শ্রীমদ্বাল্মীকীয রামাযণে অরণ্যকাংডম্ ।
অথ ষট্পংচাশস্সর্গঃ ।
সা তথোক্তা তু বৈদেহী নির্ভযা শোককর্শিতা ।
তৃণমংতরতঃ কৃত্বা রাবণং প্রত্যভাষত ॥ 1 ॥
রাজা দশরথো নাম ধর্মসেতুরিবাচলঃ ।
সত্যসংধঃ পরিজ্ঞাতো যস্য পুত্রস্সরাঘবঃ ॥ 2 ॥
রামো নাম স ধর্মাত্মা ত্রিষু লোকেষু বিশ্রুতঃ ।
দীর্ঘবাহুর্বিশালাক্ষো দৈবতং হি পতির্মম ॥ 3 ॥
ইক্ষ্বাকূণাং কুলে জাতস্সিংহস্কংধো মহাদ্যুতিঃ ।
লক্ষ্মণেন সহ ভ্রাত্রা যস্তে প্রাণান্হরিষ্যতি ॥ 4 ॥
প্রত্যক্ষং যদ্যহং তস্য ত্বযা স্যাং ধর্ষিতা বলাত্ ।
শযিতা ত্বং হতস্সংখ্যে জনস্থানে যথা খরঃ ॥ 5 ॥
য এতে রাক্ষসাঃ প্রোক্তা ঘোররূপা মহাবলাঃ ।
রাঘবে নির্বিষাস্সর্বে সুপর্ণে পন্নগা যথা ॥ 6 ॥
তস্য জ্যাবিপ্রমুক্তাস্তে শরাঃ কাংচনভূষণাঃ ।
শরীরং বিধমিষ্যংতি গংগাকূলমিবোর্মযঃ ॥ 7 ॥
অসুরৈর্বা সুরৈর্বা ত্বং যদ্যবধ্যোঽসি রাবণ ।
উত্পাদ্য সুমহদ্বৈরং জীবংস্তস্য ন মোক্ষ্যসে ॥ 8 ॥
স তে জীবিতশেষস্য রাঘবোঽংতকরো বলী ।
পশোর্যূপগতস্যেব জীবিতং তব দুর্লভম্ ॥ 9 ॥
যদি পশ্যেত্স রামস্ত্বাং রোষদীপ্তেন চক্ষুষা ।
রক্ষস্ত্বমদ্য নির্ধগ্ধো গচ্ছেস্সদ্যঃ পরাভবম্ ॥ 10 ॥
যশ্চংদ্রং নভসো ভূমৌ পাতযেন্নাশযেত বা ।
সাগরং শোষযেদ্বাপি স সীতাং মোচযেদিহ ॥ 11 ॥
গতাযুস্ত্বং গতশ্রীকো গতসত্ত্ব গতেংদ্রিযঃ ।
লংকা বৈধব্যসংযুক্তা ত্বত্কৃতেন ভবিষ্যতি ॥ 12 ॥
ন তে পাপমিদং কর্ম শুখোদর্কং ভবিষ্যতি ।
যাঽহং নীতা বিনাভাবং পতিপার্শ্বাত্ত্বযা বনে ॥ 13 ॥
স হি দৈবতসংযুক্তো মম ভর্তা মহাদ্যুতিঃ ।
নির্ভযো বীর্যমাশ্রিত্য শূন্যে বসতি দংডকে ॥ 14 ॥
স তে দর্পং বলং বীর্যমুত্সেকং চ তথাবিধম্ ।
অপনেষ্যতি গাত্রেভ্যশ্শরবর্ষেণ সংযুগে ॥ 15 ॥
যদা বিনাশো ভূতানাং দৃশ্যতে কালচোদিতঃ ।
তদা কার্যে প্রমাদ্যংতি নরাঃ কালবশং গতাঃ ॥ 16 ॥
মাং প্রধৃষ্য স তে কালঃ প্রাপ্তোঽযং রাক্ষসাধম ।
আত্মনো রাক্ষসানাং চ বধাযাংতঃপুরস্য চ ॥ 17 ॥
ন শক্যা যজ্ঞমধ্যস্থা বেদী সৃগ্ভাংডমংডিতা ।
দ্বিজাতিমংত্রপূতা চ চংডালেনাবমর্দিতুম্ ॥ 18 ॥
তথাঽহং ধর্মনিত্যস্য ধর্মপত্নী পতিব্রতা ।
ত্বযা স্পৃষ্টুং ন শক্যাস্মি রাক্ষসাধম পাপিনা ॥ 19 ॥
ক্রীডংতী রাজহংসেন পদ্মষংডেষু নিত্যদা ।
হংসী সা তৃণষংডস্থং কথং পশ্যেত মদ্গুকম্ ॥ 20 ॥
ইদং শরীরং নিস্সংজ্ঞং বংধ বা খাতযস্ব বা ।
নেদং শরীরং রক্ষযং মে জীবিতং বাপি রাক্ষস ॥ 21 ॥
ন তু শক্ষ্যাম্যুপক্রোশং পৃথিব্যাং দাতুমাত্মনঃ ।
এবমুক্ত্বা তু বৈদেহী ক্রোধাত্সুপরুষং বচঃ ॥ 22 ॥
রাবণং মৈথিলী তত্র পুনর্নোবাচ কিংচন ।
সীতাযা বচনং শ্রুত্বা পরুষং রোমহর্ষণম্ ॥ 23 ॥
প্রত্যুবাচ ততস্সীতাং ভযসংদর্শনং বচঃ ।
শৃণু মৈথিলি মদ্বাক্যং মাসাংদ্বাদশ ভামিনি ॥ 24 ॥
কালেনানেন নাভ্যেষি যদি মাং চারুহাসিনি ।
ততস্ত্বাং প্রাতরাশার্থং সূদাশ্ছেত্স্যংতি লেশশঃ ॥ 25 ॥
ইত্যুক্ত্বা পরুষং বাক্যং রাবণশ্শত্রুরাবণঃ ।
রাক্ষসীশ্চ ততঃ ক্রুদ্ধ ইদং বচনমব্রবীত্ ॥ 26 ॥
শীঘ্রমেব হি রাক্ষস্যো বিকৃতা ঘোরদর্শনাঃ ।
দর্পমস্যা বিনেষ্যধ্বং মাংসশোণিতভোজনাঃ ॥ 27 ॥
বচনাদেব তাস্তস্য সুঘোরা রাক্ষসীগণাঃ ।
কৃতপ্রাংজলযো ভূত্বা মৈথিলীং পর্যবারযন্ ॥ 28 ॥
স তাঃ প্রোবাচ রাজা তু রাবণো ঘোরদর্শনঃ ।
প্রচাল্য চরণোত্কর্ষৈর্দারযন্নিব মেদিনীম্ ॥ 29 ॥
অশোকবনিকামধ্যে মৈথিলী নীযতামিযম্ ।
তত্রেযং রক্ষ্যতাং গূঢং যুষ্মাভিঃ পরিবারিতা ॥ 30 ॥
তত্রৈনাং তর্জনৈর্ঘোরৈঃ পুনস্সাংত্বৈশ্চ মৈথিলীম্ ।
আনযধ্বং বশং সর্বা বন্যাং গজবধূমিব ॥ 31 ॥
ইতি প্রতিসমাদিষ্টা রাক্ষস্যো রাবণেন তাঃ ।
অশোকবনিকাং জগ্মুর্মৈথিলীং পরিগৃহ্য তু ॥ 32 ॥
সর্বকালফলৈর্বৃক্ষৈর্নানাপুষ্পফলৈর্বৃতাম্ ।
সর্বকালমদৈশ্চাপি দ্বিজৈস্সমুপসেবিতাম্ ॥ 33 ॥
সা তু শোকপরীতাংগী মৈথিলী জনকাত্মজা ।
রাক্ষসীবশমাপন্না ব্যাঘ্রীণাং হরিণী যথা ॥ 34 ॥
শোকেন মহতা গ্রস্তা মৈথিলী জনকাত্মজা ।
ন শর্ম লভতে ভীরুঃ পাশবদ্ধা মৃগী যথা ॥ 35 ॥
ন বিংদতে তত্র তু শর্ম মৈথিলী বিরূপনেত্রাভিরতীব তর্জিতা ।
পতিং স্মরংতী দযিতং চ দেবতং বিচেতনাঽভূদ্ভযশোকপীডিতা ॥ 36 ॥
ইত্যার্ষে শ্রীমদ্রামাযণে বাল্মীকীয আদিকাব্যে অরণ্যকাংডে ষট্পংচাশস্সর্গঃ ॥
