শ্রীমদ্বাল্মীকীয রামাযণে অযোধ্যাকাংডম্ ।
অথ ত্রযোদশাধিকশততমস্সর্গঃ ।
তত শ্শিরসি কৃত্বা তু পাদুকে ভরতস্তদা ।
আরুরোহ রথং হৃষ্টঃ শত্রুঘ্নেন সমন্বিতঃ ॥ 1 ॥
বসিষ্ঠো বামদেবশ্চ জাবালিশ্চ দৃঢব্রতঃ ।
অগ্রতঃ প্রযযু স্সর্বে মংত্রিণো মংত্রপূজিতাঃ ॥ 2 ॥
মংদাকিনীং নদীং রম্যাং প্রাঙ্মুখাস্তে যযুস্তদা ।
প্রদক্ষিণং চ কুর্বাণাশ্চিত্রকূটং মহাগিরিম্ ॥ 3 ॥
পশ্যংধাতুসহস্রাণি রম্যাণি বিবিধানি চ ।
প্রযযৌ তস্য পার্শ্বেন সসৈন্যো ভরতস্তদা ॥ 4 ॥
অদূরাচ্চিত্রকূটস্য দদর্শ ভরতস্তদা ।
আশ্রমং যত্র স মুনির্ভরদ্বাজঃ কৃতালযঃ ॥ 5 ॥
স তমাশ্রমমাগম্য ভরদ্বাজস্য বুদ্ধিমান্ ।
অবতীর্য রথাত্পাদৌ ববংদে ভরতস্তদা ॥ 6 ॥
ততো হৃষ্টো ভরদ্বাজো ভরতং বাক্যমব্রবীত্ ।
অপি কৃত্যং কৃতং তাত রামেণ চ সমাগতম্ ॥ 7 ॥
এবমুক্ত স্স তু ততো ভরদ্বাজেন ধীমতা ।
প্রত্যুবাচ ভরদ্বাজং ভরতো ধর্মবত্সলঃ ॥ 8 ॥
স যাচ্যমানো গুরুণা মযা চ দৃঢবিক্রমঃ ।
রাঘবঃ পরমপ্রীতো বসিষ্ঠং বাক্যমব্রবীত্ ॥ 9 ॥
পিতুঃ প্রতিজ্ঞাং তামেব পালযিষ্যামি তত্ত্বতঃ ।
চতুর্দশ হি বর্ষাণি যা প্রতিজ্ঞা পিতুর্মম ॥ 10 ॥
এবমুক্তো মহাপ্রাজ্ঞো বসিষ্ঠঃ প্রত্যুবাচ হ ।
বাক্যজ্ঞো বাক্যকুশলং রাঘবং বচনং মহত্ ॥ 11 ॥
এতে প্রযচ্ছ সংহৃষ্টঃ পাদুকে হেমভূষিতে ।
অযোধ্যাযাং মহাপ্রাজ্ঞ যোগক্ষেমকরে তব ॥ 12 ॥
এবমুক্তো বসিষ্ঠেন রাঘবঃ প্রাঙ্মুখঃ স্থিতঃ ।
পাদুকে হ্যধিরুহ্যৈতে মম রাজ্যায বৈ দদৌ ॥ 13 ॥
নিবৃত্তোঽহমনুজ্ঞাতো রামেণ সুমহাত্মনা ।
অযোধ্যামেব গচ্ছামি গৃহীত্বা পাদুকে শুভে ॥ 14 ॥
এতচ্ছ্রুত্বা শুভং বাক্যং ভরতস্য মহাত্মনঃ ।
ভরদ্বাজশ্শুভতরং মুনির্বাক্যমুবাচ তম্ ॥ 15 ॥
নৈতচ্চিত্রং নরব্যাঘ্র শীলবৃত্তবতাং বর ।
যদার্যং ত্বযি তিষ্ঠেত্তু নিম্নে সৃষ্টমিবোদকম্ ॥ 16 ॥
অমৃত স্সমহাবাহুঃ পিতা দশরথস্তব ।
যস্য ত্বমীদৃশঃ পুত্রো ধর্মজ্ঞো ধর্মবত্সলঃ ॥ 17 ॥
তমৃষিং তু মহাত্মানমুক্তবাক্যং কৃতাংজলিঃ ।
আমংত্রযিতুমারেভে চরণাবুপগৃহ্য চ ॥ 18 ॥
ততঃ প্রদক্ষিণং কৃত্বা ভরদ্বাজং পুনঃ পুনঃ ।
ভরতস্তু যযৌ শ্রীমানযোধ্যাং সহ মংত্রিভিঃ ॥ 19 ॥
যানৈশ্চ শকটৈশ্চৈব হযৈর্নাগৈশ্চ সা চমূঃ ।
পুনর্নিবৃত্তা বিস্তীর্ণা ভরতস্যানুযাযিনী ॥ 20 ॥
ততস্তে যমুনাং দিব্যাং নদীং তীর্ত্বোর্মিমালিনীম্ ।
দদৃশুস্তাং পুন স্সর্বে গংগাং শুভজলাং নদীম্ ॥ 21 ॥
তাং রম্যজলসংপূর্ণাং সংতীর্য সহবাংধবঃ শৃংগিবেরপুরং রম্যং প্রবিবেশ সসৈনিকঃ ।
শৃংগিবেরপুরাদ্ভূয স্ত্বযোধ্যাং সংদদর্শ হ ॥ 22 ॥
অযোধ্যাং চ ততো দৃষ্ট্বা পিত্রা ভ্রাত্রা বিবর্জিতাম্ ।
ভরতো দুঃখ সংতপ্ত স্সারথিং চেদমব্রবীত্ ॥ 23 ॥
সারথে পশ্য বিধ্বস্তা সাঽযোধ্যা ন প্রকাশতে ।
নিরাকারা নিরানংদা দীনা প্রতিহতস্বরা ॥ 24 ॥
ইত্যার্ষে শ্রীমদ্রামাযণে বাল্মীকীয আদিকাব্যে অযোধ্যাকাংডে ত্রযোদশাধিকশততমস্সর্গঃ ॥
