শ্রীমদ্বাল্মীকীয রামাযণে বালকাংডম্ ।
অথ অষ্টাদশস্সর্গঃ ।
নির্বৃত্তে তু ক্রতৌ তস্মিন্হযমেধে মহাত্মনঃ ।
প্রতিগৃহ্য সুরা ভাগান্প্রতিজগ্মুর্যথাগতম্ ॥ 1 ॥
সমাপ্তদীক্ষানিযমঃ পত্নীগণসমন্বিতঃ ।
প্রবিবেশ পুরীং রাজা সভৃত্যবলবাহনঃ ॥ 2 ॥
যথার্হং পূজিতাস্তেন রাজ্ঞা বৈ পৃথিবীশ্বরাঃ ।
মুদিতাঃ প্রযযুর্দেশান্প্রণম্য মুনিপুংগবম্ ॥ 3 ॥
শ্রীমতাং গচ্ছতাং তেষাং স্বপুরাণি পুরাত্ততঃ ।
বলানি রাজ্ঞাং শুভ্রাণি প্রহৃষ্টানি চকাশিরে ॥ 4 ॥
গতেষু পৃথিবীশেষু রাজা দশরথস্তদা ।
প্রবিবেশ পুরীং শ্রীমান্ পুরস্কৃত্য দ্বিজোত্তমান্ ॥ 5 ॥
শাংতযা প্রযযৌ সার্ধমৃশ্যশৃংগস্সুপূজিতঃ ।
অন্বীযমানো রাজ্ঞাঽথ সানুযাত্রেণ ধীমতা ॥ 6 ॥
এবং বিসৃজ্য তান্সর্বান্রাজা সংপূর্ণমানসঃ ।
উবাস সুখিতস্তত্র পুত্রোত্পত্তিং বিচিংতযন্ ॥ 7 ॥
ততো যজ্ঞে সমাপ্তে তু ঋতূনাং ষট্সমত্যযুঃ ।
ততশ্চ দ্বাদশে মাসে চৈত্রে নাবমিকে তিথৌ ॥ 8 ॥
নক্ষত্রেঽদিতিদৈবত্যে স্বোচ্চসংস্থেষু পংচসু ।
গ্রহেষু কর্কটে লগ্নে বাক্পতাবিংদুনা সহ ॥ 9 ॥
প্রোদ্যমানে জগন্নাথং সর্বলোকনমস্কৃতম্ ।
কৌসল্যাঽজনযদ্রামং সর্বলক্ষণসংযুতম্ ॥ 10 ॥
বিষ্ণোরর্ধং মহাভাগং পুত্রমৈক্ষ্বাকুবর্ধনম্ ।
কৌসল্যা শুশুভে তেন পুত্রেণামিততেজসা ॥ 11 ॥
যথা বরেণ দেবানামদিতির্বজ্রপাণিনা ।
ভরতো নাম কৈকেয্যাং জজ্ঞে সত্যপরাক্রমঃ ॥ 12 ॥
সাক্ষাদ্বিষ্ণোশ্চতুর্ভাগস্সর্বৈস্সমুদিতো গুণৈঃ ।
অথ লক্ষ্মণশত্রুঘ্নৌ সুমিত্রাঽজনযত্সুতৌ ॥ 13 ॥
বীরৌ সর্বাস্ত্রকুশলৌ বিষ্ণোরর্ধসমন্বিতৌ ।
পুষ্যে জাতস্তু ভরতো মীনলগ্নে প্রসন্নধীঃ ॥ 14 ॥
সার্পে জাতৌ চ সৌমিত্রী কুলীরেঽভ্যুদিতে রবৌ ।
রাজ্ঞঃ পুত্রা মহাত্মানশ্চত্বারো জজ্ঞিরে পৃথক্ ॥ 15 ॥
গুণবংতোঽনুরূপাশ্চ রুচ্যা প্রোষ্ঠপদোপমাঃ ।
জগুঃ কলং চ গংধর্বা ননৃতুশ্চাপ্সরোগণাঃ ॥ 16 ॥
দেবদুংদুভযো নেদুঃ পুষ্পবৃষ্টিশ্চ খাচ্চ্যুতা ।
উত্সবশ্চ মহানাসীদযোধ্যাযাং জনাকুলঃ ॥ 17 ॥
রথ্যাশ্চ জনসংবাধা নটনর্তকসংকুলাঃ ।
গাযনৈশ্চ বিরাবিণ্যো বাদনৈশ্চ তথাঽপরৈঃ ॥ 18 ॥
প্রদেযাংশ্চ দদৌ রাজা সূতমাগধবংদিনাম্ ।
ব্রাহ্মণেভ্যো দদৌ বিত্তং গোধনানি সহস্রশঃ ॥ 19 ॥
অতীত্যৈকাদশাহং তু নামকর্ম তথাঽকরোত্ ।
জ্যেষ্ঠং রামং মহাত্মানং ভরতং কৈকযীসুতম্ ॥ 20 ॥
সৌমিত্রিং লক্ষ্মণমিতি শত্রুঘ্নমপরং তথা ।
বসিষ্ঠঃ পরমপ্রীতো নামানি কৃতবান্ তদা ॥ 21 ॥
ব্রাহ্মণান্ভোজযামাস পৌরাংজানপদানপি ।
অদদাদ্ব্রহ্মণানাং চ রত্নৌঘমমিতং বহু ॥ 22 ॥
তেষাং জন্মক্রিযাদীনি সর্বকর্মাণ্যকারযত্ ।
তেষাং কেতুরিব জ্যেষ্ঠো রামো রতিকরঃ পিতুঃ ॥ 23 ॥
বভূব ভূযো ভূতানাং স্বযংভূরিব সম্মতঃ ।
সর্বে বেদবিদশ্শূরাস্সর্বে লোকহিতে রতাঃ ॥ 24 ॥
সর্বে জ্ঞানোপসংপন্নাস্সর্বে সমুদিতা গুণৈঃ ।
তেষামপি মহাতেজা রামস্সত্যপরাক্রমঃ ॥ 25 ॥
ইষ্টস্সর্বস্য লোকস্য শশাংক ইব নির্মলঃ ।
গজস্কংধেঽশ্বপৃষ্ঠে চ রথচর্যাসু সম্মতঃ ॥ 26 ॥
ধনুর্বেদে চ নিরতঃ পিতৃশুশ্রূষণে রতঃ ।
বাল্যাত্প্রভৃতি সুস্নিগ্ধো লক্ষ্মণো লক্ষ্মিবর্ধনঃ ॥ 27 ॥
রামস্য লোকরামস্য ভ্রাতুর্জ্যেষ্ঠস্য নিত্যশঃ ।
সর্বপ্রিযকরস্তস্য রামস্যাপি শরীরতঃ ॥ 28 ॥
লক্ষ্মণো লক্ষ্মিসংপন্নো বহিঃপ্রাণ ইবাপরঃ ।
ন চ তেন বিনা নিদ্রাং লভতে পুরুষোত্তমঃ ॥ 29 ॥
মৃষ্টমন্নমুপানীতমশ্নাতি ন হি তং বিনা ।
যদা হি হযমারূঢো মৃগযাং যাতি রাঘবঃ ॥ 30 ॥
তদৈনং পৃষ্ঠতোঽন্বেতি সধনুঃ পরিপালযন্ ।
ভরতস্যাপি শত্রুঘ্নো লক্ষ্মণাবরজো হি সঃ ॥ 31 ॥
প্রাণৈঃ প্রিযতরো নিত্যং তস্য চাসীত্তথা প্রিযঃ ।
স চতুর্ভির্মহাভাগৈঃপুত্রৈর্দশরথঃ প্রিযৈঃ ॥ 32 ॥
বভূব পরমপ্রীতো দেবৈরিব পিতামহঃ ।
তে যদা জ্ঞানসংপন্নাস্সর্বৈস্সমুদিতা গুণৈঃ ॥ 33 ॥
হ্রীমংতঃ কীর্তিমংতশ্চ সর্বজ্ঞা দীর্ঘদর্শিনঃ ।
তেষামেবং প্রভাবানাং সর্বেষাং দীপ্ততেজসাম্ ॥ 34 ॥
পিতা দশরথো হৃষ্টো ব্রহ্মা লোকাধিপো যথা ।
তে চাপি মনুজব্যাঘ্রা বৈদিকাধ্যযনে রতাঃ ॥ 35 ॥
পিতৃশুশ্রূষণরতা ধনুর্বেদে চ নিষ্ঠিতাঃ ।
অথ রাজা দশরথস্তেষাং দারক্রিযাং প্রতি ॥ 36 ॥
চিংতযামাস ধর্মাত্মা সোপাধ্যাযস্সবাংধবঃ ।
তস্য চিংতযমানস্য মংত্রিমধ্যে মহাত্মনঃ ॥ 37 ॥
অভ্যগচ্ছন্মহাতেজা বিশ্বামিত্রো মহামুনিঃ ।
স রাজ্ঞো দর্শনাকাংক্ষী দ্বারাধ্যক্ষানুবাচ হ ॥ 38 ॥
শীঘ্রমাখ্যাত মাং প্রাপ্তং কৌশিকং গাধিনস্সুতম্ ।
তচ্ছ্রুত্বা বচনং ত্রাসাদ্রাজ্ঞো বেশ্ম প্রদুদ্রুবুঃ ॥ 39 ॥
সংভ্রাংতমনসস্সর্বে তেন বাক্যেন চোদিতাঃ ।
তে গত্বা রাজভবনং বিশ্বামিত্রমৃষিং তদা ॥ 40 ॥
প্রাপ্তমাবেদযামাসুর্নৃপাযৈক্ষ্বাকবে তদা ।
তেষাং তদ্বচনং শ্রুত্বা সপুরোধাস্সমাহিতঃ ॥ 41 ॥
প্রত্যুজ্জগাম তং হৃষ্টো ব্রহ্মাণমিব বাসবঃ ।
তং দৃষ্ট্বা জ্বলিতং দীপ্ত্যা তাপসং সংশিতব্রতম্ ॥ 42 ॥
প্রহৃষ্টবদনো রাজা ততোঽর্ঘ্যমুপহারযত্ ।
স রাজ্ঞঃ প্রতিগৃহ্যার্ঘ্যং শাস্ত্রদৃষ্টেন কর্মণা ॥ 43 ॥
কুশলং চাব্যযং চৈব পর্যপৃচ্ছন্নরাধিপম্ ।
2 পুরে কোশে জনপদে বাংধবেষু সুহৃত্সু চ ॥ 44 ॥
কুশলং কৌশিকো রাজ্ঞঃ পর্যপৃচ্ছত্সুধার্মিকঃ ।
অপি তে সন্নতাস্সর্বে সামংতা রিপবো জিতাঃ ॥ 45 ॥
দৈবং চ মানুষং চাপি কর্ম তে সাধ্বনুষ্ঠিতম্ ।
বসিষ্ঠং চ সমাগম্য কুশলং মুনিপুংগবঃ ॥ 46 ॥
ঋষীংশ্চ তান্যথান্যাযং মহাভাগানুবাচ হ ।
তে সর্বে হৃষ্টমনসস্তস্য রাজ্ঞো নিবেশনম্ ॥ 47 ॥
বিবিশুঃ পূজিতাস্তত্র নিষেদুশ্চ যথার্হতঃ ।
অথ হৃষ্টমনা রাজা বিশ্বামিত্রং মহামুনিম্ ॥ 48 ॥
উবাচ পরমোদারো হৃষ্টস্তমভিপূজযন্ ।
যথাঽমৃতস্য সংপ্রাপ্তির্যথাবর্ষমনূদকে ।
যথা সদৃশদারেষু পুত্রজন্মাঽপ্রজস্য চ ॥ 49 ॥
প্রণষ্টস্য যথালাভো যথা হর্ষো মহোদযে ।
তথৈবাগমনং মন্যে স্বাগতং তে মহামুনে ॥ 50 ॥
কং চ তে পরমং কামং করোমি কিমু হর্ষিতঃ ॥ 51 ॥
পাত্রভূতোঽসি মে ব্রহ্মংদিষ্টযা প্রাপ্তাঽসি কৌশিক ।
অদ্য মে সফলং জন্ম জীবিতং চ সুজীবিতম্ ॥ 52 ॥
পূর্বং রাজর্ষিশব্দেন তপসা দ্যোতিতপ্রভঃ ।
ব্রহ্মর্ষিত্বমনুপ্রাপ্তঃ পূজ্যোঽসি বহুধা মযা ॥ 53 ॥
তদদ্ভুতমিদং ব্রহ্মন্পবিত্রং পরমং মম ।
শুভক্ষেত্রগতশ্চাহং তব সংদর্শনাত্প্রভো ॥ 54 ॥
ব্রূহি যত্প্রার্থিতং তুভ্যং কার্যমাগমনং প্রতি ।
ইচ্ছাম্যনুগৃহীতোঽহং ত্বদর্থপরিবৃদ্ধযে ॥ 55 ॥
কার্যস্য ন বিমর্শং চ গংতুমর্হসি কৌশিক ।
কর্তা চাহমশেষেণ দৈবতং হি ভবান্মম ॥ 56 ॥
মম চাযমনুপ্রাপ্তো মহানভ্যুদযো দ্বিজ ।
তবাগমনজঃ কৃত্স্নো ধর্মশ্চানুত্তমো মম ॥ 57 ॥
ইতি হৃদযসুখং নিশম্য বাক্যং শ্রুতিসুখমাত্মবতা বিনীতমুক্তম্ ।
প্রথিতগুণযশা গুণৈর্বিশিষ্টঃ পরমঋষিঃ পরমং জগাম হর্ষম্ ॥ 58 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে অষ্টাদশস্সর্গঃ ॥
