ශ්රීමද්වාල්මීකීය රාමායණේ සුංදරකාංඩම් ।
අථ පංචපංචාශස්සර්ගඃ ।
ලංකාං සමස්තාං සංදීප්ය ලාංගූලාග්නිං මහාබලඃ ।
නිර්වාපයාමාස තදා සමුද්රේ හරිසත්තමඃ ।
සංදීප්යමානාං විධ්වස්තාං ත්රස්තරක්ෂෝගණාං පුරීම් ।
ආවේක්ෂ්ය හනුමාන් ලංකාං චිංතයාමාස වානරඃ ॥ 1 ॥
තස්යාභූත්සුමහාංස්ත්රාසඃ කුත්සා චාත්මන්යජායත ।
ලංකාං ප්රදහතා කර්ම කිංස්විත්කෘතමිදං මයා ॥ 2 ॥
ධන්යාස්තේ පුරුෂශ්රේෂ්ඨා යේ බුද්ධ්යා කෝපමුත්ථිතම් ।
නිරුංධංති මහාත්මානෝ දීප්තමග්නිමිවාංභසා ॥ 3 ॥
ක්රුද්ධඃ පාපං න කුර්යාත්කඃ ක්රුද්ධෝ හන්යාද්ගුරූනපි ।
ක්රුද්ධඃ පරුෂයා වාචා නරස්සාධූනධික්ෂිපේත් ॥ 4 ॥
වාච්යාවාච්යං ප්රකුපිතෝ න විජානාති කර්හිචිත් ।
නාකාර්යමස්ති ක්රුද්ධස්ය නාවාච්යං විද්යතේ ක්වචිත් ॥ 5 ॥
යස්සමුත්පතිතං ක්රෝධං ක්ෂමයෛව නිරස්යති ।
යථෝරගස්ත්වචං ජීර්ණාං ස වෛ පුරුෂ උච්යතේ ॥ 6 ॥
ධිගස්තු මාං සුදුර්බුද්ධිං නිර්ලජ්ජං පාපකෘත්තමම් ।
අචිංතයිත්වා තාං සීතාමග්නිදං ස්වාමිඝාතුකම් ॥ 7 ॥
යදි දග්ධා ත්වියං ලංකා නූනමාර්යාऽපි ජානකී ।
දග්ධා තේන මයා භර්තුර්හිතං කාර්යමජානතා ॥ 8 ॥
යදර්ථමයමාරංභස්තත්කාර්යමවසාදිතම් ।
මයා හි දහතා ලංකාං න සීතා පරිරක්ෂිතා ॥ 9 ॥
ඊෂත්කාර්යමිදං කාර්යං කෘතමාසීන්න සංශයඃ ।
තස්ය ක්රෝධාභිභූතේන මයා මූලක්ෂයඃ කෘතඃ ॥ 10 ॥
විනෂ්ටා ජානකී නූනං න හ්යදග්ධඃ ප්රදෘශ්යතේ ।
ලංකායාං කශ්චිදුද්ධේශස්සර්වා භස්මීකෘතා පුරී ॥ 11 ॥
යදි තද්විහතං කාර්යං මම ප්රජ්ඤාවිපර්යයාත් ।
ඉහෛව ප්රාණසංන්යාසෝ මමාපි හ්යද්ය රෝචතේ ॥ 12 ॥
කිමග්නෞ නිපතාම්යද්ය ආහෝස්විද්බඩබාමුඛේ ।
ශරීරමාහෝ සත්ත්වානාං දද්මි සාගරවාසිනාම් ॥ 13 ॥
කථං හි ජීවතා ශක්යෝ මයා ද්රෂ්ටුං හරීශ්වරඃ ।
තෞ වා පුරුෂශාර්දූලෞ කාර්යසර්වස්වඝාතිනා ॥ 14 ॥
මයා ඛලු තදේවේදං රෝෂදෝෂාත්ප්රදර්ශිතම් ।
ප්රථිතං ත්රිෂු ලෝකේෂු කපිත්වමනවස්ථිතම් ॥ 15 ॥
ධිගස්තු රාජසං භාවමනීශමනවස්ථිතම් ।
ඊශ්වරේණාපි යද්රාගාන්මයා සීතා න රක්ෂිතා ॥ 16 ॥
විනෂ්ටායාං තු සීතායාං තාවුභෞ විනශිෂ්යතඃ ।
තයෝර්විනාශේ සුග්රීවඃ සබංධුර්විනශිෂ්යති ॥ 17 ॥
ඒතදේව වචශ්ශ්රුත්වා භරතෝ භ්රාතෘවත්සලඃ ।
ධර්මාත්මා සහශත්රුඝ්නඃ කථං ශක්ෂ්යති ජීවිතුම් ॥ 18 ॥
ඉක්ෂ්වාකුවංශේ ධර්මිෂ්ඨේ ගතේ නාශමසංශයම් ।
භවිෂ්යංති ප්රජාස්සර්වාශ්ශෝකසංතාපපීඩිතාඃ ॥ 19 ॥
තදහං භාග්යරහිතෝ ලුප්තධර්මාර්ථසංග්රහඃ ॥ 20 ॥
රෝෂදෝෂපරීතාත්මා ව්යක්තං ලෝකවිනාශනඃ ।
ඉති චිංතයතස්තස්ය නිමිත්තාන්යුපපේදිරේ ।
පූර්වමප්යුපලබ්ධානි සාක්ෂාත්පුනරචිංතයත් ॥ 21 ॥
අථවා චාරුසර්වාංගී රක්ෂිතා ස්වේන තේජසා ।
න නශිෂ්යති කල්යාණී නාග්නිරග්නෞ ප්රවර්තතේ ॥ 22 ॥
න හි ධර්මාත්මනස්තස්ය භාර්යාමමිතතේජසඃ ।
ස්වචාරිත්රාභිගුප්තාං තාං ස්ප්රෂ්ටුමර්හති පාවකඃ ॥ 23 ॥
නූනං රාමප්රභාවේණ වෛදේහ්යාස්සුකෘතේන ච ।
යන්මාං දහනකර්මායං නාදහද්ධව්යවාහනඃ ॥ 24 ॥
ත්රයාණාං භරතාදීනාං භ්රාත්රූණාං දේවතා ච යා ।
රාමස්ය ච මනඃ කාංතා සා කථං විනශිෂ්යති ॥ 25 ॥
යද්වා දහනකර්මායං සර්වත්ර ප්රභුරව්යයඃ ।
න මේ දහති ලාංගූලං කථමාර්යාං ප්රධක්ෂ්යති ॥ 26 ॥
පුනශ්චාචිංතයත්තත්ර හනුමාන්විස්මිතස්තදා ।
හිරණ්යනාභස්ය ගිරේර්ජලමධ්යේ ප්රදර්ශනම් ॥ 27 ॥
තපසා සත්යවාක්යේන අනන්යත්වාච්ච භර්තරි ।
අපි සා නිර්දහේදග්නිං න තාමග්නිඃ ප්රධක්ෂ්යති ॥ 28 ॥
ස තථා චිංතයංස්තත්ර දේව්යා ධර්මපරිග්රහම් ।
ශුශ්රාව හනුමාන්වාක්යං චාරණානාං මහාත්මනාම් ॥ 29 ॥
අහෝ ඛලු කෘතං කර්ම දුෂ්කරං හි හනූමතා ।
අග්නිං විසෘජතාऽභීක්ෂ්ණං භීමං රාක්ෂසවේශ්මනි ॥ 30 ॥
ප්රපලායිතරක්ෂඃ ස්ත්රීබාලවෘද්ධසමාකුලා ।
ජනකෝලාහලාධ්මාතා ක්රංදංතීවාද්රිකංදරෛඃ ॥ 31 ॥
දග්ධේයං නගරී සර්වා සාට්ටප්රාකාරතෝරණා ।
ජානකී න ච දග්ධේති විස්මයෝऽද්භුත ඒව නඃ ॥ 32 ॥
ස නිමිත්තෛශ්ච දෘෂ්ටාර්ථෛඃ කාරණෛශ්ච මහාගුණෛඃ ।
ඍෂිවාක්යෛශ්ච හනුමානභවත්ප්රීතමානසඃ ॥ 33 ॥
තතඃ කපිඃ ප්රාප්තමනෝරථාර්ථස්තාමක්ෂතාං රාජසුතාං විදිත්වා ।
ප්රත්යක්ෂතස්තාං පුනරේව දෘෂ්ටවා ප්රතිප්රයාණාය මතිං චකාර ॥ 34 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ පංචපංචාශස්සර්ගඃ ॥
