ଶ୍ରୀମଦ୍ଵାଲ୍ମୀକୀୟ ରାମାୟଣେ ସୁଂଦରକାଂଡମ୍ ।
ଅଥ ପଂଚପଂଚାଶସ୍ସର୍ଗଃ ।
ଲଂକାଂ ସମସ୍ତାଂ ସଂଦୀପ୍ୟ ଲାଂଗୂଲାଗ୍ନିଂ ମହାବଲଃ ।
ନିର୍ଵାପୟାମାସ ତଦା ସମୁଦ୍ରେ ହରିସତ୍ତମଃ ।
ସଂଦୀପ୍ୟମାନାଂ ଵିଧ୍ଵସ୍ତାଂ ତ୍ରସ୍ତରକ୍ଷୋଗଣାଂ ପୁରୀମ୍ ।
ଆଵେକ୍ଷ୍ୟ ହନୁମାନ୍ ଲଂକାଂ ଚିଂତୟାମାସ ଵାନରଃ ॥ 1 ॥
ତସ୍ୟାଭୂତ୍ସୁମହାଂସ୍ତ୍ରାସଃ କୁତ୍ସା ଚାତ୍ମନ୍ୟଜାୟତ ।
ଲଂକାଂ ପ୍ରଦହତା କର୍ମ କିଂସ୍ଵିତ୍କୃତମିଦଂ ମୟା ॥ 2 ॥
ଧନ୍ୟାସ୍ତେ ପୁରୁଷଶ୍ରେଷ୍ଠା ୟେ ବୁଦ୍ଧ୍ୟା କୋପମୁତ୍ଥିତମ୍ ।
ନିରୁଂଧଂତି ମହାତ୍ମାନୋ ଦୀପ୍ତମଗ୍ନିମିଵାଂଭସା ॥ 3 ॥
କ୍ରୁଦ୍ଧଃ ପାପଂ ନ କୁର୍ୟାତ୍କଃ କ୍ରୁଦ୍ଧୋ ହନ୍ୟାଦ୍ଗୁରୂନପି ।
କ୍ରୁଦ୍ଧଃ ପରୁଷୟା ଵାଚା ନରସ୍ସାଧୂନଧିକ୍ଷିପେତ୍ ॥ 4 ॥
ଵାଚ୍ୟାଵାଚ୍ୟଂ ପ୍ରକୁପିତୋ ନ ଵିଜାନାତି କର୍ହିଚିତ୍ ।
ନାକାର୍ୟମସ୍ତି କ୍ରୁଦ୍ଧସ୍ୟ ନାଵାଚ୍ୟଂ ଵିଦ୍ୟତେ କ୍ଵଚିତ୍ ॥ 5 ॥
ୟସ୍ସମୁତ୍ପତିତଂ କ୍ରୋଧଂ କ୍ଷମୟୈଵ ନିରସ୍ୟତି ।
ୟଥୋରଗସ୍ତ୍ଵଚଂ ଜୀର୍ଣାଂ ସ ଵୈ ପୁରୁଷ ଉଚ୍ୟତେ ॥ 6 ॥
ଧିଗସ୍ତୁ ମାଂ ସୁଦୁର୍ବୁଦ୍ଧିଂ ନିର୍ଲଜ୍ଜଂ ପାପକୃତ୍ତମମ୍ ।
ଅଚିଂତୟିତ୍ଵା ତାଂ ସୀତାମଗ୍ନିଦଂ ସ୍ଵାମିଘାତୁକମ୍ ॥ 7 ॥
ୟଦି ଦଗ୍ଧା ତ୍ଵିୟଂ ଲଂକା ନୂନମାର୍ୟାଽପି ଜାନକୀ ।
ଦଗ୍ଧା ତେନ ମୟା ଭର୍ତୁର୍ହିତଂ କାର୍ୟମଜାନତା ॥ 8 ॥
ୟଦର୍ଥମୟମାରଂଭସ୍ତତ୍କାର୍ୟମଵସାଦିତମ୍ ।
ମୟା ହି ଦହତା ଲଂକାଂ ନ ସୀତା ପରିରକ୍ଷିତା ॥ 9 ॥
ଈଷତ୍କାର୍ୟମିଦଂ କାର୍ୟଂ କୃତମାସୀନ୍ନ ସଂଶୟଃ ।
ତସ୍ୟ କ୍ରୋଧାଭିଭୂତେନ ମୟା ମୂଲକ୍ଷୟଃ କୃତଃ ॥ 10 ॥
ଵିନଷ୍ଟା ଜାନକୀ ନୂନଂ ନ ହ୍ୟଦଗ୍ଧଃ ପ୍ରଦୃଶ୍ୟତେ ।
ଲଂକାୟାଂ କଶ୍ଚିଦୁଦ୍ଧେଶସ୍ସର୍ଵା ଭସ୍ମୀକୃତା ପୁରୀ ॥ 11 ॥
ୟଦି ତଦ୍ଵିହତଂ କାର୍ୟଂ ମମ ପ୍ରଜ୍ଞାଵିପର୍ୟୟାତ୍ ।
ଇହୈଵ ପ୍ରାଣସଂନ୍ୟାସୋ ମମାପି ହ୍ୟଦ୍ୟ ରୋଚତେ ॥ 12 ॥
କିମଗ୍ନୌ ନିପତାମ୍ୟଦ୍ୟ ଆହୋସ୍ଵିଦ୍ବଡବାମୁଖେ ।
ଶରୀରମାହୋ ସତ୍ତ୍ଵାନାଂ ଦଦ୍ମି ସାଗରଵାସିନାମ୍ ॥ 13 ॥
କଥଂ ହି ଜୀଵତା ଶକ୍ୟୋ ମୟା ଦ୍ରଷ୍ଟୁଂ ହରୀଶ୍ଵରଃ ।
ତୌ ଵା ପୁରୁଷଶାର୍ଦୂଲୌ କାର୍ୟସର୍ଵସ୍ଵଘାତିନା ॥ 14 ॥
ମୟା ଖଲୁ ତଦେଵେଦଂ ରୋଷଦୋଷାତ୍ପ୍ରଦର୍ଶିତମ୍ ।
ପ୍ରଥିତଂ ତ୍ରିଷୁ ଲୋକେଷୁ କପିତ୍ଵମନଵସ୍ଥିତମ୍ ॥ 15 ॥
ଧିଗସ୍ତୁ ରାଜସଂ ଭାଵମନୀଶମନଵସ୍ଥିତମ୍ ।
ଈଶ୍ଵରେଣାପି ୟଦ୍ରାଗାନ୍ମୟା ସୀତା ନ ରକ୍ଷିତା ॥ 16 ॥
ଵିନଷ୍ଟାୟାଂ ତୁ ସୀତାୟାଂ ତାଵୁଭୌ ଵିନଶିଷ୍ୟତଃ ।
ତୟୋର୍ଵିନାଶେ ସୁଗ୍ରୀଵଃ ସବଂଧୁର୍ଵିନଶିଷ୍ୟତି ॥ 17 ॥
ଏତଦେଵ ଵଚଶ୍ଶ୍ରୁତ୍ଵା ଭରତୋ ଭ୍ରାତୃଵତ୍ସଲଃ ।
ଧର୍ମାତ୍ମା ସହଶତ୍ରୁଘ୍ନଃ କଥଂ ଶକ୍ଷ୍ୟତି ଜୀଵିତୁମ୍ ॥ 18 ॥
ଇକ୍ଷ୍ଵାକୁଵଂଶେ ଧର୍ମିଷ୍ଠେ ଗତେ ନାଶମସଂଶୟମ୍ ।
ଭଵିଷ୍ୟଂତି ପ୍ରଜାସ୍ସର୍ଵାଶ୍ଶୋକସଂତାପପୀଡିତାଃ ॥ 19 ॥
ତଦହଂ ଭାଗ୍ୟରହିତୋ ଲୁପ୍ତଧର୍ମାର୍ଥସଂଗ୍ରହଃ ॥ 20 ॥
ରୋଷଦୋଷପରୀତାତ୍ମା ଵ୍ୟକ୍ତଂ ଲୋକଵିନାଶନଃ ।
ଇତି ଚିଂତୟତସ୍ତସ୍ୟ ନିମିତ୍ତାନ୍ୟୁପପେଦିରେ ।
ପୂର୍ଵମପ୍ୟୁପଲବ୍ଧାନି ସାକ୍ଷାତ୍ପୁନରଚିଂତୟତ୍ ॥ 21 ॥
ଅଥଵା ଚାରୁସର୍ଵାଂଗୀ ରକ୍ଷିତା ସ୍ଵେନ ତେଜସା ।
ନ ନଶିଷ୍ୟତି କଲ୍ୟାଣୀ ନାଗ୍ନିରଗ୍ନୌ ପ୍ରଵର୍ତତେ ॥ 22 ॥
ନ ହି ଧର୍ମାତ୍ମନସ୍ତସ୍ୟ ଭାର୍ୟାମମିତତେଜସଃ ।
ସ୍ଵଚାରିତ୍ରାଭିଗୁପ୍ତାଂ ତାଂ ସ୍ପ୍ରଷ୍ଟୁମର୍ହତି ପାଵକଃ ॥ 23 ॥
ନୂନଂ ରାମପ୍ରଭାଵେଣ ଵୈଦେହ୍ୟାସ୍ସୁକୃତେନ ଚ ।
ୟନ୍ମାଂ ଦହନକର୍ମାୟଂ ନାଦହଦ୍ଧଵ୍ୟଵାହନଃ ॥ 24 ॥
ତ୍ରୟାଣାଂ ଭରତାଦୀନାଂ ଭ୍ରାତ୍ରୂଣାଂ ଦେଵତା ଚ ୟା ।
ରାମସ୍ୟ ଚ ମନଃ କାଂତା ସା କଥଂ ଵିନଶିଷ୍ୟତି ॥ 25 ॥
ୟଦ୍ଵା ଦହନକର୍ମାୟଂ ସର୍ଵତ୍ର ପ୍ରଭୁରଵ୍ୟୟଃ ।
ନ ମେ ଦହତି ଲାଂଗୂଲଂ କଥମାର୍ୟାଂ ପ୍ରଧକ୍ଷ୍ୟତି ॥ 26 ॥
ପୁନଶ୍ଚାଚିଂତୟତ୍ତତ୍ର ହନୁମାନ୍ଵିସ୍ମିତସ୍ତଦା ।
ହିରଣ୍ୟନାଭସ୍ୟ ଗିରେର୍ଜଲମଧ୍ୟେ ପ୍ରଦର୍ଶନମ୍ ॥ 27 ॥
ତପସା ସତ୍ୟଵାକ୍ୟେନ ଅନନ୍ୟତ୍ଵାଚ୍ଚ ଭର୍ତରି ।
ଅପି ସା ନିର୍ଦହେଦଗ୍ନିଂ ନ ତାମଗ୍ନିଃ ପ୍ରଧକ୍ଷ୍ୟତି ॥ 28 ॥
ସ ତଥା ଚିଂତୟଂସ୍ତତ୍ର ଦେଵ୍ୟା ଧର୍ମପରିଗ୍ରହମ୍ ।
ଶୁଶ୍ରାଵ ହନୁମାନ୍ଵାକ୍ୟଂ ଚାରଣାନାଂ ମହାତ୍ମନାମ୍ ॥ 29 ॥
ଅହୋ ଖଲୁ କୃତଂ କର୍ମ ଦୁଷ୍କରଂ ହି ହନୂମତା ।
ଅଗ୍ନିଂ ଵିସୃଜତାଽଭୀକ୍ଷ୍ଣଂ ଭୀମଂ ରାକ୍ଷସଵେଶ୍ମନି ॥ 30 ॥
ପ୍ରପଲାୟିତରକ୍ଷଃ ସ୍ତ୍ରୀବାଲଵୃଦ୍ଧସମାକୁଲା ।
ଜନକୋଲାହଲାଧ୍ମାତା କ୍ରଂଦଂତୀଵାଦ୍ରିକଂଦରୈଃ ॥ 31 ॥
ଦଗ୍ଧେୟଂ ନଗରୀ ସର୍ଵା ସାଟ୍ଟପ୍ରାକାରତୋରଣା ।
ଜାନକୀ ନ ଚ ଦଗ୍ଧେତି ଵିସ୍ମୟୋଽଦ୍ଭୁତ ଏଵ ନଃ ॥ 32 ॥
ସ ନିମିତ୍ତୈଶ୍ଚ ଦୃଷ୍ଟାର୍ଥୈଃ କାରଣୈଶ୍ଚ ମହାଗୁଣୈଃ ।
ଋଷିଵାକ୍ୟୈଶ୍ଚ ହନୁମାନଭଵତ୍ପ୍ରୀତମାନସଃ ॥ 33 ॥
ତତଃ କପିଃ ପ୍ରାପ୍ତମନୋରଥାର୍ଥସ୍ତାମକ୍ଷତାଂ ରାଜସୁତାଂ ଵିଦିତ୍ଵା ।
ପ୍ରତ୍ୟକ୍ଷତସ୍ତାଂ ପୁନରେଵ ଦୃଷ୍ଟଵା ପ୍ରତିପ୍ରୟାଣାୟ ମତିଂ ଚକାର ॥ 34 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ସୁଂଦରକାଂଡେ ପଂଚପଂଚାଶସ୍ସର୍ଗଃ ॥
