শ্রীমদ্বাল্মীকীয রামাযণে সুংদরকাংডম্ ।
অথ পংচপংচাশস্সর্গঃ ।
লংকাং সমস্তাং সংদীপ্য লাংগূলাগ্নিং মহাবলঃ ।
নির্বাপযামাস তদা সমুদ্রে হরিসত্তমঃ ।
সংদীপ্যমানাং বিধ্বস্তাং ত্রস্তরক্ষোগণাং পুরীম্ ।
আবেক্ষ্য হনুমান্ লংকাং চিংতযামাস বানরঃ ॥ 1 ॥
তস্যাভূত্সুমহাংস্ত্রাসঃ কুত্সা চাত্মন্যজাযত ।
লংকাং প্রদহতা কর্ম কিংস্বিত্কৃতমিদং মযা ॥ 2 ॥
ধন্যাস্তে পুরুষশ্রেষ্ঠা যে বুদ্ধ্যা কোপমুত্থিতম্ ।
নিরুংধংতি মহাত্মানো দীপ্তমগ্নিমিবাংভসা ॥ 3 ॥
ক্রুদ্ধঃ পাপং ন কুর্যাত্কঃ ক্রুদ্ধো হন্যাদ্গুরূনপি ।
ক্রুদ্ধঃ পরুষযা বাচা নরস্সাধূনধিক্ষিপেত্ ॥ 4 ॥
বাচ্যাবাচ্যং প্রকুপিতো ন বিজানাতি কর্হিচিত্ ।
নাকার্যমস্তি ক্রুদ্ধস্য নাবাচ্যং বিদ্যতে ক্বচিত্ ॥ 5 ॥
যস্সমুত্পতিতং ক্রোধং ক্ষমযৈব নিরস্যতি ।
যথোরগস্ত্বচং জীর্ণাং স বৈ পুরুষ উচ্যতে ॥ 6 ॥
ধিগস্তু মাং সুদুর্বুদ্ধিং নির্লজ্জং পাপকৃত্তমম্ ।
অচিংতযিত্বা তাং সীতামগ্নিদং স্বামিঘাতুকম্ ॥ 7 ॥
যদি দগ্ধা ত্বিযং লংকা নূনমার্যাঽপি জানকী ।
দগ্ধা তেন মযা ভর্তুর্হিতং কার্যমজানতা ॥ 8 ॥
যদর্থমযমারংভস্তত্কার্যমবসাদিতম্ ।
মযা হি দহতা লংকাং ন সীতা পরিরক্ষিতা ॥ 9 ॥
ঈষত্কার্যমিদং কার্যং কৃতমাসীন্ন সংশযঃ ।
তস্য ক্রোধাভিভূতেন মযা মূলক্ষযঃ কৃতঃ ॥ 10 ॥
বিনষ্টা জানকী নূনং ন হ্যদগ্ধঃ প্রদৃশ্যতে ।
লংকাযাং কশ্চিদুদ্ধেশস্সর্বা ভস্মীকৃতা পুরী ॥ 11 ॥
যদি তদ্বিহতং কার্যং মম প্রজ্ঞাবিপর্যযাত্ ।
ইহৈব প্রাণসংন্যাসো মমাপি হ্যদ্য রোচতে ॥ 12 ॥
কিমগ্নৌ নিপতাম্যদ্য আহোস্বিদ্বডবামুখে ।
শরীরমাহো সত্ত্বানাং দদ্মি সাগরবাসিনাম্ ॥ 13 ॥
কথং হি জীবতা শক্যো মযা দ্রষ্টুং হরীশ্বরঃ ।
তৌ বা পুরুষশার্দূলৌ কার্যসর্বস্বঘাতিনা ॥ 14 ॥
মযা খলু তদেবেদং রোষদোষাত্প্রদর্শিতম্ ।
প্রথিতং ত্রিষু লোকেষু কপিত্বমনবস্থিতম্ ॥ 15 ॥
ধিগস্তু রাজসং ভাবমনীশমনবস্থিতম্ ।
ঈশ্বরেণাপি যদ্রাগান্মযা সীতা ন রক্ষিতা ॥ 16 ॥
বিনষ্টাযাং তু সীতাযাং তাবুভৌ বিনশিষ্যতঃ ।
তযোর্বিনাশে সুগ্রীবঃ সবংধুর্বিনশিষ্যতি ॥ 17 ॥
এতদেব বচশ্শ্রুত্বা ভরতো ভ্রাতৃবত্সলঃ ।
ধর্মাত্মা সহশত্রুঘ্নঃ কথং শক্ষ্যতি জীবিতুম্ ॥ 18 ॥
ইক্ষ্বাকুবংশে ধর্মিষ্ঠে গতে নাশমসংশযম্ ।
ভবিষ্যংতি প্রজাস্সর্বাশ্শোকসংতাপপীডিতাঃ ॥ 19 ॥
তদহং ভাগ্যরহিতো লুপ্তধর্মার্থসংগ্রহঃ ॥ 20 ॥
রোষদোষপরীতাত্মা ব্যক্তং লোকবিনাশনঃ ।
ইতি চিংতযতস্তস্য নিমিত্তান্যুপপেদিরে ।
পূর্বমপ্যুপলব্ধানি সাক্ষাত্পুনরচিংতযত্ ॥ 21 ॥
অথবা চারুসর্বাংগী রক্ষিতা স্বেন তেজসা ।
ন নশিষ্যতি কল্যাণী নাগ্নিরগ্নৌ প্রবর্ততে ॥ 22 ॥
ন হি ধর্মাত্মনস্তস্য ভার্যামমিততেজসঃ ।
স্বচারিত্রাভিগুপ্তাং তাং স্প্রষ্টুমর্হতি পাবকঃ ॥ 23 ॥
নূনং রামপ্রভাবেণ বৈদেহ্যাস্সুকৃতেন চ ।
যন্মাং দহনকর্মাযং নাদহদ্ধব্যবাহনঃ ॥ 24 ॥
ত্রযাণাং ভরতাদীনাং ভ্রাত্রূণাং দেবতা চ যা ।
রামস্য চ মনঃ কাংতা সা কথং বিনশিষ্যতি ॥ 25 ॥
যদ্বা দহনকর্মাযং সর্বত্র প্রভুরব্যযঃ ।
ন মে দহতি লাংগূলং কথমার্যাং প্রধক্ষ্যতি ॥ 26 ॥
পুনশ্চাচিংতযত্তত্র হনুমান্বিস্মিতস্তদা ।
হিরণ্যনাভস্য গিরের্জলমধ্যে প্রদর্শনম্ ॥ 27 ॥
তপসা সত্যবাক্যেন অনন্যত্বাচ্চ ভর্তরি ।
অপি সা নির্দহেদগ্নিং ন তামগ্নিঃ প্রধক্ষ্যতি ॥ 28 ॥
স তথা চিংতযংস্তত্র দেব্যা ধর্মপরিগ্রহম্ ।
শুশ্রাব হনুমান্বাক্যং চারণানাং মহাত্মনাম্ ॥ 29 ॥
অহো খলু কৃতং কর্ম দুষ্করং হি হনূমতা ।
অগ্নিং বিসৃজতাঽভীক্ষ্ণং ভীমং রাক্ষসবেশ্মনি ॥ 30 ॥
প্রপলাযিতরক্ষঃ স্ত্রীবালবৃদ্ধসমাকুলা ।
জনকোলাহলাধ্মাতা ক্রংদংতীবাদ্রিকংদরৈঃ ॥ 31 ॥
দগ্ধেযং নগরী সর্বা সাট্টপ্রাকারতোরণা ।
জানকী ন চ দগ্ধেতি বিস্মযোঽদ্ভুত এব নঃ ॥ 32 ॥
স নিমিত্তৈশ্চ দৃষ্টার্থৈঃ কারণৈশ্চ মহাগুণৈঃ ।
ঋষিবাক্যৈশ্চ হনুমানভবত্প্রীতমানসঃ ॥ 33 ॥
ততঃ কপিঃ প্রাপ্তমনোরথার্থস্তামক্ষতাং রাজসুতাং বিদিত্বা ।
প্রত্যক্ষতস্তাং পুনরেব দৃষ্টবা প্রতিপ্রযাণায মতিং চকার ॥ 34 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে পংচপংচাশস্সর্গঃ ॥
