শ্রীমদ্বাল্মীকীয রামাযণে সুংদরকাংডম্ ।
অথ ষট্ত্রিংশস্সর্গঃ ।
ভূয এব মহাতেজা হনূমান্পবনাত্মজঃ ।
অব্রবীত্প্রশ্রিতং বাক্যং সীতাপ্রত্যযকারণাত্ ॥ 1 ॥
বানরোঽহং মহাভাগে দূতো রামস্য ধীমতঃ ।
রামনামাংকিতং চেদং পশ্য দেব্যংগুলীযকম্ ॥ 2 ॥
প্রত্যযার্থং তবাঽনীতং তেন দত্তং মহাত্মনা ।
সমাশ্বসিহি ভদ্রং তে ক্ষীণদুঃখফলা হ্যসি ॥ 3 ॥
গৃহীত্বা প্রেক্ষমাণা সা ভর্তুঃ করবিভূষণম্ ।
ভর্তারমিব সংপ্রাপ্তা জানকী মুদিতাঽভবত্ ॥ 4 ॥
চারু তদ্বদনং তস্যাস্তাম্রশুক্লাযতেক্ষণম্ ।
অশোভত বিশালাক্ষ্যা রাহুমুক্ত ইবোডুরাট্ ॥ 5 ॥
ততস্সা হ্রীমতী বালা ভর্তৃসংদেশহর্ষিতা ।
পরিতুষ্টা প্রিযং কৃত্বা প্রশশংস মহাকপিম্ ॥ 6 ॥
বিক্রাংতস্ত্বং সমর্থস্ত্বং প্রাজ্ঞস্ত্বং বানরোত্তম ।
যেনেদং রাক্ষসপদং ত্বযৈকেন প্রধর্ষিতম্ ॥ 7 ॥
শতযোজনবিস্তীর্ণ স্সাগরো মকরালযঃ ।
বিক্রমশ্লাঘনীযেন ক্রমতা গোষ্পদীকৃতঃ ॥ 8 ॥
ন হি ত্বাং প্রাকৃতং মন্যে বানরং বানরর্ষভ ।
যস্য তে নাস্তি সংত্রাসো রাবণান্নাপি সংভ্রমঃ ॥ 9 ॥
অর্হসে চ কপিশ্রেষ্ঠ মযা সমভিভাষিতুম্ ।
যদ্যসি প্রেষিতস্তেন রামেণ বিদিতাত্মনা ॥ 10 ॥
প্রেষযিষ্যতি দুর্ধর্ষো রামো ন হ্যপরীক্ষিতম্ ।
পরাক্রমমবিজ্ঞায মত্সকাশং বিশেষতঃ ॥ 11 ॥
দিষ্ট্যা চ কুশলী রামো ধর্মাত্মা সত্যসংগরঃ ।
লক্ষ্মণশ্চ মহাতেজাস্সুমিত্রানংদবর্ধনঃ ॥ 12 ॥
কুশলী যদি কাকুত্স্থঃ কিং নু সাগরমেখলাম্ ।
মহীং দহতি কোপেন যুগাংতাগ্নিরিবোত্থিতঃ ॥ 13 ॥
অথবা শক্তিমংতৌ তৌ সুরাণামপি নিগ্রহে ।
মমৈব তু ন দুঃখানামস্তি মন্যে বিপর্যযঃ ॥ 14 ॥
কচ্চিন্ন ব্যথিতো রামঃ কচ্চিন্ন পরিতপ্যতে ।
উত্তরাণি চ কার্যাণি কুরুতে পুরুষোত্তমঃ ॥ 15 ॥
কচ্চিন্ন দীন স্সংভ্রাংতঃ কার্যেষু ন চ মুহ্যতি ।
কচ্চিত্পুরুষকার্যাণি কুরুতে নৃপতেস্সুতঃ ॥ 16 ॥
দ্বিবিধং ত্রিবিধোপাযমুপাযমপি সেবতে ।
বিজিগীষুস্সুহৃত্কচ্চিন্মিত্রেষু চ পরংতপঃ ॥ 17 ॥
কচ্চিন্মিত্রাণি লভতে মিত্রৈশ্চাপ্যভিগম্যতে ।
কচ্চিত্কল্যাণমিত্ত্রশ্চ মিত্রত্ত্রৈশ্চাপি পুরস্কৃতঃ ॥ 18 ॥
কচ্চিদাশাস্তি দেবানাং প্রসাদং পার্থিবাত্মজঃ ।
কচ্চিত্পুরুষকারং চ দৈবং চ প্রতিপদ্যতে ॥ 19 ॥
কচ্চিন্ন বিগতস্নেহঃ প্রবাসান্মযি রাঘবঃ ।
কচ্চিন্মাং ব্যসনাদস্মান্মোক্ষযিষ্যতি বানর ॥ 20 ॥
সুখানামুচিতো নিত্যমসুখানামনৌচিতঃ ।
দুঃখমুত্তরমাসাদ্য কচ্চিদ্রামো ন সীদতি ॥ 21 ॥
কৌসল্যাযাস্তথা কচ্চিত্সুমিত্রাযাস্তথৈব চ ।
অভীক্ষ্ণং শ্রূযতে কচ্চিত্কুশলং ভরতস্য চ ॥ 22 ॥
মন্নিমিত্তেন মানার্হঃ কচ্চিচ্ছোকেন রাঘবঃ ।
কচ্চিন্নান্যমনা রামঃ কচ্চিন্মাং তারযিষ্যতি ॥ 23 ॥
কচ্চিদক্ষৌহিণীং ভীমাং ভরতো ভ্রাতৃবত্সলঃ ।
ধ্বজিনীং মংত্রিভির্গুপ্তাং প্রেষযিষ্যতি মত্কৃতে ॥ 24 ॥
বানরাধিপতিশ্শীমান্সুগ্রীবঃ কচ্চিদেষ্যতি ।
মত্কৃতে হরিভির্বীরৈর্বৃতো দংতনখাযুধৈঃ ॥ 25 ॥
কচ্চিচ্ছ লক্ষ্মণশ্শূরস্সুমিত্রানংদবর্ধনঃ ।
অস্ত্রবিচ্ছরজালেন রাক্ষসান্বিধমিষ্যতি ॥ 26 ॥
রৌদ্রেণ কচ্চিদস্ত্রেণ জ্বলতা নিহতং রণে ।
দ্রক্ষ্যাম্যল্পেন কালেন রাবণং সসুহৃজ্জনম্ ॥ 27 ॥
কচ্চিন্ন তদ্ধেমসমানবর্ণং তস্যাননং পদ্মসমানগংধি ।
মযা বিনা শুষ্যতি শোকদীনং জলক্ষযে পদ্মমিবাতপেন ॥ 28 ॥
ধর্মাপদেশাত্ত্যজতশ্চ রাজ্যং মাং চাপ্যরণ্যং নযতঃ পদাতিম্ ।
নাসীদ্ব্যথা যস্য ন ভীর্ন শোকঃ কচ্চিত্স ধৈর্যং হৃদযে করোতি ॥ 29 ॥
ন চাস্য মাতা ন পিতা চ নান্যঃ স্নেহাদ্বিশিষ্টোঽস্তি মযা সমো বা ।
তাবত্ত্বহং দূত জিজীবিষেযং যাবত্প্রবৃত্তিং শৃণুযাং প্রিযস্য ॥ 30 ॥
ইতীব দেবী বচনং মহার্থং তং বানরেংদ্রং মধুরার্থমুক্ত্বা ।
শ্রোতুং পুনস্তস্য বচোঽভিরামং রামার্থযুক্তং বিররাম রামা ॥ 31 ॥
সীতাযা বচনং শ্রুত্বা মারুতির্ভীমবিক্রমঃ ।
শিরস্যংজলিমাধায বাক্যমুত্তরমব্রবীত্ ॥ 32 ॥
ন ত্বামিহস্থাং জানীতে রামঃ কমললোচনে ।
তেন ত্বাং নানযত্যাশু শচীমিব পুরংদরঃ ॥ 33 ॥
শ্রুত্বৈব তু বচো মহ্যং ক্ষিপ্রমেষ্যতি রাঘবঃ ।
চমূং প্রকর্ষন্মহতীং হর্যৃক্ষগণসংকুলাম্ ॥ 34 ॥
বিষ্টংভযিত্বা বাণৌঘৈরক্ষোভ্যং বরুণালযম্ ।
করিষ্যতি পুরীং লংকাং কাকুত্স্থঃ শাংতরাক্ষসাম্ ॥ 35 ॥
তত্র যদ্যংতরা মৃত্যুর্যদি দেবাস্সহাসুরাঃ ।
স্থাস্যংতি পথি রামস্য স তানপি বধিষ্যতি ॥ 36 ॥
তবাদর্শনজেনার্যে শোকেন স পরিপ্লুতঃ ।
ন শর্ম লভতে রামস্সিংহার্দিত ইব দ্বিপঃ ॥ 37 ॥
মলযেন চ বিংধ্যেন মেরুণা মংদরেণ চ ।
দর্দুরেণ চ তে দেবি শপে মূলফলেন চ ॥ 38 ॥
যথা সুনযনং বল্গু বিংবোষ্ঠং চারু কুংডলম্ ।
মুখং দ্রক্ষ্যসি রামস্য পূর্ণচংদ্রমিবোদিতম্ ॥ 39 ॥
ক্ষিপ্রং দ্রক্ষ্যসি বৈদেহি রামং প্রস্রবণে গিরৌ ।
শতক্রতুমিবাসীনং নাগরাজস্য মূর্ধনি ॥ 40 ॥
ন মাংসং রাঘবো ভুঙক্তে ন চাঽপি মধু সেবতে ।
বন্যং সুবিহিতং নিত্যং ভক্তমশ্নাতি পংচমম্ ॥ 41 ॥
নৈব দংশান্ন মশকান্ন কীটান্ন সরীসৃপান্ ।
রাঘবোঽপনযেদ্গাত্রাত্ত্বদ্গতেনাংতরাত্মনা ॥ 42 ॥
নিত্যং ধ্যানপরো রামো নিত্যং শোকপরাযণঃ ।
নান্যচ্চিংতযতে কিংচিত্স তু কামবশং গতঃ ॥ 43 ॥
অনিদ্রস্সততং রামস্সুপ্তোঽপি চ নরোত্তমঃ ।
সীতেতি মধুরাং বাণীং ব্যাহরন্প্রতিবুধ্যতে ॥ 44 ॥
দৃষ্ট্বা ফলং বা পুষ্পং বা যদ্বাঽন্যত্সুমনোহরম্ ।
বহুশো হা প্রিযেত্যেবং শ্বসংস্ত্বামভিভাষতে ॥ 45 ॥
স দেবি নিত্যং পরিতপ্যমান স্ত্বামেব সীতেত্যভিভাষমাণঃ ।
ধৃতব্রতো রাজসুতো মহাত্মা তবৈব লাভায কৃতপ্রযত্নঃ ॥ 46 ॥
সা রামসংকীর্তনবীতশোকা রামস্য শোকেন সমানশোকা ।
শরন্মুখে সাংবুদশেষচংদ্রা নিশেব বৈদেহসুতা বভূব ॥ 47 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে ষট্ত্রিংশস্সর্গঃ ॥
