श्रीमद्वाल्मीकीय रामायणे युद्धकांडम् ।
अथ नवमस्सर्गः ।
ततोनिकुंभोरभसस्सूर्यशत्रुर्महाबलः ।
सुप्तघ्नोयज्ञहारक्षोमहापार्श्वमहोदरौ ॥ 1 ॥
अग्निकेतुश्चदुर्धर्षोरश्मिकेतुश्चराक्षसः ।
इंद्रजिच्चमहातेजाबलवान्रावणात्मजः ॥ 2 ॥
प्रहस्तोऽथविरूपाक्षोवज्रदंष्ट्रोमहाबलः ।
धूम्राक्षश्चातिकायश्चदुर्मुखश्चैवराक्षसः ॥ 3 ॥
परिघान्पट्टिशान्प्रासान्शक्तिशूलपरश्वधान् ।
चापानिचसबाणानिखंगांश्चविपुलान्शितान् ॥ 4 ॥
प्रगृह्यपरमक्रुद्धास्समुत्पत्यचराक्षसाः ।
अब्रुवन्रावणंसर्वेप्रदीप्ताइवतेजसा ॥ 5 ॥
अद्यरामंवधिष्यामस्सुग्रीवंसचलक्ष्मणम् ।
कृपणंचहनूमंतंलंकायेनप्रधर्षिता ॥ 6 ॥
तान्गृहीतायुधान् सर्वान्वारयित्वाविभीषणः ।
अब्रवीत्प्रांजलिर्वाक्यंपुनःप्रत्युपवेश्यतान् ॥ 7 ॥
अप्युपायैस्त्रिभिस्तातयोऽर्थःप्राप्तुंनशक्यते ।
तस्यविक्रमकालांस्तान्युक्तानाहुर्मनीषिणः ॥ 8 ॥
प्रमत्तेष्यभियुक्तेषुदैवेनप्रहतेषुच ।
विक्रमास्तातसिध्यंतिपरीक्ष्यविधिनाकृताः ॥ 9 ॥
अप्रमत्तंकथंतंतुविजिगीषुंबलेस्थितम् ।
जितरोषंदुराधर्षतंप्रधर्षयितुमिच्छथ ॥ 10 ॥
समुद्रंलंघयित्वातुघोरंनदनदीपतिम् ।
गतिंहनूमतोलोकेकोविद्यात्तर्कयेतवा ॥ 11 ॥
बलान्यपरिमेयानिवीर्याणिचनिशाचराः ।
परेषांसहसाऽवज्ञानकर्तव्याकथंचन ॥ 12 ॥
किंचराक्षसराजस्यरामेणापकृतंपुरा ।
आजहारजनस्थानाद्यस्यभार्यांयशस्विनः ॥ 13 ॥
खरोयद्यतिवृत्तस्तुरामेणनिहतोरणे ।
अवश्यंप्राणिनांप्राणारक्षितव्यायथाबलम् ॥ 14 ॥
एतन्निमित्तंवैदेहीभयंनस्सुमहद्भवेत् ।
आहृतासापरित्याज्याकलहार्थेकृतेनकिम् ॥ 15 ॥
नतुक्षमंवीर्यवतातेनधर्मानुवर्तिना ।
वैरंनिरर्थकंकर्तुंदीयतामस्यमैथिली ॥ 16 ॥
यावन्नसगजांसाश्वांबहुरत्नसमाकुलाम् ।
पुरींदारयतेबाणैर्दीयतामस्यमैथिली ॥ 17 ॥
यावत्सुघोरामहतीदुर्धर्षाहरिवाहिनी ।
नावस्कंदतिनोलंकांतावत्सीताप्रदीयताम् ॥ 18 ॥
विनश्येद्धिपुरीलंकाशूरास्सर्वेचराक्षसाः ।
रामस्यदयितापत्नीनस्वयंनयदिदीयते ॥ 19 ॥
प्रसादयेत्वांबंधुत्वात्कुरुष्यवचनंमम ।
हितंतथ्यमहंब्रूमिदीयतामस्यमैथिली ॥ 20 ॥
पुराशरत्सूर्यमरीचिसन्निभान्नवाग्रपुंखान् सुदृढान्नृपात्मजः ।
सृजत्यमोघान्विशिखान्वधायतेप्रदीयतांदशरधायमैथिली ॥ 21 ॥
त्वजस्वकोपंसुखधर्मनाशनंभजस्वधर्मंरतिकीर्तिवर्धनम् ।
प्रसीदजीवेमसपुत्रबांधवाःप्रदीयतांदाशरथायमैथिली ॥ 22 ॥
विभीषणवच्शुत्वारावणोराक्षसेश्वराः ।
विसर्जयित्वातान्सर्वान्प्रविवेशस्वकंगृहम् ॥ 23 ॥
इत्यार्षे श्रीमद्रामायणे वाल्मीकीय आदिकाव्ये युद्धकांडे नवमस्सर्गः ॥
