শ্রীমদ্বাল্মীকীয রামাযণে বালকাংডম্ ।
অথ ষট্ত্রিংশস্সর্গঃ ।
উক্তবাক্যে মুনৌ তস্মিন্নুভৌ রাঘবলক্ষ্মণৌ ।
প্রতিনংদ্য কথাং বীরাবূচতুর্মুনিপুংগবম্ ॥ 1 ॥
ধর্মযুক্তমিদং ব্রহ্মন্ কথিতং পরমং ত্বযা ।
দুহিতুশ্শৈলরাজস্য জ্যেষ্ঠাযা বক্তুমর্হসি ॥ 2 ॥
বিস্তরং বিস্তরজ্ঞোঽসি দিব্যমানুষসংভবম্ ।
ত্রীন্ পথো হেতুনা কেন প্লাবযেল্লোকপাবনী ॥ 3 ॥
কথং গংগা ত্রিপথগা বিশ্রুতা সরিদুত্তমা ।
ত্রিষু লোকেষু ধর্মজ্ঞ কর্মভিঃ কৈস্সমন্বিতা ॥ 4 ॥
তথা ব্রুবতি কাকুত্স্থে বিশ্বামিত্রস্তপোধনঃ ।
নিখিলেন কথাং সর্বামৃষিমধ্যে ন্যবেদযত্ ॥ 5 ॥
পুরা রাম কৃতোদ্বাহো নীলকংঠো মহাতপাঃ ।
দৃষ্ট্বা চ স্পৃহযা দেবীং মৈথুনাযোপচক্রমে ॥ 6 ॥
শিতিকংঠস্য দেবস্য দিব্যং বর্ষশতং গতম্ ।
ন চাপি তনযো রাম তস্যামাসীত্ পরংতপ ॥ 7 ॥
ততো দেবাস্সমুদ্বিগ্নাঃ পিতামহপুরোগমাঃ ।
যদিহোত্পদ্যতে ভূতং কস্তত্প্রতিসহিষ্যতে ॥ 8 ॥
অভিগম্য সুরাস্সর্বে প্রণিপত্যেদমব্রুবন্ ।
দেব দেব মহাদেব লোকস্যাস্য হিতে রত ॥ 9 ॥
সুরাণাং প্রণিপাতেন প্রসাদং কর্তুমর্হসি ।
ন লোকা ধারযিষ্যংতি তব তেজস্সুরোত্তম ॥ 10 ॥
ব্রাহ্মেণ তপসা যুক্তো দেব্যা সহ তপশ্চর ।
ত্রৈলোক্যহিতকামার্থং তেজস্তেজসি ধারয ॥ 11 ॥
দেবতানাং বচশ্শ্রুত্বা সর্বলোকমহেশ্বরঃ ।
বাঢমিত্যব্রবীত্সর্বান্পুনশ্চৈবমুবাচ হ ॥ 12 ॥
ধারযিষ্যাম্যহং তেজস্তেজস্যেব সহোমযা ।
ত্রিদশাঃ পৃথিবী চৈব নির্বাণমধিগচ্ছতু ॥ 13 ॥
যদিদং ক্ষুভিতং স্থানান্মম তেজো হ্যনুত্তমম্ ।
ধারযিষ্যতি কস্তন্মে ব্রুবংতু সুরসত্তমাঃ ॥ 14 ॥
এবমুক্তাস্সুরাস্সর্বে প্রত্যূচুর্বৃষভধ্বজম্ ।
যত্তেজঃ ক্ষুভিতং হ্যেতত্তদ্ধরা ধারযিষ্যতি ॥ 15 ॥
এবমুক্তস্সুরপতিঃ প্রমুমোচ মহীতলে ।
তেজসা পৃথিবী যেন ব্যাপ্তা সগিরিকাননা ॥ 16 ॥
ততো দেবাঃ পুনরিদমূচুশ্চাথ হুতাশনম্ ।
প্রবিশ ত্বং মহাতেজো রৌদ্রং বাযুসমন্বিতঃ ॥ 17 ॥
তদগ্নিনা পুনর্ব্যাপ্তং সংজাতশ্শ্বেতপর্বতঃ ।
দিব্যং শরবণং চৈব পাবকাদিত্যসন্নিভম্ ॥ 18 ॥
যত্র জাতো মহাতেজাঃ কার্তিকেযোঽগ্নিসংভবঃ ।
অথোমাং চ শিবং চৈব দেবাস্সর্ষিগণাস্তদা ।
পূজযামাসুরত্যর্থং সুপ্রীতমনসস্ততঃ ॥ 19 ॥
অথ শৈলসুতা রাম ত্রিদশানিদমব্রবীত্ ।
সমন্যুরশপত্সর্বান্ ক্রোধসংরক্তলোচনা ॥ 20 ॥
যস্মান্নিবারিতা চৈব সংগতিঃ পুত্রকাম্যযা ।
অপত্যং স্বেষু দারেষু তস্মান্নোত্পাদযিষ্যথ ॥ 21 ॥
অদ্যপ্রভৃতি যুষ্মাকমপ্রজাস্সংতু পত্নযঃ ॥ 22 ॥
এবমুক্ত্বাসুরান্ সর্বান্ শশাপ পৃথিবীমপি ।
অবনে নৈকরূপা ত্বং বহুভার্যা ভবিষ্যসি ॥ 23 ॥
ন চ পুত্রকৃতাং প্রীতিং মত্ক্রোধকলুষীকৃতা ।
প্রাপ্স্যসি ত্বং সুদুর্মেধে মম পুত্রমনিচ্ছতী ॥ 24 ॥
তান্ সর্বান্ ব্রীডিতান্ দৃষ্ট্বা সুরান্সুরপতিস্তদা ।
গমনাযোপচক্রাম দিশং বরুণপালিতাম্ ॥ 25 ॥
স গত্বা তপ আতিষ্ঠত্পার্শ্বে তস্যোত্তরে গিরৌ ।
হিমবত্প্রভবে শৃংগে সহ দেব্যা মহেশ্বরঃ ॥ 26 ॥
এষ তে বিস্তরো রাম শৈলপুত্র্যা নিবেদিতঃ ।
গংগাযাঃ প্রভবং চৈব শৃণু মে সহলক্ষ্মণঃ ॥ 27 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে ষট্ত্রিংশস্সর্গঃ ॥
