শ্রীমদ্বাল্মীকীয রামাযণে বালকাংডম্ ।
অথ তৃতীযস্সর্গঃ ।
শ্রুত্বা বস্তু সমগ্রং তদ্ধর্মাত্মা ধর্মসংহিতম্ ।
ব্যক্তমন্বেষতে ভূযো যদ্বৃত্তং তস্য ধীমতঃ ॥ 1 ॥
উপস্পৃশ্যোদকং সম্যগ্মুনিস্স্থিত্বা কৃতাংজলিঃ ।
প্রাচীনাগ্রেষু দর্ভেষু ধর্মেণান্বেষতে গতিম্ ॥ 2 ॥
রামলক্ষ্মণসীতাভী রাজ্ঞা দশরথেন চ ।
সভার্যেণ সরাষ্ট্রেণ যত্প্রাপ্তং তত্র তত্ত্বতঃ ॥ 3 ॥
হসিতং ভাষিতং চৈব গতির্যা যচ্চ চেষ্টিতম্ ।
তত্সর্বং ধর্মবীর্যেণ যথাবত্সংপ্রপশ্যতি ॥ 4 ॥
স্ত্রীতৃতীযেন চ তদা যত্প্রাপ্তং চরতা বনে ।
সত্যসংধেন রামেণ তত্সর্বং চান্ববেক্ষিতম্ ॥ 5 ॥
ততঃ পশ্যতি ধর্মাত্মা তত্সর্বং যোগমাস্থিতঃ ।
পুরা যত্তত্র নির্বৃত্তং পাণাবামলকং যথা ॥ 6 ॥
তত্সর্বং তত্ত্বতো দৃষ্ট্বা ধর্মেণ স মহাদ্যুতিঃ ।
অভিরামস্য রামস্য চরিতং কর্তুমুদ্যতঃ ॥ 7 ॥
কামার্থগুণসংযুক্তং ধর্মার্থগুণবিস্তরম্ ।
সমুদ্রমিব রত্নাঢ্যং সর্বশ্রুতিমনোহরম্ ॥ 8 ॥
স যথা কথিতং পূর্বং নারদেন মহর্ষিণা ।
রঘুবংশস্য চরিতং চকার ভগবানৃষিঃ ॥ 9 ॥
জন্ম রামস্য সুমহদ্বীর্যং সর্বানুকূলতাম্ ।
লোকস্য প্রিযতাং ক্ষাংতিং সৌম্যতাং সত্যশীলতাম্ ॥ 10 ॥
নানাচিত্রকথাশ্চান্যা বিশ্বামিত্রসমাগমে ।
জানক্যাশ্চ বিবাহং চ ধনুষশ্চ বিভেদনম্ ॥ 11 ॥
রামরামবিবাদং চ গুণাংদাশরথেস্তথা ।
তথাঽভিষেকং রামস্য কৈকেয্যা দুষ্টভাবতাম্ ॥ 12 ॥
বিঘাতং চাভিষেকস্য রাঘবস্য বিবাসনম্ ।
রাজ্ঞশ্শোকবিলাপং চ পরলোকস্য চাশ্রযম্ ॥ 13 ॥
প্রকৃতীনাং বিষাদং চ প্রকৃতীনাং বিসর্জনম্ ।
নিষাদাধিপসংবাদং সূতোপাবর্তনং তথা ॥ 14 ॥
গংগাযাশ্চাপি সংতারং ভরদ্বাজস্য দর্শনম্ ।
ভরদ্বাজাভ্যনুজ্ঞানাচ্চিত্রকূটস্য দর্শনম্ ॥ 15 ॥
বাস্তুকর্ম নিবেশং চ ভরতাগমনং তথা ।
প্রসাদনং চ রামস্য পিতুশ্চ সলিলক্রিযাম্ ॥ 16 ॥
পাদুকাগ্র্যাভিষেকং চ নংদিগ্রামনিবাসনম্ ।
দংডকারণ্যগমনং বিরাধস্য বধং তথা ॥ 17 ॥
দর্শনং শরভংগস্য সুতীক্ষ্ণেন সমাগমম্ ।
অনসূযাসহাস্যামপ্যংগরাগস্য চার্পণম্ ॥ 18 ॥
অগস্ত্যদর্শনং চৈব জটাযোরভিসংগমম্ ।
পংচবট্যাশ্চ গমনং শূর্পণখ্যাশ্চ দর্শনম্ ॥ 19 ॥
শূর্পণখ্যাশ্চ সংবাদং বিরূপকরণং তথা ।
বধং খরত্রিশিরসোরুত্থানং রাবণস্য চ ॥ 20 ॥
মারীচস্য বধং চৈব বৈদেহ্যা হরণং তথা ।
রাঘবস্য বিলাপং চ গৃধ্ররাজনিবর্হণম্ ॥ 21 ॥
কবংধদর্শনং চাপি পংপাযাশ্চাপি দর্শনম্ ।
শবর্যাঃ দর্শনং চৈব হনূমদ্দর্শনং তথা ॥ 22 ॥
ঋশ্যমূকস্য গমনং সুগ্রীবেণ সমাগমম্ ।
প্রত্যযোত্পাদনং সখ্যং বালিসুগ্রীববিগ্রহম্ ॥ 23 ॥
বালিপ্রমথনং চৈব সুগ্রীবপ্রতিপাদনম্ ।
তারাবিলাপং সমযং বর্ষরাত্রনিবাসনম্ ॥ 24 ॥
কোপং রাঘবসিংহস্য বলানামুপসংগ্রহম্ ।
দিশঃ প্রস্থাপনং চৈব পৃথিব্যাশ্চ নিবেদনম্ ॥ 25 ॥
অংগুলীযকদানং চ ঋক্ষস্য বিলদর্শনম্ ।
প্রাযোপবেশনং চাপি সংপাতেশ্চাপি দর্শনম্ ॥ 26 ॥
পর্বতারোহণং চাপি সাগরস্যাপি লংঘনম্ ।
সমুদ্রবচনাচ্চৈব মৈনাকস্য চ দর্শনম্ ॥ 27 ॥
সিংহিকাযাশ্চ নিধনং লংকামলযদর্শনম্ ।
রাত্রৌ লংকাপ্রবেশং চ একস্যাথ বিচিংতনম্ ॥ 28 ॥
দর্শনং রাবণস্যাপি পুষ্পকস্য চ দর্শনম্ ।
আপানভূমিগমনমবরোধস্য দর্শনম্ ॥ 29 ॥
অশোকবনিকাযানং সীতাযাশ্চপি দর্শনম্ ।
অভিজ্ঞানপ্রদানং চ রাবণস্য চ দর্শনম্ ॥ 30 ॥
রাক্ষসীতর্জনং চৈব ত্রিজটাস্বপ্নদর্শনম্ ।
মণিপ্রদানং সীতাযা বৃক্ষভংগং তথৈব চ ॥ 31 ॥
রাক্ষসীবিদ্রবং চৈব কিংকরাণাং নিবর্হণম্ ।
গ্রহণং বাযুসূনোশ্চ লংকাদাহাভিগর্জনম্ ॥ 32 ॥
প্রতিপ্লবনমেবাথ মধূনাং হরণং তথা ।
রাঘবাশ্বাসনং চাপি মণিনির্যাতনং তথা ॥ 33 ॥
সংগমং চ সমুদ্রেণ নলসেতোশ্চ বংধনম্ ।
প্রতারং চ সমুদ্রস্য রাত্রৌ লংকাবরোধনম্ ॥ 34 ॥
বিভীষণেন সংসর্গং বধোপাযনিবেদনম্ ।
কুংভকর্ণস্য নিধনং মেঘনাদনিবর্হণম্ ॥ 35 ॥
রাবণস্য বিনাশং চ সীতাবাপ্তিমরেঃ পুরে ।
বিভীষণাভিষেকং চ পুষ্পকস্য চ দর্শনম্ ॥ 36 ॥
অযোধ্যাযাশ্চ গমনং ভরতেন সমাগমম্ ।
রামাভিষেকাভ্যুদযং সর্বসৈন্যবিসর্জনম্ ।
স্বরাষ্ট্ররংজনং চৈব বৈদেহ্যাশ্চ বিসর্জনম্ ॥ 37 ॥
অনাগতং চ যত্কিংচিদ্রামস্য বসুধাতলে ।
তচ্চকারোত্তরে কাব্যে বাল্মীকির্ভগবানৃষিঃ ॥ 38 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে তৃতীযস্সর্গঃ ॥
