শ্রীমদ্বাল্মীকীয রামাযণে অরণ্যকাংডম্ ।
অথ অষ্টাদশস্সর্গঃ ।
ততশ্শূর্পণখাং রামঃ কামপাশাবপাশিতাম্ ।
স্বচ্ছযা শ্লক্ষ্ণযা বাচা স্মিতপূর্বমথাব্রবীত্ ॥ 1 ॥
কৃতদারোঽস্মি ভবতি ভার্যেযং দযিতা মম ।
ত্বদ্বিধানাং তু নারীণাং সুদুঃখা সসপত্নতা ॥ 2 ॥
অনুজস্ত্বেষ মে ভ্রাতা শীলবান্প্রিযদর্শনঃ ।
শ্রীমানকৃতদারশ্চ লক্ষ্মণো নাম বীর্যবান্ ॥ 3 ॥
অপূর্বী ভার্যযা চার্থী তরুণঃ প্রিযদর্শনঃ ।
অনুরূপশ্চ তে ভর্তা রূপস্যাস্য ভবিষ্যতি ॥ 4 ॥
এনং ভজ বিশালাক্ষি ভর্তারং ভ্রাতরং মম ।
অসপত্না বরারোহে মেরুমর্কপ্রভা যথা ॥ 5 ॥
ইতি রামেণ সা প্রোক্তা রাক্ষসী কামমোহিতা ।
বিসৃজ্য রামং সহসা ততো লক্ষ্মণমব্রবীত্ ॥ 6 ॥
অস্য রূপস্য তে যুক্তা ভার্যাহং বরবর্ণিনী ।
মযা সহ সুখং সর্বাংদংডকান্বিচরিষ্যসি ॥ 7 ॥
এবমুক্তস্তু সৌমিত্রী রাক্ষস্যা বাক্যকোবিদঃ ।
ততশ্শূর্পণখীং স্মিত্বা লক্ষ্মণো যুক্তমব্রবীত্ ॥ 8 ॥
কথং দাসস্য মে দাসী ভার্যা ভবিতুমিচ্ছসি ।
সোঽহমার্যেণ পরবান্ভ্রাত্রা কমলবর্ণিনি ॥ 9 ॥
সমৃদ্ধার্থস্য সিদ্ধার্থা মুদিতামলবর্ণিনী ।
আর্যস্য ত্বং বিশালাক্ষি ভার্যা ভব যবীযসী ॥ 10 ॥
এনাং বিরূপামসতীং করালাং নির্ণতোদরীম্ ।
ভার্যাং বৃদ্ধাং পরিত্যজ্য ত্বামেবৈষ ভজিষ্যতি ॥ 11 ॥
কো হি রূপমিদং শ্রেষ্ঠং সংত্যজ্য বরবর্ণিনি ।
মানুষীষু বরারোহে কুর্যাদ্ভাবং বিচক্ষণঃ ॥ 12 ॥
ইতি সা লক্ষ্মণেনোক্তা করালা নির্ণতোদরী ।
মন্যতে তদ্বচস্তথ্যং পরিহাসাবিচক্ষণা ॥ 13 ॥
সা রামং পর্ণশালাযামুপবিষ্টং পরংতপম্ ।
সীতযা সহ দুর্দর্ষমব্রবীত্কামমোহিতা ॥ 14 ॥
এনাং বিরূপামসতীং করালাং নির্ণতোদরীম্ ।
বৃদ্ধাং ভার্যামবষ্টভ্য মাং ন ত্বং বহুমন্যসে ॥ 15 ॥
অদ্যেমাং ভক্ষযিষ্যামি পশ্যতস্তব মানুষীম্ ।
ত্বযা সহ চরিষ্যামি নিস্সপত্না যথাসুখম্ ॥ 16 ॥
ইত্যুক্ত্বা মৃগশাবাক্ষীমলাতসদৃশেক্ষণা ।
অভ্যধাবত্সুসংকৃদ্ধা মহোল্কাং রোহিণীমিব ॥ 17 ॥
তাং মৃত্যুপাশপ্রতিমামাপতংতীং মহাবলঃ ।
নিগৃহ্য রামঃ কুপিত স্ততো লক্ষ্মণমব্রবীত্ ॥ 18 ॥
ক্রূরৈরনার্যৈ স্সৌমিত্রে পরিহাসঃ কথংচন ।
ন কার্যঃ পশ্যবৈদেহীং কথংচিত্সৌম্য জীবতীম্ ॥ 19 ॥
ইমাং বিরূপামসতীমতিমত্তাং মহোদরীম্ ।
রাক্ষসীং পুরুষব্যাঘ্র বিরূপযিতুমর্হসি ॥ 20 ॥
ইত্যুক্তো লক্ষ্মণস্তস্যাঃ ক্রুদ্ধো রামস্য পার্শ্বতঃ ।
উদ্ধৃত্য খংগং চিচ্ছেদ কর্ণনাসং মহাবলঃ ॥ 21 ॥
নিকৃত্তকর্ণনাসা তু বিস্বরং সা বিনদ্য চ ।
যথাগতং প্রদুদ্রাব ঘোরা শূর্পণখা বনম্ ॥ 22 ॥
সা বিরূপা মহাঘোরা রাক্ষসী শোণিতোক্ষিতা ।
ননাদ বিবিধান্নাদান্যথা প্রাবৃষি তোযদঃ ॥ 23 ॥
সা বিক্ষরংতী রুধিরং বহুধা ঘোরদর্শনা ।
প্রগৃহ্য বাহূ গর্জংতী প্রবিবেশ মহাবনম্ ॥ 24 ॥
ততস্তু সা রাক্ষসসংঘসংবৃতং খরং জনস্থানগতং বিরূপিতা ।
উপেত্য তং ভ্রাতরমুগ্রদর্শনং পপাত ভূমৌ গগনাদ্যথাঽশনিঃ ॥ 25 ॥
ততস্সভার্যং ভযমোহমূর্ছিতা সলক্ষ্মণং রাঘবমাগতং বনম্ ।
বিরূপণং চাত্মনি শোণিতোক্ষিতা শশংস সর্বং ভগিনী খরস্য সা ॥ 26 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাংডে অষ্টাদশস্সর্গঃ ॥
