাপালংকৃতহস্তাব্জং পদ্মালংকৃতপাণিকাম্॥6॥
শরণাগতগোপ্তারং প্রণিপাদপ্রসাদিকাম্ ।
কালমেঘনিভং রামং কার্তস্বরসমপ্রভাম্ ॥7॥
দিব্যসিংহাসনাসীনং দিব্যস্রগ্বস্ত্রভূষণাম্ ।
অনুক্ষণং কটাক্ষাভ্যাং অন্যোন্যেক্ষণকাংক্ষিণৌ ॥8॥
অন্যোন্যসদৃশাকারৌ ত্রৈলোক্যগৃহদংপতী ।
ইমৌ যুবাং প্রণম্যাহং ভজাম্যদ্য কৃতার্থতাম্ ॥9॥
অনেন স্তৌতি যঃ স্তুত্যং রামং সীতাং চ ভক্তিতঃ ।
তস্য তৌ তনুতাং পুণ্যাস্সংপদঃ সকলার্থদাঃ ॥10॥
এবং শ্রীরাচংদ্রস্য জানক্যাশ্চ বিশেষতঃ ।
কৃতং হনূমতা পুণ্যং স্তোত্রং সদ্যো বিমুক্তিদম্ ।
যঃ পঠেত্প্রাতরুত্থায সর্বান্ কামানবাপ্নুযাত্ ॥11॥
