শ্রীমদ্বাল্মীকীয রামাযণে অযোধ্যাকাংডম্ ।
অথ একাদশাধিকশততমস্সর্গঃ ।
বসিষ্ঠস্তু তদা রামমুক্ত্বা রাজপুরোহিতঃ ।
অব্রবীদ্ধর্মসংযুক্তং পুনরেবাপরং বচঃ ॥ 1 ॥
পুরুষস্যেহ জাতস্য ভবংতি গুরবস্ত্রযঃ ।
আচার্যশ্চৈব কাকুত্স্থ পিতা মাতা চ রাঘব ॥ 2 ॥
পিতা হ্যেবং জনযতি পুরুষং পুরুষর্ষভ ।
প্রজ্ঞাং দদাতি চাচার্যস্তস্মাত্স গুরুরুচ্যতে ॥ 3 ॥
সোঽহং তে পিতুরাচার্যস্তব চৈব পরংতপ ।
মম ত্বং বচনং কুর্বন্নাতিবর্তেস্সতাং গতিম্ ॥ 4 ॥
ইমা হি তে পরিষদ শ্শ্রেণযশ্চ দ্বিজাস্তথা ।
এষু তাত চরংধর্মং নাতিবর্তেঃ সতাং গতিম্ ॥ 5 ॥
বৃদ্ধাযা ধর্মশীলাযা মাতুর্নার্হস্যবর্তিতুম্ ।
অস্যা হি বচনং কুর্বন্নাতিবর্তেস্সতাং গতিম্ ॥ 6 ॥
ভরতস্য বচঃ কুর্বন্যাচমানস্য রাঘব ।
আত্মানং নাতিবর্তেস্ত্বং সত্যধর্মপরাক্রম ॥ 7 ॥
এবং মধুরমুক্তস্সন্ গুরুণা রাঘবস্স্বযম্ ।
প্রত্যুবাচ সমাসীনং বসিষ্ঠং পুরুষর্ষভঃ ॥ 8 ॥
যন্মাতাপিতরৌ বৃত্তং তনযে কুরুতঃ সদা ।
ন সুপ্রতিকরং তত্ তু মাত্রা পিত্রা চ যত্কৃতম্ ॥ 9 ॥
যথাশক্তি প্রদানেন স্বাপনোচ্ছাদনেন চ ।
নিত্যং চ প্রিযবাদেন তথা সংবর্ধনেন চ ॥ 10 ॥
যন্মাতাপিতরৌ বৃত্তং তনযে কুরুতস্সদা ।
ন সুপ্রতিকরং তত্তু মাত্রা পিত্রা চ যত্কৃতম্ ॥ 11 ॥
যথাশক্তিপ্রদানেন স্বাপনোচ্ছাদনেন চ ।
নিত্যং চ প্রিযবাদেন তথা সংবর্ধনেন চ ॥ 12 ॥
স হি রাজা জনযিতা পিতা দশরথো মম ।
আজ্ঞাতং যন্মযা তস্য ন তন্মিথ্যা ভবিষ্যতি ॥ 13 ॥
এবমুক্তস্তু রামেণ ভরতঃ প্রত্যনংতরম্ ।
উবাচ পরমোদারস্সূতং পরমদুর্মনাঃ ॥ 14 ॥
ইহ মে স্থংডিলে শীঘ্রং কুশানাস্তর সারথে ।
আর্যং প্রত্যুপবেক্ষ্যামি যাবন্মে ন প্রসীদতি ॥ 15 ॥
অনাহারো নিরালোকো ধনহীনো যথা দ্বিজঃ ।
শেষ্যে পুরস্তাচ্ছালাযা যাবন্ন প্রতিযাস্যতি ॥ 16 ॥
স তু রামমবেক্ষংতং সুমংত্রং পেক্ষ্য দুর্মনাঃ ।
কুশোত্তরমুপস্থাপ্য ভূমাবেবাঽস্তরত্স্বযম্ ॥ 17 ॥
তমুবাচ মহাতেজা রামো রাজর্ষিসত্তমঃ ।
কিং মাং ভরত কুর্বাণং তাত প্রত্যুপবেক্ষ্যসি ॥ 18 ॥
ব্রাহ্মণো হ্যেকপার্শ্বেন নরান্রোদ্ধুমিহার্হতি ।
ন তু মূর্ধাভিষিক্তানাং বিধিঃ প্রত্যুপবেশনে ॥ 19 ॥
উত্তিষ্ঠ নরশার্দূল হিত্বৈতদ্দারুণং ব্রতম্ ।
পুরবর্যামিতঃ ক্ষিপ্রমযোধ্যাং যাহি রাঘব ॥ 20 ॥
আসীনস্ত্বেব ভরতঃ পৌরজানপদং জনম্ ।
উবাচ সর্বতঃ প্রেক্ষ্য কিমার্যং নানুশাসথ ॥ 21 ॥
তে তদোচুর্মহাত্মানং পৌরজানপদা জনাঃ ।
কাকুত্স্থমভিজানীমঃ সম্যগ্ বদতি রাঘবঃ ॥ 22 ॥
এষোঽপি হি মহাভাগঃ পিতুর্বচসি তিষ্ঠতি ।
অত এব ন শক্তাঃ স্মো ব্যাবর্তযিতুমংজসা ॥ 23 ॥
তেষামাজ্ঞায বচনং রামো বচনমব্রবীত্ ।
এবং নিবোধ বচনং সুহৃদাং ধর্মচক্ষুষাম্ ॥ 24 ॥
এতচ্চৈবোভযং শ্রুত্বা সম্যক্সংপশ্য রাঘব ।
উত্তিষ্ঠ ত্বং মহাবাহো মাং চ স্পৃশ তথোদকম্ ॥ 25 ॥
অথোত্থায জলংস্পৃষ্ট্বা ভরতো বাক্যমব্রবীত্ ।
শ্রুণ্বংতু মে পরিষদো মংত্রিণ শ্শ্রেণযস্তথা ॥ 26 ॥
ন যাচে পিতরং রাজ্যং নানুশাসামি মাতরম্ ।
আর্যং পরমধর্মজ্ঞং নানুজানামি রাঘবম্ ॥ 27 ॥
যদিত্ববশ্যং বস্তব্যং কর্তব্যং চ পিতুর্বচঃ ।
অহমেব নিবত্স্যামি চতুর্দশ সমা বনে ॥ 28 ॥
ধর্মাত্মা তস্য তথ্যেন ভ্রাতুর্বাক্যেন বিস্মিতঃ ।
উবাচ রাম স্সংপ্রেক্ষ্য পৌরজানপদং জনম্ ॥ 29 ॥
বিক্রীতমাহিতং ক্রীতং যত্পিত্রা জীবতা মম ।
ন তল্লোপযিতুং শক্যং মযা বা ভরতেন বা ॥ 30 ॥
উপধির্ন মযা কার্যো বনবাসে জুগুপ্সিতঃ ।
যুক্তমুক্তং চ কৈকেয্যা পিত্রা মে সুকৃতং কৃতম্ ॥ 31 ॥
জানামি ভরতং ক্ষাংতং গুরুসত্কারকারিণম্ ।
সর্বমেবাত্র কল্যাণং সত্যসংধে মহাত্মনি ॥ 32 ॥
অনেন ধর্মশীলেন বনাত্প্রত্যাগতঃ পুনঃ ।
ভ্রাত্রা সহ ভবিষ্যামি পৃথিব্যাঃ পতিরুত্তমঃ ॥ 33 ॥
বৃতো হি রাজা কৈকেয্যা মযা তদ্বচনং কৃতম্ ।
অনৃতান্মোচযানেন পিতরং তং মহীপতিম্ ॥ 34 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে একাদশাধিকশততমস্সর্গঃ ॥
