শ্রীমদ্বাল্মীকীয রামাযণে অরণ্যকাংডম্ ।
অথ ষট্ত্রিংশস্সর্গঃ ।
মারীচ শ্রূযাতাং তাত বচনং মম ভাষতঃ ।
আর্তোঽস্মি মম চার্তস্য ভবান্হি পরমা গতিঃ ॥ 1 ॥
জানীষে ত্বং জনস্থানে যথা ভ্রাতা খরো মম ।
দূষণশ্চ মহাবাহু স্বসা শূর্পণখা চ মে ॥ 2 ॥
ত্রিশিরাশ্চ মহাতেজা রাক্ষসঃ পিশিতাশনঃ ।
অন্যে চ বহবশ্শূরা লব্ধলক্ষা নিশাচরাঃ ॥ 3 ॥
বসত্নি মন্নিযোগেন নিত্যবাসং চ রাক্ষসাঃ ।
বাধমানা মহারণ্যে মুনীন্বৈ ধর্মচারিণঃ ॥ 4 ॥
চতুর্দশ সহস্রাণি রক্ষসাং ভীমকর্মণাম্ ।
শূরাণাং লব্ধলক্ষাণাং খরচিত্তানুবর্তিনাম্ ॥ 5 ॥
তে ত্বিদানীং জনস্থানে বসমানা মহাবলাঃ ।
সংগতাঃ পরমাযত্তা রামেণ সহ সংযুগে ॥ 6 ॥
নানাপ্রহরণোপেতাঃ খরপ্রমুখরাক্ষসাঃ ।
তেন সংজাতরোষেণ রামেণ রণমূর্ধনি ।
অনুক্ত্বা পরুষং কিংচিচ্ছরৈর্ব্যাপারিতং ধনুঃ ॥ 7 ॥
চতুর্দশ সহস্রাণি রক্ষসামুগ্রতেজসাম্ ।
নিহতানি শরৈস্তীক্ষ্ণৈর্মানুষেণ পদাতিনা ॥ 8 ॥
খরশ্চ নিহতস্সংখ্যে দূষণশ্চ নিপাতিতঃ ।
হতশ্চ ত্রিশিরাশ্চাপি নির্ভযা দংডকাঃ কৃতাঃ ॥ 9 ॥
পিত্রা নিরস্তঃ ক্রুদ্ধেন সভার্যঃ ক্ষীণজীবিতঃ ।
স হংতা তস্য সৈন্যস্য রামঃ ক্ষত্রিযপাংসনঃ ॥ 10 ॥
দুশ্শীলঃ কর্কশস্তীক্ষ্ণো মূর্খো লুব্ধোঽজিতেংদ্রিযঃ ॥ 11 ॥
ত্যক্তধর্মো হ্যধর্মাত্মা ভূতানামহিতে রতঃ ।
যেন বৈরং বিনাঽরণ্যে সত্বমাশ্রিত্য কেবলম্ ॥ 12 ॥
কর্ণনাসাপহরণাদ্ভগিনী মে বিরূপিতা ।
তস্যভার্যাং জনস্থানাত্সীতাং সুরসুতোপমাম্ ॥ 13 ॥
আনযিষ্যামি বিক্রম্য সহাযস্তত্র মে ভব ।
ত্বযা হ্যহং সহাযেন পার্শ্বস্থেন মহাবল ॥ 14 ॥
ভ্রাতৃভিশ্চ সুরান্যুদ্ধে সমগ্রান্নাভিচিংতযে ।
তত্সহাযো ভব ত্বং মে সমর্থো হ্যসি রাক্ষস ॥ 15 ॥
বীর্যে যুদ্ধে চ দর্পে চ ন হ্যস্তি সদৃশস্তব ।
উপাযজ্ঞো মহান্শূরস্সর্বমাযাবিশারদঃ ॥ 16 ॥
এতদর্থমহং প্রাপ্তস্ত্বত্সমীপং নিশাচর ।
শৃণু তত্কর্ম সাহায্যে যত্কার্যং বচনান্মম ॥ 17 ॥
সৌবর্ণস্ত্বং মৃগো ভূত্বা চিত্রো রজতবিংদুভিঃ ।
আশ্রমে তস্য রামস্য সীতাযাঃ প্রমুখে চর ॥ 18 ॥
ত্বাং তু নিস্সংশযং সীতা দৃষ্ট্বা তু মৃগরূপিণম্ ।
গৃহ্যতামিতি ভর্তারং লক্ষ্মণং চাভিধাস্যতি ॥ 19 ॥
ততস্তযোরপাযে তু শূন্যে সীতাং যথাসুখম্ ।
নিরাবাধো হরিষ্যামি রাহুশ্চংদ্রপ্রভামিব ॥ 20 ॥
ততঃ পশ্চাত্সুখং রামে ভার্যাহরণকর্শিতে ।
বিস্রব্ধঃ প্রহরিষ্যামি কৃতার্থেনাংতরাত্মনা ॥ 21 ॥
তস্য রামকথাং শ্রুত্বা মারীচস্য মহাত্মনঃ ।
শুষ্কং সমভবদ্বক্ত্রং পরিতপ্তা বভূব হ ॥ 22 ॥
ওষ্ঠৌ পরিলিহংচুষ্কৌ নেত্রৈরনিমিষৈরিব ।
মৃতভূত ইবার্তস্তু রাবণং সমুদৈক্ষত ॥ 23 ॥
স রাবণং ত্রস্তবিষণ্ণচেতা মহাবনে রামপরাক্রমজ্ঞঃ ।
কৃতাংজলিস্তত্বমুবাচ বাক্যং হিতং চ তস্মৈ হিতমাত্মনশ্চ ॥ 24 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাংডে ষট্ত্রিংশস্সর্গঃ ॥
