শ্রীমদ্বাল্মীকীয রামাযণে বালকাংডম্ ।
অথ দ্বিতীযস্সর্গঃ ।
নারদস্য তু তদ্বাক্যং শ্রুত্বা বাক্যবিশারদঃ ।
পূজযামাস ধর্মাত্মা সহশিষ্যো মহামুনিঃ ॥ 1 ॥
যথাবত্পূজিতস্তেন দেবর্ষির্নারদস্তদা ।
আপৃষ্ট্বৈবাভ্যনুজ্ঞাতস্স জগাম বিহাযসম্ ॥ 2 ॥
স মুহূর্তং গতে তস্মিংদেবলোকং মুনিস্তদা ।
জগাম তমসাতীরং জাহ্নব্যাস্ত্ববিদূরতঃ ॥ 3 ॥
স তু তীরং সমাসাদ্য তমসাযা মহামুনিঃ ।
শিষ্যমাহ স্থিতং পার্শ্বে দৃষ্ট্বা তীর্থমকর্দমম্ ॥ 4 ॥
অকর্দমমিদং তীর্থং ভরদ্বাজ নিশাময ।
রমণীযং প্রসন্নাংবু সন্মনুষ্যমনো যথা ॥ 5 ॥
ন্যস্যতাং কলশস্তাত দীযতাং বল্কলং মম ।
ইদমেবাবগাহিষ্যে তমসাতীর্থমুত্তমম্ ॥ 6 ॥
এবমুক্তো ভরদ্বাজো বাল্মীকেন মহাত্মনা ।
প্রাযচ্ছত মুনেস্তস্য বল্কলং নিযতো গুরোঃ ॥ 7 ॥
স শিষ্যহস্তাদাদায বল্কলং নিযতেংদ্রিযঃ ।
বিচচার হ পশ্যংস্তত্সর্বতো বিপুলং বনম্ ॥ 8 ॥
তস্যাভ্যাশে তু মিথুনং চরংতমনপাযিনম্ ।
দদর্শ ভগবাংস্তত্র ক্রৌংচযোশ্চারুনিস্বনম্ ॥ 9 ॥
তস্মাত্তু মিথুনাদেকং পুমাংসং পাপনিশ্চযঃ ।
জঘান বৈরনিলযো নিষাদস্তস্য পশ্যতঃ ॥ 10 ॥
তং শোণিতপরীতাংগং বেষ্টমানং মহীতলে ।
ভার্যা তু নিহতং দৃষ্ট্বা রুরাব করুণাং গিরম্ ॥ 11 ॥
বিযুক্তা পতিনা তেন দ্বিজেন সহচারিণা ।
তাম্রশীর্ষেণ মত্তেন পত্রিণা সহিতেন বৈ ॥ 12 ॥
তদা তু তং দ্বিজং দৃষ্ট্বা নিষাদেন নিপাতিতম্ ।
ঋষের্ধর্মাত্মনস্তস্য কারুণ্যং সমপদ্যত ॥ 13 ॥
ততঃ করুণবেদিত্বাদধর্মোঽযমিতি দ্বিজঃ ।
নিশাম্য রুদতীং ক্রৌংচীমিদং বচনমব্রবীত্ ॥ 14 ॥
মা নিষাদ প্রতিষ্ঠাং ত্বমগমশ্শাশ্বতীস্সমাঃ ।
যত্ক্রৌংচমিথুনাদেকমবধীঃ কামমোহিতম্ ॥ 15 ॥
15 তস্যৈবং ব্রুবতশ্চিংতা বভূব হৃদি বীক্ষতঃ ।
শোকার্তেনাস্য শকুনেঃ কিমিদং ব্যাহৃতং মযা ॥ 16 ॥
চিংতযন্স মহাপ্রাজ্ঞশ্চকার মতিমান্মতিম্ ।
শিষ্যং চৈবাঽব্রবীদ্বাক্যমিদং স মুনিপুংগবঃ ॥ 17 ॥
পাদবদ্ধোঽক্ষরসমস্তংত্রীলযসমন্বিতঃ ।
শোকার্তস্য প্রবৃত্তো মে শ্লোকো ভবতু নান্যথা ॥ 18 ॥
শিষ্যস্তু তস্য ব্রুবতো মুনের্বাক্যমনুত্তমম্ ।
প্রতিজগ্রাহ সংহৃষ্টস্তস্য তুষ্টোঽভবদ্গুরুঃ ॥ 19 ॥
সোঽভিষেকং ততঃ কৃত্বা তীর্থে তস্মিন্যথাবিধি ।
তমেব চিংতযন্নর্থমুপাবর্তত বৈ মুনিঃ ॥ 20 ॥
ভরদ্বাজস্ততশ্শিষ্যো বিনীতশ্শ্রুতবান্মুনেঃ ।
কলশং পূর্ণমাদায পৃষ্ঠতোঽনুজগাম হ ॥ 21 ॥
স প্রবিশ্যাশ্রমপদং শিষ্যেণ সহ ধর্মবিত্ ।
উপবিষ্টঃ কথাশ্চান্যাশ্চকার ধ্যানমাস্থিতঃ ॥ 22 ॥
আজগাম ততো ব্রহ্মা লোককর্তা স্বযং প্রভুঃ ।
চতুর্মুখো মহাতেজা দ্রষ্টুং তং মুনিপুংগবম্ ॥ 23 ॥
বাল্মীকিরথ তং দৃষ্ট্বা সহসোত্থায বাগ্যতঃ ।
প্রাংজলিঃ প্রযতো ভূত্বা তস্থৌ পরমবিস্মিতঃ ॥ 24 ॥
পূজযামাস তং দেবং পাদ্যার্ঘ্যাসনবংদনৈঃ ।
প্রণম্য বিধিবচ্চৈনং পৃষ্ট্বাঽনামযমব্যযম্ ॥ 25 ॥
অথোপবিশ্য ভগবানাসনে পরমার্চিতে ।
বাল্মীকযে মহর্ষযে সংদিদেশাসনং ততঃ ॥ 26 ॥
ব্রহ্মণা সমনুজ্ঞাতস্সোঽপ্যুপাবিশদাসনে ।
উপবিষ্টে তদা তস্মিন্সর্বলোকপিতামহে ।
তদ্গতেনৈব মনসা বাল্মীকির্ধ্যানমাস্থিতঃ ॥ 27 ॥
পাপাত্মনা কৃতং কষ্টং বৈরগ্রহণবুদ্ধিনা ।
যস্তাদৃশং চারুরবং ক্রৌংচং হন্যাদকারণাত্ ॥ 28 ॥
শোচন্নেব মুহুঃ ক্রৌংচীমুপশ্লোকমিমং পুনঃ ।
জগাবংতর্গতমনা ভূত্বা শোকপরাযণঃ ॥ 29 ॥
তমুবাচ ততো ব্রহ্মা প্রহসন্মুনিপুংগবম্ ।
শ্লোক এব ত্বযা বদ্ধো নাত্র কার্যা বিচারণা ॥ 30 ॥
মচ্ছংদাদেব তে ব্রহ্মন্ প্রবৃত্তেযং সরস্বতী ।
রামস্য চরিতং সর্বং কুরু ত্বমৃষিসত্তম ॥ 31 ॥
ধর্মাত্মনো গুণবতো লোকে রামস্য ধীমতঃ ।
বৃত্তং কথয ধীরস্য যথা তে নারদাচ্ছ্রুতম্ ॥ 32 ॥
রহস্যং চ প্রকাশং চ যদ্বৃত্তং তস্য ধীমতঃ ।
রামস্য সহসৌমিত্রেঃ রাক্ষসানাং চ সর্বশঃ ॥ 33 ॥
বৈদেহ্যাশ্চৈব যদ্বৃত্তং প্রকাশং যদি বা রহঃ ।
তচ্চাপ্যবিদিতং সর্বং বিদিতং তে ভবিষ্যতি ॥ 34 ॥
ন তে বাগনৃতা কাব্যে কাচিদত্র ভবিষ্যতি ।
কুরু রামকথাং পুণ্যাং শ্লোকবদ্ধাং মনোরমাম্ ॥ 35 ॥
যাবত্ স্থাস্যংতি গিরযস্সরিতশ্চ মহীতলে ।
তাবদ্রামাযণকথা লোকেষু প্রচরিষ্যতি ॥ 36 ॥
যাবদ্রামাযণকথা ত্বত্কৃতা প্রচরিষ্যতি ।
তাবদূর্ধ্বমধশ্চ ত্বং মল্লোকেষু নিবত্স্যসি ॥ 37 ॥
ইত্যুক্ত্বা ভগবান্ব্রহ্মা তত্রৈবাংতরধীযত ।
ততস্সশিষ্যো ভগবান্মুনির্বিস্মযমাযযৌ ॥ 38 ॥
তস্য শিষ্যাস্ততস্সর্বে জগুশ্শ্লোকমিমং পুনঃ ।
মুহুর্মুহুঃ প্রীযমাণাঃ প্রাহুশ্চ ভৃশবিস্মিতাঃ ॥ 39 ॥
সমাক্ষরৈশ্চতুর্ভির্যঃ পাদৈর্গীতো মহর্ষিণা ।
সোঽনুব্যাহরণাদ্ভূযশ্শ্লোকশ্শ্লোকত্বমাগতঃ ॥ 40 ॥
তস্য বুদ্ধিরিযং জাতা বাল্মীকের্ভাবিতাত্মনঃ ।
কৃত্স্নং রামাযণং কাব্যমীদৃশৈঃ করবাণ্যহম্ ॥ 41 ॥
উদারবৃত্তার্থপদৈর্মনোরমৈঃ তদাস্য রামস্য চকারকীর্তিমান্ ।
সমাক্ষরৈশ্শ্লোকশতৈর্যশস্বিনো যশস্করং কাব্যমুদারধীর্মুনিঃ ॥ 42 ॥
তদুপগতসমাসসংধিযোগং সমমধুরোপনতার্থবাক্যবদ্ধম্ ।
রঘুবরচরিতং মুনিপ্রণীতং দশশিরসশ্চ বধং নিশামযধ্বম্ ॥ 43 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে দ্বিতীযস্সর্গঃ ॥
