শ্রীমদ্বাল্মীকীয রামাযণে বালকাংডম্ ।
অথ সপ্তমস্সর্গঃ ।
. তস্যামাত্যা গুণৈরাসন্নিক্ষ্বাকোস্তু মহাত্মনঃ ।
মংত্রজ্ঞাশ্চেংগিতজ্ঞাশ্চ নিত্যং প্রিযহিতে রতাঃ ॥ 1 ॥
অষ্টৌ বভূবুর্বীরস্য তস্যামাত্যা যশস্বিনঃ ।
শুচযশ্চানুরক্তাশ্চ রাজকৃত্যেষু নিত্যশঃ ॥ 2 ॥
ধৃষ্টির্জযংতো বিজযস্সিদ্ধার্থো হ্যর্থসাধকঃ ।
অশোকো মংত্রপালশ্চ সুমংত্রশ্চাষ্টমোঽভবত্ ॥ 3 ॥
ঋত্বিজৌ দ্বাবভিমতৌ তস্যাঽঽস্তামৃষিসত্তমৌ ।
বসিষ্ঠো বামদেবশ্চ মংত্রিণশ্চ তথাপরে ॥ 4 ॥
বিদ্যাবিনীতা হ্রীমংতঃ কুশলা নিযতেংদ্রিযাঃ ।
শ্রীমংতশ্চ মহাত্মানশ্শাস্ত্রজ্ঞা দৃঢবিক্রমাঃ ॥ 5 ॥
কীর্তিমংতঃ প্রণিহিতাঃ যথাবচনকারিণঃ ।
তেজঃ ক্ষমাযশঃপ্রাপ্তা স্মিতপূর্বাভিভাষিণঃ ॥ 6 ॥
ক্রোধাত্কামার্থহেতোর্বা ন ব্রূযুরনৃতং বচঃ ।
তেষামবিদিতং কিংচিত্স্বেষু নাস্তি পরেষু বা ।
ক্রিযমাণং কৃতং বাপি চারেণাপি চিকীর্ষিতম্ ॥ 7 ॥
কুশলা ব্যবহারেষু সৌহৃদেষু পরীক্ষিতাঃ ।
প্রাপ্তকালং তু তে দংডং ধারযেযুস্সুতেষ্বপি ॥ 8 ॥
কোশসংগ্রহণে যুক্তা বলস্য চ পরিগ্রহে ।
অহিতং চাপি পুরুষং ন বিহিংস্যুরদূষকম্ ॥ 9 ॥
বীরাশ্চ নিযতোত্সাহা রাজশাস্ত্রমনুষ্ঠিতাঃ ।
শুচীনাং রক্ষিতারশ্চ নিত্যং বিষযবাসিনাম্ ॥ 10 ॥
ব্রহ্ম ক্ষত্রমহিংসংতস্তে কোশং সমপূরযন্ ।
সুতীক্ষ্ণদংডাস্সংপ্রেক্ষ্য পুরুষস্য বলাবলম্ ॥ 11 ॥
শুচীনামেকবুদ্ধীনাং সর্বেষাং সংপ্রজানতাম্ ।
নাসীত্পুরে বা রাষ্ট্রে বা মৃষাবাদী নরঃ ক্বচিত্ ॥ 12 ॥
কশ্চিন্ন দুষ্টস্তত্রাসীত্পরদাররতো নরঃ ।
প্রশাংতং সর্বমেবাসীদ্রাষ্ট্রং পুরবরং চ তত্ ॥ 13 ॥
সুবাসসস্সুবেষাশ্চ তে চ সর্বে সুশীলিনঃ ।
হিতার্থং চ নরেংদ্রস্য জাগ্রতো নযচক্ষুষা ॥ 14 ॥
গুরোর্গুণগৃহীতাশ্চ প্রখ্যাতাশ্চ পরাক্রমে ।
বিদেশেষ্বপি বিজ্ঞাতাস্সর্বতো বুদ্ধিনিশ্চযাত্ ॥ 15 ॥
সংধিবিগ্রহতত্ত্বজ্ঞাঃ প্রকৃত্যা সংপদান্বিতাঃ ॥ 16 ॥
মংত্রসংবরণে শক্তাশ্শ্লক্ষ্ণাস্সূক্ষ্মাসু বুদ্ধিষু ।
নীতিশাস্ত্রবিশেষজ্ঞাস্সততং প্রিযবাদিনঃ ॥ 17 ॥
ঈদৃশৈস্তৈরমাত্যৈস্তু রাজা দশরথোঽনঘঃ ।
উপপন্নো গুণোপেতৈরন্বশাসদ্বসুংধরাম্ ॥ 18 ॥
অবেক্ষমাণশ্চারেণ প্রজা ধর্মেণ রংজযন্ ।
প্রজানাং পালনং কুর্বন্নধর্মান্পরিবর্জযন্ ॥ 19 ॥
বিশ্রুতস্ত্রিষু লোকেষু বদান্যস্সত্যসংগরঃ ।
স তত্র পুরুষব্যাঘ্রশ্শশাস পৃথিবীমিমাম্ ॥ 20 ॥
নাধ্যগচ্ছদ্বিশিষ্টং বা তুল্যং বা শত্রুমাত্মনঃ ।
মিত্রবান্নতসামংতঃ প্রতাপহতকংটকঃ ॥ 21 ॥
স শশাস জগদ্রাজা দিবং দেবপতির্যথা ।
তৈর্মংত্রিভির্মংত্রহিতে নিযুক্তৈ র্বৃতোঽনুরক্তৈঃ কুশলৈস্সমর্থৈঃ ।
স পার্থিবো দীপ্তিমবাপ যুক্ত স্তেজোমযৈর্গোভিরিবোদিতোঽর্কঃ ॥ 22 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে সপ্তমস্সর্গঃ ॥
