শ্রীমদ্বাল্মীকীয রামাযণে সুংদরকাংডম্ ।
অথ অষ্টমস্সর্গঃ ।
স তস্য মধ্যে ভবনস্য সংস্থিতং মহদ্বিমানং মণিবজ্রচিত্রিতম্ ।
প্রতপ্তজাংবূনদজালকৃত্রিমং দদর্শ বীরঃ পবনাত্মজঃ কপিঃ ॥ 1 ॥
তদপ্রমেযাপ্রতিকারকৃত্রিমং কৃতং স্বযং সাধ্বিতি বিশ্বকর্মণা ।
দিবং গতং বাযুপথপ্রতিষ্ঠিতং ব্যরাজতাদিত্যপথস্য লক্ষ্মবত্ ॥ 2 ॥
ন তত্র কিংচিন্ন কৃতং প্রযত্নতো ন তত্র কিংচিন্ন মহার্হরত্নবত্ ।
ন তে বিশেষা নিযতাঃ সুরেষ্বপি ন তত্র কিংচিন্ন মহাবিশেষবত্ ॥ 3 ॥
তপঃ সমাধানপরাক্রমার্জিতং মনঃ সমাধানবিচারচারিণম্ ।
অনেকসংস্থানবিশেষনির্মিতং ততস্ততস্তুল্যবিশেষদর্শনম্ ॥ 4 ॥
বিশেষমালংব্য বিশেষসংস্থিতং বিচিত্রকূটং বহুকূটমংডিতম্ ।
মনোঽভিরামং শরদিংদুনির্মলং বিচিত্রকূটং শিখরং গিরের্যথা ॥ 5 ॥
বহংতি যং কুংডলশোভিতাননাঃ মহাশনা ব্যোমচরা নিশাচরাঃ ।
বিবৃত্তবিধ্বস্তবিশাললোচনাঃ মহাজবা ভূতগণাঃ সহস্রশঃ ॥ 6 ॥
বসংতপুষ্পোত্করচারুদর্শনং বসংতমাসাদপি কাংতদর্শনম্ ।
স পুষ্পকং তত্র বিমানমুত্তমং দদর্শ তদ্বানরবীরসত্তমঃ ॥ 7 ॥
ইত্যার্ষে শ্রীমদ্রামাযণে বাল্মীকীয আদিকাব্যে সুংদরকাংডে অষ্টমস্সর্গঃ ॥
