শ্রীমদ্বাল্মীকীয রামাযণে অযোধ্যাকাংডম্ ।
অথ ষট্পংচাশস্সর্গঃ ।
অথ রাত্র্যাং ব্যতীতাযামবসুপ্তমনংতরম্ ।
প্রবোধযামাস শনৈর্লক্ষ্মণং রঘুনংদনঃ ॥ 1 ॥
সৌমিত্রে শ্রুণু বন্যানাং বল্গু ব্যাহরতাং স্বনম্ ।
সংপ্রতিষ্ঠামহে কাল প্রস্থানস্য পরংতপ ॥ 2 ॥
স সুপ্তস্সমযে ভ্রাত্রা লক্ষ্মণঃ প্রতিবোধিতঃ ।
জহৌ নিদ্রাং চ তংদ্রীং চ প্রসক্তং চ পথি শ্রমম্ ॥ 3 ॥
তত উত্থায তে সর্বে স্পৃষ্ট্বা নদ্যা শ্শিবং জলম্ ।
পংথানমৃষিণাঽদিষ্টং চিত্রকূটস্য তং যযুঃ ॥ 4 ॥
ততস্সংপ্রস্থিতঃ কালে রামস্সৌমিত্রিণা সহ ।
সীতাং কমলপত্রাক্ষীমিদং বচনমব্রবীত্ ॥ 5 ॥
আদিপ্তানিব বৈদেহি সর্বতঃ পুষ্পিতান্নগান্ ।
স্বৈঃ পুষ্পৈঃ কিংশুকান্ পশ্য মালিনশিশিরাত্যযে ॥ 6 ॥
পশ্য ভল্লাতকান্ ফুল্লান্নরৈ রনুপসেবিতান্ ।
ফলপত্রৈরবনতা ন্নূনং শক্ষ্যাম জীবিতুম্ ॥ 7 ॥
পশ্য দ্রোণপ্রমাণানি লংবমানানি লক্ষ্মণ ।
মধূনি মধুকারীভি স্সংভৃতানি নগে নগে ॥ 8 ॥
এষ ক্রোশতি নত্যূহস্তং শিখী প্রতিকূজতি ।
রমণীযে বনোদ্দেশে পুষ্পসংস্তরসংকটে ॥ 9 ॥
মাতংগযূথানুসৃতং পক্ষিসংংঘানুনাদিতম্ ।
চিত্রকূটমিমং পশ্য প্রবৃদ্ধশিখরং গিরিম্ ॥ 10 ॥
সমভূমিতলে রম্যে দ্রুমৈর্বহুভিরাবৃতে ।
পুণ্যে রংস্যামহে তাত চিত্রকূটস্য কাননে ॥ 11 ॥
ততস্তৌ পাদচারেণ গচ্ছংতৌ সহ সীতযা ।
রম্যমাসেদতুশ্শৈলং চিত্রকূটং মনোরমম্ ॥ 12 ॥
তংতু পর্বতমাসাদ্য নানাপক্ষিগণাযুতম্ ।
বহুমূলফলং রম্যং সংপন্নং সরসোদকম্ ॥ 13 ॥
মনোজ্ঞোঽযং গিরিস্সৌম্য নানাদ্রুমলতাযুতঃ ।
বহুমূলফলো রম্য স্স্বাজীবঃ প্রতিভাতি মে ॥ 14 ॥
মুনযশ্চ মহাত্মানো বসংত্যস্মি শিলোচ্চযে ।
অযং বাসো ভবেত্তাবদত্র সৌম্য রমেমহি ॥ 15 ॥
ইতি সীতা চ রামশ্চ লক্ষ্মণশ্চ কৃতাংজলিঃ ।
অভিগম্যাঽশ্রমং সর্বে বাল্মীকি মভিবাদযন্ ॥ 16 ॥
তান্মহর্ষি প্রমুদিতঃ পূজযামাস ধর্মবিত্ ।
অস্যতামিতি চোবাচ স্বাগংতু নিবেদ্য চ ॥ 17 ॥
ততোঽব্রবীন্মহাবাহুর্লক্ষ্মণং লক্ষ্মণাগ্রজঃ ।
সন্নিবেদ্য যথান্যায মাত্মানমৃষযে প্রভুঃ ॥ 18 ॥
লক্ষ্মণাঽঽনয দারূণি দৃঢানি চ বরাণি চ ।
কুরুষ্বাঽবসথং সৌম্য বাসে মেঽভিরতং মনঃ ॥ 19 ॥
তস্য তদ্বচনং শ্রুত্বা সৌমিত্রির্বিবিধান্ দ্রুমান্ ।
আজহার তত শ্চক্রে পর্ণশালামরিংদমঃ ॥ 20 ॥
তাং নিষ্ঠিতাং বদ্ধকটাং দৃষ্ট্বা রামস্সুদর্শনাম্ ।
শুশ্রূষমাণমেকাগ্রমিদং বচনমব্রবীত্ ॥ 21 ॥
ঐণেযং মাংসমাহৃত্য শালাং যক্ষ্যামহে বযম্ ।
কর্তব্যং বাস্তুশমনং সৌমিত্রে চিরজীবিভিঃ ॥ 22 ॥
মৃগং হত্বাঽঽনয ক্ষিপ্রং লক্ষ্মণেহ শুভেক্ষণ ।
কর্তব্য শ্শাস্ত্রদৃষ্টো হি বিধির্ধর্মমনুস্মর ॥ 23 ॥
ভ্রাতুর্বচনমাজ্ঞায লক্ষ্মণঃ পরবীরহা ।
চকার স যথোক্তং চ তং রাম পুনরব্রবীত্ ॥ 24 ॥
ঐণেযং শ্রপযস্বৈতচ্ছালাং যক্ষ্যামহে বযম্ ।
ত্বর সৌম্য মুহূর্তোঽযং ধ্রুবশ্চ দিবসোঽপ্যযম্ ॥ 25 ॥
স লক্ষ্মণঃ কৃষ্ণমৃগং মেধ্যং হত্বা প্রতাপবান্ ।
অথ চিক্ষেপ সৌমিত্রিস্সমিদ্ধে জাতবেদসি ॥ 26 ॥
তংতু পক্বং পরিজ্ঞায নিষ্টপ্তং ছিন্নশোণিতম্ ।
লক্ষ্মণঃ পুরুষব্যাঘ্রমথ রাঘবমব্রবীত্ ॥ 27 ॥
অযং সর্বঃ সমস্তাগ্ঙঃ শ্রৃতঃ কৃষ্ণমৃগো মযা ।
দেবতাং দেবসংকাশ যজস্ব কুশলো হ্যসি ॥ 28 ॥
রামঃ স্নাত্বা তু নিযতো গুণবান্ জপ্যকোবিদঃ ।
সংগ্রহেণাকরোত্ স্রবার্ন মংত্রান্ সত্রাবসানিকান্ ॥ 29 ॥
ইষ্ট্বা দেবগণান্সর্বান্বিবেশাঽবসথং শুচিঃ ।
বভূব চ মনোহ্লাদো রামস্যামিততেজসঃ ॥ 30 ॥
বৈশ্বদেববলিং কৃত্বা রৌদ্রং বৈষ্ণব মেব চ ।
বাস্তুসংশমনীযানি মংগলানি প্রবর্তযন্ ॥ 31 ॥
জপং চ ন্যাযত কৃত্বা স্নাত্বা নদ্যাং যথাবিধি ।
পাপসংশমনং রাম শ্চকার বলিমুত্তমম্ ॥ 32 ॥
বেদিস্থলবিধানানি চৈত্যান্যাযতনানি চ ।
আশ্রমস্যানুরূপাণি স্থাপযামাস রাঘবঃ ॥ 33 ॥
বন্যৈর্মাল্যৈঃ ফলৈর্মূলৈঃ পক্বৈর্মাংসৈর্যথাবিধি ।
অদ্ভির্জপৈশ্চ বেদোক্তৈর্দর্ভৈশ্চ সসমিত্কুশৈঃ ॥ 34 ॥
তৌ তর্পযিত্বা ভূতানি রাঘবৌ সহ সীতযা ।
তদা বিবিশতু শ্শালাং সুশুভাং শুভলক্ষণৌ ॥ 35 ॥
তাং বৃক্ষপর্ণচ্ছদনাং মনোজ্ঞাং যথাপ্রদেশং সুকৃতাং নিবাতাম্ ।
বাসায সর্বে বিবিশুস্সমেতাস্সভাং যথা দেবগণাস্সুধর্মাম্ ॥ 36 ॥
অনেকনানামৃগপক্ষিসংকুলে বিচিত্রপত্রস্তবকৈর্দ্রুমৈর্যুতে ।
বনোত্তমে ব্যালমৃগানুনাদিতে তদা বিজহ্রু স্সুসুখং জিতেংদ্রিযাঃ ॥ 37 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে ষট্পংচাশস্সর্গঃ ॥
