শ্রীমদ্বাল্মীকীয রামাযণে অযোধ্যাকাংডম্ ।
অথ অষ্টনবতিতমস্সর্গঃ ।
নিবেশ্য সেনাং তু বিভুঃ পদ্ভ্যাং পাদবতাং বরঃ ।
অভিগংতুং স কাকুত্থ্সমিযেষ গুরুবর্তকম্ ॥ 1 ॥
নিবিষ্টমাত্রে সৈন্যে তু যথোদ্দেশং বিনীতবত্ ।
ভরতো ভ্রাতরং বাক্যং শত্রুঘ্নমিদমব্রবীত্ ॥ 2 ॥
ক্ষিপ্রং বনমিদং সৌম্য নরসংঘৈ স্সমংততঃ ।
লুব্ধৈশ্চ সহিতৈরেভি স্ত্বমন্বেষিতুমর্হসি ॥ 3 ॥
গুহো জ্ঞাতিসহস্রেণ শরচাপাসিধারিণা ।
সমন্বেষতু কাকুত্স্থমস্মিন্ পরিবৃতস্স্বযম্ ॥ 4 ॥
অমাত্যৈ স্সহ পৌরৈশ্চ গুরুভিশ্চ দ্বিজাতিভিঃ ।
বনং সর্বং চরিষ্যামি পদ্ভ্যাং পরিবৃত স্স্বযম্ ॥ 5 ॥
যাবন্ন রামং দ্রক্ষ্যামি লক্ষ্মণং বা মহাবলম্ ।
বৈদেহীং চ মহাভাগাং ন মে শাংতির্ভবিষ্যতি ॥ 6 ॥
যাবন্ন চংদ্রসংকাশং দ্রক্ষ্যামি শুভমাননম্ ।
ভ্রাতুঃ পদ্মপলাশাক্ষং ন মে শাংতির্ভবিষ্যতি ॥ 7 ॥
যাবন্ন চরণৌ ভ্রাতুঃ পার্থিবব্যংজনান্বিতৌ ।
শিরসা ধারযিষ্যামি ন মে শাংতির্ভবিষ্যতি ॥ 8 ॥
যাবন্ন রাজ্যে রাজ্যার্হঃ পিতৃপৈতামহে স্থিতঃ ।
অভিষেকজলক্লিন্নো ন মে শাংতির্ভবিষ্যতি ॥ 9 ॥
সিদ্ধার্থঃ খলু সৌমিত্রির্যশ্চংদ্রবিমলোপমম্ ।
মুখং পশ্যতি রামস্য রাজীবাক্ষং মহাদ্যুতি ॥ 10 ॥
কৃতকৃত্যা মহাভাগা বৈদেহী জনকাত্মজা ।
ভর্তারং সাগরাংতাযাঃ পৃথিব্যা যানুগচ্ছতি ॥ 11 ॥
সুভগশ্চিত্রকূটোঽসৌ গিরিরাজোপমো গিরিঃ ।
যস্মিন্বসতি কাকুত্স্থঃ কুবের ইব নংদনে ॥ 12 ॥
কৃতকার্যমিদং দুর্গং বনং ব্যালনিষেবিতম্ ।
যদধ্যাস্তে মহাতেজা রাম শ্শস্ত্রভৃতাং বরঃ ॥ 13 ॥
এবমুক্ত্বা মহাতেজা ভরতঃ পুরষর্ষভঃ ।
পদ্ভ্যামেব মহাবাহুঃ প্রবিবেশ মহাদ্বনম্ ॥ 14 ॥
স তানি দ্রুমজালানি জাতানি গিরিসানুষু ।
পুষ্পিতাগ্রাণি মধ্যেন জগাম বদতাং বরঃ ॥ 15 ॥
স গিরেশ্চিত্রকূটস্য সালমাসাদ্য পুষ্পিতম্ ।
রামাশ্রমগতস্যাগ্নের্দদর্শ ধ্বজমুচ্ছ্রিতম্ ॥ 16 ॥
তং দৃষ্ট্বা ভরত শ্রীমান্মুমোদ সহ বাংধবঃ ।
অত্র রাম ইতি জ্ঞাত্বা গতঃ পারমিবাংভসঃ ॥ 17 ॥
স চিত্রকূটে তু গিরৌ নিশম্যব রামাশ্রমং পুণ্যজনোপপন্নম্ ।
গুহেন সার্ধং ত্বরিতো জগাম পুনর্নিবেশ্যৈব চমূং মহাত্মা ॥ 18 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে অষ্টনবতিতমস্সর্গঃ ॥
