শ্রীমদ্বাল্মীকীয রামাযণে বালকাংডম্ ।
অথ অষ্টমস্সর্গঃ ।
তস্য ত্বেবং প্রভাবস্য ধর্মজ্ঞস্য মহাত্মনঃ ।
সুতার্থং তপ্যমানস্য নাসীদ্বংশকরস্সুতঃ ॥ 1 ॥
চিংতযানস্য তস্যৈবং বুদ্ধিরাসীন্মহাত্মনঃ ।
সুতার্থং হযমেধেন কিমর্থং ন যজাম্যহম্ ॥ 2 ॥
স নিশ্চিতাং মতিং কৃত্বা যষ্টব্যমিতি বুদ্ধিমান্ ।
মংত্রিভিস্সহ ধর্মাত্মা সর্বৈরেব কৃতাত্মভিঃ ॥ 3 ॥
ততোঽব্রবীদিদং রাজা সুমংত্রং মংত্রিসত্তমম্ ।
শীঘ্রমানয মে সর্বান্গুরূংস্তান্ সপুরোহিতান্ ॥ 4 ॥
ততস্সুমংত্রস্ত্বরিতং গত্বা ত্বরিতবিক্রমঃ ।
সমানযত্স তান্ সর্বান্ সমস্তান্বেদপারগান্ ॥ 5 ॥
সুযজ্ঞং বামদেবং চ জাবালিমথ কাশ্যপম্ ।
পরোহিতং বসিষ্ঠং চ যে চান্যে ব্দিজসত্তমাঃ ॥ 6 ॥
তান্পূজযিত্বা ধর্মাত্মা রাজা দশরথস্তদা ।
ইদং ধর্মার্থসহিতং শ্লক্ষ্ণংবচনমব্রবীত্ ॥ 7 ॥
মম লালপ্যমানস্য পুত্রার্থন্নাস্তি বৈ সুখম্ ।
তদর্থং হযমেধেন যক্ষ্যামীতি মতির্মম ॥ 8 ॥
তদহং যষ্টুমিচ্ছামি শাস্ত্রদৃষ্টেন কর্মণা ।
কথং প্রাপ্স্যাম্যহং কামং বুদ্ধিরত্রবিচার্যতাম্ ॥ 9 ॥
ততস্সাধ্বিতি তদ্বাক্যং ব্রাহ্মণাঃ প্রত্যপূজযন্ ।
বসিষ্ঠপ্রমুখাস্সর্বে পার্থিবস্য মুখাচ্চ্যুতম্ ॥ 10 ॥
ঊচুশ্চ পরমপ্রীতাস্সর্বে দশরথং বচঃ ।
সংভারাস্সংভ্রিযংতাং তে তুরগশ্চ বিমুচ্যতাম্ ॥ 11 ॥
সর্বথা প্রাপ্স্যসে পুত্রানভিপ্রেতাংশ্চ পার্থিব ।
যস্য তে ধার্মিকী বুদ্ধিরিযং পুত্রার্থমাগতা ॥ 12 ॥
ততঃ প্রীতোঽভবদ্রাজা শ্রুত্বা তদ্বিজভাষিতম্ ।
অমাত্যাংশ্চাব্রবীদ্রাজা হর্ষপর্যাকুলেক্ষণঃ ॥ 13 ॥
সংভারাস্সংভ্রিযংতাং মে গুরূণাং বচনাদিহ ।
সমর্থাধিষ্ঠিতশ্চাশ্বস্সোপাধ্যাযো বিমুচ্যতাম্ ॥ 14 ॥
সরয্বাশ্চোত্তরে তীরে যজ্ঞভূমির্বিধীযতাম্ ।
শাংতযশ্চাভিবর্ধংতাং যথাকল্পং যথাবিধি ॥ 15 ॥
শক্যঃ প্রাপ্তুমযং যজ্ঞস্সর্বেণাপি মহীক্ষিতা ।
নাপরাধো ভবেত্কষ্টো যদ্যস্মিন্ক্রতুসত্তমে ॥ 16 ॥
ছিদ্রং হি মৃগযংতেঽত্র বিদ্বাংসো ব্রহ্মরাক্ষসাঃ ।
নিহতস্য চ যজ্ঞস্য সদ্যঃ কর্তা বিনশ্যতি ॥ 17 ॥
তদ্যথা বিধিপূর্বং মে ক্রতুরেষ সমাপ্যতে ।
তথা বিধানং ক্রিযতাং সমর্থাঃ করণেষ্বিহ ॥ 18 ॥
তথেতি চাব্রুবন্সর্বে মংত্রিণঃপ্রত্যপূজযন্ ।
পার্থিবেংদ্রস্য তদ্বাক্যং যথাজ্ঞপ্তং নিশম্য তে ॥ 19 ॥
তথা দ্বিজাস্তে ধর্মজ্ঞা বর্ধযংতো নৃপোত্তমম্ ।
অনুজ্ঞাতাস্ততস্সর্বে পুনর্জগ্মুর্যথাগতম্ ॥ 20 ॥
বিসর্জযিত্বা তান্বিপ্রান্সচিবানিদমব্রবীত্ ।
ঋত্বিগ্ভিরুপদিষ্টোঽযং যথাবত্ক্রতুরাপ্যতাম্ ॥ 21 ॥
ইত্যুক্ত্বা নৃপশার্দূলস্সচিবান্সমুপস্থিতান্ ।
বিসর্জযিত্বা স্বং বেশ্ম প্রবিবেশ মহাদ্যুতিঃ ॥ 22 ॥
ততস্স গত্বা তাঃপত্নীর্নরেংদ্রো হৃদযপ্রিযাঃ ।
উবাচ দীক্ষাং বিশত যক্ষ্যেঽহং সুতকারণাত্ ॥ 23 ॥
তাসাং তেনাতিকাংতেন বচনেন সুবর্চসাম্ ।
মুখপদ্মান্যশোভংত পদ্মানীব হিমাত্যযে ॥ 24 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে অষ্টমস্সর্গঃ ॥
