শ্রীমদ্বাল্মীকীয রামাযণে যুদ্ধকাংডম্ ।
অথ দশমস্সর্গঃ ।
ততঃপ্রত্যুষসিপ্রাপ্তেপ্রাপ্তধর্মার্থনিশ্চযঃ ।
রাক্ষসাধিপতের্বেশ্মভীমকর্মাবিভীষণঃ ॥ 1 ॥
শৈলাগ্রচযসংকাশংশৈলশৃংগমিবোন্নতম্ ।
সুবিভক্তমহাকক্ষংমহাজনপরিগ্রহম্ ॥ 2 ॥
মতিমদ্ভির্মহামাত্রৈরনুরক্তৈরধিষ্ঠিতম্ ।
রাক্ষসৈরাপ্তপর্যাপ্তৈস্সর্বতঃপরিরক্ষিতম্ ॥ 3 ॥
মত্তমাতংগনিশ্শ্বাসৈর্ব্যাকুলীকৃতমারুতম্ ।
শংখঘোষমহাঘোষংতূর্যনাদানুনাদিতম্ ॥ 4 ॥
প্রমদাজনসংবাধংপ্রজল্পিতমহাপথম্ ।
তপ্তকাংচননির্যূহংভূষণোত্তমভূষিতম্ ॥ 5 ॥
গংধর্বাণামিবাঽবাসমালযংমরুতামিব ।
রত্নসংচযসংবাধংভবনংভোগিনামিব ॥ 6 ॥
তংমহাভ্রমিবাঽদিত্যস্তেজোবিস্তৃতরশ্মিমান্ ।
অগ্রজস্যালযংবীরঃপ্রবিবেশমহাদ্যুতিঃ ॥ 7 ॥
পুণ্যান্পুণ্যাহঘোষাংশ্চবেদবিদ্ভিরুদাহৃতান্ ।
শুশ্রাবসুমহাতেজাভ্রাতুর্বিজযসংশ্রিতান্ ॥ 8 ॥
পূজিতান্ দধিপাত্রৈশ্চসর্পির্ভিস্সুমনোক্ষতৈঃ ।
মংত্রবেদবিদোবিপ্রাংদদর্শসমহাবলঃ ॥ 9 ॥
সপূজ্যমানোরক্ষোভিদ্দীপ্যমানস্স্বতেজসা ।
আসনস্থংমহাবাহুর্ববংদেধনদানুজম্ ॥ 10 ॥
সরাজদৃষ্টিসংপন্নমাসনংহেমভূষিতম্ ।
জগামসমুদাচারংপ্রযুজ্যাচারকোবিদঃ ॥ 11 ॥
সরাবণংমহাত্মানংবিজনেমংত্রিসন্নিধৌ ।
উবাচহিতমত্যর্থংবচনংহেতুনিশ্চিতম্ ॥ 12 ॥
প্রসাদ্যভ্রাতরংজেষ্ঠংসাংত্বেনোপস্থিতক্রমঃ ।
দেশকালার্থসংবাদিদৃষ্টলোকপরাবরঃ ॥ 13 ॥
যদাপ্রভৃতিবৈদেহীসংপ্রাস্তেমাংপুরীংতব ।
তদাপ্রভৃতিদৃশ্যংতেনিমিত্তান্যশুভানিনঃ ॥ 14 ॥
সস্ফুলিংগস্সধূমার্চিস্সধূমকলুষোদযঃ ।
মংত্রসংঘহুতোঽপ্যগ্নির্নসম্যগভিবর্থতে ॥ 15 ॥
অগ্নিষ্ঠেষ্বগ্নিশলাসুতথাব্রহ্মস্থালীষুচ ।
সরীসৃপাণিদৃশ্যংতেহন্যেষুচপিপীলিকাঃ ॥ 16 ॥
গবাংসযাংসিস্কন্নানিবিমদাবীরকুংজরাঃ ।
দীনমশ্বাঃপ্রহেষংতেনচগ্রাসাভিনংদিনঃ ॥ 17 ॥
খরোষ্ট্রাশ্বতরারাজভনভিন্নরোমাস্স্রবংতিচ ।
নস্বভাবেঽবতিষ্ঠংতিবিধানৈরপিচিংতিতাঃ ॥ 18 ॥
বাযসাঃসংঘশঃক্রূরাব্যাহরংতিসমংততঃ ।
সমবেতাশ্চদৃশ্যংতেবিমানাগ্রেষুসংঘশঃ ॥ 19 ॥
গৃধ্রাশ্চপরিলীযংতেপুরীমুপরিপিংডিতাঃ ।
উপপন্নাশ্চস্নধ্যেদ্বেব্যাহ্নত্যশিবংশিবাঃ ॥ 20 ॥
ক্রব্যাদানাংমৃগাণাংচপুরীদ্বারেষুসংঘশঃ ।
শ্রূযংতেবিপুলাঘোষাস্সবিস্ফূর্জিতনিস্স্বনাঃ ॥ 21 ॥
তদেবংপ্রস্তুতেকার্যেপ্রাযশ্চিত্তমিদংক্ষমম্ ।
রোচতেযদিবৈদেহীরাঘবাযপ্রদীযতাম্ ॥ 22 ॥
ইদংচযদিবামোহাল্লোভাদ্বাব্যাহৃতংমযা ।
তত্রাপিচমহারাজ নদোষংকর্তুমর্হসি ॥ 23 ॥
অযংহিদোষস্সর্বস্যজনস্যাস্যোপলক্ষ্যতে ।
রক্ষসাংরাক্ষসীনাংচপুরস্যাংতঃপুরস্যচ ॥ 24 ॥
শ্রাবণেচাস্যমংত্রস্যনিবৃত্তাস্সর্বমংত্রিণঃ ।
অবশ্যংচমযাবাচ্যংযদ্দৃষ্টমপিবাশ্রুতম্ ॥ 25 ॥
হিতংমহার্থংমৃদুহেতুসংহিতংব্যতীতকালাযতিসংপ্রতিক্ষমম্ ।
নিশম্যতদ্বাক্যমুপস্থিতজ্বরঃপ্রসংগবানুত্তরমেতদব্রবীত্ ॥ 26 ॥
ভযংনপশ্যামিকুতশ্চিদপ্যহংনরাঘবঃপ্রাপ্স্যতিজাতুমৈথিলীম্ ।
সুরৈস্সহেংদ্রৈরপিসংগরেকথংমমাগ্রতস্স্থাস্যতিলক্ষ্মণাগ্রজঃ ॥ 27 ॥
ইত্যেবমুক্ত্বাসুরসৈন্যনাশনোমহাবলস্সংযতিচংডবিক্রমঃ ।
দশাননোভ্রাতরমাপ্তবাদিনংবিসর্জযামাসতদাবিভীষণম্ ॥ 28 ॥
ইত্যার্ষে শ্রীমদ্রামাযণে বাল্মীকীয আদিকাব্যে যুদ্ধকাংডে দশমস্সর্গঃ ॥
