শ্রীমদ্বাল্মীকীয রামাযণে অযোধ্যাকাংডম্ ।
অথ ত্রযোবিংশস্সর্গঃ ।
ইতি ব্রুবতি রামে তু লক্ষ্মণোঽধশ্শিরা মুহুঃ ।
শ্রৃত্বা মধ্যং জগামেব মনসা দুঃখহর্ষযোঃ ॥ 1 ॥
তদা তু বধ্দ্বা ভ্রুকুটীং ভ্রুবোর্মধ্যে নরর্ষভঃ ।
নিশশ্বাস মহাসর্পো বিলস্থ ইব রোষিতঃ ॥ 2 ॥
তস্য দুষ্প্রতিবীক্ষং তদ্ভ্রুকুটীসহিতং তদা ।
বভৌ ক্রুদ্ধস্য সিংহস্য মুখস্য সদৃশং মুখম্ ॥ 3 ॥
অগ্রহস্তং বিধুন্বংস্তু হস্তী হস্তমিবাত্মনঃ ।
তির্যগূর্ধ্বং শরীরে চ পাতযিত্বা শিরোধরাম্ ॥ 4 ॥
অগ্রাক্ষ্ণা বীক্ষমাণস্তু তির্যগ্ভ্রাতরমব্রবীত্ ।
অস্থানে সংভ্রমো যস্য জাতো বৈ সুমহানযম্ ॥ 5 ॥
ধর্মদোষ প্রসংগেন লোকস্যানতিশংকযা ।
কথংহ্যেতদসংভ্রাংতস্ত্বদ্বিধো বক্তুমর্হতি ॥ 6 ॥
যথা দৈবমশৌডীরং শৌংডীর ক্ষত্রিযর্ষভ ।
কিন্নাম কৃপণং দৈবমশক্তমভিশংসসি ॥ 7 ॥
পাপযোস্তে কথং নাম তযোশ্শংকা ন বিদ্যতে ।
সংতি ধর্মোপধা শ্লক্ষ্ণাঃ ধর্মাত্মন্কিং ন বুধ্যসে ॥ 8 ॥
তযোস্সুচরিতং স্বার্থং শাঠ্যাত্পরিজিহীর্ষতোঃ ।
যদি নৈবং ব্যবসিতং স্যাদ্ধি প্রাগেব রাঘব ॥ 9 ॥
তযোঃ প্রাগেব দত্তশ্চ স্যাদ্বরঃ প্রকৃতশ্চ সঃ ।
লোকবিদ্বিষ্টমারব্ধং ত্বদন্যস্যাভিষেচনম্ ।
নোত্সহে সহিতুং বীর তত্র মে ক্ষংতুমর্হসি ॥ 10 ॥
যেনেয মাগতা দ্বৈধং তব বুদ্ধির্মহামতে ।
স হি ধর্মো মম দ্বেষ্যঃ প্রসংগাদ্যস্য মুহ্যসি ॥ 11 ॥
কথং ত্বং কর্মণা শক্তঃ কৈকেযীবশবর্তিনঃ ।
করিষ্যসি পিতুর্বাক্যমধর্মিষ্ঠং বিগর্হিতম্ ॥ 12 ॥
যদ্যযং কিল্বিষাদ্ভেদঃ কৃতোঽপ্যেবং ন গৃহ্যতে ।
জাযতে তত্র মে দুঃখং ধর্মসংগশ্চ গর্হিতঃ ॥ 13 ॥
মনসাঽপি কথং কামং কুর্যাস্ত্বং কামবৃত্তযোঃ ।
তযোস্ত্বহিতযোর্নিত্যং শত্র্বোঃ পিত্রভিধানযোঃ ॥ 14 ॥
যদ্যপি প্রতিপত্তিস্তে দৈবী চাপি তযোর্মতম্ ।
তথাপ্যুপেক্ষণীযং তে ন মে তদপি রোচতে ॥ 15 ॥
বিক্লবো বীর্যহীনো যস্স দৈবমনুবর্ততে ।
বীরাস্সংভাবিতাত্মানো ন দৈবং পর্যুপাসতে ॥ 16 ॥
দৈবং পুরুষকারেণ যঃ সমর্থঃ প্রবাধিতুম্ ।
ন দৈবেন বিপন্নার্থঃ পুরুষস্সোঽবসীদতি ॥ 17 ॥
দ্রক্ষ্যংতি ত্বদ্য দৈবস্য পৌরুষং পুরুষস্য চ ।
দৈবমানুষযোরদ্য ব্যক্তা ব্যক্তির্ভবিষ্যতি ॥ 18 ॥
অদ্য মত্পৌরুষহতং দৈবং দ্রক্ষ্যংতি বৈ জনাঃ ।
যদ্দৈবাদাহতং তেঽদ্য দৃষ্টং রাজ্যাভিষেচনম্ ॥ 19 ॥
অত্যংকুশমিবোদ্দামং গজং মদবলোদ্ধতম্ ।
প্রধাবিতমহং দৈবং পৌরুষেণ নিবর্তযে ॥ 20 ॥
লোকপালাস্সমস্তা স্তে নাদ্য রামাভিষেচনম্ ।
ন চ কৃত্স্নাস্ত্রযো লোকা বিহন্যুঃ কিং পুনঃ পিতা ॥ 21 ॥
যৈর্নিবাসস্তবারণ্যে মিথো রাজন্সমর্থিতঃ ।
অরণ্যে তে নিবত্স্যংতি চতুর্দশ সমাস্তথা ॥ 22 ॥
অহং তদাশাং ছেত্স্যামি পিতুস্তস্যাশ্চ যা তব ।
অভিষেকবিঘাতেন পুত্ররাজ্যায বর্ততে ॥ 23 ॥
মদ্বলেন বিরুদ্ধায ন স্যাদ্দৈববলং তথা ।
প্রভবিষ্যতি দুঃখায যথোগ্রং পৌরুষং মম ॥ 24 ॥
ঊর্ধ্বং বর্ষসহস্রাংতে প্রজাপাল্যমনংতরম্ ।
আর্যপুত্রাঃ করিষ্যংতি বনবাসং গতে ত্বযি ॥ 25 ॥
পূর্বং রাজর্ষিবৃত্ত্যা হি বনবাসো বিধীযতে ।
প্রজা নিক্ষিপ্য পুত্রেষু পুত্রবত্পরিপালনে ॥ 26 ॥
স চেদ্রাজন্যনেকাগ্রে রাজ্যবিভ্রমশংকযা ।
নৈবমিচ্ছসি ধর্মাত্মন্ রাজ্যং রাম ত্বমাত্মনি ॥ 27 ॥
প্রতিজানে চ তে বীর মাঽভূবং বীরলোকভাক্ ।
রাজ্যং চ তব রক্ষেযমহং বেলেব সাগরম্ ॥ 28 ॥
মংগলৈরভিষিংচস্ব তত্র ত্বং ব্যাপৃতো ভব ।
অহমেকো মহীপালানলং বারযিতুং বলাত্ ॥ 29 ॥
ন শোভার্থাবিমৌ বাহূ ন ধনুর্ভূষণায মে ।
নাঽসিরাবংধনার্থায ন শরাস্তংভহেতবঃ ॥ 30 ॥
অমিত্রদমনার্থং মে সর্বমেতচ্চতুষ্টযম্ ।
ন চাহং কামযেঽত্যর্থং যস্স্যাচ্ছত্রুর্মতো মম ॥ 31 ॥
অসিনা তীক্ষ্ণধারেণ বিদ্যুচ্চলিতবর্চসা ।
প্রগৃহীতেন বৈ শত্রুং বজ্রিণং বা ন কল্পযে ॥ 32 ॥
খড্গনিষ্পেষনিষ্পিষ্টৈর্গহনা দুশ্চরা চ মে ।
হস্ত্যশ্বনরহস্তোরুশিরোভির্ভবিতা মহী ॥ 33 ॥
খড্গধারাহতা মেঽদ্য দীপ্যমানা ইবাদ্রযঃ ।
পতিষ্যংতি দ্বিপা ভূমৌ মেঘা ইব সবিদ্যুতঃ ॥ 34 ॥
বদ্ধগোধাংগুলিত্রাণে প্রগৃহীতশরাসনে ।
কথং পুরুষমানী স্যাত্পুরুষাণাং মযি স্থিতে ॥ 35 ॥
বহুভিশ্চৈকমত্যস্যন্নেকেন চ বহূন্জনান্ ।
বিনিযোক্ষ্যাম্যহং বাণান্নৃবাজিগজমর্মসু ॥ 36 ॥
অদ্য মেঽস্ত্রপ্রভাবস্য প্রভাবঃ প্রভবিষ্যতি ।
রাজ্ঞশ্চাপ্রভুতাং কর্তুং প্রভুত্বং তব চ প্রভোঃ ॥ 37 ॥
অদ্য চংদনসারস্য কেযূরামোক্ষণস্য চ ।
বসূনাং চ বিমোক্ষস্য সুহৃদাং পালনস্য চ ॥ 38 ॥
অনুরূপাবিমৌ বাহূ রাম কর্ম করিষ্যতঃ ।
অভিষেচনবিঘ্নস্য কর্তৃণাং তে নিবারণে ॥ 39 ॥
ব্রবীহি কোঽদ্যৈব মযা বিযুজ্যতাং তবা সুহৃত্প্রাণযশস্সুহৃজ্জনৈঃ ।
যথা তবেযং বসুধা বশে ভবে ত্তথৈব মাং শাধি তবাস্মি কিংকরঃ ॥ 40 ॥
বিমৃজ্য বাষ্পং পরিসাংত্ব্যচাসকৃত্ স লক্ষ্মণং রাঘববংশবর্ধনঃ ।
উবাচ পিত্র্যে বচনে ব্যবস্থিতং নিবোধ মামেষ হি সৌম্য সত্পথঃ ॥ 41 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে ত্রযোবিংশস্সর্গঃ ॥
