শ্রীমদ্বাল্মীকীয রামাযণে অযোধ্যাকাংডম্ ।
অথ একোনচত্বারিংশস্সর্গঃ ।
রামস্য তু বচঃ শৃত্বা মুনিবেশধরং চ তম্ ।
সমীক্ষ্য সহ ভার্যাভী রাজা বিগতচেতনঃ ॥ 1 ॥
নৈনং দুঃখেন সংতপ্তঃ প্রত্যবৈক্ষত রাঘবম্ ।
ন চৈনমভিসংপ্রেক্ষ্য প্রত্যভাষত দুর্মনাঃ ॥ 2 ॥
রামস্য তু বচঃ শৃত্বা মুনিবেশধরং চ তম্ ।
সমীক্ষ্য সহ ভার্যাভী রাজা বিগতচেতনঃ ॥ 3 ॥
নৈনং দুঃখেন সংতপ্তঃ প্রত্যবৈক্ষত রাঘবম্ ।
ন চৈনমভিসংপ্রেক্ষ্য প্রত্যভাষত দুর্মনাঃ ॥ 4 ॥
স মুহূর্তমিবাসংজ্ঞো দুঃখিতশ্চ মহীপতিঃ ।
বিললাপ মহাবাহূ রামমেবানুচিংতযন্ ॥ 5 ॥
মন্যে খলু মযা পূর্বং বিবত্সা বহবঃকৃতাঃ ।
প্রাণিনো হিংসিতা বাপি তস্মাদিদমুপস্থিতম্ ॥ 6 ॥
ন ত্বেবানাগতে কালে দেহাচ্চ্যবতি জীবিতম্ ।
কৈকেয্যা ক্লিশ্যমানস্য মৃত্যুর্মম ন বিদ্যতে ॥ 7 ॥
যোঽহং পাবকসংকাশং পশ্যামি পুরতঃ স্থিতম্ ।
বিহায বসনে সূক্ষ্মে তাপসাচ্ছাদমাত্মজম্ ॥ 8 ॥
একস্যাঃ খলু কৈকেয্যাঃ কৃতেঽযং ক্লিশ্যতে জনঃ ।
স্বার্থে প্রযতমানাযাঃ সংশ্রিত্য নিকৃতিং ত্বিমাম্ ॥ 9 ॥
এবমুক্ত্বা তু বচনং বাষ্পেণ পিহিতেংদ্রিযঃ ।
রামেতি সকৃদেবোক্ত্বা ব্যাহর্তুং ন শশাক হ ॥ 10 ॥
সংজ্ঞাং তু প্রতিলভ্যৈব মুহূর্তাত্স মহীপতিঃ ।
নেত্রাভ্যামশ্রুপূর্ণাভ্যাং সুমংত্রমিদমব্রবীত্ ॥ 11 ॥
ঔপবাহ্যং রথং যুক্ত্বা ত্বমাযাহি হযোত্তমৈঃ ।
প্রাপযৈনং মহাভাগমিতো জনপদাত্পরম্ ॥ 12 ॥
এবং মন্যে গুণবতাং গুণানাং ফলমুচ্যতে ।
পিত্রা মাত্রা চ যত্সাধুর্বীরো নির্বাস্যতে বনম্ ॥ 13 ॥
রাজ্ঞো বচনমাজ্ঞায সুমংত্রঃ শীঘ্রবিক্রমঃ ।
যোজযিত্বাঽযযৌ তত্র রথমশ্বৈরলংকৃতম্ ॥ 14 ॥
তং রথং রাজপুত্রায সূতঃ কনকভূষিতম্ ।
আচচক্ষেঽংজলিং কৃত্বা যুক্তং পরমবাজিভিঃ ॥ 15 ॥
রাজা সত্বরমাহূয ব্যাপৃতং বিত্তসংংচযে ।
উবাচ দেশকালজ্ঞো নিশ্চিতং সর্বত শ্শুচিম্ ॥ 16 ॥
বাসাংসি চ মহার্হাণি ভূষণানি বরাণি চ ।
বর্ষাণ্যেতানি সংখ্যায বৈদেহ্যাঃ ক্ষিপ্রমানয ॥ 17 ॥
নরেংদ্রেণৈবমুক্তস্তু গত্বা কোশগৃহং ততঃ ।
প্রাযচ্ছত্সর্বমাহৃত্য সীতাযৈ সমমেব তত্ ॥ 18 ॥
সা সুজাতা সুজাতানি বৈদেহী প্রস্থিতা বনম্ ।
ভূষযামাস গাত্রাণি তৈর্বিচিত্রৈর্বিভূষণৈঃ ॥ 19 ॥
ব্যরাজযত বৈদেহী বেশ্ম তত্সুবিভূষিতা ।
উদ্যতোংঽশুমতঃ কালে খং প্রভেব বিবস্বতঃ ॥ 20 ॥
তাং ভুজাভ্যাং পরিষ্বজ্য শ্বশ্রূর্বচনমব্রবীত্ ।
অনাচরংতী কৃপণং মূর্ধ্ন্যুপাঘ্রায মৈথিলীম্ ॥ 21 ॥
অসত্য স্সর্বলোকেঽস্মিন্সততং সত্কৃতাঃ প্রিযৈঃ ।
ভর্তারং নানুমন্যংতে বিনিপাতগতং স্ত্রিযঃ ॥ 22 ॥
এষ স্বভাবো নারীণামনুভূয পুরা সুখম্ ।
অল্পামপ্যাপদং প্রাপ্য দুষ্যংতি প্রজহত্যপি ॥ 23 ॥
অসত্যশীলা বিকৃতা দুর্গ্রাহ্যহৃদযাস্সদা ।
যুবত্যঃ পাপসংংকল্পাঃ ক্ষণমাত্রাদ্বিরাগিণঃ ॥ 24 ॥
ন কুলং ন কৃতং বিদ্যা ন দত্তং নাপি সংগ্রহঃ ।
স্ত্রীণাং গৃহ্ণাতি হৃদযমনিত্যহৃদযা হি তাঃ ॥ 25 ॥
সাধ্বীনাং হি স্থিতানাং তু শীলে সত্যে শ্রুতে শমে ।
স্ত্রীণাং পবিত্রং পরমং পতিরেকো বিশিষ্যতে ॥ 26 ॥
স ত্বযা নাবমংতব্যঃ পুত্রঃ প্রব্রাজিতো মম ।
তব দৈবতমস্ত্বেষ নির্ধনঃ সধনোঽপি বা ॥ 27 ॥
বিজ্ঞায বচনং সীতা তস্যা ধর্মার্থসংহিতম্ ।
কৃতাংজলিরুবাচেদং শ্বশ্রূমভিমুখে স্থিতাম্ ॥ 28 ॥
করিষ্যে সর্বমেবাহমার্যা যদনুশাস্তি মাম্ ।
অভিজ্ঞাস্মি যথা ভর্তুর্বর্তিতব্যং শ্রুতং চ মে ॥ 29 ॥
ন মামসজ্জনেনার্যা সমানযিতুমর্হতি ।
ধর্মাদ্বিচলিতুং নাহমলং চংদ্রাদিব প্রভা ॥ 30 ॥
নাতংত্রী বাদ্যতে বীণা নাচক্রো বর্ততে রথঃ ।
নাপতিস্সুখমেধেত যা স্যাদপি শতাত্মজা ॥ 31 ॥
মিতং দদাতি হি পিতা মিতং মাতা মিতং সুতঃ ।
অমিতস্য হি দাতারং ভর্তারং কা ন পূজযেত্ ॥ 32 ॥
সাহমেবং গতা শ্রেষ্ঠা শ্রুতধর্মপরাবরা ।
আর্যে কিমবমন্যেঽহং স্ত্রীণাং ভর্তা হি দৈবতম্ ॥ 33 ॥
সীতাযা বচনং শ্রুত্বা কৌশল্যা হৃদযংগমম্ ।
শুদ্ধসত্ত্বা মুমোচাশ্রু সহসা দুঃখহর্ষজম্ ॥ 34 ॥
তাং প্রাংজলিরভিক্রম্য মাতৃমধ্যেঽতিসত্কৃতাম্ ।
রামঃ পরমধর্মাত্মা মাতরং বাক্যমব্রবীত্ ॥ 35 ॥
অংব মা দুঃখিতা ভূস্ত্বং পশ্য ত্বং পিতরং মম ।
ক্ষযো হি বনবাসস্য ক্ষিপ্রমেব ভবিষ্যতি ॥ 36 ॥
সুপ্তাযাস্তে গমিষ্যংতি নব বর্ষাণি পংচ চ ।
সা সমগ্রমিহ প্রাপ্তং মাং দ্রক্ষ্যসি সুহৃদ্বৃতম্ ॥ 37 ॥
এতাবদভিনীতার্থমুক্ত্বা স জননীং বচঃ ।
ত্রযশ্শতশতার্ধাশ্চ দদর্শা বেক্ষ্য মাতরঃ ॥ 38 ॥
তা শ্চাপি স তথৈবার্তা মাতৃর্দশরথাত্মজঃ ।
ধর্মযুক্তমিদং বাক্যং নিজগাদ কৃতাংজলিঃ ॥ 39 ॥
সংবাসাত্পরুষং কিংচিদজ্ঞানাদ্বাপি যত্কৃতম্ ।
তন্মে সমনুজানীত সর্বাশ্চামংত্রযামি বঃ ॥ 40 ॥
বচনং রাঘবস্যৈতধ্দর্মযুক্তং সমাহিতম্ ।
শুশ্রুবুস্তাঃ স্ত্রিযংস্সর্বা শ্শোকোপহতচেতসঃ ॥ 41 ॥
জজ্ঞেঽথ তাসাং সন্নাদঃ ক্রৌংচীনামিব নিস্বনঃ ।
মানবেংদ্রস্য ভার্যাণামেবং বদতি রাঘবে ॥ 42 ॥
মুরজপণবমেঘঘোষবত্ দশরথবেশ্ম বভূব যত্পুরা ।
বিলপিতপরিদেবনাকুলং ব্যসনগতং তদভূত্সুদুঃখিতম্ ॥ 43 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে একোনচত্বারিংশস্সর্গঃ ॥
