শ্রীমদ্বাল্মীকীয রামাযণে কিষ্কিংধাকাংডম্ ।
অথ ত্রযোদশস্সর্গঃ ।
ঋষ্যমূকাত্স ধর্মাত্মা কিষ্কিংধাং লক্ষ্মণাগ্রজঃ ।
জগাম সহসুগ্রীবো বালিবিক্রমপালিতাম্ ॥ 1 ॥
সমুদ্যম্য মহচ্চাপং রামঃ কাংচনভূষিতম্ ।
শরাংশ্চাদিত্যসংকাশান্গৃহীত্বা রণসাধকান্ ॥ 2 ॥
অগ্রতস্তু যযৌ তস্য রাঘবস্য মহাত্মনঃ ।
সুগ্রীবঃ সংহতগ্রীবো লক্ষ্মণশ্চ মহাবলঃ ॥ 3 ॥
পৃষ্ঠতো হনুমান্বীরো নলো নীলশ্চ বানরঃ ।
তারশ্চৈব মহাতেজা হরিযূথপযূথপঃ ॥ 4 ॥
তে বীক্ষমাণা বৃক্ষাংশ্চ পুষ্পভারাবলংবিনঃ ।
প্রসন্নাংবুবহাশ্চৈব সরিতস্সাগরংগমাঃ ॥ 5 ॥
কংদরাণি চ শৈলাংশ্চ নির্দরাণি গুহাস্তথা ।
শিখরাণি চ মুখ্যানি দরীশ্চ প্রিযদর্শনাঃ ॥ 6 ॥
বৈঢূর্যবিমলৈঃপর্ণৈ পদ্মৈশ্চাকোশকুট্মলৈঃ ।
শোভিতাংত্সজলান্মার্গে তটাকাংশ্চ ব্যলোকযন্ ॥ 7 ॥
কারংডৈস্সারসৈর্হংসৈর্বংজুলৈর্জলকুক্কুটৈঃ ।
চক্রবাকৈ স্তথা চান্যৈশ্শকুনৈঃ রুপনাদিতান্ ॥ 8 ॥
মৃদুশষ্পাংকুরাহারান্নির্ভযান্বনগোচরান্ ।
চরতস্সর্বতৌঽপশ্যন্ স্থলীষু হরিণান্ স্থিতান্ ॥ 9 ॥
তটাকবৈরিণশ্চাপি শুক্লদংতবিভূষিতান্ ।
ঘোরানেকচরান্বন্যাংদ্বিরদান্কূলঘাতিনঃ ॥ 10 ॥
মত্তান্গিরিতটোত্কৃষ্টান্পর্বতানিব জংগমান্ ।
বারণান্বারিদপ্রখ্যান্মহীরেণুসমুক্ষিতান্ ॥ 11 ॥
বনে বনচরাংশ্চান্যান্খেচরাংশ্চ বিহংগমান্ ।
পশ্যংতস্ত্বরিতা জগ্মুস্সুগ্রীববশবর্তিনঃ ॥ 12 ॥
তেষাং তু গচ্ছতাং তত্র ত্বরিতং রঘুনংদনঃ ।
দ্রুমষংডং বনং দৃষ্ট্বা রামস্সুগ্রীবমব্রবীত্ ॥ 13 ॥
এষ মেঘ ইবাকাশে বৃক্ষষংডঃ প্রকাশতে ।
মেঘসংঘাতবিপুলঃ পর্যংতকদলীবৃতঃ ॥ 14 ॥
কিমেতত্ জ্ঞাতুমিচ্ছামি সখে কৌতূহলং হি মে ।
কৌতূহলাপনযনং কর্তুমিচ্ছাম্যহং ত্বযা ॥ 15 ॥
তস্য তদ্বচনং শ্রুত্বা রাঘবস্য মহাত্মনঃ ।
গচ্ছন্নেবাচচক্ষেঽথ সুগ্রীবস্তন্মহদ্বনম্ ॥ 16 ॥
এতদ্রাঘব বিস্তীর্ণমাশ্রমং শ্রমনাশনম্ ।
উদ্যানবনসংপন্নং স্বাদুমূলফলোদকম্ ॥ 17 ॥
অত্র সপ্তজনা নাম মুনয স্সংশ্রিতব্রতাঃ ।
সপ্তৈবাসন্নধশশীর্ষা নিযতং জলশাযিনঃ ॥ 18 ॥
সপ্তরাত্রকৃতাহারা বাযুনাচলবাসিনঃ ।
দিবং বর্ষশতৈর্যাতাঃ সপ্তভিঃ সকলেবরাঃ ॥ 19 ॥
তেষামেবং প্রভাবানাং দ্রুমপ্রাকারসংবৃতম্ ।
আশ্রমস্সুদুরাধর্ষ অপি সেংদ্রৈস্সুরাসুরৈঃ ॥ 20 ॥
পক্ষিণো বর্জযংত্যেতত্তথাঽন্যে বনচারিণঃ ।
বিশংতি মোহাদ্যেঽপ্যত্র নিবর্তংতে ন তে পুনঃ ॥ 21 ॥
বিভূষণরবাস্তত্র শ্রূযংতে সকলাক্ষরাঃ ।
তূর্যগীতস্বনাশ্চাত্র গংধো দিব্যশ্চ রাঘব ॥ 22 ॥
ত্রেতাগ্নযোঽপি দীপ্যংতে দূমো হ্যত্র প্রকাশতে ।
বেষ্টযন্নিব বৃক্ষাগ্রান্কপোতাংগারুণো ঘনঃ ॥ 23 ॥
এতে বৃক্ষাঃ প্রকাশংতে ধূমসংসক্তমস্তকাঃ ।
মেঘজালপ্রতিচ্ছন্না বৈঢূর্যগিরযো যথা ॥ 24 ॥
কুরু প্রণামং ধর্মাত্মংস্তেষামুদ্দিশ্য রাঘব ।
লক্ষ্মণেব সহ ভ্রাত্রা প্রযংতস্সযতাংজলিঃ ॥ 25 ॥
প্রণমংতি হি যে তেষাং মুনীনাং ভাবিতাত্মনাম্ ।
ন তেষামশুভং কিংচিচ্ছরীরে রাম দৃশ্যতে ॥ 26 ॥
ততো রামস্সহ ভ্রাত্রা লক্ষ্মণেন কৃতাংজলিঃ ।
সমুদ্দিশ্য মহাত্মানস্তানৃষীনভ্যবাদযত্ ॥ 27 ॥
অভিবাদ্য তু ধর্মাত্মা রামো ভ্রাতা চ লক্ষ্মণঃ ।
সুগ্রীবো বানরাশ্চৈব জগ্মুসংহৃষ্টমানসাঃ ॥ 28 ॥
তে গত্বা দূরমধ্বানং তস্মাত্সপ্তজনাশ্রমাত্ ।
দদৃশুস্তাং দুরাধর্ষাং কিষ্কিংধাং বালিপালিতাম্ ॥ 29 ॥
ততস্তু রামানুজরামবানরাঃ প্রগৃহ্য শস্ত্রাণ্যুদিতাগ্র্যতেজসঃ ।
পুরীং সুরেশাত্মজবীর্যপালিতাং বধায শত্রোঃ পুনরাগতাস্সহ ॥ 30 ॥
ইত্যার্ষে শ্রীমদ্রামাযণে বাল্মীকীয আদিকাব্যে কিষ্কিংধাকাংডে ত্রযোদশস্সর্গঃ ॥
