শ্রীমদ্বাল্মীকীয রামাযণে কিষ্কিংধাকাংডম্ ।
অথ ষোডশস্সর্গঃ ।
তামেবং ব্রুবতীং তারাং তারাধিপনিভাননাম্ ।
বালী নির্ভর্ত্সযামাস বচনং চেদমব্রবীত্ ॥ 1 ॥
গর্জতোঽস্য চ সুসংভ্রশ্চ ভ্রাতুঃ শত্রোর্বিশেষতঃ ।
মর্ষযিষ্যাম্যহং কেন কারণেন বরাননে ॥ 2 ॥
অধর্ষিতানাং শূরাণাং সমরেষ্বনিবর্তিনাম্ ।
ধর্ষণামর্ষণং ভীরু মরণাদতিরিচ্যতে ॥ 3 ॥
সোঢুং ন চ সমর্থোঽহং যুদ্ধকামস্য সংযুগে ।
সুগ্রীবস্য চ সম্রংভং হীনগ্রীবস্য গর্জতঃ ॥ 4 ॥
ন চ কার্যো বিষাদস্তে রাঘবং প্রতি মত্কৃতে ।
ধর্মজ্ঞশ্চ কৃতজ্ঞশ্চ কথং পাপং করিষ্যতি ॥ 5 ॥
নিবর্তস্ব সহ স্ত্রীভিঃ কথং ভূযোঽনুগচ্ছসি ।
সৌহৃদং দর্শিতং তারে মযি ভক্তিঃ কৃতা ত্বযা ॥ 6 ॥
প্রতিযোত্স্যাম্যহং গত্বা সুগ্রীবং জহি সংভ্রমম্ ।
দর্পমাত্রং বিনেষ্যামি ন চ প্রাণৈর্বিমোক্ষ্যতে ॥ 7 ॥
অহং হ্যাজৌস্থিতস্যাস্য করিষ্যামি যথেপ্সিতম্ ।
বৃক্ষৈর্মুষ্টিপ্রহারৈশ্চ পীডিতঃ প্রতিযাস্যতি ॥ 8 ॥
ন মে গর্বিতমাযস্তং সহিষ্যতি দুরাত্মবান্ ।
কৃতং তারে সহাংযত্বং সৌহৃদং দর্শিতং মযি ॥ 9 ॥
শাপিতাঽপি মম প্রাণৈর্নিবর্তস্ব জযেন চ ।
অহং জিত্বা নিবর্তিষ্যে তমহং ভ্রাতরং রণে ॥ 10 ॥
তং তু তারা পরিষ্বজ্য বালিনং প্রিযবাদিনী ।
চকার রুদতী মংদং দক্ষিণা সা প্রদক্ষিণম্ ॥ 11 ॥
ততঃ স্বস্ত্যযনং কৃত্বা মংত্রবিদ্বিজযৈষিণী ।
অংতঃপুরং সহ স্ত্রীভিঃ প্রবিষ্টা শোকমোহিতা ॥ 12 ॥
প্রবিষ্টাযাং তু তারাযাং সহ স্ত্রীভিস্স্বমালযম্ ।
নগরান্নির্যযৌ ক্রুদ্ধো মহাসর্প ইব শ্বসন্ ॥ 13 ॥
স নিশ্শ্বস্য মহাতেজা বালী পরমরোষণঃ ।
সর্বতশ্চারযন্ দৃষ্টিং শত্রুদর্শনকাংক্ষযা ॥ 14 ॥
স দদর্শ ততশ্শ্রীমান্ সুগ্রীবং হেমপিংগলম্ ।
সুসংবীতমবষ্টব্ধং দীপ্যমানমিবানলম্ ॥ 15 ॥
স তং দৃষ্ট্বা মহাবীর্যং সুগ্রীবং পর্যবস্থিতম্ ।
গাঢং পরিদধে বাসো বালী পরমরোষণঃ ॥ 16 ॥
স বালী গাঢসংবীতো মুষ্টিমুদ্যম্য বীর্যবান্ ।
সুগ্রীবমেবাভিমুখো যযৌ যোদ্ধুং কৃতক্ষণঃ ॥ 17 ॥
শ্লিষ্টং মুষ্টিং সমুদ্যম্য সংরব্ধতরমাগতঃ ।
সুগ্রীবোঽপি সমুদ্দিশ্য বালিনং হেমমালিনম্ ॥ 18 ॥
তং বালী ক্রোধতাম্রাক্ষস্সুগ্রীবং রণপংডিতম্ ।
আপতংতং মহাবেগমিদং বচনমব্রবীত্ ॥ 19 ॥
এষ মুষ্টির্মযাবদ্ধো গাঢস্সন্নিহিতাংগুলিঃ ।
মযা বেগবিমুক্তস্তে প্রাণানাদায যাস্যতি ॥ 20 ॥
এবমুক্তস্তু সুগ্রীবঃ ক্রুদ্ধো বালিনমব্রবীত্ ।
তবৈব চা হরন্প্রাণান্মুষ্টিঃ পততু মূর্ধনি ॥ 21 ॥
তাডিতস্তেন সংকৃদ্ধস্সমভিক্রম্য বেগিতঃ ।
অভবচ্ছোণিতোদ্গারী সোত্পীড ইব পর্বতঃ ॥ 22 ॥
সুগ্রীবেণ তু নিস্সংগং সালমুত্পাট্য তেজসা ।
গাত্রেষ্বভিহতো বালী বজ্রেণেব মহাগিরিঃ ॥ 23 ॥
স তু বালী প্রচলিতস্সালতাডনবিহ্বলঃ ।
গুরুভারসমাক্রাংতো নৌ সার্থ ইব সাগরে ॥ 24 ॥
তৌ ভীমবলবিক্রাংতৌ সুপর্ণসমবেগিনৌ ।
প্রবৃদ্ধৌ ঘোরবপুষৌ চংদ্রসূর্যাবিবাংবরে ।
পরস্পরমমিত্রঘ্নৌ চ্ছিদ্রান্বেষণতত্পরৌ ॥ 25 ॥
ততোঽবর্ধত বালী তু বলবীর্যসমন্বিতঃ ।
সূর্যপুত্রো মহাবীর্যস্সুগ্রীবঃ পরিহীযতে ॥ 26 ॥
বালিনা ভগ্নদর্পস্তু সুগ্রীবো মংদবিক্রমঃ ।
বালিনং প্রতি সামর্ষো দর্শযামাস লাঘবম্ ॥ 27 ॥
বৃক্ষৈঃ স্সশাখৈ স্সশিখৈর্বজ্রকোটিনিভৈর্নখৈঃ ॥ 28 ॥
মুষ্টিভির্জানুভিঃ পদ্ভির্বাহুভিশ্চ পুনঃ পুনঃ ।
তযোর্যুদ্ধমভূদ্ঘোরং বৃত্রবাসবযোরিব ॥ 29 ॥
তৌ শোণিতাক্তৌ যুধ্যেতাং বানরৌ বনচারিণৌ ।
মেঘাবিব মহাশব্দৈ স্তর্জমানৌ পরস্পরম্ ॥ 30 ॥
হীযমানমথোঽপশ্যত্সুগ্রীবং বানরেশ্বরম্ ।
বীক্ষমাণং দিশশ্চৈব রাঘবস্স মুহুর্মুহুঃ ॥ 31 ॥
ততো রামো মহাতেজা আর্তং দৃষ্ট্বা হরীশ্বরম্ ।
শরং চ বীক্ষতে বীরো বালিনো বধকারণাত্ ॥ 32 ॥
ততো ধনুষি সংধায শরমাশীবিষোপমম্ ।
পুরযামাস তচ্চাপং কালচক্রমিবাংতকঃ ॥ 33 ॥
তস্য জ্যাতলঘোষেণ ত্রস্তাঃ পত্ররথেশ্বরাঃ ।
প্রদুদ্রুবুর্মৃগাশ্চৈব যুগাংত ইব মোহিতাঃ ॥ 34 ॥
মুক্তস্তু বজ্রনির্ঘোষঃ প্রদীপ্তাশনিসন্নিভঃ ।
রাঘবেণ মহাবাণো বালিবক্ষসি পাতিতঃ ॥ 35 ॥
ততস্তেন মহাতেজা বীযৌটত্সিক্তঃ কপীশ্বরঃ ।
বেগেনাভিহতো বালী নিপপাত মহীতলে ॥ 36 ॥
ইংদ্রধ্বজ ইবোদ্ধূতঃ পৌর্ণমাস্যাং মহীতলে ।
আশ্বযুক্সমযে মাসি গতশ্রীকো বিচেতনঃ ॥ 37 ॥
নরোত্তমঃ কালযুগাংতকোপমং শরোত্তমং কাংচনরূপ্যভুষিতম্ ।
সসর্জ দীপ্তং তমমিত্রমর্দনং সধূমমগ্নিং মুখতো যথা হরঃ ॥ 38 ॥
অথোক্ষিতশ্শোণিততোযবিস্রবৈ স্সুপুষ্পিতাশোক ইবানিলোদ্ধতঃ ।
বিচেতনো বাসবসূনুরাহবে বিভ্রংশিতেংদ্রধ্বজবত্ক্ষিতিং গতঃ ॥ 39 ॥
ইত্যার্ষে শ্রীমদ্রামাযণে বাল্মীকীয আদিকাব্যে কিষ্কিংধাকাংডে ষোডশস্সর্গঃ ॥
