ଅୟୋଧ୍ୟାପୁରନେତାରଂ ମିଥିଲାପୁରନାୟିକାମ୍ ।
ରାଘଵାଣାମଲଂକାରଂ ଵୈଦେହାନାମଲଂକ୍ରିୟାମ୍ ॥1॥
ରଘୂଣାଂ କୁଲଦୀପଂ ଚ ନିମୀନାଂ କୁଲଦୀପିକାମ୍ ।
ସୂର୍ୟଵଂଶସମୁଦ୍ଭୂତଂ ସୋମଵଂଶସମୁଦ୍ଭଵାମ୍ ॥2॥
ପୁତ୍ରଂ ଦଶରଥସ୍ୟାଦ୍ୟଂ ପୁତ୍ରୀଂ ଜନକଭୂପତେଃ ।
ଵଶିଷ୍ଠାନୁମତାଚାରଂ ଶତାନଂଦମତାନୁଗାମ୍ ॥3॥
କୌସଲ୍ୟାଗର୍ଭସଂଭୂତଂ ଵେଦିଗର୍ଭୋଦିତାଂ ସ୍ଵୟମ୍ ।
ପୁଂଡରୀକଵିଶାଲାକ୍ଷଂ ସ୍ଫୁରଦିଂଦୀଵରେକ୍ଷଣାମ୍ ॥4॥
ଚଂଦ୍ରକାଂତାନନାଂଭୋଜଂ ଚଂଦ୍ରବିଂବୋପମାନନାମ୍ ।
ମତ୍ତମାତଂଗଗମନଂ ମତ୍ତହଂସଵଧୂଗତାମ୍ ॥5॥
ଚଂଦନାର୍ଦ୍ରଭୁଜାମଧ୍ୟଂ କୁଂକୁମାର୍ଦ୍ରକୁଚସ୍ଥଲୀମ୍ ।
ଚାପାଲଂକୃତହସ୍ତାବ୍ଜଂ ପଦ୍ମାଲଂକୃତପାଣିକାମ୍॥6॥
ଶରଣାଗତଗୋପ୍ତାରଂ ପ୍ରଣିପାଦପ୍ରସାଦିକାମ୍ ।
କାଲମେଘନିଭଂ ରାମଂ କାର୍ତସ୍ଵରସମପ୍ରଭାମ୍ ॥7॥
ଦିଵ୍ୟସିଂହାସନାସୀନଂ ଦିଵ୍ୟସ୍ରଗ୍ଵସ୍ତ୍ରଭୂଷଣାମ୍ ।
ଅନୁକ୍ଷଣଂ କଟାକ୍ଷାଭ୍ୟାଂ ଅନ୍ୟୋନ୍ୟେକ୍ଷଣକାଂକ୍ଷିଣୌ ॥8॥
ଅନ୍ୟୋନ୍ୟସଦୃଶାକାରୌ ତ୍ରୈଲୋକ୍ୟଗୃହଦଂପତୀ ।
ଇମୌ ୟୁଵାଂ ପ୍ରଣମ୍ୟାହଂ ଭଜାମ୍ୟଦ୍ୟ କୃତାର୍ଥତାମ୍ ॥9॥
ଅନେନ ସ୍ତୌତି ୟଃ ସ୍ତୁତ୍ୟଂ ରାମଂ ସୀତାଂ ଚ ଭକ୍ତିତଃ ।
ତସ୍ୟ ତୌ ତନୁତାଂ ପୁଣ୍ୟାସ୍ସଂପଦଃ ସକଲାର୍ଥଦାଃ ॥10॥
ଏଵଂ ଶ୍ରୀରାଚଂଦ୍ରସ୍ୟ ଜାନକ୍ୟାଶ୍ଚ ଵିଶେଷତଃ ।
କୃତଂ ହନୂମତା ପୁଣ୍ୟଂ ସ୍ତୋତ୍ରଂ ସଦ୍ୟୋ ଵିମୁକ୍ତିଦମ୍ ।
ୟଃ ପଠେତ୍ପ୍ରାତରୁତ୍ଥାୟ ସର୍ଵାନ୍ କାମାନଵାପ୍ନୁୟାତ୍ ॥11॥
