শ্রীমদ্বাল্মীকীয রামাযণে অযোধ্যাকাংডম্ ।
অথ চতুর্দশস্সর্গঃ ।
পুত্রশোকার্দিতং পাপা বিসংজ্ঞং পতিতং ভুবি ।
বিবেষ্টমানমুদ্বীক্ষ্য সৈক্ষ্বাকমিদমব্রবীত্ ॥ 1 ॥
পাপং কৃত্বৈব কিমিদং মম সংশ্রুত্য সংশ্রবম্ ।
শেষে ক্ষিতিতলে সন্নঃ স্থিত্যাং স্থাতুং ত্বমর্হসি ॥ 2 ॥
আহু স্সত্যং হি পরমং ধর্মং ধর্মবিদো জনাঃ ।
সত্যমাশ্রিত্য হি মযা ত্বং চ ধর্মং প্রবোধিতঃ ॥ 3 ॥
সংশ্রুত্য শৈব্যশ্শ্যেনায স্বাং তনুং জগতীপতিঃ ।
প্রদায পক্ষিণে রাজ ন্জগাম গতিমুত্তমাম্ ॥ 4 ॥
তথা হ্যলর্কস্তেজস্বী ব্রাহ্মণে বেদপারগে ।
যাচমানে স্বকে নেত্রে উদ্ধৃত্যাবিমনা দদৌ ॥ 5 ॥
সরিতাং তু পতিস্স্বল্পাং মর্যাদাং সত্যমন্বিতঃ ।
সত্যানুরোধাত্সমযে স্বাং বেলাং নাতিবর্ততে ॥ 6 ॥
সত্যমেকপদং ব্রহ্ম সত্যে ধর্মঃ প্রতিষ্টিতঃ ।
সত্যমেবাক্ষযা বেদা সত্যেনৈবাপ্যতে স্পরম্ ॥ 7 ॥
সত্যং সমনুবর্তস্ব যদি ধর্মে ধৃতা মতিঃ ।
সফলস্স বরো মেঽস্তু বরদো হ্যসি সত্তম ॥ 8 ॥
ধর্মস্যৈহাভিকামার্থং মম চৈবাভিচোদনাত্ ।
প্রব্রাজয সুতং রামং ত্রিঃখলু ত্বাং ব্রবীম্যহম্ ॥ 9 ॥
সমযং চ মমার্যেমং যদি ত্বং ন করিষ্যসি ।
অগ্রতস্তে পরিত্যক্তা পরিত্যক্ষ্যামি জীবিতম্ ॥ 10 ॥
এবং প্রচোদিতো রাজা কৈকেয্যা নির্বিশংকযা ।
নাশকত্পাশমুন্মোক্তুং বলিরিংদ্রকৃতং যথা ॥ 11 ॥
উদ্ভ্রাংতহৃদযশ্চাপি বিবর্ণবদনোঽভবত্ ।
স ধুর্যোবৈপরিস্পংদন্যুগচক্রাংতরং যথা ॥ 12 ॥
বিহ্বলাভ্যাং চ নেত্রাভ্যামপশ্যন্নিব ভূপতিঃ ।
কৃচ্ছ্রাদ্ধৈর্যেণ সংস্তভ্য কৈকেযীমিদমব্রবীত্ ॥ 13 ॥
যস্তে মংত্রকৃতঃ পাণিরগ্নৌ পাপে মযা ধৃতঃ ।
তং ত্যজামি স্বজং চৈব তব পুত্রং ত্বযা সহ ॥ 14 ॥
প্রযাতা রজনী দেবি সূর্যস্যোদযনংপ্রতি ।
অভিষেকং গুরুজনস্ত্বরযিষ্যতি মাং ধ্রুবম্ ॥ 15 ॥
রামাভিষেকসংভারৈস্তদর্থমুপকল্পিতৈঃ ।
রামঃ কারযিতব্যো মে মৃতস্য সলিলক্রিযাম্ ॥ 16 ॥
ত্বযা সপুত্রযা নৈব কর্তব্যা সলিলক্রিযা ।
ব্যাহংতাঽস্যশুভাচারে যদি রামাভিষেচনম্ ॥ 17 ॥
ন চ শক্তোঽস্ম্যহং দ্রষ্টুং দৃষ্ট্বা পূর্বং তথাসুখম্ ।
হতহর্ষং নিরানংদং পুনর্জনমবাঙ্মুখম্ ॥ 18 ॥
তাং তথা ব্রুবতস্তস্য ভূমিপস্য মহাত্মনঃ ।
প্রভাতা শর্বরী পুণ্যা চংদ্রনক্ষত্রশালিনী ॥ 19 ॥
ততঃ পাপসমাচারা কৈকেযী পার্থিবং পুনঃ ।
উবাচ পরুষং বাক্যং বাক্যজ্ঞা রোষমূর্ছিতা ॥ 20 ॥
কিমিদং ভাষসে রাজন্বাক্যং গররুজোপমম্ ।
আনাযযিতুমক্লিষ্টং পুত্রং রামমিহার্হসি ॥ 21 ॥
স্থাপ্য রাজ্যে মম সুতং কৃত্বা রামং বনেচরম্ ।
নিস্সপত্নাং চ মাং কৃত্বা কৃতকৃত্যো ভবিষ্যসি ॥ 22 ॥
স নুন্ন ইব তীক্ষ্ণেন প্রতোদেন হযোত্তমঃ ।
রাজা প্রচোদিতোঽভীক্ষ্ণং কৈকেযীমিদমব্রবীত্ ॥ 23 ॥
ধর্মবংধেন বধ্দোঽস্মি নষ্টা চ মম চেতনা ।
জ্যেষ্ঠং পুত্রং প্রিযং রামং দ্রষ্টুমিচ্ছামি ধার্মিকম্ ॥ 24 ॥
ততঃ প্রভাতাং রজনীমুদিতে চ দিবাকরে ।
পুণ্যে নক্ষত্রযোগে চ মুহূর্তে চ সমাহিতে ॥ 25 ॥
বসিষ্ঠো গুণসংপন্ন শ্শিষ্যৈ পরিবৃতস্তদা ।
উপগৃহ্যাশু সংভারান্প্রবিবেশ পুরোত্তমম্ ॥ 26 ॥
সিক্তসম্মার্জিতপথাং পতাকোত্তম ভূষিতাম্ ।
বিচিত্রকুসুমাকীর্ণাং নানাস্রগ্ভির্বিরাজিতাম্ ॥ 27 ॥
সংহৃষ্টমনুজোপেতাং সমৃদ্ধবিপণাপণাম্ ।
মহোত্সবসমাকীর্ণাং রাঘবার্থে সমুত্সুকাম্ ॥ 28 ॥
চংদনাগরুধূপৈশ্চ সর্বতঃ প্রতিধূপিতাম্ ।
তাং পুরীং সমতিক্রম্য পুরংদরপুরোপমাম্ ॥ 29 ॥
দদর্শাংতঃপুরশ্রেষ্ঠং নানাদ্বিজগণাযুতম্ ।
পৌরজানপদাকীর্ণং ব্রাহ্মণৈরুপশোভিতম্ ॥ 30 ॥
যজ্ঞবিদ্ভি স্সুসংপূর্ণং সদস্যৈঃ পরমদ্বিজৈঃ ।
তদংতঃপুরমাসাদ্য ব্যতিচক্রাম তং জনম্ ॥ 31 ॥
বসিষ্ঠঃ পরমপ্রীতঃ পরমর্ষির্বিবেশ চ ।
সত্বপশ্যদ্বিনিষ্ক্রাংতং সুমংত্রং নাম সারথিম্ ॥ 32 ॥
দ্বারে মনুজসিংহস্য সচিবং প্রিযদর্শনম্ ।
তমুবাচ মহাতেজা স্সূতপুত্রং বিশারদম্ ॥ 33 ॥
বসিষ্ঠঃ ক্ষিপ্রমাচক্ষ্ব নৃপতের্মামিহাগতম্ ।
ইমে গংগোদকঘটা স্সাগরেভ্যশ্চ কাংচনাঃ ॥ 34 ॥
ঔদুংবরং ভদ্রপীঠমভিষেকার্থমাগতম্ ।
সর্ববীজানি গংধাশ্চ রত্নানি বিবিধানি চ ॥ 35 ॥
ক্ষৌদ্রং দধি ঘৃতং লাজা দর্ভাস্সুমনসঃ পযঃ ।
অষ্টৌ চ কন্যা রুচিরা মত্তশ্চ বরবারণঃ ॥ 36 ॥
চতুরশ্বো রথশ্শ্রীমান্নিস্ত্রিংশো ধনুরুত্তমম্ ।
বাহনং নরসংযুক্তং ছত্রং চ শশিসন্নিভম্ ॥ 37 ॥
শ্বেতে চ বালব্যজনে ভৃংগারুশ্চ হিরণ্মযঃ ।
হেমদামপিনধ্দশ্চ ককুদ্মান্পাংডুরো বৃষঃ ॥ 38 ॥
কেসরী চ চতুর্দংষ্ট্রো হরিশ্রেষ্ঠো মহাবলঃ ।
সিংহাসনং ব্যাঘ্রতনু স্সমিদ্ধশ্চ হুতাশনঃ ॥ 39 ॥
সর্ববাদিত্রসংঘাশ্চ বেশ্যাশ্চালংকৃতা স্স্ত্রযঃ ।
আচার্যা ব্রাহ্মণা গাবঃ পুণ্যাশ্চ মৃগপক্ষিণঃ ॥ 40 ॥
পৌরজানপদশ্রেষ্ঠা নৈগমাশ্চ গণৈ স্সহ ।
এতে চান্যে চ বহবো নীযমানাঃ প্রিযংবদাঃ ॥ 41 ॥
অভিষেকায রামস্য সহ তিষ্ঠংতি পার্থিবৈঃ ।
ত্বরযস্ব মহারাজং যথা সমুদিতেঽহনি ॥ 42 ॥
পুষ্যে নক্ষত্রযোগে চ রামো রাজ্যমবাপ্নুযাত্ ।
ইতি তস্য বচ শ্শ্রুত্বা সূতপুত্রো মহাত্মনঃ ॥ 43 ॥
স্তুবন্নৃপতিশার্দূলং প্রবিবেশ নিবেশনম্ ।
তং তু পূর্বোদিতং বৃধ্দং দ্বারস্থা রাজ সম্মতম্ ॥ 44 ॥
ন শেকুরভিসংরোধ্দুং রাজ্ঞঃ প্রিযচিকীর্ষবঃ ।
স সমীপস্থিতো রাজ্ঞস্তামবস্থামজজ্ঞিবান্ ॥ 45 ॥
বাগ্ভিঃ পরমতুষ্টাভিরভিষ্টোতুং প্রচক্রমে ।
তত স্সূতো যথাকালং পার্থিবস্য নিবেশনে ॥ 46 ॥
সুমংত্রঃ প্রাংজলির্ভূত্বা তুষ্টাব জগতীপতিম্ ।
যথা নংদতি তেজস্বী সাগরো ভাস্করোদযে ॥ 47 ॥
প্রীতঃ প্রীতেন মনসা তথাঽনংদঘন স্স্বতঃ ।
ইংদ্রমস্যাং তু বেলাযামভিতুষ্টাব মাতলিঃ ॥ 48 ॥
সোঽজযদ্দানবান্সর্বাংস্তথা ত্বাং বোধযাম্যহম্ ।
বেদাস্সহাংগবিদ্যাশ্চ যথাহ্যাত্মভুবং বিভুম্ ॥ 49 ॥
ব্রহ্মাণং বোধযংত্যদ্য তথা ত্বাং বোধযাম্যহম্ ।
আদিত্যস্সহ চংদ্রেণ যথা ভূতধরাং শুভাম্ ॥ 50 ॥
বোধযত্যদ্য পৃথিবীং তথা ত্বাং বোধযাম্যহম্ ।
উত্তিষ্ঠাশু মহারাজ কৃতকৌতুকমংগলঃ ॥ 51 ॥
বিরাজমানো বপুষা মেরোরিব দিবাকরঃ ।
সোমসূর্যৌ চ কাকুত্স্থ শিববৈশ্রবণাবপি ॥ 52 ॥
বরুণশ্চাগ্নিরিংদ্রশ্চ বিজযং প্রদিশংতু তে ।
গতা ভগবতী রাত্রিঃ কৃতং কৃত্যমিদং তব ॥ 53 ॥
বুদ্ধ্যস্ব নৃপশার্দূল কুরু কার্যমনংতরম্ ।
উদতিষ্ঠত রামস্য সমগ্রমভিষেচনম্ ॥ 54 ॥
পৌরজানাপদৈশ্চাপি নৈগমৈশ্চ কৃতাংজলিঃ ।
স্বযং বশিষ্ঠো ভগবান্ব্রাহ্মণৈ স্সহ তিষ্ঠতি ॥ 55 ॥
ক্ষিপ্রমাজ্ঞাপ্যতাং রাজন্রাঘবস্যাভিষেচনম্ ।
যথা হ্যপালাঃ পশবো যথা সেনা হ্যনাযকা ॥ 56 ॥
যথা চংদ্রং বিনা রাত্রির্যথা গাবো বিনা বৃষম্ ।
এবং হি ভবিতা রাষ্ট্রং যত্র রাজা ন দৃশ্যতে ॥ 57 ॥
ইতি তস্য বচ শ্শৃত্বা সাংত্বপূর্বমিবার্থবত্ ।
অভ্যকীর্যত শোকেন ভূয এব মহীপতিঃ ॥ 58 ॥
তত স্সরাজা তং সূতং সন্নহর্ষ স্সুতং প্রতি ।
শোকরক্তেক্ষণ শ্শ্রীমানুদ্বীক্ষ্যোবাচ ধার্মিকঃ ॥ 59 ॥
বাক্যৈস্তু খলু মর্মাণি মম ভূযো নিকৃংতসি ।
সুমংত্রঃ করুণং শ্রুত্বা দৃষ্ট্বা দীনং চ পার্থিবম্ ।
প্রগৃহীতাংজলিঃ কিংচিত্তস্মাদ্দেশাদপাক্রমত্ ॥ 60 ॥
যদা বক্তুং স্বযং দৈন্যান্ন শশাক মহীপতিঃ ॥ 61 ॥
তদা সুমংত্রং মংত্রজ্ঞা কৈকেযী প্রত্যুবাচ হ ।
সুমংত্র রাজা রজনীং রামহর্ষসমুত্সুকঃ ॥ 62 ॥
প্রজাগরপরিশ্রাংতো নিদ্রাযা বশমুপেযিবান্ ।
তদ্গচ্ছ ত্বরিতং সূত রাজপুত্রং যশস্বিনম্ ॥ 63 ॥
রামমানয ভদ্রং তে নাত্র কার্যা বিচারণা ।
স মন্যমানঃ কল্যাণং হৃদযেন ননংদ চ ॥ 64 ॥
নির্জগাম চ সংপ্রীত্যা ত্বরিতো রাজশাসনাত্ ।
সুমংত্রশ্চিংতযামাস ত্বরিতং চোদিতস্তযা ॥ 65 ॥
ব্যক্তং রামোঽভিষেকার্থমিহাযাস্যতি ধর্মবিত্ ।
ইতি সূতো মতিং কৃত্বা হর্ষেণ মহতাঽঽবৃতঃ ॥ 66 ॥
নির্জগাম মহাবাহো রাঘবস্য দিদৃক্ষযা ।
সাগরহ্রদসংকাশাত্সুমংত্রোঽংতঃপুরাচ্ছুভাত্ ॥ 67 ॥
নিষ্ক্রম্য জনসংবাধং দদর্শ দ্বারমগ্রতঃ ।
ততঃ পুরস্তাত্সহসা বিনির্গতো মহীপতীংদ্বারগতো বিলোকযন্ ।
দদর্শ পৌরান্বিবিধান্মহাধনা নুপস্থিতাংদ্বারমুপেত্য বিষ্ঠিতান্ ॥ 68 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে চতুর্দশস্সর্গঃ ॥
