শ্রীমদ্বাল্মীকীয রামাযণে বালকাংডম্ ।
অথ ষট্চত্বারিংশস্সর্গঃ ।
হতেষু তেষু পুত্রেষু দিতিঃ পরমদুঃখিতা ।
মারীচং কাশ্যপং রাম ভর্তারমিদমব্রবীত্ ॥ 1 ॥
হতপুত্রাঽস্মি ভগবংস্তব পুত্রৈর্মহাবলৈঃ ।
শক্রহংতারমিচ্ছামি পুত্রং দীর্ঘতপোঽর্জিতম্ ॥ 2 ॥
সাঽহং তপশ্চরিষ্যামি গর্ভং মে দাতুমর্হসি ।
ঈশ্বরং শক্রহংতারং ত্বমনুজ্ঞাতুমর্হসি ॥ 3 ॥
তস্যাস্তদ্বচনং শ্রুত্বা মারীচঃ কাশ্যপস্তদা ।
প্রত্যুবাচ মহাতেজা দিতিং পরমদুঃখিতাম্ ॥ 4 ॥
এবং ভবতু, ভদ্রং তে শুচির্ভব তপোধনে ।
জনযিষ্যসি পুত্রং ত্বং শক্রহংতারমাহবে ॥ 5 ॥
পূর্ণে বর্ষসহস্রে তু শুচির্যদি ভবিষ্যসি ।
পুত্রং ত্রৈলোক্যভর্তারং মত্তস্ত্বং জনযিষ্যসি ॥ 6 ॥
এবমুক্ত্বা মহাতেজাঃ পাণিনা স মমার্জ তাম্ ।
সমালভ্য ততস্স্বস্তীত্যুক্ত্বা স তপসে যযৌ ॥ 7 ॥
গতে তস্মিন্নরশ্শ্রেষ্ঠ দিতিঃ পরমহর্ষিতা ।
কুশপ্লবনমাসাদ্য তপস্তেপে সুদারুণম্ ॥ 8 ॥
তপস্তস্যাং হি কুর্বংত্যাং পরিচর্যাং চকার হ ।
সহস্রাক্ষো নরশ্শ্রেষ্ঠ পরযা গুণসংপদা ॥ 9 ॥
অগ্নিং কুশান্ কাষ্ঠমপঃ ফলং মূলং তথৈব চ ।
ন্যবেদযত্সহস্রাক্ষো যচ্চান্যদপি কাংক্ষিতম্ ॥ 10 ॥
গাত্রসংবহনশ্চৈব শ্রমাপনযনৈস্তথা ।
শক্রস্সর্বেষু কালেষু দিতিং পরিচচার হ ॥ 11 ॥
অথ বর্ষসহস্রে তু দশোনে রঘুনংদন ।
দিতিঃ পরমসংপ্রীতা সহস্রাক্ষমথাব্রবীত্ ॥ 12 ॥
যাচিতেন সুরশ্রেষ্ঠ তব পিত্রা মহাত্মনা ।
বরো বর্ষসহস্রাংতে দত্তো মম সুতং প্রতি ॥ 13 ॥
তপশ্চরংত্যা বর্ষাণি দশ বীর্যবতাং বর ।
অবশিষ্টানি ভদ্রং তে ভ্রাতরং দ্রক্ষ্যসে ততঃ ॥ 14 ॥
তমহং ত্বত্কৃতে পুত্র সমাধাস্যে জযোত্সুকম্ ।
ত্রৈলোক্যবিজযং পুত্র সহ ভোক্ষ্যসি বিজ্বরঃ ॥ 15 ॥
এবমুক্ত্বা দিতিশ্শক্রং প্রাপ্তে মধ্যং দিবাকরে ।
নিদ্রযাঽপহৃতা দেবী পাদৌ কৃত্বাঽথ শীর্ষতঃ ॥ 16 ॥
দৃষ্ট্বা তামশুচিং শক্রঃ পাদতঃ কৃতমূর্ধজাম্ ।
শিরস্স্থানে কৃতৌ পাদৌ জহাস চ মুমোদ চ ॥ 17 ॥
তস্যাশ্শরীরবিবরং বিবেশ চ পুরংদরঃ ।
গর্ভং চ সপ্তধা রাম বিভেদ পরমাত্মবান্ ॥ 18 ॥
ভিদ্যমানস্ততো গর্ভো বজ্রেণ শতপর্বণা ।
রুরোদ সুস্বরং রাম ততো দিতিরবুধ্যত ॥ 19 ॥
মা রুদো মা রুদশ্চেতি গর্ভং শক্রোঽভ্যভাষত ।
বিভেদ চ মহাতেজা রুদংতমপি বাসবঃ ॥ 20 ॥
ন হংতব্যো ন হংতব্য ইত্যেবং দিতিরব্রবীত্ ।
নিষ্পপাত ততশ্শক্রো মাতুর্বচনগৌরবাত্ ॥ 21 ॥
প্রাংজলির্বজ্রসহিতো দিতিং শক্রোঽভ্যভাষত ।
অশুচির্দেবি সুপ্তাঽসি পাদযোঃ কৃতমূর্ধজা ॥ 22 ॥
তদংতরমহং লব্ধ্বা শক্রহংতারমাহবে ।
অভিদং সপ্তধা দেবি তন্মে ত্বং ক্ষংতুমর্হসি ॥ 23 ॥
ইত্যার্ষে শ্রীমদ্রামাযণে বাল্মীকীয আদিকাব্যে বালকাংডে ষট্চত্বারিংশস্সর্গঃ ॥
