শ্রীমদ্বাল্মীকীয রামাযণে যুদ্ধকাংডম্ ।
অথ প্রথমস্সর্গঃ ।
শ্রুত্বা হনুমতো বাক্যং যথাবদভিভাষিতম্ ।
রামঃ প্রীতিসমাযুক্তো বাক্যমুত্তরমব্রবীত্ ॥ 1 ॥
কৃতং হনুমতা কার্যং সুমহদ্ভুবি দুর্লভম্ ।
মনসাপি যদন্যেন ন শক্যং ধরণীতলে ॥ 2 ॥
ন হি তং পরিপশ্যামি যস্তরেত মহার্ণবম্ ।
অন্যত্র গরুডাদ্বাযোরন্যত্র চ হনূমতঃ ॥ 3 ॥
দেবদানবযক্ষাণাং গংধর্বোরগরক্ষসাম্ ।
অপ্রধৃষ্যাং পুরীং লংকাং রাবণেন সুরক্ষিতাম্ ।
প্রবষ্ট স্সত্ত্বমাশ্রিত্যশ্বসন্কো নাম নিষ্ক্রমেত্ ॥ 4 ॥
কো বিশেত্সুদুরাধর্ষাং রাক্ষসৈশ্চ সুরক্ষিতাম্ ।
যো বীর্যবলসংপন্নো ন সমস্যাদ্ধনূমতঃ ॥ 5 ॥
ভৃত্যকার্যং হনুমতা সুগ্রীবস্য কৃতংমহত্ ।
স্বযং বিধায স্ববলং সদৃশং বিক্রমস্য চ ॥ 6 ॥
যো হি ভৃত্যো নিযুক্তস্সন্ভর্ত্রা কর্মণি দুষ্করে ।
কুর্যাত্তদনুরাগেণ তমাহুঃ পুরুষোত্তমম্ ॥ 7 ॥
নিযুক্তোযঃ পরং কার্যং ন কুর্যান্নৃপতেঃ প্রিযম্ ।
ভৃত্যোঽভৃত্যস্সমর্থোঽপি তমাহুর্মধ্যমং নরম্ ॥ 8 ॥
নিযুক্তো নৃপতেঃ কার্যং ন কুর্যাদ্যস্সমাহিতঃ ।
ভৃত্যো যুক্তস্সমর্থশ্চ তমাহুঃ পুরুষাধমম্ ॥ 9 ॥
তন্নিযোগে নিযুক্তেন কৃতং কৃত্যং হনূমতা ।
ন চাত্মা লঘুতাং নীতস্সুগ্রীবশ্চাপি তোষিতঃ ॥ 10 ॥
অহং চ রঘুবংশশ্চ লক্ষ্মণশ্চ মহাবলঃ ।
বৈদেহ্যা দর্শনেনাদ্য ধর্মতঃ পরিরক্ষিতাঃ ॥ 11 ॥
ইদং তু মম দীনস্য মনো ভূযঃ প্রকর্ষতি ।
যদিহাস্য প্রিযাখ্যাতুর্ন কুর্মি সদৃশং প্রিযম্ ॥ 12 ॥
এষ সর্বস্বভূতে পরিষ্বংগো হনূমতঃ ।
মযা কালমিমং প্রাপ্য দত্তস্তস্য মহাত্মনঃ ॥ 13 ॥
ইত্যুক্ত্বা প্রীতিহৃষ্টাংগো রামস্তং পরিষস্বজে ।
হনূমংতং কৃতাত্মানং কৃতকার্যমুপাগতম্ ॥ 14 ॥
ধ্যাত্বা পুনরুবাচেদং বচনং রঘুনংদনঃ ।
হরীণামীশ্বরস্যাপি সুগ্রীবস্যোপশৃণ্বতঃ ॥ 15 ॥
সর্বথা সুকৃতং তাবত্সীতাযাঃ পরিমার্গণম্ ।
সাগরং তু সমাসাদ্য পুনর্নষ্টং মনো মম ॥ 16 ॥
কথং নাম সমুদ্রস্য দুষ্পারস্য মহাংভসঃ ।
হরযো দক্ষিণং পারং গমিষ্যংতি সমাগতাঃ ॥ 17 ॥
যদ্যপ্যেষ তু বৃত্তাংতো বৈদেহ্যা গদিতো মম ।
সমুদ্রপারগমনে হরীণাং কিমিহোত্তরম্ ॥ 18 ॥
ইত্যুক্তবা শোকসংভ্রাংতো রাম শ্শত্রুনিবর্হণঃ ।
হনূমংতং মহাবাহুস্ততো ধ্যানমুপাগমত্ ॥ 19 ॥
ইত্যার্ষে শ্রীমদ্রামাযণে বাল্মীকীয আদিকাব্যে যুদ্ধকাংডে প্রথমস্সর্গঃ ॥
