শ্রীমদ্বাল্মীকীয রামাযণে সুংদরকাংডম্ ।
অথ অষ্টপংচাশস্সর্গঃ ।
ততস্তস্য গিরেঃ শৃংগে মহেংদ্রস্য মহাবলাঃ ।
হনুমত্প্রমুখাঃ প্রীতিং হরযো জগ্মুরুত্তমাম্ ॥ 1 ॥
তং ততঃ প্রীতিসংহৃষ্টঃ প্রীতিমংতং মহাকপিম্ ।
জাংববান্কার্যবৃত্তাংতমপৃচ্ছদনিলাত্মজম্ ॥ 2 ॥
কথং দৃষ্টা ত্বযা দেবী কথং বা তত্র বর্ততে ।
তস্যাং বা স কথংবৃত্তঃ ক্রূরকর্মা দশাননঃ ॥ 3 ॥
তত্ত্বতস্সর্বমেতন্নঃ প্রব্রূহি ত্বং মহাকপে ।
শ্রুতার্থাশ্চিংতযিষ্যামো ভূযঃ কার্যবিনিশ্চযম্ ॥ 4 ॥
যশ্চার্থস্তত্ত্র বক্তব্যো গতৈরস্মাভিরাত্মবান্ ।
রক্ষিতব্যং চ যত্তত্র তদ্ভবান্ব্যাকরোতু নঃ ॥ 5 ॥
স নিযুক্তস্ততস্তেন সংপ্রহৃষ্টতনূরুহঃ ।
প্রণম্য শিরসা দেব্যৈ সীতাযৈ প্রত্যভাষত ॥ 6 ॥
প্রত্যক্ষমেব ভবতাং মহেংদ্রাগ্রাত্খামাপ্লুতঃ ।
উদধের্দক্ষিণং পারং কাংক্ষমাণ স্সমাহিতঃ ॥ 7 ॥
গচ্ছতশ্চ হি মে ঘোরং বিঘ্নরূপমিবাভবত্ ।
কাংচনং শিখরং দিব্যং পশ্যামি সুমনোহরম্ ॥ 8 ॥
স্থিতং পংধানমাবৃত্য মেনে বিঘ্নং চ তং নগম্ ।
উপসংগম্য তং দিব্যং কাংচনং নগসত্তমম্ ॥ 9 ॥
কৃতা মে মনসা বুদ্ধির্ভেত্তব্যোঽযং মযেতি চ ।
প্রহতং চ মযা তস্য লাংগূলেন মহাগিরেঃ ॥ 10 ॥
শিখরং সূর্যসংকাশং ব্যশীর্যত সহস্রধা ।
ব্যবসাযং চ তং বুদ্ধ্বা স হোবাচ মহাগিরিঃ ॥ 11 ॥
পুত্ত্রেতি মধুরাং বাণীং মনঃ প্রহ্লাদযন্নিব ।
পিতৃব্যং চাপি মাং বিদ্ধি সখাযং মাতরিশ্বনঃ ॥ 12 ॥
মৈনাকমিতি বিখ্যাতং নিবসংতং মহোদধৌ ।
পক্ষবংতঃ পুরা পুত্ত্র বভূবুঃ পর্বতোত্তমাঃ ॥ 13 ॥
ছংদতঃ পৃথিবীং চেরুর্বাধমানাঃ সমংততঃ ।
শ্রুত্বা নগানাং চরিতং মহেংদ্রঃ পাকশাসনঃ ॥ 14 ॥
চিচ্ছেদ ভগবান্ পক্ষান্বজ্রেণৈষাং সহস্রশঃ ।
অহং তু মোক্ষিতস্তস্মাত্তব পিত্রা মহাত্মনা ॥ 15 ॥
মারুতেন তদা বত্স প্রক্ষিপ্তোঽস্মি মহার্ণবে ।
রামস্য চ মযা সাহ্যে বর্তিতব্যমরিংদম ॥ 16 ॥
রামো ধর্মভৃতাং শ্রেষ্ঠো মহেংদ্রসমবিক্রমঃ ।
এতচ্ছ্রুত্বা বচস্তস্য মৈনাকস্য মহাত্মনঃ ॥ 17 ॥
কার্যমাবেদ্য তু গিরেরুদ্যতং চ মনো মম ।
তেন চাহমনুজ্ঞাতো মৈনাকেন মহাত্মনা ॥ 18 ॥
স চাপ্যংতর্হিতঃ শৈলো মানুষেণ বপুষ্মতা ।
শরীরেণ মহাশৈলঃ শৈলেন চ মহোদধৌ ॥ 19 ॥
উত্তমং জবমাস্থায শেষং পংথানমাস্থিতঃ ।
ততোঽহং সুচিরং কালং বেগেনাভ্যাগমং পথি ॥ 20 ॥
ততঃ পশ্যাম্যহং দেবীং সুরসাং নাগমাতরম্ ।
সমুদ্রমধ্যে সা দেবী বচনং মামভাষত ॥ 21 ॥
মম ভক্ষঃ প্রদিষ্টস্ত্বমমরৈর্হরিসত্তম ।
অতস্ত্বাং ভক্ষযিষ্যামি বিহিতস্ত্বং চিরস্য মে ॥ 22 ॥
এবমুক্ত স্সুরসযা প্রাংজলিঃ প্রণতঃ স্থিতঃ ।
বিবর্ণবদনো ভূত্বা বাক্যং চেদমুদীরযম্ ॥ 23 ॥
রামো দাশরথিঃ শ্রীমান্ প্রবিষ্টো দংডকাবনম্ ।
লক্ষ্মণেন সহ ভ্রাত্রা সীতযা চ পরংতপঃ ॥ 24 ॥
তস্য সীতা হৃতা ভার্যা রাবণেন দুরাত্মনা ।
তস্যা স্সংকাশং দূতোঽহং গমিষ্যে রামশাসনাত্ ॥ 25 ॥
কর্তুমর্হসি রামস্য সাহায্যং বিষযে সতী ।
অথবা মৈথিলীং দৃষ্ট্বা রামং চাক্লিষ্টকারিণম্ ॥ 26 ॥
আগমিষ্যামি তে বক্ত্রং সত্যং প্রতিশৃণোমি তে ।
এবমুক্তা মযা সা তু সুরসা কামরূপিণী ॥ 27 ॥
অব্রবীন্নাতিবর্তেত কশ্চিদেষ বরো মম ।
এবমুক্তস্সুরসযা দশযোজনমাযতঃ ॥ 28 ॥
ততোর্থগুণবিস্তারো বভূবাহং ক্ষণেন তু ।
মত্প্রমাণানুরূপং চ ব্যাদিতং চ মুখং তযা ॥ 29 ॥
তদ্দৃষ্ট্বা ব্যাদিতং চাস্যং হ্রস্বং হ্যকরবং বপুঃ ।
তস্মিন্মুহূর্তে চ পুনর্বভূবাংগুষ্ঠমাত্রকঃ ॥ 30 ॥
অভিপত্যাশু তদ্বক্ত্রং নির্গতোঽহং ততঃ ক্ষণাত্ ।
অব্রবীত্সুরসা দেবী স্বেন রূপেণ মাং পুনঃ ॥ 31 ॥
অর্থসিদ্ধ্যৈ হরিশ্রেষ্ঠ গচ্ছ সৌম্য যথাসুখম্ ।
সমানয চ বৈদেহীং রাঘবেণ মহাত্মনা ॥ 32 ॥
সুখী ভব মহাবাহো প্রীতাঽস্মি তব বানর ।
ততোঽহং সাধু সাধ্বিতি সর্বভূতৈঃ প্রশংসিতঃ ॥ 33 ॥
ততোঽংতরিক্ষং বিপুলং প্লুতোঽহং গরুডো যথা ।
ছাযা মে নিগৃহীতা চ ন চ পশ্যামি কিংচন ॥ 34 ॥
সোঽহং বিহতবেগস্তু দিশো দশ বিলোকযন্ ।
ন কিংচিত্তত্র পশ্যামি যেন মেঽপহৃতা গতিঃ ॥ 35 ॥
ততো মে বুদ্ধিরুত্পন্না কিন্নাম গগনে মম ।
ঈদৃশো বিঘ্ন উত্পন্নো রূপং যত্র ন দৃশ্যতে ॥ 36 ॥
অধোভাগেন মে দৃষ্টি শ্শোচতা পাতিতা মযা ।
ততোঽদ্রাক্ষমহং ভীমাং রাক্ষসীং সলিলেশযাম্ ॥ 37 ॥
প্রহস্য চ মহানাদমুক্তোঽহং ভীমযা তযা ।
অবস্থিতমসংভ্রাংতমিদং বাক্যমশোভনম্ ॥ 38 ॥
ক্বাসি গংতা মহাকায ক্ষুধিতাযা মমেপ্সিতঃ ।
ভক্ষঃ প্রীণয মে দেহং চিরমাহারবর্জিতম্ ॥ 39 ॥
বাঢমিত্যেব তাং বাণীং প্রত্যগৃহ্ণামহং ততঃ ।
অস্যপ্রমাণাদধিকং তস্যাঃ কাযমপূরযম্ ॥ 40 ॥
তস্যাশ্চাস্যং মহদ্ভীমং বর্ধতে মম ভক্ষণে ।
ন চ মাং সাধু বুবুধে মম বা বিকৃতং কৃতম্ ॥ 41 ॥
ততোঽহং বিপুলং রূপং সংক্ষিপ্য নিমিষাংতরাত্ ।
তস্যা হৃদযমাদায প্রপতামি নভঃস্থলম্ ॥ 42 ॥
সা বিসৃষ্টভুজা ভীমা পপাত লবণাংভসি ।
মযা পর্বতসংকাশা নিকৃত্তহৃদযা সতী ॥ 43 ॥
শৃণোমি খগতানাং চ সিদ্ধানাং চারণৈস্সহ ।
রাক্ষসী সিংহিকা ভীমা ক্ষিপ্রং হনুমতা হতা ॥ 44 ॥
তাং হত্বা পুনরেবাহং কৃত্যমাত্যযিকং স্মরন্ ।
গত্বা চাহ মহধ্বানং পশ্যামি নগমংডিতম্ ॥ 45 ॥
দক্ষিণং তীরমুদধের্লংকা যত্র চ সা পুরী ।
অস্তং দিনকরে যাতে রক্ষসাং নিলযং পুরম্ ॥ 46 ॥
প্রবিষ্টোঽহমবিজ্ঞাতো রক্ষোভির্ভীমবিক্রমৈঃ ।
তত্র প্রবিশতশ্চাপি কল্পাংতঘনসন্নিভা ॥ 47 ॥
অট্টহাসং বিমুংচংতী নারী কাপ্যুত্থিতা পুরঃ ।
জিঘাংসংতীং ততস্তাং তু জ্বলদগ্নিশিরোরুহাম্ ॥ 48 ॥
সব্যমুষ্টিপ্রহারেণ পরাজিত্য সুভৈরবাম্ ।
প্রদোষকালে প্রবিশং ভীতযাঽহং তযোদিতঃ ॥ 49 ॥
অহং লংকাপুরী বীর নির্জিতা বিক্রমেণ তে ।
যস্মাত্তস্মাদ্বিজেতাসি সর্বরক্ষাংস্যশেষতঃ ॥ 50 ॥
তত্রাহং সর্বরাত্রং তু বিচিন্বন্ জনকাত্মজাম্ ।
রাবণাংতঃপুরগতো ন চাপশ্যং সুমধ্যমাম্ ॥ 51 ॥
তত স্সীতামপশ্যংস্তু রাবণস্য নিবেশনে ।
শোকসাগরমাসাদ্য ন পারমুপলক্ষযে ॥ 52 ॥
শোচতা চ মযা দৃষ্টং প্রাকারেণ সমাবৃতম্ ।
কাংচনেন বিকৃষ্টেন গৃহোপবনমুত্তমম্ ॥ 53 ॥
স প্রাকারমবপ্লুত্য পশ্যামি বহুপাদপম্ ।
অশোকবনিকামধ্যে শিংশুপাপাদপো মহান্ ॥ 54 ॥
তমারুহ্য চ পশ্যামি কাংচনং কদলীবনম্ ।
অদূরে শিংশুপাবৃক্ষাত্পশ্যামি বরবর্ণিনীম্ ॥ 55 ॥
শ্যামাং কমলপত্রাক্ষীমুপবাসকৃশাননাম্ ।
তদেকবাসস্সংবীতাং রজোধ্বস্তশিরোরুহাম্ ॥ 56 ॥
শোকসংতাপদীনাংগীং সীতাং ভর্তৃহিতে স্থিতাম্ ।
রাক্ষসীভির্বিরূপাভিঃ ক্রূরাভিরভিসংবৃতাম্ ॥ 57 ॥
মাংসশোণিতভক্ষাভির্ব্যাঘ্রীভির্হরিণীমিব ।
সা মযা রাক্ষসীমধ্যে তর্জ্যমানা মুহুর্মুহুঃ ॥ 58 ॥
একবেণীধরা দীনা ভর্তৃচিংতাপরাযণা ।
ভূমিশয্যা বিবর্ণাংগী পদ্মিনীব হিমাগমে ॥ 59 ॥
রাবণাদ্বিনিবৃত্তার্থা মর্তব্যকৃতনিশ্চযা ।
কথংচিন্মৃগশাবাক্ষী তূর্ণমাসাদিতা মযা ॥ 60 ॥
তাং দৃষ্ট্বা তাদৃশীং নারীং রামপত্নীং যশস্বিনীম্ ।
তত্রৈব শিংশুপাবৃক্ষে পশ্যন্নহমবস্থিতঃ ॥ 61 ॥
ততো হলহলাশব্দং কাংচীনূপুরমিশ্রিতম্ ।
শৃণোম্যধিকগংভীরং রাবণস্য নিবেশনে ॥ 62 ॥
ততোঽহং পরমোদ্বিগ্নঃ স্বং রূপং প্রত্যসংহরম্ ।
অহং তু শিংশুপাবৃক্ষে পক্ষীব গহনে স্থিতঃ ॥ 63 ॥
ততো রাবণদারাশ্চ রাবণশ্চ মহাবলঃ ।
তং দেশং সমনুপ্রাপ্তা যত্র সীতাঽভবত্ স্থিতা ॥ 64 ॥
তং দৃষ্ট্বাথ বরারোহা সীতা রক্ষোগণেশ্বরম্ ।
সংকুচ্যোরূস্তনৌ পীনৌ বাহুভ্যাং পরিরভ্য চ ॥ 65 ॥
বিত্রস্তাং পরমোদ্বিগ্নাং বীক্ষমাণাং ততস্ততঃ ।
ত্রাণং কিংচিদপশ্যংতীং বেপমানাং তপস্বিনীম্ ॥ 66 ॥
তামুবাচ দশগ্রীবস্সীতাং পরমদুঃখিতাম্ ।
অবাক্চিরাঃ প্রপতিতো বহুমন্যস্ব মামিতি ॥ 67 ॥
যদি চেত্ত্বং তু দর্পান্মাং নাভিনংদসি গর্বিতে ।
দ্বৌ মাসাবংতরং সীতে পাস্যামি রুধিরং তব ॥ 68 ॥
এতচ্ছ্রুত্বা বচস্তস্য রাবণস্য দুরাত্মনঃ ।
উবাচ পরমক্রুদ্ধা সীতা বচনমুত্তমম্ ॥ 69 ॥
রাক্ষসাধম রামস্য ভার্যামমিততেজসঃ ।
ইক্ষ্বাকুকুলনাথস্য স্নুষাং দশরথস্য চ ॥ 70 ॥
অবাচ্যং বদতো জিহ্বা কথং ন পতিতা তব ।
কিংচিদ্বীর্যং তবানার্য যো মাং ভর্তুরসন্নিধৌ ॥ 71 ॥
অপহৃত্যাঽঽগতঃ পাপ তে নাদৃষ্টো মহাত্মনা ।
ন ত্বং রামস্য সদৃশো দাস্যেঽপ্যস্য ন যুজ্যসে ॥ 72 ॥
যজ্ঞীয স্সত্যবাদী চ রণশ্লাঘী চ রাঘবঃ ।
জানক্যা পরুষং বাক্যমেবমুক্তো দশাননঃ ॥ 73 ॥
জজ্বাল সহসা কোপাচ্চিতাস্থ ইব পাবকঃ ।
বিবৃত্য নযনে ক্রূরে মুষ্টিমুদ্যম্য দক্ষিণম্ ॥ 74 ॥
মৈথিলীং হংতুমারব্ধঃ স্ত্রীভির্হাহাকৃতং তদা ।
স্ত্রীণাং মধ্যাত্সমুত্পত্য তস্য ভার্যা দুরাত্মনঃ ॥ 75 ॥
বরা মংদোদরী নাম তযা স প্রতিষেধিতঃ ।
উক্তশ্চ মধুরাং বাণীং তযা স মদনার্দিতঃ ॥ 76 ॥
সীতযা তব কিং কার্যং মহেংদ্রসমবিক্রমঃ ।
দেবগংধর্বকন্যাভির্যক্ষকন্যাভিরেব চ ॥ 77 ॥
সার্ধং প্রভো রমস্বেহ সীতযা কিং করিষ্যসি ।
ততস্তাভিস্সমেতাভির্নারীভিস্স মহাবলঃ ॥ 78 ॥
প্রসাদ্য সহসা নীতো ভবনং স্বং নিশাচরঃ ।
যাতে তস্মিন্ দশগ্রীবে রাক্ষস্যো বিকৃতাননাঃ ॥ 79 ॥
সীতাং নির্ভর্ত্সযামাসুর্বাক্যৈঃ ক্রূরৈস্সুদারুণৈঃ ।
তৃণবদ্ভাষিতং তাসাং গণযামাস জানকী ॥ 80 ॥
গর্জিতং চ তদা তাসাং সীতাং প্রাপ্য নিরর্থকম্ ।
বৃথাগর্জিতনিশ্চেষ্টা রাক্ষস্যঃ পিশিতাশনাঃ ॥ 81 ॥
রাবণায শশংসুস্তাঃ সীতাধ্যবসিতং মহত্ ।
ততস্তাস্সহিতাস্সর্বা নিহতাশা নিরুদ্যমাঃ ॥ 82 ॥
পরিক্ষিপ্য সমংতাত্তাং নিদ্রাবশমুপাগতাঃ ।
তাসু চৈব প্রসুপ্তাসু সীতা ভর্তৃহিতে রতা ॥ 83 ॥
বিলপ্য করুণং দীনা প্রশুশোচ সুদুঃখিতা ।
তাসাং মধ্যাত্সমুত্থায ত্রিজটা বাক্যমব্রবীত্ ॥ 84 ॥
আত্মানং খাদত ক্ষিপ্রং ন সীতা বিনশিষ্যতি ।
জনকস্যাত্মজা সাধ্বী স্নুষা দশরথস্য চ ॥ 85 ॥
স্বপ্নো হ্যদ্য মযা দৃষ্টো দারুণো রোমহর্ষণঃ ।
রক্ষসাং চ বিনাশায ভর্তুরস্যা জযায চ ॥ 86 ॥
অলমস্মাত্পরিত্রাতুং রাঘবাদ্রাক্ষসীগণম্ ।
অভিযাচাম বৈদেহীমেতদ্ধি মম রোচতে ॥ 87 ॥
যস্যা হ্যেবংবিধস্স্বপ্নো দুঃখিতাযাঃ প্রদৃশ্যতে ।
সা দুঃখৈর্বিবিধৈর্মুক্তা সুখমাপ্নোত্যনুত্তমম্ ॥ 88 ॥
প্রণিপাতপ্রসন্না হি মৈথিলী জনকাত্মজা ।
ততস্সা হ্রীমতী বালা ভর্তুর্বিজযহর্ষিতা ॥ 89 ॥
অবোচদ্যদি তত্তথ্যং ভবেযং শরণং হি বঃ ।
তাং চাহং তাদৃশীং দৃষ্ট্বা সীতাযা দারুণাং দশাম্ ।
চিংতযামাস বিক্রাংতো ন চ মে নির্বৃতং মনঃ ॥ 90 ॥
সংভাষণার্থং চ মযা জানক্যাশ্চিংতিতো বিধিঃ ॥ 91 ॥
ইক্ষ্বাকূণাং হি বংশস্তু ততো মম পুরস্কৃতঃ ।
শ্রুত্বা তু গদিতাং বাচং রাজর্ষিগণপূজিতাম্ ॥ 92 ॥
প্রত্যভাষত মাং দেবী বাষ্পৈঃ পিহিতলোচনা ।
কস্ত্বং কেন কথং চেহ প্রাপ্তো বানরপুংগবঃ ॥ 93 ॥
কা চ রামেণ তে প্রীতিস্তন্মে শংসিতুমর্হসি ।
তস্যাস্তদ্বচনং শ্রুত্বা হ্যহমপ্যব্রুবং বচঃ ॥ 94 ॥
দেবি রামস্য ভর্তুস্তে সহাযো ভীমবিক্রমঃ ।
সুগ্রীবো নাম বিক্রাংতো বানরেংদ্রো মহাবলঃ ॥ 95 ॥
তস্য মাং বিদ্ধি ভৃত্যং ত্বং হনুমংতমিহাগতম্ ।
ভর্ত্রাহং প্রেষিতস্তুভ্যং রামেণাক্লিষ্টকর্মণা ॥ 96 ॥
ইদং চ পুরুষব্যাঘ্রঃ শ্রীমান্ দাশরথিঃ স্বযম্ ।
অংগুলীযমভিজ্ঞানমদাত্তুভ্যং যশস্বিনি ॥ 97 ॥
তদিচ্ছামি ত্বযাঽঽজ্ঞপ্তং দেবি কিং করবাণ্যহম্ ।
রামলক্ষ্মণযোঃ পার্শ্বং নযামি ত্বাং কিমুত্তরম্ ॥ 98 ॥
এতচ্ছ্রুত্বা বিদিত্বা চ সীতা জনকনংদিনী ।
আহরাবণমুত্সাদ্য রাঘবো মাং নযত্বিতি ॥ 99 ॥
প্রণম্য শিরসা দেবীং মহমার্যামনিংদিতাম্ ।
রাঘবস্য মনোহ্লাদমভিজ্ঞানমযাচিষম্ ॥ 100 ॥
অথ মামব্রবীত্সীতা গৃহ্যতামযমুত্তমঃ ।
মণির্যেন মহাবাহূ রামস্ত্বাং বহুমন্যতে ॥ 101 ॥
ইত্যুক্ত্বা তু বরারোহা মণিপ্রবরমদ্ভুতম্ ।
প্রাযচ্ছত্পরমোদ্বিগ্না বাচা মাং সংদিদেশহ ॥ 102 ॥
ততস্তস্যৈ প্রণম্যাহং রাজপুত্র্যৈ সমাহিতঃ ।
প্রদক্ষিণং পরিক্রামমিহাভ্যুদ্গতমানসঃ ॥ 103 ॥
উক্তোঽহং পুনরেবেদং নিশ্চিত্য মনসা তযা ।
হনুমন্মম বৃত্তাংতং বক্তুমর্হসি রাঘবে ॥ 104 ॥
যথা শ্রুত্বৈব ন চিরাত্তাবুভৌ রামলক্ষ্মণৌ ।
সুগ্রীবসহিতৌ বীরাবুপেযাতাং তথা কুরু ॥ 105 ॥
যদ্যন্যথা ভবেদেতদ্দ্বৌ মাসৌ জীবিতং মম ।
ন মাং দ্রক্ষ্যতি কাকুত্স্থো ম্রিযে সাহমনাথবত্ ॥ 106 ॥
তচ্ছ্রুত্বা করুণং বাক্যং ক্রোধো মামভ্যবর্তত ।
উত্তরং চ মযা দৃষ্টং কার্যশেষমনংতরম্ ॥ 107 ॥
ততোঽবর্ধত মে কাযস্তদা পর্বতসন্নিভঃ ।
যুদ্ধকাংক্ষী বনং তচ্চ বিনাশযিতুমারভে ॥ 108 ॥
তদ্ভগ্নং বনষংডং তু ভ্রাংতত্রস্তমৃগদ্বিজম্ ।
প্রতিবুদ্ধা নিরীক্ষংতে রাক্ষস্যো বিকৃতাননাঃ ॥ 109 ॥
মাং চ দৃষ্ট্বা বনে তস্মিন্ সমাগম্য ততস্ততঃ ।
তা স্সমভ্যাগতাঃ ক্ষিপ্রং রাবণাযাচচক্ষিরে ॥ 110 ॥
রাজস্বনমিদং দুর্গং তব ভগ্নং দুরাত্মনা ।
বানরেণ হ্যবিজ্ঞায তব বীর্যং মহাবল ॥ 111 ॥
দুর্বুদ্ধেস্তস্য রাজেংদ্র তব বিপ্রিযকারিণঃ ।
বধমাজ্ঞাপয ক্ষিপ্রং যথাসৌ বিলযং ব্রজেত্ ॥ 112 ॥
তচ্ছ্রুত্বা রাক্ষসেংদ্রেণ বিসৃষ্টা ভৃশদুর্জযাঃ ।
রাক্ষসাঃ কিংকরা নাম রাবণস্য মনোনুগাঃ ॥ 113 ॥
তেষামশীতিসাহস্রং শূলমুদ্গরপাণিনাম্ ।
মযা তস্মিন্বনোদ্দেশে পরিঘেণ নিষূদিতম্ ॥ 114 ॥
তেষাং তু হতশেষা যে তে গত্বা লঘুবিক্রমাঃ ।
নিহতং চ মহত্সৈন্যং রাবণাযাচচক্ষিরে ॥ 115 ॥
ততো মে বুদ্ধিরুত্পন্না চৈত্যপ্রাসাদমাক্রমম্ ।
তত্রস্থান্রাক্ষসান্ হত্বা শতং স্তংভেন বৈ পুনঃ ॥ 116 ॥
ললামভূতো লংকাযাস্স বৈ বিধ্বংসিতো মযা ।
ততঃ প্রহস্তস্য সুতং জংবুমালিনমাদিশত্ ॥ 117 ॥
রাক্ষসৈর্বহুভিস্সার্ধং ঘোররূপৈর্ভযানকৈঃ ।
তং মহাবলসংপন্নং রাক্ষসং রণকোবিদম্ ॥ 118 ॥
পরিঘেণাতিঘোরেণ সূদযামি সহানুগম্ ।
তচ্ছ্রুত্বা রাক্ষসেংদ্রস্তু মংত্রিপুত্ত্রান্মহাবলান্ ॥ 119 ॥
পদাতিবলসংপন্নান্ প্রেষযামাস রাবণঃ ।
পরিঘেণৈব তান্ সর্বান্নযামি যমসাদনম্ ॥ 120 ॥
মংত্রিপুত্ত্রান্হতান্চ্ছৃত্বা সমরেঽলঘুবিক্রমান্ ।
পংচ সেনাগ্রগাচ্ছ্রূরান্প্রেষযামাস রাবণঃ ॥ 121 ॥
তানহং সহসৈন্যান্বৈ সর্বানেবাভ্যসূদযম্ ।
ততঃ পুনর্দশগ্রীবঃ পুত্রমক্ষং মহাবলম্ ॥ 122 ॥
বহুভী রাক্ষসৈস্সার্ধং প্রেষযামাস রাবণঃ ।
তং তু মংদোদরীপুত্ত্রং কুমারং রণপংডিতম্ ॥ 123 ॥
সহসা খং সমুত্ক্রাংতং পাদযোশ্চ গৃহীতবান্ ।
চর্মাসিনং শতগুণং ভ্রামযিত্বা ব্যপেষযম্ ॥ 124 ॥
তমক্ষমাগতং ভগ্নং নিশম্য স দশাননঃ ।
তত ইংদ্রজিতং নাম দ্বিতীযং রাবণস্সুতম্ ॥ 125 ॥
ব্যাদিদেশ সুসংকৃদ্ধো বলিনং যুদ্ধদুর্মদম্ ।
তচ্চাপ্যহং বলং সর্বং তং চ রাক্ষসপুংগবম্ ॥ 126 ॥
নষ্টৌজসং রণে কৃত্বা পরং হর্ষমুপাগমম্ ।
মহতাপি মহাবাহুঃ প্রত্যযেন মহাবলঃ ॥ 127 ॥
প্রেষিতো রাবণেনৈব সহ বীরৈর্মদোত্কটৈঃ ।
সোঽবিষহ্যং হি মাং বুদ্ধ্বা স্বং বলং চাবমর্দিতম্ ॥ 128 ॥
ব্রাহ্মণাস্ত্রেণ স তু মাং প্রাবধ্নাচ্ছাতিবেগিতঃ ।
রজ্জুভিশ্চাভিবধ্নংতি ততো মাং তত্র রাক্ষসাঃ ॥ 129 ॥
রাবণস্য সমীপং চ গৃহীত্বা মামুপানযন্ ।
দৃষ্ট্বা সংভাষিতশ্চাহং রাবণেন দুরাত্মনা ॥ 130 ॥
পৃষ্টশ্চ লংকাগমনং রাক্ষসানাং চ তং বধম্ ।
তত্সর্বং চ মযা তত্র সীতার্থমিতি জল্পিতম্ ॥ 131 ॥
অস্যাহং দর্শনাকাংক্ষী প্রাপ্তস্ত্বদ্ভবনং বিভো ।
মারুতস্যৌরসঃ পুত্রো বানরো হনুমানহম্ ॥ 132 ॥
রামদূতং চ মাং বিদ্ধি সুগ্রীবসচিবং কপিম্ ।
সোঽহং দূত্যেন রামস্য ত্বত্সকাশমিহাগতঃ ॥ 133 ॥
সুগ্রীবশ্চ মহাতেজাস্সত্বাং কুশলমব্রবীত্ ।
ধর্মার্থকামসহিতং হিতং পথ্যমুবাচ চ ॥ 134 ॥
বসতো ঋশ্যমূকে মে পর্বতে বিপুলদ্রুমে ।
রাঘবো রণবিক্রাংতো মিত্ত্রত্বং সমুপাগতঃ ॥ 135 ॥
তেন মে কথিতং রাজ্ঞা ভার্যা মে রক্ষসা হৃতা ।
তত্র সাহায্যমস্মাকং কার্যং সর্বাত্মনা ত্বযা ॥ 136 ॥
মযা চ কথিতং তস্মৈ বালিনশ্চ বধং প্রতি ।
তত্র সাহায্যহেতোর্মে সমযং কর্তুমর্হসি ॥ 137 ॥
বালিনা হৃতরাজ্যেন সুগ্রীবেণ মহাপ্রভুঃ ।
চক্রেঽগ্নিসাক্ষিকং সখ্যং রাঘবস্সহ লক্ষ্মণঃ ॥ 138 ॥
তেন বালিনমুত্পাট্য শরেণৈকেন সংযুগে ।
বানরাণাং মহারাজঃ কৃতস্স প্লবতাং প্রভুঃ ॥ 139 ॥
তস্য সাহায্যমস্মাভিঃ কার্যং সর্বাত্মনা ত্বিহ ।
তেন প্রস্থাপিতস্তুভ্যং সমীপমিহ ধর্মতঃ ॥ 140 ॥
ক্ষিপ্রমানীযতাং সীতা দীযতাং রাঘবায চ ।
যাবন্ন হরযো বীরা বিধমংতি বলং তব ॥ 141 ॥
বানরাণাং প্রভাবো হি ন কেন বিদিতঃ পুরা ।
দেবতানাং সংকাশং চ যে গচ্ছংতি নিমংত্রিতাঃ ॥ 142 ॥
ইতি বানররাজস্ত্বামাহেত্যভিহিতো মযা ।
মামৈক্ষত ততঃ ক্রুদ্ধশ্চক্ষুষা প্রদহন্নিব ॥ 143 ॥
তেন বধ্যোঽহমাজ্ঞপ্তো রক্ষসা রৌদ্রকর্মণা ।
মত্প্রভাবমবিজ্ঞায রাবণেন দুরাত্মনা ॥ 144 ॥
ততো বিভীষণো নাম তস্য ভ্রাতা মহামতিঃ ।
তেন রাক্ষসরাজোঽসৌ যাচিতো মম কারণাত্ ॥ 145 ॥
নৈবং রাক্ষসশার্দূল ত্যজ্যতামেষ নিশ্চযঃ ।
রাজশাস্ত্রব্যপেতো হি মার্গঃ সংসেব্যতে ত্বযা ॥ 146 ॥
দূতবধ্যা ন দৃষ্টা হি রাজশাস্ত্রেষু রাক্ষস ।
দূতেন বেদিতব্যং চ যথার্থং হিতবাদিনা ॥ 147 ॥
সুমহত্যপরাধেঽপি দূতস্যাতুলবিক্রমঃ ।
বিরূপকরণং দৃষ্টং ন বধোঽস্তীতি শাস্ত্রতঃ ॥ 148 ॥
বিভীষণেনৈবমুক্তো রাবণস্সংদিদেশ তান্ ।
রাক্ষসানেতদেবাস্য লাংগূলং দহ্যতামিতি ॥ 149 ॥
ততস্তস্য বচঃ শ্রুত্বা মম পুচ্ছং সমংততঃ ।
বেষ্টিতং শণবল্কৈশ্চ জীর্ণৈঃ কার্পাসজৈঃ পটৈঃ ॥ 150 ॥
রাক্ষসাঃ সিদ্ধসন্নাহাস্ততস্তে চংডবিক্রমাঃ ।
তদাঽদহ্যংত মে পুচ্ছং নিঘ্নংতঃ কাষ্ঠমুষ্টিভিঃ ॥ 151 ॥
বদ্ধস্য বহুভিঃ পাশৈর্যংত্রিতস্য চ রাক্ষসৈঃ ।
ততস্তে রাক্ষসাশ্শূরা বদ্ধং মামগ্নিসংবৃতম্ ॥ 152 ॥
অঘোষযন্রাজমার্গে নগরদ্বারমাগতাঃ ।
ততোঽহং সুমহদ্রূপং সংক্ষিপ্য পুনরাত্মনঃ ॥ 153 ॥
বিমোচযিত্বা তং বংধং প্রকৃতিস্থঃ স্থিতঃ পুনঃ ।
আযসং পরিঘং গৃহ্য তানি রক্ষাংস্যসূদযম্ ॥ 154 ॥
ততস্তন্নগরদ্বারং বেগেনাপ্লুতবানহম্ ।
পুচ্ছেন চ প্রদীপ্তেন তাং পুরীং সাট্টগোপুরাম্ ॥ 155 ॥
দহাম্যহমসংভ্রাংতো যুগাংতাগ্নিরিব প্রজাঃ ।
বিনষ্টা জানকী ব্যক্তং ন হ্যদগ্ধঃ প্রদৃশ্যতে ॥ 156 ॥
লংকাযাং কশ্চিদুদ্ধেশঃ সর্বা ভস্মীকৃতা পুরী ।
দহতা চ মযা লংকাং দগ্ধা সীতা ন সংশযঃ ॥ 157 ॥
রামস্য হি মহত্কার্যং মযেদং বিতথীকৃতম্ ।
ইতি শোকসমাবিষ্টশ্চিংতামহমুপাগতঃ ॥ 158 ॥
অথাহং বাচমশ্রৌষং চারণানাং শুভাক্ষরাম্ ।
জানকী ন চ দগ্ধেতি বিস্মযোদংতভাষিণাম্ ॥ 159 ॥
ততো মে বুদ্ধিরুত্পন্না শ্রুত্বা তামদ্ভুতাং গিরম্ ।
অদগ্ধা জানকীত্যেবং নিমিত্তৈশ্চোপলক্ষিতা ॥ 160 ॥
দীপ্যমানে তু লাংগূলে ন মাং দহতি পাবকঃ ।
হৃদযং চ প্রহৃষ্টং মে বাতাস্সুরভিগংধিনঃ ॥ 161 ॥
তৈর্নিমিত্তৈশ্চ দৃষ্টাথৈঃ কারণৈশ্চ মহাগুণৈঃ ।
ঋষিবাক্যৈশ্চ সিদ্ধার্থৈরভবং হৃষ্টমানসঃ ॥ 162 ॥
পুনর্দৃষ্ট্বা চ বৈদেহীং বিসৃষ্টশ্চ তযা পুনঃ ।
ততঃ পর্বতমাসাদ্য তত্রারিষ্টমহং পুনঃ ॥ 163 ॥
প্রতিপ্লবনমারেভে যুষ্মদ্ধর্শনকাংক্ষযা ।
ততঃ পবনচংদ্রার্কসিদ্ধগংধর্বসেবিতম্ ॥ 164 ॥
পংথানমহমাক্রম্য ভবতো দৃষ্টবানিহ ।
রাঘবস্য প্রভাবেণ ভবতাং চৈব তেজসা ॥ 165 ॥
সুগ্রীবস্য চ কার্যার্থং মযা সর্বমনুষ্ঠিতম্ ।
এতত্সর্বং মযা তত্র যথাবদুপপাদিতম্ ॥ 166 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে অষ্টপংচাশস্সর্গঃ ॥
