শ্রীমদ্বাল্মীকীয রামাযণে বালকাংডম্ ।
অথ সপ্তবিংশস্সর্গঃ ।
অথ তাং রজনীমুষ্য বিশ্বামিত্রো মহাযশাঃ ।
প্রহস্য রাঘবং বাক্যমুবাচ মধুরাক্ষরম্ ॥ 1 ॥
পরিতুষ্টোঽস্মি ভদ্রং তে রাজপুত্র মহাযশঃ ।
প্রীত্যা পরমযা যুক্তো দদাম্যস্ত্রাণি সর্বশঃ ॥ 2 ॥
দেবাসুরগণান্বাপি সগংধর্বোরগানপি ।
যৈরমিত্রান্ প্রসহ্যাজৌ বশীকৃত্য জযিষ্যসি ॥ 3 ॥
তানি দিব্যানি ভদ্রং তে দদাম্যস্ত্রাণি সর্বশঃ ।
দংডচক্রং মহদ্দিব্যং তব দাস্যামি রাঘব ॥ 4 ॥
ধর্মচক্রং ততো বীর কালচক্রং তথৈব চ ।
বিষ্ণুচক্রং তথাত্যুগ্রমৈংদ্রমস্ত্রং তথৈব চ ॥ 5 ॥
বজ্রমস্ত্রং নরশ্রেষ্ঠ শৈবং শূলবরং তথা ।
অস্ত্রং ব্রহ্মশিরশ্চৈব ঐষীকমপি রাঘব ॥ 6 ॥
দদামি তে মহাবাহো ব্রাহ্মমস্ত্রমনুত্তমম্ ।
গদে দ্বে চৈব কাকুত্স্থ মোদকী শিখরী উভে ॥ 7 ॥
প্রদীপ্তে নরশার্দূল প্রযচ্ছামি নৃপাত্মজ ।
ধর্মপাশমহং রাম কালপাশং তথৈব চ ॥ 8 ॥
পাশং বারুণমস্ত্রং চ দদাম্যহমনুত্তমম্ ।
অশনী দ্বে প্রযচ্ছামি শুষ্কার্দ্রে রঘুনংদন ॥ 9 ॥
দদামি চাস্ত্রং পৈনাকমস্ত্রং নারাযণং তথা ।
আগ্নেযমস্ত্রং দযিতং শিখরং নাম নামতঃ ॥ 10 ॥
বাযব্যং প্রথনং নাম দদামি চ তবানঘ ।
অস্ত্রং হযশিরো নাম ক্রৌংচমস্ত্রং তথৈব চ ।
শক্তিদ্বযং চ কাকুত্স্থ দদামি তব রাঘব ॥ 11 ॥
কংকালং মুসলং ঘোরং কাপালমথ কংকণম্ ।
ধারযংত্যসুরা যানি দদাম্যেতানি সর্বশঃ ॥ 12 ॥
বৈদ্যাধরং মহাস্ত্রং চ নংদনং নাম নামতঃ ।
অসিরত্নং মহাবাহো দদামি চ নৃপাত্মজ ॥ 13 ॥
গাংধর্বমস্ত্রং দযিতং মানবং নাম নামতঃ ।
প্রস্বাপনপ্রশমনে দদ্মি সৌরং চ রাঘব ॥ 14 ॥
দর্পণং শোষণং চৈব সংতাপনবিলাপনে ।
মদনং চৈব দুর্ধর্ষং কংদর্পদযিতং তথা ॥ 15 ॥
পৈশাচমস্ত্রং দযিতং মোহনং নাম নামতঃ ।
প্রতীচ্ছ নরশার্দূল রাজপুত্র মহাযশঃ ॥ 16 ॥
তামসং নরশার্দূল সৌমনং চ মহাবল ।
সংবর্ধং চৈব দুর্ধর্ষং মৌসলং চ নৃপাত্মজ ॥ 17 ॥
সত্যমস্ত্রং মহাবাহো তথা মাযাধরং পরম্ ।
ঘোরং তেজঃ প্রভং নাম পরতেজোঽপকর্ষণম্ ॥ 18 ॥
সৌম্যাস্ত্রং শিশিরং নাম ত্বষ্টুরস্ত্রং সুদামনম্ ।
দারুণং চ ভগস্যাপি শিতেষু মথ মানবম্ ॥ 19 ॥
এতান্ রাম মহাবাহো কামরূপান্ মহাবলান্ ।
গৃহাণ পরমোদারান্ ক্ষিপ্রমেব নৃপাত্মজ ॥ 20 ॥
স্থিতস্তু প্রাঙ্মুখো ভূত্বা শুচির্মুনিবরস্তদা ।
দদৌ রামায সুপ্রীতো মংত্রগ্রামমনুত্তমম্ ॥ 21 ॥
সর্বসংগ্রহণং যেষাং দৈবতৈরপি দুর্লভম্ ।
তান্যস্ত্রাণি তদা বিপ্রো রাঘবায ন্যবেদযত্ ॥ 22 ॥
জপতস্তু মুনেস্তস্য বিশ্বামিত্রস্য ধীমতঃ ।
উপতস্থুর্মহার্হাণি সর্বাণ্যস্ত্রাণি রাঘবম্ ॥ 23 ॥
ঊচুশ্চ মুদিতাস্সর্বে রামং প্রাংজলযস্তদা ।
ইমে স্ম পরমোদারাঃ কিংকরাস্তব রাঘব ॥ 24 ॥
প্রতিগৃহ্য চ কাকুত্স্থঃ সমালভ্য চ পাণিনা ।
মানসা মে ভবিষ্যধ্বমিতি তানভ্যচোদযত্ ॥ 25 ॥
ততঃ প্রীতমনা রামো বিশ্বামিত্রং মহামুনিম্ ।
অভিবাদ্য মহাতেজা গমনাযোপচক্রমে ॥ 26 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে সপ্তবিংশস্সর্গঃ ॥
