শ্রীমদ্বাল্মীকীয রামাযণে সুংদরকাংডম্ ।
অথ দ্বাদশস্সর্গঃ ।
স তস্য মধ্যে ভবনস্য মারুতি র্লতাগৃহাংশ্চিত্রগৃহান্নিশাগৃহান্ ।
জগাম সীতাং প্রতি দর্শনোত্সুকো ন চৈব তাং পশ্যতি চারুদর্শনাম্ ॥ 1 ॥
স চিংতযামাস ততো মহাকপিঃ প্রিযামপশ্যন্রঘুনংদনস্য তাম্ ।
ধ্রুবং হি সীতা ম্রিযতে যথা ন মে বিচিন্বতো দর্শনমেতি মৈথিলী ॥ 2 ॥
সা রাক্ষসানাং প্রবরেণ জানকী স্বশীলসংরক্ষ্ণতত্পরা সতী ।
অনেন নূনং প্রতি দুষ্টকর্মণা হতা ভবেদার্যপথে পরে স্থিতা ॥ 3 ॥
বিরূপরূপা বিকৃতা বিবর্চসো মহাননা দীর্ঘবিরূপদর্শনাঃ ।
সমীক্ষ্য সা রাক্ষসরাজযোষিতো ভযাদ্বিনষ্টা জনকেশ্বরাত্মজা ॥ 4 ॥
সীতামদৃষ্ট্বা হ্যনবাপ্য পৌরুষং বিহৃত্য কালং সহ বানরৈশ্চিরম্ ।
ন মেঽস্তি সুগ্রীবসমীপগা গতিঃ সুতীক্ষ্ণদংডো বলবাংশ্চ বানরঃ ॥ 5 ॥
দৃষ্টমংতঃপুরং সর্বং দৃষ্টা রাবণযোষিতঃ ।
ন সীতা দৃশ্যতে সাধ্বীবৃথা জাতো মম শ্রমঃ ॥ 6 ॥
কিং নু মাং বানরাঃ সর্বে গতং বক্ষ্যংতি সংগতাঃ ।
গত্বা তত্র ত্বযা বীর কিং কৃতং তদ্বদস্ব নঃ ॥ 7 ॥
অদৃষ্ট্বা কিং প্রবক্ষ্যামি তামহং জনকাত্মজাম্ ।
ধ্রুবং প্রাযমুপৈষ্যংতি কালস্য ব্যতিবর্তনে ॥ 8 ॥
কিং বা বক্ষ্যতি বৃদ্ধশ্চ জাংববানাংগদশ্চ সঃ ।
গতং পারং সমুদ্রস্য বানরাশ্চ সমাগতাঃ ॥ 9 ॥
অনির্বেদঃ শ্রিযো মূলমনির্বেদঃ পরং সুখম্ ।
অনির্বেদো হি সততং সর্বার্থেষু প্রবর্তকঃ ॥ 10 ॥
করোতি সফলং জংতোঃ কর্ম যত্তত্করোতি সঃ ।
তস্মাদনির্বেদকৃতং যত্নং চেষ্টেঽহমুত্তমম্ ॥ 11 ॥
ভূযস্তাবদ্বিচেষ্যামি দেশান্রাবণপালিতান্ ।
আপানশালা বিচিতাস্তথা পুষ্পগৃহাণি চ ॥ 12 ॥
চিত্রশালাশ্চ বিচিতা ভূযঃ ক্রীডাগৃহাণি চ ।
নিষ্কুটাংতররথ্যাশ্চ বিমানানি চ সর্বশঃ ॥ 13 ॥
ইতি সংচিংত্য ভূযোঽপি বিচেতুমুপচক্রমে ।
ভূমীগৃহাংশ্চৈত্যগৃহান্ গৃহাতিগৃহকানপি ॥ 14 ॥
উত্পতন্নিষ্পতংশ্চাপি তিষ্ঠন্গচ্ছন্ পুনঃ পুনঃ ।
অপাবৃণ্বংশ্চ দ্বারাণি কবাটান্যবঘাটযন্ ॥ 15 ॥
প্রবিশন্নিষ্পতংশ্চাপি প্রপতন্নুত্পতন্নপি ।
সর্বমপ্যবকাশং স বিচচার মহাকপিঃ ॥ 16 ॥
চতুরংগুলমাত্রোঽপি নাবকাশঃ স বিদ্যতে ।
রাবণাংতঃপুরে তস্মিন্ যং কপির্ন জগাম সঃ ॥ 17 ॥
প্রাকারাংতররথ্যাশ্চ বেদিকাশ্চৈত্যসংশ্রযাঃ ।
দীর্ঘিকাঃ পুষ্করিণ্যশ্চ সর্বং তেনাবলোকিতম্ ॥ 18 ॥
রাক্ষস্যো বিবিধাকারা বিরূপা বিকৃতাস্তথা ।
দৃষ্টা হনুমতা তত্র ন তু সা জনকাত্মজা ॥ 19 ॥
রূপেণাপ্রতিমা লোকে বরা বিদ্যাধরস্ত্রিযঃ ।
দৃষ্টা হনুমতা তত্র ন তু রাঘবনংদিনী ॥ 20 ॥
নাগকন্যা বরারোহাঃ পূর্ণচন্র্দনিভাননাঃ ।
দৃষ্টা হনুমতা তত্র ন তু সীতা সুমধ্যমা ॥ 21 ॥
প্রমথ্য রাক্ষসেংদ্রেণ নাগকন্যা বলাদ্ধৃতাঃ ।
দৃষ্টা হনুমতা তত্র ন সা জনকনংদিনী ॥ 22 ॥
সোঽপশ্যংস্তাং মহাবাহুঃ পশ্যংশ্চান্যা বরস্ত্রিযঃ ।
বিষসাদ মুহুর্ধীমান্ হনুমান্ মারুতাত্মজঃ ॥ 23 ॥
উদ্যোগং বানরেংদ্রাণাং প্লবনং সাগরস্য চ ।
ব্যর্থং বীক্ষ্যানিলসুতশ্চিংতাং পুনরুপাগমত্ ॥ 24 ॥
অবতীর্য বিমানাচ্চ হনুমান্ মারুতাত্মজঃ ।
চিংতামুপজগামাথ শোকোপহতচেতনঃ ॥ 25 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে দ্বাদশস্সর্গঃ ॥
