শ্রীমদ্বাল্মীকীয রামাযণে কিষ্কিংধাকাংডম্ ।
অথ পংচষষ্টিতমস্সর্গঃ ।
অথাংগদবচশ্শ্রুত্বা তে সর্বে বানরর্ষভাঃ ।
স্বং স্বং গতৌ সমুত্সাহমূচুস্তত্র যথাক্রমম্ ॥ 1 ॥
গজো গবাক্ষো গবযশ্শরভো গংধমাদনঃ ।
মৈংদশ্চ দ্বিবিদশ্চৈব সুষেণো জাংববাং স্তথা ॥ 2 ॥
আবভাষে গজস্তত্র প্লবেযং দশযোজনম্ ।
গবাক্ষো যোজননান্যাহ গমিষ্যামীতি বিংশতিম্ ॥ 3 ॥
গবযো বানরস্তত্র বানরাং স্তানুবাচ হ ।
ত্রিংশতং তু গমিষ্যামি যোজনানাং প্লবংগমাঃ ॥ 4 ॥
শরভস্তানুবাচাথ বানরান্ বানরর্ষভঃ ।
চত্বারিংশদ্গমিষ্যামি যোজনানাং প্লবংগমাঃ ॥ 5 ॥
বানরস্তু মহাতেজা অব্রবীদ্গংধমাদনঃ ।
যোজনানাং গমিষ্যামি পংচাশত্তু ন সংশযঃ ॥ 6 ॥
মৈংদস্তু বানরস্তত্র বানরাংস্তানুবাচ হ ।
যোজনানাং পরং ষষ্টিমহং প্লবিতুমুত্সহে ॥ 7 ॥
ততস্তত্র মহাতেজা দ্বিবিদঃ প্রত্যভাষত ।
গমিষ্যামি ন সংদেহস্সপ্ততিং যোজনান্যহম্ ॥ 8 ॥
সুষেণস্তু মহাতেজাঃপ্রোক্তবান্হরিসত্তমান্ ।
অশীতিং যোজনানাং তু প্লবেযং প্লবগেশ্বরাঃ ॥ 9 ॥
তেষাং কথযতাং তত্র সর্বাংস্তাননুমান্য চ ।
ততো বৃদ্ধতমস্তেষাং জাংববান্প্রত্যভাষত ॥ 10 ॥
পূর্বমস্মাকমপ্যাসীত্কশ্চিদ্গতিপরাক্রমঃ ।
তে বযং বযসঃ পারমনুপ্রাপ্তাস্স্ম সাংপ্রতম্ ॥ 11 ॥
কিংতু নৈবং গতে শক্যমিদং কার্যমুপেক্ষিতুম্ ।
যদর্থং কপিরাজশ্চ রামশ্চ কৃতনিশ্চযৌ ॥ 12 ॥
সাংপ্রতং কালভেদেন যা গতিস্তাং নিবোধত ।
নবতিং যোজনানাং তু গমিষ্যামি ন সংশযঃ ॥ 13 ॥
তাংশ্চ সর্বান্হরিশ্রেষ্ঠাংজাংববান্পুনরব্রবীত্ ।
ন খল্বেতাবদেবাসীদ্গমনে মে পরাক্রমঃ ॥ 14 ॥
মযা মহাবলেশ্চৈব যজ্ঞে বিষ্ণুস্সনাতনঃ ।
প্রদক্ষিণীকৃতঃ পূর্বং ক্রমমাণস্ত্রিবিক্রমম্ ॥ 15 ॥
স ইদানীমহং বৃদ্ধঃ প্লবনে মংদবিক্রমঃ ।
যৌবনে চ তদাঽসীন্মে বলমপ্রতিমং পরৈঃ ॥ 16 ॥
সংপ্রত্যেতাবতীং শক্তিং গমনে তর্কযাম্যহম্ ।
নৈতাবতা হি সংসিদ্ধিঃ কার্যস্যাস্য ভবিষ্যতি ॥ 17 ॥
অথোত্তরমুদারার্থমব্রবীদংগদস্তদা ।
অনুমান্য তথা প্রাজ্ঞো জাংববংতং মহাকপিম্ ॥ 18 ॥
অহমেতদ্গমিষ্যামি যোজনানাং শতং মহত্ ।
নিবর্তনে তু মে শক্তিস্স্যান্ন বেতি ন নিশ্চিতম্ ॥ 19 ॥
তমুবাচ হরিশ্রেষ্ঠং জাংববান্বাক্যকোবিদঃ ।
জ্ঞাযতে গমনে শক্তিস্তব হর্যৃক্ষসত্তম ॥ 20 ॥
কামং শতং সহস্রং বা ন হ্যেষ বিধিরুচ্যতে ।
যোজনানাং ভবান্ শক্তো গংতুং প্রতিনিবর্তিতুম্ ॥ 21 ॥
ন হি প্রেষযিতা তাত স্বামী প্রেষ্যঃ কথংচন ।
ভবতাঽযং জনস্সর্বঃ প্রেষ্যঃ প্লবগসত্তম ॥ 22 ॥
ভবান্ কলত্রং অস্মাকং স্বামি ভাবে ব্যবস্থিতঃ ।
স্বামী কলত্রং সৈন্যস্য গতিঃ এষা পরংতপ ॥ 23 ॥
অপি বৈ এতস্য কার্যস্য ভবান্ মূলং অরিং দম ।
তস্মাত্ কলত্রবত্ তাত প্রতিপাল্যঃ সদা ভবান্ ॥ 24 ॥
মূলমর্থস্য সংরক্ষ্যমেষ কার্যবিদাং নযঃ ।
মূলে সতি হি সিদ্ধ্যংতি গুণা ফলো পুষ্পোদযাঃ ॥ 25 ॥
তদ্ভবানস্য কার্যস্য সাধনে সত্যবিক্রম ।
বুদ্ধিবিক্রমসংপন্নো হেতুরত্র পরংতপ ॥ 26 ॥
গুরুশ্চ গুরুপুত্রশ্চ ত্বং হি নঃ কপিসত্তম ।
ভবংতমাশ্রিত্য বযং সমর্থা হ্যর্থসাধনে ॥ 27 ॥
উক্তবাক্যং মহাপ্রাজ্ঞং জাংববংতং মহাকপিঃ ।
প্রত্যুবাচোত্তরং বাক্যং বালিসূনুরথাংগদঃ ॥ 28 ॥
যদি নাহং গমিষ্যামি নান্যো বানরপুংগবঃ ।
পুনঃ খল্বিদমস্মাভিঃ কার্যং প্রাযোপবেশনম্ ॥ 29 ॥
ন হ্যকৃত্বা হরিপতেস্সংদেশং তস্য ধীমতঃ ।
তত্রাপি গত্বা প্রাণানাং পশ্যামি পরিরক্ষণম্ ॥ 30 ॥
স হি প্রসাদে চাত্যর্থং কোপে চ হরিরীশ্বরঃ ।
অতীত্য তস্য সংদেশং বিনাশো গমনে ভবেত্ ॥ 31 ॥
তদ্যথা হ্যস্য কার্যস্য ন ভবত্যন্যথা গতিঃ ।
তদ্ভবানেব দৃষ্টার্থস্সংচিংতযিতু মর্হতি ॥ 32 ॥
সোঽংগদেন তদা বীরঃ প্রত্যুক্তঃ প্লবগর্ষভঃ ।
জাংববানুত্তরং বাক্যং প্রোবাচেদং ততোঽংগদম্ ॥ 33 ॥
অস্য তে বীর কার্যস্য ন কিংচিত্পরিহীযতে ।
এষ সংচোদযাম্যেনং যঃ কার্যং সাধযিষ্যতি ॥ 34 ॥
ততঃপ্রতীতং প্লবতাংবরিষ্ঠং একাংতমাশ্রিত্য সুসুখেপবিষ্ঠং সংচোদযামাস হরিপ্রবীরো হরিপ্রবীরং হনুমংতমেব ॥ 35 ॥
ইত্যার্ষে শ্রীমদ্রামাযণে বাল্মীকীয আদিকাব্যে কিষ্কিংধাকাংডে পংচষষ্টিতমস্সর্গঃ ॥
