শ্রীমদ্বাল্মীকীয রামাযণে বালকাংডম্ ।
অথ ত্রিষষ্টিতমস্সর্গঃ ।
পূর্ণে বর্ষসহস্রে তু ব্রতস্নাতং মহামুনিম্ ।
অভ্যাগচ্ছন্ সুরাস্সর্বে তপঃ ফলচিকীর্ষবঃ ॥ 1 ॥
অব্রবীত্সুমহাতেজা ব্রহ্মা সুরুচিরং বচঃ ।
ঋষিস্ত্বমসি ভদ্রং তে স্বার্জিতৈঃ কর্মভিশ্শুভৈঃ ॥ 2 ॥
তমেবমুক্ত্বা দেবেশস্ত্রিদিবং পুনরভ্যগাত্ ।
বিশ্বামিত্রো মহাতেজা ভূযস্তেপে মহত্তপঃ ॥ 3 ॥
ততঃ কালেন মহতা মেনকা পরমাঽপ্সরাঃ ।
পুষ্করেষু নরশ্রেষ্ঠ স্নাতুং সমুপচক্রমে ॥ 4 ॥
তাং দদর্শ মহাতেজা মেনকাং কুশিকাত্মজঃ ।
রূপেণাপ্রতিমাং তত্র বিদ্যুতং জলদে যথা ॥ 5 ॥
দৃষ্ট্বা কংদর্পবশগো মুনিস্তামিদমব্রবীত্ ।
অপ্সরস্স্বাগতং তেঽস্তু বস চেহ মমাশ্রমে ॥ 6 ॥
অনুগৃহ্ণীষ্ব ভদ্রং তে মদনেন সুমোহিতম্ ।
ইত্যুক্তা সা বরারোহা তত্র বাসমথাকরোত্ ॥ 7 ॥
তস্যাং বসংত্যাং বর্ষাণি পংচ পংচ চ রাঘব ।
বিশ্বামিত্রাশ্রমে রাম সুখেন ব্যতিচক্রমুঃ ॥ 8 ॥
অথ কালে গতে তস্মিন্বিশ্বামিত্রো মহামুনিঃ ।
সব্রীড ইব সম্বৃত্তশ্চিংতাশোকপরাযণঃ ॥ 9 ॥
বুদ্ধির্মুনেস্সমুত্পন্না সামর্ষা রঘুনংদন ।
সর্বং সুরাণাং কর্মৈতত্তপোপহরণং মহত্ ॥ 10 ॥
অহোরাত্রাপদেশেন গতাস্সংবত্সরা দশ ।
কামমোহাভিভূতস্য বিঘ্নোঽযং সমুপস্থিতঃ ॥ 11 ॥
বিনিশ্শ্বসন্মুনিবরঃ পশ্চাত্তাপেন দুঃখিতঃ ।
ভীতামপ্সরসং দৃষ্ট্বা বেপংতীং প্রাংজলিং স্থিতাম্ ॥ 12 ॥
মেনকাং মধুরৈর্বাক্যৈর্বিসৃজ্য কুশিকাত্মজঃ ।
উত্তরং পর্বতং রাম বিশ্বামিত্রো জগাম হ ॥ 13 ॥
স কৃত্বা নৈষ্ঠিকীং বুদ্ধিং জেতুকামো মহাযশাঃ ।
কৌশিকীতীরমাসাদ্য তপস্তেপে সুদারুণম্ ॥ 14 ॥
তস্য বর্ষসহস্রং তু ঘোরং তপ উপাসতঃ ।
উত্তরে পর্বতে রাম দেবতানামভূদ্ভযম্ ॥ 15 ॥
আমংত্রযন্ সমাগম্য সর্বে সর্ষিগণা স্সুরাঃ ।
মহর্ষিশব্দং লভতাং সাধ্বযং কুশিকাত্মজঃ ॥ 16 ॥
দেবতানাং বচ শ্শৃত্বা সর্বলোকপিতামহঃ ।
অব্রবীন্মধুরং বাক্যং বিশ্বামিত্রং তপোধনম্ ॥ 17 ॥
মহর্ষে স্বাগতং বত্স তপসোগ্রেণ তোষিতঃ ।
মহত্ত্বমৃষিমুখ্যত্বং দদামি তব কৌশিক ॥ 18 ॥
ব্রহ্মণস্স বচশ্শ্রুত্বা সর্বলোকেশ্বরস্য হ ।
ন বিষণ্ণো ন সংতুষ্টো বিশ্বামিত্রস্তপোধনঃ ॥ 19 ॥
প্রাংজলিঃ প্রণতো ভূত্বা সর্বলোকপিতামহম্ ।
প্রত্যুবাচ ততো বাচং বিশ্বামিত্রো মহামুনিঃ ॥ 20 ॥
মহর্ষিশব্দমতুলং স্বার্জিতৈঃ কর্মভিশ্শুভৈঃ ।
যদি মে ভগবানাহ ততোঽহং বিজিতেংদ্রিযঃ ॥ 21 ॥
তমুবাচ ততো ব্রহ্মা ন তাবত্ ত্ত্বং জিতেংদ্রিযঃ ।
যতস্ব মুনিশার্দূল ইত্যুক্ত্বা ত্রিদিবং গতঃ ॥ 22 ॥
বিপ্রস্থিতেষু দেবেষু বিশ্বামিত্রো মহামুনিঃ ।
ঊর্ধ্ববাহুর্নিরালংবো বাযুভক্ষস্তপশ্চরন্ ॥ 23 ॥
ঘর্মে পংচতপা ভূত্বা বর্ষাস্বাকাশসংশ্রযঃ ।
শিশিরে সলিলস্থাযী রাত্র্যহানি তপোধনঃ ॥ 24 ॥
এবং বর্ষসহস্রং হি তপো ঘোরমুপাগমত্ ।
তস্মিন্ সংতপ্যমানে তু বিশ্বামিত্রে মহামুনৌ ॥ 25 ॥
সংভ্রমস্সুমহানাসীত্সুরাণাং বাসবস্য চ ।
রংভামপ্সরসং শক্র স্সহ সর্বৈর্মরুদ্গণৈঃ ।
উবাচাত্মহিতং বাক্যমহিতং কৌশিকস্য চ ॥ 26 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে ত্রিষষ্টিতমস্সর্গঃ ॥
