শ্রীমদ্বাল্মীকীয রামাযণে অযোধ্যাকাংডম্ ।
অথ ষষ্টিতমস্সর্গঃ ।
ততো ভূতোপসৃষ্টেব বেপমানা পুনঃ পুনঃ ।
ধরণ্যাং গতসত্ত্বেব কৌসল্যা সূতমব্রবীত্ ॥ 1 ॥
নয মাং যত্র কাকুত্স্থস্সীতা যত্র চ লক্ষ্মণঃ ।
তান্বিনা ক্ষণমপ্যত্র জীবিতুং নোত্সহেহ্যহম্ ॥ 2 ॥
নিবর্তয রথং শীঘ্রং দংডকান্নয মামপি ।
অথ তান্নানুগচ্ছামি গমিষ্যামি যমক্ষযম্ ॥ 3 ॥
বাষ্পবেগোপহতযা স বাচা সজ্জমানযা ।
ইদমাশ্বাসযংদেবীং সূতঃ প্রাংজলিরব্রবীত্ ॥ 4 ॥
ত্যজ শোকং চ মোহং চ সংভ্রমং দুঃখজং তথা ।
ব্যবধূয চ সংতাপং বনে বত্স্যতি রাঘবঃ ॥ 5 ॥
লক্ষ্মণশ্চাপি রামস্য পাদৌ পরিচরন্বনে ।
আরাধযতি ধর্মজ্ঞঃ পরলোকং জিতেংদ্রিযঃ ॥ 6 ॥
বিজনেঽপি বনে সীতা বাসং প্রাপ্য গৃহেষ্বিব ।
বিস্রংভং লভতেঽভীতা রামে সন্ন্যস্তমানসা ॥ 7 ॥
নাস্যা দৈন্যং কৃতং কিংচিত্সুসূক্ষ্মমপি লক্ষ্যতে ।
উচিতেব প্রবাসানাং বৈদেহী প্রতিভাতি মা ॥ 8 ॥
নগরোপবনং গত্বা যথা স্মরমতে পুরা ।
তথৈব রমতে সীতা নির্জনেষু বনেষ্বপি ॥ 9 ॥
বালেব রমতে সীতাঽবালচংদ্রনিভাননা ।
রামা রামে হ্যধীনাত্মা বিজনেঽপি বনে সতী ॥ 10 ॥
তদ্গতং হৃদযং হ্যস্যাস্তদধীনং চ জীবিতম্ ।
অযোধ্যাপি ভবেঽত্তস্যা রামহীনা তদা বনম্ ॥ 11 ॥
পরিপৃচ্ছতি বৈদেহী গ্রামাংশ্চ নগরাণি চ ।
গতিং দৃষ্ট্বা নদীনাং চ পাদপান্বিবিধানপি ॥ 12 ॥
রামং হি লক্ষ্মণং বাপি পৃষ্ট্বা জানাতি জানকী ।
অযোধ্যা ক্রোশমাত্রে তু বিহারমিব সংশ্রিতা ॥ 13 ॥
ইদমেব স্মরাম্যস্যাস্সহসৈবোপজল্পিতম্ ।
কৈকেযী সংশ্রিতং বাক্যং নেদানীং প্রতিভাতি মা ॥ 14 ॥
ধ্বংসযিত্বা তু তদ্বাক্যং প্রমাদাত্পর্যুপত্স্থিতম্ ।
হ্লাদনং বচনং সূতো দেব্যা মধুরমব্রবীত্ ॥ 15 ॥
অধ্বনা বাতবেগেন সংভ্রমেণাঽঽতপেন চ ।
ন বিগচ্ছতি বৈদেহ্যাশ্চংদ্রাংশু সদৃশী প্রভা ॥ 16 ॥
সদৃশং শতপত্রস্য পূর্ণচংদ্রোপমপ্রভম্ ।
বদনং তদ্বদান্যাযা বৈদেহ্যা ন বিকংপতে ॥ 17 ॥
অলক্তরসরক্তাভাবলক্তরসবর্জিতৌ ।
অদ্যাপি চরণৌ তস্যাঃ পদ্মকোশসমপ্রভৌ ॥ 18 ॥
নূপুরোদ্ঘুষ্টহেলেব খেলং গচ্ছতি ভামিনী ।
ইদানীমপি বৈদেহী তদ্রাগান্নযস্ত ভূষণা ॥ 19 ॥
গজং বা বীক্ষ্য সিংহং বা ব্যাঘ্রং বা বনমাশ্রিতা ।
নাঽহারযতি সংত্রাসং বাহূ রামস্য সংশ্রিতা ॥ 20 ॥
ন শোচ্যাস্তে ন চাত্মনশ্শোচ্যো নাপি জনাধিপঃ ।
ইদং হি চরিতং লোকে প্রতিষ্ঠাস্যতি শাশ্বতম্ ॥ 21 ॥
বিধূয শোকং পরিহৃষ্টমানসা মহর্ষিযাতে পথি সুব্যবত্স্থিতাঃ ।
বনেরতা বন্যফলাশনাঃ পিতুশ্শুভাং প্রতিজ্ঞাং পরিপালযংতি তে ॥ 22 ॥
তথাপি সূতেন সুযুক্তবাদিনা নিবার্যমাণা সুতশোককর্শিতা ।
ন চৈব দেবী বিররাম কূজিতাত্প্রিযেতি পুত্রেতি চ রাঘবেতি চ ॥ 23 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে ষষ্টিতমস্সর্গঃ ॥
