শ্রীমদ্বাল্মীকীয রামাযণে সুংদরকাংডম্ ।
অথ সপ্তপংচাশস্সর্গঃ ।
স চংদ্রকুমুদং রম্যং সার্ককারংডবং শুভম্ ।
তিষ্যশ্রবণকাদংবমভ্রশৈবালশাদ্বলম্ ॥ 1 ॥
পুনর্বসুমহামীনং লোহিতাংগমহাগ্রহম্ ।
ঐরাবতমহাদ্বীপং স্বাতিহংসবিলোলিতম্ ॥ 2 ॥
বাতসংঘাতজাতোর্মি চংদ্রাংশুশিশিরাংবুমত্ ।
ভুজংগযক্ষগংধর্বপ্রবুদ্ধকমলোত্পলম্ ॥ 3 ॥
হনুমান্মারুতগতির্মহানৌরিব সাগরম্ ।
অপারমপরিশ্রাংতঃ পুপ্লুবে গগনার্ণবম্ ॥ 4 ॥
গ্রসমান ইবাকাশং তারাধিপমিবোল্লিখন্ ।
হরন্নিব সনক্ষত্রং গগনং সার্কমংডলম্ ॥ 5 ॥
মারুতস্যাত্মজঃ শ্রীমান্কপির্ব্যোমচরো মহান্ ।
হনুমান্মেঘজালানি বিকর্ষন্নিব গচ্ছতি ॥ 6 ॥
পাংডুরারুণবর্ণানি নীলমাংজিষ্ঠকানি চ ।
হরিতারুণবর্ণানি মহাভ্রাণি চকাশিরে ॥ 7 ॥
প্রবিশন্নভ্রজালানি নিষ্পতংশ্চ পুনঃ পুনঃ ।
প্রচ্ছন্নশ্চ প্রকাশশ্চ চংদ্রমা ইব লক্ষ্যতে ॥ 8 ॥
বিবিধাভ্রঘনাপন্নগোচরো ধবলাংবরঃ ।
দৃশ্যাদৃশ্যতনুর্বীরস্তদা চংদ্রাযতেঽংবরে ॥ 9 ॥
তার্ক্ষ্যাযমাণো গগনে বভাসে বাযুনংদনঃ ।
দারযন্মেঘবৃংদানি নিষ্পতংশ্চ পুনঃ পুনঃ ॥ 10 ॥
নদন্নাদেন মহতা মেঘস্বনমহাস্বনঃ ।
প্রবরান্রাক্ষসান্ হত্বা নাম বিশ্রাব্য চাত্মনঃ ॥ 11 ॥
আকুলাং নগরীং কৃত্বা ব্যথযিত্বা চ রাবণম্ ।
অর্দযিত্বা বলং ঘোরং বৈদেহীমভিবাদ্য চ ॥ 12 ॥
আজগাম মহাতেজাঃ পুনর্মধ্যেন সাগরম্ ।
পর্বতেংদ্রং সুনাভং চ সমুপস্পৃশ্য বীর্যবান্ ॥ 13 ॥
জ্যামুক্ত ইব নারাচো মহাবেগোঽভ্যুপাগতঃ ।
স কিংচিদনুসংপ্রাপ্তঃ সমালোক্য মহাগিরিম্ ॥ 14 ॥
মহেংদ্রং মেঘসংকাশং ননাদ হরিপুংগবঃ ।
স পূরযামাস কপির্দিশো দশ সমংততঃ ॥ 15 ॥
নদন্নাদেন মহতা মেঘস্বনমহাস্বনঃ ।
স তং দেশমনুপ্রাপ্তঃ সুহৃদ্ধর্শনলালসঃ ॥ 16 ॥
ননাদ হরিশার্দূলো লাংগূলং চাপ্যকংপযত্ ।
তস্য নানদ্যমানস্য সুপর্ণচরিতে পথি ॥ 17 ॥
ফলতীবাস্য ঘোষেণ গগনং সার্কমংডলম্ ।
যে তু তত্রোত্তরে তীরে সমুদ্রস্য মহাবলাঃ ॥ 18 ॥
পূর্বং সংবিষ্ঠিতাশ্শূরা বাযুপুত্রদিদৃক্ষবঃ ।
মহতো বাতনুন্নস্য তোযদস্যেব গর্জিতম্ ॥ 19 ॥
শুশ্রুবুস্তে তদা ঘোষমূরুবেগং হনূমতঃ ।
তে দীনমনসস্সর্বে শুশ্রুবুঃ কাননৌকসঃ ॥ 20 ॥
বানরেংদ্রস্য নির্ঘোষং পর্জন্যনিনদোপমম্ ।
নিশম্য নদতো নাদং বানরাস্তে সমংততঃ ॥ 21 ॥
বভূবুরুত্সুকাস্সর্বে সুহৃদ্ধর্শনকাংক্ষিণঃ ।
জাংববান্ স হরিশ্রেষ্ঠঃ প্রীতিসংহৃষ্টমানসঃ ॥ 22 ॥
উপামংত্র্য হরীন্ সর্বানিদং বচনমব্রবীত্ ।
সর্বথা কৃতকার্যোঽসৌ হনুমান্নাত্র সংশযঃ ॥ 23 ॥
ন হ্যস্যাকৃতকার্যস্য নাদ এবংবিধো ভবেত্ ।
তস্য বাহূরুবেগং চ নিনাদং চ মহাত্মনঃ ॥ 24 ॥
নিশম্য হরযো হৃষ্টাঃ সমুত্পেতুস্ততস্ততঃ ।
তে নগাগ্রান্নগাগ্রাণি শিখরাচ্ছিখরাণি চ ॥ 25 ॥
প্রহৃষ্টাঃ সমপদ্যংত হনূমংতং দিদৃক্ষবঃ ।
তে প্রীতাঃ পাদপাগ্রেষু গৃহ্য শাখাঃ সুবিষ্ঠিতাঃ ॥ 26 ॥
বাসাংসীব প্রশাখাশ্চ সমাবিধ্যংত বানরাঃ ।
গিরিগহ্বরসংলীনো যথা গর্জতি মারুতঃ ॥ 27 ॥
এবং জগর্জ বলবান্ হনুমান্মারুতাত্মজঃ ।
তমভ্রঘনসংকাশমাপতংতং মহাকপিম্ ॥ 28 ॥
দৃষ্ট্বা তে বানরাস্সর্বে তস্থুঃ প্রাংজলযস্তদা ।
ততস্তু বেগবাংস্তস্য গিরের্গিরিনিভঃ কপিঃ ॥ 29 ॥
নিপপাত মহেংদ্রস্য শিখরে পাদপাকুলে ।
হর্ষেণাপূর্যমাণোঽসৌ রম্যে পর্বতনির্ঝরে ॥ 30 ॥
ছিন্নপক্ষ ইবাঽকাশাত্পপাত ধরণীধরঃ ।
ততস্তে প্রীতমনসস্সর্বে বানরপুংগবাঃ ॥ 31 ॥
হনুমংতং মহাত্মানং পরিবার্যোপতস্থিরে ।
পরিবার্য চ তে সর্বে পরাং প্রীতিমুপাগতাঃ ॥ 32 ॥
প্রহৃষ্টবদনা স্সর্বে তমরোগমুপাগতম্ ।
উপাযনানি চাদায মূলানি চ ফলানি চ ॥ 33 ॥
প্রত্যর্চযন্ হরিশ্রেষ্ঠং হরযো মারুতাত্মজম্ ।
হনুমাংস্তু গুরূন্ বৃদ্ধাংজাংববত্প্রমুখাংস্তদা ॥ 34 ॥
কুমারমংগদং চৈব সোঽবংদত মহাকপিঃ ।
স তাভ্যাং পূজিতঃ পূজ্যঃ কপিভিশ্চ প্রসাদিতঃ ॥ 35 ॥
দৃষ্টা সীতেতি বিক্রাংত স্সংক্ষেপেণ ন্যবেদযত্ ।
নিষসাদ চ হস্তেন গৃহীত্বা বালিনস্সুতম্ ॥ 36 ॥
রমণীযে বনোদ্দেশে মহেংদ্রস্য গিরেস্তদা ।
হনুমানব্রবীদ্ধৃষ্টস্তদা তান্বানরর্ষভান্ ॥ 37 ॥
অশোকবনিকাসংস্থা দৃষ্টা সা জনকাত্মজা ।
রক্ষমাণা সুঘোরাভী রাক্ষসীভিরনিংদিতা ॥ 38 ॥
একবেণীধরা বালা রামদর্শনলালসা ।
উপবাসপরিশ্রাংতা জটিলা মলিনা কৃশা ॥ 39 ॥
ততো দৃষ্টেতি বচনং মহার্থমমৃতোপমম্ ।
নিশম্য মারুতেস্সর্বে মুদিতা বানরাভবন্ ॥ 40 ॥
ক্ষ্বেলংত্যন্যে নদংত্যন্যে গর্জংত্যন্যে মহাবলাঃ ।
চক্রুঃ কিলকিলামন্যে প্রতিগর্জংতি চাপরে ॥ 41 ॥
কেচিদুচ্ছ্রিতলাংগূলাঃ প্রহৃষ্টাঃ কপিকুংজরাঃ ।
আযতাংচিতদীর্ঘাণি লাংগূলানি প্রবিব্যধুঃ ॥ 42 ॥
অপরে চ হনূমংতং বানরা বারণোপমম্ ।
আপ্লুত্য গিরিশৃংগেভ্যস্সংস্পৃশংতি স্ম হর্ষিতাঃ ॥ 43 ॥
উক্তবাক্যং হনূমংতমংগদস্তমথাব্রবীত্ ।
সর্বেষাং হরিবীরাণাং মধ্যে বচনমুত্তমম্ ॥ 44 ॥
সত্ত্বে বীর্যে ন তে কশ্চিত্সমো বানর বিদ্যতে ।
যদবপ্লুত্য বিস্তীর্ণং সাগরং পুনরাগতঃ ॥ 45 ॥
অহো স্বামিনি তে ভক্তিরহো বীর্যমহো ধৃতিঃ ।
দিষ্ট্যা দৃষ্টা ত্বযা দেবী রামপত্নী যশস্বিনী ॥ 46 ॥
দিষ্ট্যা ত্যক্ষ্যতি কাকুত্স্থ শ্শোকং সীতাবিযোগজম্ ।
ততোঽংগদং হনূমংতং জাংববংতং চ বানরাঃ ॥ 47 ॥
পরিবার্য প্রমুদিতা ভেজিরে বিপুলাশ্শিলাঃ ।
শ্রোতুকামাস্সমুদ্রস্য লংঘনং বানরোত্তমাঃ ॥ 48 ॥
দর্শনং চাপি লংকাযাস্সীতাযা রাবণস্য চ ।
তস্থুঃ প্রাংজলযস্সর্বে হনুমদ্বচনোন্মুখাঃ ॥ 49 ॥
তস্থৌ তত্রাংগদঃ শ্রীমান্ বানরৈর্বহুভির্বৃতঃ ।
উপাস্যমানো বিবুধৈর্দিবি দেবপতির্যথা ॥ 50 ॥
হনূমতা কীর্তিমতা যশস্বিনা তথাংগদেনাংগদবদ্ধবাহুনা ।
মুদা তদাঽধ্যাসিতমুন্নতং মহন্মহীধরাগ্রং জ্বলিতং শ্রিযাভবত্ ॥ 51 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে সপ্তপংচাশস্সর্গঃ ॥
