শ্রীমদ্বাল্মীকীয রামাযণে সুংদরকাংডম্ ।
অথ একপংচাশস্সর্গঃ ।
তং সমীক্ষ্য মহাসত্ত্বং সত্ত্ববান্হরিসত্তমঃ ।
বাক্যমর্থবদব্যগ্রস্তমুবাচ দশাননম্ ॥ 1 ॥
অহং সুগ্রীবসংদেশাদিহ প্রাপ্তস্তবালযম্ ।
রাক্ষসেংদ্র হরীশস্ত্বাং ভ্রাতা কুশলমব্রবীত্ ॥ 2 ॥
ভ্রাতুশ্শৃণু সমাদেশং সুগ্রীবস্য মহাত্মনঃ ।
ধর্মার্থোপহিতং বাক্যমিহ চামুত্র চ ক্ষমম্ ॥ 3 ॥
রাজা দশরথো নাম রথকুংজরবাজিমান্ ।
পিতেব বংধুর্লোকস্য সুরেশ্বরসমদ্যুতিঃ ॥ 4 ॥
জ্যেষ্ঠস্তস্য মহাবাহুঃ পুত্রঃ প্রিযকরঃ প্রভুঃ ।
পিতুর্নিদেশান্নিষ্ক্রাংতঃ প্রবিষ্টো দংডকাবনম্ ॥ 5 ॥
লক্ষ্মণেন সহ ভ্রাত্রা সীতযা চাপি ভার্যযা ।
রামো নাম মহাতেজা ধর্ম্যং পংথানমাস্থিতঃ ॥ 6 ॥
তস্য ভার্যা বনে নষ্টা সীতা পতিমনুব্রতা ।
বৈদেহস্য সুতা রাজ্ঞো জনকস্য মহাত্মনঃ ॥ 7 ॥
স মার্গমাণস্তাং দেবীং রাজপুত্রঃ সহানুজঃ ।
ঋশ্যমূকমনুপ্রাপ্তঃ সুগ্রীবেণ সমাগতঃ ॥ 8 ॥
তস্য তেন প্রতিজ্ঞাতং সীতাযাঃ পরিমার্গণম্ ।
সুগ্রীবস্যাপি রামেণ হরিরাজ্যং নিবেদিতম্ ॥ 9 ॥
ততস্তেন মৃধে হত্বা রাজপুত্রেণ বালিনম্ ।
সুগ্রীবঃ স্থাপিতো রাজ্যে হর্যৃক্ষাণাং গণেশ্বরঃ ॥ 10 ॥
ত্বযা বিজ্ঞাতপূর্বশ্চ বালী বানরপুংগবঃ ।
রামেণ নিহতস্সংখ্যে শরেণৈকেন বানরঃ ॥ 11 ॥
স সীতামার্গণে ব্যগ্রস্সুগ্রীবঃ সত্যসংগরঃ ।
হরীন্ সংপ্রেষযামাস দিশস্সর্বা হরীশ্বরঃ ॥ 12 ॥
তাং হরীণাং সহস্রাণি শতানি নিযুতানি চ ।
দিক্ষু সর্বাসু মার্গংতে হ্যধশ্চোপরি চাংবরে ॥ 13 ॥
বৈনতেযসমাঃ কেচিত্কেচিত্তত্রানিলোপমাঃ ।
অসংগগতযশশীঘ্রা হরিবীরা মহাবলাঃ ॥ 14 ॥
অহং তু হনুমান্নাম মারুতস্যৌরসস্সুতঃ ।
সীতাযাস্তু কৃতে তূর্ণং শতযোজনমাযতম্ ॥ 15 ॥
সমুদ্রং লংঘযিত্বৈব তাং দিদৃক্ষুরিহাগতঃ ।
ভ্রমতা চ মযা দৃষ্টা গৃহে তে জনকাত্মজা ॥ 16 ॥
তদ্ভবান্ দৃষ্টধর্মার্থস্তপঃকৃতপরিগ্রহঃ ।
পরদারান্ মহাপ্রাজ্ঞ নোপরোদ্ধুং ত্বমর্হসি ॥ 17 ॥
ন হি ধর্মবিরুদ্ধেষু বহ্বপাযেষু কর্মসু ।
মূলঘাতিষু সজ্জংতে বুদ্ধিমংতো ভবদ্বিধাঃ ॥ 18 ॥
কশ্চ লক্ষ্মণমুক্তানাং রামকোপানুবর্তিনাম্ ।
শরাণামগ্রতঃ স্থাতুং শক্তো দেবাসুরেষ্বপি ॥ 19 ॥
ন চাপি ত্রিষু লোকেষু রাজন্বিদ্যেত কশ্চন ।
রাঘবস্য ব্যলীকং যঃ কৃত্বা সুখমবাপ্নুযাত্ ॥ 20 ॥
তত্ ত্রিকালহিতং বাক্যং ধর্ম্যমর্থানুবংধি চ ।
মন্যস্ব নরদেবায জানকী প্রতিদীযতাম্ ॥ 21 ॥
দৃষ্টা হীযং মযা দেবী লব্ধং যদিহ দুর্লভম্ ।
উত্তরং কর্ম যচ্ছেষং নিমিত্তং তত্র রাঘবঃ ॥ 22 ॥
লক্ষিতেযং মযা সীতা তথা শোকপরাযণা ।
গৃহ্য যাং নাভিজানাসি পংচাস্যামিব পন্নগীম্ ॥ 23 ॥
নেযং জরযিতুং শক্যা সাসুরৈরমরৈরপি ।
বিষসংসৃষ্টমত্যর্থং ভুক্তমন্নমিবৌজসা ॥ 24 ॥
তপস্সংতাপলব্ধস্তে যোঽযং ধর্মপরিগ্রহঃ ।
ন স নাশযিতুং ন্যায্য আত্মপ্রাণপরিগ্রহঃ ॥ 25 ॥
অবধ্যতাং তপোভির্যাং ভবান্ সমনুপশ্যতি ।
আত্মনঃ সাসুরৈর্দেবৈর্হেতুস্তত্রাপ্যযং মহান্ ॥ 26 ॥
সুগ্রীবো ন হি দেবোঽযং নাসুরো ন চ রাক্ষসঃ ।
ন দানবো ন গংধর্বো ন যক্ষো ন চ পন্নগঃ ॥ 27 ॥
তস্মাত্প্রাণপরিত্রাণং কথং রাজন্করিষ্যসি ।
ন তু ধর্মোপসংহারমধর্মফলসংহিতম্ ॥ 28 ॥
তদেব ফলমন্বেতি ধর্মশ্চাধর্মনাশনঃ ।
প্রাপ্তং ধর্মফলং তাবদ্ভবতা নাত্র সংশযঃ ।
ফলমস্যাপ্যধর্মস্য ক্ষিপ্রমেব প্রপত্স্যসে ॥ 29 ॥
জনস্থানবধং বুদ্ধ্বা বুদ্ধ্বা বালিবধং তথা ॥ 30 ॥
রামসুগ্রীবসখ্যং চ বুধ্যস্ব হিতমাত্মনঃ ।
কামং খল্বহমপ্যেকস্সবাজিরথকুংজরাম্ ॥ 31 ॥
লংকাং নাশযিতুং শক্তস্তস্যৈষ তু ন নিশ্চযঃ ।
রামেণ হি প্রতিজ্ঞাতং হর্যৃক্ষগণসন্নিধৌ ॥ 32 ॥
উত্সাদনমমিত্রাণাং সীতা যৈস্তু প্রধর্ষিতা ।
অপকুর্বন্ হি রামস্য সাক্ষাদপি পুরংদরঃ ॥ 33 ॥
ন সুখং প্রাপ্নুযাদন্যঃ কিং পুনস্ত্বদ্বিধো জনঃ ।
যাং সীতেত্যভিজানাসি যেযং তিষ্ঠতি তে বশে ॥ 34 ॥
কালরাত্রীতি তাং বিদ্ধি সর্বলংকাবিনাশিনীম্ ।
তদলং কালপাশেন সীতাবিগ্রহরূপিণা ॥ 35 ॥
স্বযং স্কংধাবসক্তেন ক্ষেমমাত্মনি চিংত্যতাম্ ।
সীতাযাস্তেজসা দগ্ধাং রামকোপপ্রপীডিতাম্ ॥ 36 ॥
দহ্যমানামিমাং পশ্য পুরীং সাট্টপ্রতোলিকাম্ ।
স্বানি মিত্রাণি মংত্রীংশ্চ জ্ঞাতীন্ ভ্রাত্রূন্ সুতান্ হিতান্ ॥ 37 ॥
ভোগাংদারাংশ্চ লংকাং চ মা বিনাশমুপানয ।
সত্যং রাক্ষসরাজেংদ্র শৃণুষ্ব বচনং মম ॥ 38 ॥
রামদাসস্য দূতস্য বানরস্য বিশেষতঃ ।
সর্বান্ লোকান্ সুসংহৃত্য সভূতান্ সচরাচরান্ ॥ 39 ॥
পুনরেব তথা স্রষ্টুং শক্তো রামো মহাযশাঃ ।
দেবাসুরনরেংদ্রেষু যক্ষরক্ষোগণেষু চ ॥ 40 ॥
বিদ্যাধরেষু সর্বেষু গংধর্বেষূরগেষু চ ।
সিদ্ধেষু কিন্নরেংদ্রেষু পতত্রিষু চ সর্বতঃ ॥ 41 ॥
সর্বভূতেষু সর্বত্র সর্বকালেষু নাস্তি সঃ ।
যো রামং প্রতিযুধ্যেত বিষ্ণুতুল্যপরাক্রমম্ ॥ 42 ॥
সর্বলোকেশ্বরস্যৈবং কৃত্বা বিপ্রিযমুত্তমম্ ।
রামস্য রাজসিংহস্য দুর্লভং তব জীবিতম্ ॥ 43 ॥
দেবাশ্চ দৈত্যাশ্চ নিশাচরেংদ্র গংধর্ববিদ্যাধরনাগযক্ষাঃ ।
রামস্য লোকত্রযনাযকস্য স্থাতুং ন শক্তাস্সমরেষু সর্বে ॥ 44 ॥
ব্রহ্মা স্বযংভূশ্চতুরাননো বা রুদ্রস্ত্রিণেত্রস্ত্রিপুরাংতকো বা ।
ইংদ্রো মহেংদ্রস্সুরনাযকো বা ত্রাতুং ন শক্তা যুধি রামবধ্যম্ ॥ 45 ॥
স সৌষ্ঠবোপেতমদীনবাদিনঃ কপের্নিশম্যাপ্রতিমোঽপ্রিযং বচঃ ।
দশাননঃ কোপবিবৃত্তলোচনঃ সমাদিশত্তস্য বধং মহাকপেঃ ॥ 46 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে একপংচাশস্সর্গঃ ॥
