শ্রীমদ্বাল্মীকীয রামাযণে বালকাংডম্ ।
অথ চতুর্থস্সর্গঃ ।
প্রাপ্তরাজ্যস্য রামস্য বাল্মীকির্ভগবানৃষিঃ ।
চকার চরিতং কৃত্স্নং বিচিত্রপদমাত্মবান্ ॥ 1 ॥
চতুর্বিংশত্সহস্রাণি শ্লোকানামুক্তবানৃষিঃ ।
তথা সর্গশতান্পংচ ষট্কাংডানি তথোত্তরম্ ॥ 2 ॥
কৃত্বাপি তন্মহাপ্রাজ্ঞস্সভবিষ্যং সহোত্তরম্ ।
চিংতযামাস কোন্বেতত্প্রযুংজীযাদিতি প্রভুঃ ॥ 3 ॥
তস্য চিংতযমানস্য মহর্ষের্ভাবিতাত্মনঃ ।
অগৃহ্ণীতাং ততঃ পাদৌ মুনিবেষৌ কুশীলবৌ ॥ 4 ॥
কুশীলবৌ তু ধর্মজ্ঞৌ রাজপুত্রৌ যশস্বিনৌ ।
ভ্রাতরৌ স্বরসংপন্নৌ দদর্শাশ্রমবাসিনৌ ॥ 5 ॥
স তু মেধাবিনৌ দৃষ্ট্বা বেদেষু পরিনিষ্ঠিতৌ ।
বেদোপবৃংহণার্থায তাবগ্রাহযত প্রভুঃ ॥ 6 ॥
কাব্যং রামাযণং কৃত্স্নং সীতাযাশ্চরিতং মহত্ ।
পৌলস্ত্যবধমিত্যেব চকার চরিতব্রতঃ ॥ 7 ॥
পাঠ্যে গেযে চ মধুরং প্রমাণৈস্ত্রিভিরন্বিতম্ ।
জাতিভিস্সপ্তভির্বদ্ধং তংত্রীলযসমন্বিতম্ ॥ 8 ॥
রসৈশ্শৃংগারকারুণ্যহাস্যবীরভযানকৈঃ ।
রৌদ্রাদিভিশ্চ সংযুক্তং কাব্যমেতদগাযতাম্ ॥ 9 ॥
তৌ তু গাংধর্বতত্ত্বজ্ঞৌ মূর্ছনাস্থানকোবিদৌ ।
ভ্রাতরৌ স্বরসংপন্নৌ গংধর্বাবিব রূপিণৌ ॥ 10 ॥
রূপলক্ষণসংপন্নৌ মধুরস্বরভাষিণৌ ।
বিংবাদিবোদ্ধৃতৌ বিংবৌ রামদেহাত্তথাঽপরৌ ॥ 11 ॥
তৌ রাজপুত্রৌ কার্ত্স্ন্যেন ধর্ম্যমাখ্যানমুত্তমম্ ।
বাচোবিধেযং তত্সর্বং কৃত্বা কাব্যমনিংদিতৌ ॥ 12 ॥
ঋষীণাং চ দ্বিজাতীনাং সাধূনাং চ সমাগমে ।
যথোপদেশং তত্ত্বজ্ঞৌ জগতুস্সুসমাহিতৌ ॥ 13 ॥
মহাত্মানৌ মহাভাগৌ সর্বলক্ষণলক্ষিতৌ ।
তৌ কদাচিত্সমেতানামৃষীণাং ভাবিতাত্মনাম্ ।
আসীনানাং সমীপস্থাবিদং কাব্যমগাযতাম্ ॥ 14 ॥
তচ্ছ্রুত্বা মুনযস্সর্বে বাষ্পপর্যাকুলেক্ষণাঃ ।
সাধুসাধ্বিতি তাবূচুঃ পরং বিস্মযমাগতাঃ ॥ 15 ॥
তে প্রীতমনসস্সর্বে মুনযো ধর্মবত্সলাঃ ।
প্রশশংসুঃ প্রশস্তব্যৌ গাযমানৌ কুশীলবৌ ॥ 16 ॥
অহো গীতস্য মাধুর্যং শ্লোকানাং চ বিশেষতঃ ।
চিরনির্বৃত্তমপ্যেতত্প্রত্যক্ষমিব দর্শিতম্ ॥ 17 ॥
প্রবিশ্য তাবুভৌ সুষ্ঠু ভাবং সম্যগগাযতাম্ ।
সহিতৌ মধুরং রক্তং সংপন্নং স্বরসংপদা ॥ 18 ॥
এবং প্রশস্যমানৌ তৌ তপশ্শ্লাঘ্যৈর্মহাত্মভিঃ ।
সংরক্ততরমত্যর্থং মধুরং তাবগাযতাম্ ॥ 19 ॥
প্রীতঃ কশ্চিন্মুনিস্তাভ্যাং সংস্থিতঃ কলশং দদৌ ।
প্রসন্নো বল্কলং কশ্চিদ্দদৌ তাভ্যাং মহাযশাঃ ॥ 20 ॥
আশ্চর্যমিদমাখ্যানং মুনিনা সংপ্রকীর্তিতম্ ।
পরং কবীনামাধারং সমাপ্তং চ যথাক্রমম্ ॥ 21 ॥
অভিগীতমিদং গীতং সর্বগীতেষু কোবিদৌ ।
আযুষ্যং পুষ্টিজনকং সর্বশ্রুতিমনোহরম্ ॥ 22 ॥
প্রশস্যমানৌ সর্বত্র কদাচিত্তত্র গাযকৌ ।
রথ্যাসু রাজমার্গেষু দদর্শ ভরতাগ্রজঃ ॥ 23 ॥
স্ববেশ্ম চানীয তদা ভ্রাতরৌ স কুশীলবৌ ।
পূজযামাস পূজার্হৌ রামশ্শত্রুনিবর্হণঃ ॥ 24 ॥
আসীনঃ কাংচনে দিব্যে স চ সিংহাসনে প্রভুঃ ।
উপোপবিষ্টস্সচিবৈর্ভ্রাতৃভিশ্চ পরংতপঃ ॥ 25 ॥
দৃষ্ট্বা তু রূপসংপন্নৌ তাবুভৌ নিযতস্তথা ।
উবাচ লক্ষ্মণং রামশ্শত্রুঘ্নং ভরতং তদা ॥ 26 ॥
শ্রূযতামিদমাখ্যানমনযোর্দেববর্চসোঃ ।
বিচিত্রার্থপদং সম্যগ্গাযকৌ তাবচোদযত্ ॥ 27 ॥
তৌ চাপি মধুরং রক্তং স্বংচিতাযতনিস্বনম্ ।
তংত্রীলযবদত্যর্থং বিশ্রুতার্থমগাযতাম্ ॥ 28 ॥
হ্লাদযত্সর্বগাত্রাণি মনাংসি হৃদযানি চ ।
শ্রোত্রাশ্রযসুখং গেযং তদ্বভৌ জনসংসদি ॥ 29 ॥
ইমৌ মুনী পার্থিবলক্ষণান্বিতৌ কুশীলবৌ চৈব মহাতপস্বিনৌ ।
মমাপি তদ্ভূতিকরং প্রবক্ষ্যতে মহানুভাবং চরিতং নিবোধত ॥ 30 ॥
ততস্তু তৌ রামবচঃপ্রচোদিতাবগাযতাং মার্গবিধানসংপদা ।
স চাপি রামঃ পরিষদ্গতঃ শনৈর্বুভূষযাসক্তমনা বভূব ॥ 31 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে চতুর্থস্সর্গঃ ॥
