শ্রীমদ্বাল্মীকীয রামাযণে অযোধ্যাকাংডম্ ।
অথ চতুঃপংচাশস্সর্গঃ ।
তে তু তস্মিন্মহাবৃক্ষে উষিত্বা রজনীং শিবাম্ ।
বিমলেঽভ্যুদিতে সূর্যে তস্মাদ্দেশাত্প্রতস্থিরে ॥ 1 ॥
যত্র ভাগীরথীং গংগাং যমুনাভিপ্রবর্ততে ।
জগ্মুস্তং দেশমুদ্দিশ্য বিগাহ্য সুমহদ্বনম্ ॥ 2 ॥
তে ভূমিভাগান্বিবিধান্ দেশাংশ্চাপি মনোরমান্ ।
অদৃষ্টপূর্বান্ পশ্যংতস্তত্র তত্র যশশ্বিনঃ ॥ 3 ॥
যথা ক্ষেমেণ গচ্ছন্ স পশ্যংশ্চ বিবিধান্ দ্রুমান্ ।
নিবৃত্তমাত্রে দিবসে রামঃ সৌমিত্রিমব্রবীত্ ॥ 4 ॥
প্রযাগমভিতঃ পশ্য সৌমিত্রে ধূমমুন্নতম্ ।
অগ্নের্ভগবতঃ কেতুং মন্যে সন্নিহিতো মুনিঃ ॥ 5 ॥
নূনং প্রাপ্তাঃ স্ম সংভেদং গংগাযমুনযোর্বযম্ ।
তথা হি শ্রূযতে শব্দো বারিণো বারিঘট্টিতঃ ॥ 6 ॥
দারূণি পরিভিন্নানি বনজৈরুপজীবিভিঃ ।
ভরদ্বাজাশ্রমে চৈতে দৃশ্যংতে বিবিধা দ্রুমাঃ ॥ 7 ॥
ধন্বিনৌ তৌ সুখং গত্বা লংবমানে দিবাকরে ।
গংগাযমুনযোস্সংধৌ প্রাপতুর্নিলযং মুনেঃ ॥ 8 ॥
রামস্ত্বাশ্রমমাসাদ্য ত্রাসযন্মৃগপক্ষিণঃ ।
গত্বা মুহূর্তমধ্বানং ভরদ্বাজমুপাগমত্ ॥ 9 ॥
ততস্ত্বাশ্রমাসাদ্য মুনের্দর্শনকাংক্ষিণৌ ।
সীতযানুগতৌ বীরৌ দূরাদেবাবতস্থতুঃ ॥ 10 ॥
স প্রবিশ্য মহাত্মানমৃষিং শিষ্যগণৈর্বৃতম্ ।
সংশিতব্রতমেকাগ্রং তপসা লব্ধচক্ষুষম্ ॥ 11 ॥
হুতাগ্নিহোত্রং দৃষ্ট্বৈব মহাভাগং কৃতাংজলিঃ ।
রামঃ সৌমিত্রিণা সার্ধং সীতযা চাভ্যবাদযত্ ॥ 12 ॥
ন্যবেদযত চাত্মানং তস্মৈ লক্ষ্মণপূর্বজঃ ।
পুত্রৌ দশরথস্যাবাং ভগবন্ রামলক্ষ্মণৌ ॥ 13 ॥
ভার্যা মমেযং বৈদেহী কল্যাণী জনকাত্মজা ।
মাং চানুযাতা বিজনং তপোবনমনিংদিতা ॥ 14 ॥
পিত্রা প্রব্রাজ্যমানং মাং সৌমিত্রিরনুজ প্রিযঃ ।
অযমন্বগমদ্ভ্রাতা বনমেব দৃঢব্রতঃ ॥ 15 ॥
পিত্রা নিযুক্তা ভগবন্ প্রবেক্ষ্যামস্তপোবনম্ ।
ধর্মমেব চরিষ্যাম স্তত্র মূলফলাশনাঃ ॥ 16 ॥
তস্য তদ্বচনং শ্রুত্বা রাজপুত্রস্য ধীমতঃ ।
উপানযত ধর্মাত্মা গামর্ঘ্যমুদকং ততঃ ॥ 17 ॥
নানাবিধানন্নরসান্ বন্যমূলফলাশ্রযান্ ।
তেভ্যো দদৌ তপ্ততপা বাসং চৈবাভ্যকল্পযত্ ॥ 18 ॥
মৃগপক্ষিভিরাসীনো মুনিভিশ্চ সমংততঃ ।
রামমাগতমভ্যর্চ্য স্বাগতেনাহতং মুনিঃ ॥ 19 ॥
প্রতিগৃহ্য চ তামর্চামুপবিষ্টং স রাঘবম্ ।
ভরদ্বাজোঽব্রবীদ্বাক্যং ধর্মযুক্তমিদং তদা ॥ 20 ॥
চিরস্য খলু কাকুত্স্থ পশ্যামি ত্বামিহাগতম্ ।
শ্রুতং তব মযা চেদং বিবাসনমকারণম্ ॥ 21 ॥
অবকাশো বিবিক্তোঽযং মহানদ্যোস্সমাগমে ।
পুণ্যশ্চ রমণীযশ্চ বসত্বিহ ভবান্ সুখম্ ॥ 22 ॥
এবমুক্তস্তু বচনং ভরদ্বাজেন রাঘবঃ ।
প্রত্যুবাচ শুভং বাক্যং রামঃ সর্বহিতে রতঃ ॥ 23 ॥
ভগবন্নিত আসন্নঃ পৌরজানপদো জনঃ ।
সুদর্শমিহ মাং প্রেক্ষ্য মন্যেঽহমিমমাশ্রমম্ ॥ 24 ॥
আগমিষ্যতি বৈদেহীং মাং চাপি প্রেক্ষকো জনঃ ।
অনেন কারণেনাহমিহ বাসং ন রোচযে ॥ 25 ॥
একাংতে পশ্য ভগবন্নাশ্রমস্থানমুত্তমম্ ।
রমেত যত্র বৈদেহী সুখার্হা জনকাত্মজা ॥ 26 ॥
এতছ্রুত্বা শুভং বাক্যং ভরদ্বাজো মহামুনিঃ ।
রাঘবস্য ততো বাক্যমর্থগ্রাহকমব্রবীত্ ॥ 27 ॥
দশক্রোশ ইতস্তাত গিরির্যত্রনিবত্স্যসি ।
মহর্ষিসেবিতঃ পুণ্যঃ সর্বতঃ সুখদর্শনঃ ॥ 28 ॥
গোলাংগূলানুচরিতো বানরর্ক্ষনিষেবিতঃ ।
চিত্রকূট ইতি খ্যাতো গংধমাদনসন্নিভঃ ॥ 29 ॥
যাবতা চিত্রকূটস্য নরশৃংগান্যবেক্ষতে ।
কল্যাণানি সমাধত্তে ন পাপে কুরুতে মনঃ ॥ 30 ॥
ঋষযস্তত্র বহবো বিহৃত্য শরদাং শতম্ ।
তপসা দিবমারূঢাঃ কপালশিরসা সহ ॥ 31 ॥
প্রবিবিক্তমহং মন্যে তং বাসং ভবতস্সুখম্ ।
ইহ বা বনবাসায বস রাম মযা সহ ॥ 32 ॥
স রামং সর্বকামৈস্তং ভরদ্বাজঃ প্রিযাতিথিম্ ।
সভার্যং সহ চ ভ্রাত্রা প্রতিজগ্রাহ ধর্মবিত্ ॥ 33 ॥
তস্য প্রযাগে রামস্য তং মহর্ষিমুপেযুষঃ ।
প্রপন্না রজনী পুণ্যাঃ চিত্রাঃ কথযতঃ কথাঃ ॥ 34 ॥
সীতাতৃতীযঃ কাকুত্স্থঃ পরিশ্রাংতঃ সুখোচিতঃ ।
ভরদ্বাজাশ্রমে রম্যে তাং রাত্রিমবসত্সুখম্ ॥ 35 ॥
প্রভাতাযাং রজন্যাং তু ভরদ্বাজমুপাগমত্ ।
উবাচ নরশার্দূলো মুনিং জ্বলিততেজসম্ ॥ 36 ॥
শর্বরীং ভগবন্নদ্য সত্যশীল তবাশ্রমে ।
উষিতাঃ স্মেহ বসতিমনুজানাতু নো ভবান্ ॥ 37 ॥
রাত্র্যাং তু তস্যাং ব্যুষ্টাযাং ভরদ্বাজোঽব্রবীদিদম্ ।
মধুমূলফলোপেতং চিত্রকূটং ব্রজেতি হ ॥ 38 ॥
বাসমৌপযিকং মন্যে তব রাম মহাবল নানানগগণোপেতঃ কিন্নরোরগসেবিতঃ ।
মযূরনাদাভিরুতো গজরাজনিষেবিতঃ ॥ 39 ॥
গম্যতাং ভবতা শৈল শ্চিত্রকূটঃ স বিশ্রুতঃ ।
পুণ্যশ্চ রমণীযশ্চ বহুমূলফলাযুতঃ ॥ 40 ॥
তত্র কুংজরযূথানি মৃগযূথানি চাভিতঃ ।
বিচরংতি বনাংতেস্মিন্ তানি দ্রক্ষ্যসি রাঘব ॥ 41 ॥
সরিত্প্রস্রবণপ্রস্থান্ দরীকংদরনির্ঝরান্ ।
চরতঃ সীতযা সার্ধং নংদিষ্যতি মনস্তব ॥ 42 ॥
প্রহৃষ্টকোযষ্টিককোকিলস্বনৈর্বিনাদিতং তং বসুধাধরং শিবম্ ।
মৃগৈশ্চ মত্তৈর্বহুভিশ্চ কুংজরৈঃ সুরম্যমাসাদ্য সমাবসাশ্রমম্ ॥ 43 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে চতুঃপংচাশস্সর্গঃ ॥
