শ্রীমদ্বাল্মীকীয রামাযণে বালকাংডম্ ।
অথ ত্রিসপ্ততিতমস্সর্গঃ ।
যস্মিংস্তু দিবসে রাজা চক্রে গোদানমুত্তমম্ ।
তস্মিং স্তু দিবসে শূরো যুধাজিত্সমুপেযিবান্ ॥ 1 ॥
পুত্রঃ কেকযরাজস্য সাক্ষাদ্ভরতমাতুলঃ ।
দৃষ্ট্বা পৃষ্ট্বা চ কুশলং রাজানমিদমব্রবীত্ ॥ 2 ॥
কেকযাধিপতী রাজা স্নেহাত্ কুশলমব্রবীত্ ।
যেষাং কুশলকামোঽসি তেষাং সংপ্রত্যনামযম্ ॥ 3 ॥
স্বস্রীযং মম রাজেংদ্র দ্রষ্টুকামো মহীপতিঃ ।
তদর্থমুপযাতোঽহমযোধ্যাং রঘুনংদন ॥ 4 ॥
শ্রুত্বা ত্বহমযোধ্যাযাং বিবাহার্থং তবাত্মজান্ ।
মিথিলামুপযাতাংস্তু ত্বযা সহ মহীপতে ॥ 5 ॥
ত্বরযাভ্যুপযাতোঽহং দ্রষ্টুকাম স্স্বসুস্সুতম্ ।
অথ রাজা দশরথঃ প্রিযাতিথিমুপস্থিতম্ ॥ 6 ॥
দৃষ্ট্বা পরমসত্কারৈঃ পূজার্হং সমপূজযত্ ।
ততস্তামুষিতো রাত্রিং সহ পুত্রৈর্মহাত্মভিঃ ॥ 7 ॥
প্রভাতে পুনরুত্থায কৃত্বা কর্মাণি কর্মবিত্ ।
ঋষীংস্তদা পুরস্কৃত্য যজ্ঞবাটমুপাগমত্ ॥ 8 ॥
যুক্তে মুহূর্তে বিজযে সর্বাভরণভূষিতৈঃ ।
ভ্রাতৃভিস্সহিতো রামঃ কৃতকৌতুকমংগলঃ ॥ 9 ॥
বসিষ্ঠং পুরতঃ কৃত্বা মহর্ষীনপরানপি ।
পিতু স্সমীপমাশ্রিত্য তস্থৌ ভ্রাতৃভিরাবৃতঃ ॥ 10 ॥
বসিষ্ঠো ভগবানেত্য বৈদেহমিদমব্রবীত্ ।
রাজা দশরথো রাজন্ কৃতকৌতুকমংগলৈঃ ॥ 11 ॥
পুত্রৈর্নরবর শ্রেষ্ঠ দাতারমভিকাংক্ষতে ।
দাতৃপ্রতিগ্রহীতৃভ্যাং সর্বার্থাঃ প্রভবংতি হি ॥ 12 ॥
স্বধর্মং প্রতিপদ্যস্ব কৃত্বা বৈবাহ্যমুত্তমম্ ।
ইত্যুক্তঃ পরমোদারো বসিষ্ঠেন মহাত্মনা ॥ 13 ॥
প্রত্যুবাচ মহাতেজা বাক্যং পরমধর্মবিত্ ।
কস্স্থিতঃ প্রতিহারো মে কস্যাজ্ঞা সংপ্রতীক্ষ্যতে ॥ 14 ॥
স্বগৃহে কো বিচারোঽস্তি যথা রাজ্যমিদং তব ।
কৃতকৌতুকসর্বস্বা বেদিমূলমুপাগতাঃ ॥ 15 ॥
মম কন্যা মুনিশ্রেষ্ঠ দীপ্তা বহ্নেরিবার্চিষঃ ।
সজ্জোঽহং ত্বত্প্রতীক্ষোঽস্মি বেদ্যামস্যাং প্রতিষ্ঠিতঃ ॥ 16 ॥
অবিঘ্নং কুরুতাং রাজা কিমর্থমবলংবতে ।
তদ্বাক্যং জনকেনোক্তং শ্রুত্বা দশরথস্তদা ।
প্রবেশযামাস সুতান্ সর্বানৃষিগণানপি ॥ 17 ॥
ততো রাজা বিদেহানাং বসিষ্ঠমিদমব্রবীত্ ॥ 18 ॥
কারযস্ব ঋষে সর্বমৃষিভিঃ সহ ধার্মিক ।
রামস্য লোকরামস্য ক্রিযাং বৈবাহিকীং বিভো ॥ 19 ॥
তথেত্যুক্ত্বা তু জনকং বসিষ্ঠো ভগবানৃষিঃ ।
বিশ্বামিত্রং পুরস্কৃত্য শতানংদং চ ধার্মিকম্ ॥ 20 ॥
প্রপামধ্যে তু বিধিবত্বেদিং কৃত্বা মহাতপাঃ ।
অলংচকার তাং বেদিং গংধপুষ্পৈ স্সমংততঃ ॥ 21 ॥
সুবর্ণপালিকাভিশ্চ ছিদ্রকুংভৈশ্চ সাংকুরৈঃ ।
অংকুরাঢ্যৈশ্শরাবৈশ্চ ধূপপাত্রৈ স্সধূপকৈঃ ॥ 22 ॥
শংখপাত্রৈ স্স্রুবৈ স্স্রুগ্ভিঃ পাত্রৈরর্ঘ্যাভিপূরিতৈঃ ।
লাজপূর্ণৈশ্চ পাত্রীভিরক্ষতৈরভিসংস্কৃতৈঃ ॥ 23 ॥
দর্ভৈস্সমৈস্সমাস্তীর্য বিধিবন্মংত্রপূর্বকম্ ।
অগ্নিমাদায বেদ্যাং তু বিধিমংত্রপুরস্কৃতম্ ॥ 24 ॥
জুহাবাগ্নৌ মহাতেজা বসিষ্ঠো ভগবানৃষিঃ ।
ততস্সীতাং সমানীয সর্বাভরণভূষিতাম্ ॥ 25 ॥
সমক্ষমগ্নে স্সংস্থাপ্য রাঘবাভিমুখে তদা ।
অব্রবীজ্জনকো রাজা কৌসল্যানংদবর্ধনম্ ॥ 26 ॥
ইযং সীতা মম সুতা সহধর্মচরী তব ।
প্রতীচ্ছ চৈনাং ভদ্রং তে পাণিং গৃহ্ণীষ্ব পাণিনা ॥ 27 ॥
পতিব্রতা মহাভাগা ছাযেবানুগতা সদা ।
ইত্যুক্ত্বা প্রাক্ষিপদ্রাজা মংত্রপূতং জলং তদা ॥ 28 ॥
সাধু সাধ্বিতি দেবানা মৃষীণাং বদতাং তদা ।
দেবদুংদুভির্নির্ঘোষঃ পুষ্পবর্ষো মহানভূত্ ॥ 29 ॥
এবং দত্ত্বা তদা সীতাং মংত্রোদকপুরস্কৃতাম্ ।
অব্রবীজ্জনকো রাজা হর্ষেণাভিপরিপ্লুতঃ ॥ 30 ॥
লক্ষ্মণাগচ্ছ ভদ্রং তে ঊর্মিলামুদ্যতাং মযা ।
প্রতীচ্ছ পাণিং গৃহ্ণীষ্ব মাভূত্কালস্য পর্যযঃ ॥ 31 ॥
তমেবমুক্ত্বা জনকো ভরতং চাভ্যভাষত ।
গৃহাণ পাণিং মাংডব্যাঃ পাণিনা রঘুনংদন ॥ 32 ॥
শত্রুঘ্নং চাপি ধর্মাত্মা অব্রবীজ্জনকেশ্বরঃ ।
শ্রুতকীর্ত্যা মহাবাহো পাণিং গৃহ্ণীষ্ব পাণিনা ॥ 33 ॥
সর্বে ভবংতস্সৌম্যাশ্চ সর্বে সুচরিতব্রতাঃ ।
পত্নীভিস্সংতু কাকুত্স্থা মাভূত্কালস্য পর্যযঃ ॥ 34 ॥
জনকস্য বচ শ্শৃত্বা পাণীন্ পাণিভিরাস্পৃশন্ ।
চত্বারস্তে চতসৃণাং বসিষ্ঠস্য মতে স্থিতাঃ ॥ 35 ॥
অগ্নিং প্রদক্ষিণীকৃত্য বেদিং রাজানমেব চ ।
ঋষীংশ্চৈব মহাত্মানস্সভার্যা রঘুসত্তমাঃ ॥ 36 ॥
যথোক্তেন তদা চক্রুর্বিবাহং বিধিপূর্বকম্ ।
কাকুত্স্থৈশ্চ গৃহীতেষু ললিতেষু চ পাণিষু ॥ 37 ॥
পুষ্পবৃষ্টির্মহত্যাসীদংতরিক্ষাত্সুভাস্বরা ।
দিব্যদুংদুভিনির্ঘোষৈর্গীতবাদিত্রনিস্বনৈঃ ॥ 38 ॥
ননৃতুশ্চাপ্সরস্সংঘা গংধর্বাশ্চ জগুঃ কলম্ ।
বিবাহে রঘুমুখ্যানাং তদদ্ভুতমদৃশ্যত ॥ 39 ॥
ঈদৃশে বর্তমানে তু তূর্যোদ্ঘুষ্টনিনাদিতে ।
ত্রিরগ্নিং তে পরিক্রম্য ঊহুর্ভার্যাং মহৌজসঃ ॥ 40 ॥
অথোপকার্যাং জগ্মুস্তে সভার্যা রঘুনংদনাঃ ।
রাজাঽপ্যনুযযৌ পশ্যংত্সর্ষিসংঘ স্সবাংধবঃ ॥ 41 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে ত্রিসপ্ততিতমস্সর্গঃ ॥
