𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌸𑍁𑌂𑌦𑌰𑌕𑌾𑌂𑌡𑌮𑍍 ।
𑌅𑌥 𑌪𑌂𑌚𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ।
𑌲𑌂𑌕𑌾𑌂 𑌸𑌮𑌸𑍍𑌤𑌾𑌂 𑌸𑌂𑌦𑍀𑌪𑍍𑌯 𑌲𑌾𑌂𑌗𑍂𑌲𑌾𑌗𑍍𑌨𑌿𑌂 𑌮𑌹𑌾𑌬𑌲𑌃 ।
𑌨𑌿𑌰𑍍𑌵𑌾𑌪𑌯𑌾𑌮𑌾𑌸 𑌤𑌦𑌾 𑌸𑌮𑍁𑌦𑍍𑌰𑍇 𑌹𑌰𑌿𑌸𑌤𑍍𑌤𑌮𑌃 ।
𑌸𑌂𑌦𑍀𑌪𑍍𑌯𑌮𑌾𑌨𑌾𑌂 𑌵𑌿𑌧𑍍𑌵𑌸𑍍𑌤𑌾𑌂 𑌤𑍍𑌰𑌸𑍍𑌤𑌰𑌕𑍍𑌷𑍋𑌗𑌣𑌾𑌂 𑌪𑍁𑌰𑍀𑌮𑍍 ।
𑌆𑌵𑍇𑌕𑍍𑌷𑍍𑌯 𑌹𑌨𑍁𑌮𑌾𑌨𑍍 𑌲𑌂𑌕𑌾𑌂 𑌚𑌿𑌂𑌤𑌯𑌾𑌮𑌾𑌸 𑌵𑌾𑌨𑌰𑌃 ॥ 1 ॥
𑌤𑌸𑍍𑌯𑌾𑌭𑍂𑌤𑍍𑌸𑍁𑌮𑌹𑌾𑌂𑌸𑍍𑌤𑍍𑌰𑌾𑌸𑌃 𑌕𑍁𑌤𑍍𑌸𑌾 𑌚𑌾𑌤𑍍𑌮𑌨𑍍𑌯𑌜𑌾𑌯𑌤 ।
𑌲𑌂𑌕𑌾𑌂 𑌪𑍍𑌰𑌦𑌹𑌤𑌾 𑌕𑌰𑍍𑌮 𑌕𑌿𑌂𑌸𑍍𑌵𑌿𑌤𑍍𑌕𑍃𑌤𑌮𑌿𑌦𑌂 𑌮𑌯𑌾 ॥ 2 ॥
𑌧𑌨𑍍𑌯𑌾𑌸𑍍𑌤𑍇 𑌪𑍁𑌰𑍁𑌷𑌶𑍍𑌰𑍇𑌷𑍍𑌠𑌾 𑌯𑍇 𑌬𑍁𑌦𑍍𑌧𑍍𑌯𑌾 𑌕𑍋𑌪𑌮𑍁𑌤𑍍𑌥𑌿𑌤𑌮𑍍 ।
𑌨𑌿𑌰𑍁𑌂𑌧𑌂𑌤𑌿 𑌮𑌹𑌾𑌤𑍍𑌮𑌾𑌨𑍋 𑌦𑍀𑌪𑍍𑌤𑌮𑌗𑍍𑌨𑌿𑌮𑌿𑌵𑌾𑌂𑌭𑌸𑌾 ॥ 3 ॥
𑌕𑍍𑌰𑍁𑌦𑍍𑌧𑌃 𑌪𑌾𑌪𑌂 𑌨 𑌕𑍁𑌰𑍍𑌯𑌾𑌤𑍍𑌕𑌃 𑌕𑍍𑌰𑍁𑌦𑍍𑌧𑍋 𑌹𑌨𑍍𑌯𑌾𑌦𑍍𑌗𑍁𑌰𑍂𑌨𑌪𑌿 ।
𑌕𑍍𑌰𑍁𑌦𑍍𑌧𑌃 𑌪𑌰𑍁𑌷𑌯𑌾 𑌵𑌾𑌚𑌾 𑌨𑌰𑌸𑍍𑌸𑌾𑌧𑍂𑌨𑌧𑌿𑌕𑍍𑌷𑌿𑌪𑍇𑌤𑍍 ॥ 4 ॥
𑌵𑌾𑌚𑍍𑌯𑌾𑌵𑌾𑌚𑍍𑌯𑌂 𑌪𑍍𑌰𑌕𑍁𑌪𑌿𑌤𑍋 𑌨 𑌵𑌿𑌜𑌾𑌨𑌾𑌤𑌿 𑌕𑌰𑍍𑌹𑌿𑌚𑌿𑌤𑍍 ।
𑌨𑌾𑌕𑌾𑌰𑍍𑌯𑌮𑌸𑍍𑌤𑌿 𑌕𑍍𑌰𑍁𑌦𑍍𑌧𑌸𑍍𑌯 𑌨𑌾𑌵𑌾𑌚𑍍𑌯𑌂 𑌵𑌿𑌦𑍍𑌯𑌤𑍇 𑌕𑍍𑌵𑌚𑌿𑌤𑍍 ॥ 5 ॥
𑌯𑌸𑍍𑌸𑌮𑍁𑌤𑍍𑌪𑌤𑌿𑌤𑌂 𑌕𑍍𑌰𑍋𑌧𑌂 𑌕𑍍𑌷𑌮𑌯𑍈𑌵 𑌨𑌿𑌰𑌸𑍍𑌯𑌤𑌿 ।
𑌯𑌥𑍋𑌰𑌗𑌸𑍍𑌤𑍍𑌵𑌚𑌂 𑌜𑍀𑌰𑍍𑌣𑌾𑌂 𑌸 𑌵𑍈 𑌪𑍁𑌰𑍁𑌷 𑌉𑌚𑍍𑌯𑌤𑍇 ॥ 6 ॥
𑌧𑌿𑌗𑌸𑍍𑌤𑍁 𑌮𑌾𑌂 𑌸𑍁𑌦𑍁𑌰𑍍𑌬𑍁𑌦𑍍𑌧𑌿𑌂 𑌨𑌿𑌰𑍍𑌲𑌜𑍍𑌜𑌂 𑌪𑌾𑌪𑌕𑍃𑌤𑍍𑌤𑌮𑌮𑍍 ।
𑌅𑌚𑌿𑌂𑌤𑌯𑌿𑌤𑍍𑌵𑌾 𑌤𑌾𑌂 𑌸𑍀𑌤𑌾𑌮𑌗𑍍𑌨𑌿𑌦𑌂 𑌸𑍍𑌵𑌾𑌮𑌿𑌘𑌾𑌤𑍁𑌕𑌮𑍍 ॥ ॥
𑌯𑌦𑌿 𑌦𑌗𑍍𑌧𑌾 𑌤𑍍𑌵𑌿𑌯𑌂 𑌲𑌂𑌕𑌾 𑌨𑍂𑌨𑌮𑌾𑌰𑍍𑌯𑌾𑌽𑌪𑌿 𑌜𑌾𑌨𑌕𑍀 ।
𑌦𑌗𑍍𑌧𑌾 𑌤𑍇𑌨 𑌮𑌯𑌾 𑌭𑌰𑍍𑌤𑍁𑌰𑍍𑌹𑌿𑌤𑌂 𑌕𑌾𑌰𑍍𑌯𑌮𑌜𑌾𑌨𑌤𑌾 ॥ ॥
𑌯𑌦𑌰𑍍𑌥𑌮𑌯𑌮𑌾𑌰𑌂𑌭𑌸𑍍𑌤𑌤𑍍𑌕𑌾𑌰𑍍𑌯𑌮𑌵𑌸𑌾𑌦𑌿𑌤𑌮𑍍 ।
𑌮𑌯𑌾 𑌹𑌿 𑌦𑌹𑌤𑌾 𑌲𑌂𑌕𑌾𑌂 𑌨 𑌸𑍀𑌤𑌾 𑌪𑌰𑌿𑌰𑌕𑍍𑌷𑌿𑌤𑌾 ॥ ॥
𑌈𑌷𑌤𑍍𑌕𑌾𑌰𑍍𑌯𑌮𑌿𑌦𑌂 𑌕𑌾𑌰𑍍𑌯𑌂 𑌕𑍃𑌤𑌮𑌾𑌸𑍀𑌨𑍍𑌨 𑌸𑌂𑌶𑌯𑌃 ।
𑌤𑌸𑍍𑌯 𑌕𑍍𑌰𑍋𑌧𑌾𑌭𑌿𑌭𑍂𑌤𑍇𑌨 𑌮𑌯𑌾 𑌮𑍂𑌲𑌕𑍍𑌷𑌯𑌃 𑌕𑍃𑌤𑌃 ॥ 10 ॥
𑌵𑌿𑌨𑌷𑍍𑌟𑌾 𑌜𑌾𑌨𑌕𑍀 𑌨𑍂𑌨𑌂 𑌨 𑌹𑍍𑌯𑌦𑌗𑍍𑌧𑌃 𑌪𑍍𑌰𑌦𑍃𑌶𑍍𑌯𑌤𑍇 ।
𑌲𑌂𑌕𑌾𑌯𑌾𑌂 𑌕𑌶𑍍𑌚𑌿𑌦𑍁𑌦𑍍𑌧𑍇𑌶𑌸𑍍𑌸𑌰𑍍𑌵𑌾 𑌭𑌸𑍍𑌮𑍀𑌕𑍃𑌤𑌾 𑌪𑍁𑌰𑍀 ॥ 11 ॥
𑌯𑌦𑌿 𑌤𑌦𑍍𑌵𑌿𑌹𑌤𑌂 𑌕𑌾𑌰𑍍𑌯𑌂 𑌮𑌮 𑌪𑍍𑌰𑌜𑍍𑌞𑌾𑌵𑌿𑌪𑌰𑍍𑌯𑌯𑌾𑌤𑍍 ।
𑌇𑌹𑍈𑌵 𑌪𑍍𑌰𑌾𑌣𑌸𑌂𑌨𑍍𑌯𑌾𑌸𑍋 𑌮𑌮𑌾𑌪𑌿 𑌹𑍍𑌯𑌦𑍍𑌯 𑌰𑍋𑌚𑌤𑍇 ॥ 12 ॥
𑌕𑌿𑌮𑌗𑍍𑌨𑍌 𑌨𑌿𑌪𑌤𑌾𑌮𑍍𑌯𑌦𑍍𑌯 𑌆𑌹𑍋𑌸𑍍𑌵𑌿𑌦𑍍𑌬𑌡𑌬𑌾𑌮𑍁𑌖𑍇 ।
𑌶𑌰𑍀𑌰𑌮𑌾𑌹𑍋 𑌸𑌤𑍍𑌤𑍍𑌵𑌾𑌨𑌾𑌂 𑌦𑌦𑍍𑌮𑌿 𑌸𑌾𑌗𑌰𑌵𑌾𑌸𑌿𑌨𑌾𑌮𑍍 ॥ 13 ॥
𑌕𑌥𑌂 𑌹𑌿 𑌜𑍀𑌵𑌤𑌾 𑌶𑌕𑍍𑌯𑍋 𑌮𑌯𑌾 𑌦𑍍𑌰𑌷𑍍𑌟𑍁𑌂 𑌹𑌰𑍀𑌶𑍍𑌵𑌰𑌃 ।
𑌤𑍌 𑌵𑌾 𑌪𑍁𑌰𑍁𑌷𑌶𑌾𑌰𑍍𑌦𑍂𑌲𑍌 𑌕𑌾𑌰𑍍𑌯𑌸𑌰𑍍𑌵𑌸𑍍𑌵𑌘𑌾𑌤𑌿𑌨𑌾 ॥ 14 ॥
𑌮𑌯𑌾 𑌖𑌲𑍁 𑌤𑌦𑍇𑌵𑍇𑌦𑌂 𑌰𑍋𑌷𑌦𑍋𑌷𑌾𑌤𑍍𑌪𑍍𑌰𑌦𑌰𑍍𑌶𑌿𑌤𑌮𑍍 ।
𑌪𑍍𑌰𑌥𑌿𑌤𑌂 𑌤𑍍𑌰𑌿𑌷𑍁 𑌲𑍋𑌕𑍇𑌷𑍁 𑌕𑌪𑌿𑌤𑍍𑌵𑌮𑌨𑌵𑌸𑍍𑌥𑌿𑌤𑌮𑍍 ॥ 15 ॥
𑌧𑌿𑌗𑌸𑍍𑌤𑍁 𑌰𑌾𑌜𑌸𑌂 𑌭𑌾𑌵𑌮𑌨𑍀𑌶𑌮𑌨𑌵𑌸𑍍𑌥𑌿𑌤𑌮𑍍 ।
𑌈𑌶𑍍𑌵𑌰𑍇𑌣𑌾𑌪𑌿 𑌯𑌦𑍍𑌰𑌾𑌗𑌾𑌨𑍍𑌮𑌯𑌾 𑌸𑍀𑌤𑌾 𑌨 𑌰𑌕𑍍𑌷𑌿𑌤𑌾 ॥ 16 ॥
𑌵𑌿𑌨𑌷𑍍𑌟𑌾𑌯𑌾𑌂 𑌤𑍁 𑌸𑍀𑌤𑌾𑌯𑌾𑌂 𑌤𑌾𑌵𑍁𑌭𑍌 𑌵𑌿𑌨𑌶𑌿𑌷𑍍𑌯𑌤𑌃 ।
𑌤𑌯𑍋𑌰𑍍𑌵𑌿𑌨𑌾𑌶𑍇 𑌸𑍁𑌗𑍍𑌰𑍀𑌵𑌃 𑌸𑌬𑌂𑌧𑍁𑌰𑍍𑌵𑌿𑌨𑌶𑌿𑌷𑍍𑌯𑌤𑌿 ॥ 1 ॥
𑌏𑌤𑌦𑍇𑌵 𑌵𑌚𑌶𑍍𑌶𑍍𑌰𑍁𑌤𑍍𑌵𑌾 𑌭𑌰𑌤𑍋 𑌭𑍍𑌰𑌾𑌤𑍃𑌵𑌤𑍍𑌸𑌲𑌃 ।
𑌧𑌰𑍍𑌮𑌾𑌤𑍍𑌮𑌾 𑌸𑌹𑌶𑌤𑍍𑌰𑍁𑌘𑍍𑌨𑌃 𑌕𑌥𑌂 𑌶𑌕𑍍𑌷𑍍𑌯𑌤𑌿 𑌜𑍀𑌵𑌿𑌤𑍁𑌮𑍍 ॥ 1 ॥
𑌇𑌕𑍍𑌷𑍍𑌵𑌾𑌕𑍁𑌵𑌂𑌶𑍇 𑌧𑌰𑍍𑌮𑌿𑌷𑍍𑌠𑍇 𑌗𑌤𑍇 𑌨𑌾𑌶𑌮𑌸𑌂𑌶𑌯𑌮𑍍 ।
𑌭𑌵𑌿𑌷𑍍𑌯𑌂𑌤𑌿 𑌪𑍍𑌰𑌜𑌾𑌸𑍍𑌸𑌰𑍍𑌵𑌾𑌶𑍍𑌶𑍋𑌕𑌸𑌂𑌤𑌾𑌪𑌪𑍀𑌡𑌿𑌤𑌾𑌃 ॥ 1 ॥
𑌤𑌦𑌹𑌂 𑌭𑌾𑌗𑍍𑌯𑌰𑌹𑌿𑌤𑍋 𑌲𑍁𑌪𑍍𑌤𑌧𑌰𑍍𑌮𑌾𑌰𑍍𑌥𑌸𑌂𑌗𑍍𑌰𑌹𑌃 ॥ 20 ॥
𑌰𑍋𑌷𑌦𑍋𑌷𑌪𑌰𑍀𑌤𑌾𑌤𑍍𑌮𑌾 𑌵𑍍𑌯𑌕𑍍𑌤𑌂 𑌲𑍋𑌕𑌵𑌿𑌨𑌾𑌶𑌨𑌃 ।
𑌇𑌤𑌿 𑌚𑌿𑌂𑌤𑌯𑌤𑌸𑍍𑌤𑌸𑍍𑌯 𑌨𑌿𑌮𑌿𑌤𑍍𑌤𑌾𑌨𑍍𑌯𑍁𑌪𑌪𑍇𑌦𑌿𑌰𑍇 ।
𑌪𑍂𑌰𑍍𑌵𑌮𑌪𑍍𑌯𑍁𑌪𑌲𑌬𑍍𑌧𑌾𑌨𑌿 𑌸𑌾𑌕𑍍𑌷𑌾𑌤𑍍𑌪𑍁𑌨𑌰𑌚𑌿𑌂𑌤𑌯𑌤𑍍 ॥ 21 ॥
𑌅𑌥𑌵𑌾 𑌚𑌾𑌰𑍁𑌸𑌰𑍍𑌵𑌾𑌂𑌗𑍀 𑌰𑌕𑍍𑌷𑌿𑌤𑌾 𑌸𑍍𑌵𑍇𑌨 𑌤𑍇𑌜𑌸𑌾 ।
𑌨 𑌨𑌶𑌿𑌷𑍍𑌯𑌤𑌿 𑌕𑌲𑍍𑌯𑌾𑌣𑍀 𑌨𑌾𑌗𑍍𑌨𑌿𑌰𑌗𑍍𑌨𑍌 𑌪𑍍𑌰𑌵𑌰𑍍𑌤𑌤𑍇 ॥ 22 ॥
𑌨 𑌹𑌿 𑌧𑌰𑍍𑌮𑌾𑌤𑍍𑌮𑌨𑌸𑍍𑌤𑌸𑍍𑌯 𑌭𑌾𑌰𑍍𑌯𑌾𑌮𑌮𑌿𑌤𑌤𑍇𑌜𑌸𑌃 ।
𑌸𑍍𑌵𑌚𑌾𑌰𑌿𑌤𑍍𑌰𑌾𑌭𑌿𑌗𑍁𑌪𑍍𑌤𑌾𑌂 𑌤𑌾𑌂 𑌸𑍍𑌪𑍍𑌰𑌷𑍍𑌟𑍁𑌮𑌰𑍍𑌹𑌤𑌿 𑌪𑌾𑌵𑌕𑌃 ॥ 23 ॥
𑌨𑍂𑌨𑌂 𑌰𑌾𑌮𑌪𑍍𑌰𑌭𑌾𑌵𑍇𑌣 𑌵𑍈𑌦𑍇𑌹𑍍𑌯𑌾𑌸𑍍𑌸𑍁𑌕𑍃𑌤𑍇𑌨 𑌚 ।
𑌯𑌨𑍍𑌮𑌾𑌂 𑌦𑌹𑌨𑌕𑌰𑍍𑌮𑌾𑌯𑌂 𑌨𑌾𑌦𑌹𑌦𑍍𑌧𑌵𑍍𑌯𑌵𑌾𑌹𑌨𑌃 ॥ 24 ॥
𑌤𑍍𑌰𑌯𑌾𑌣𑌾𑌂 𑌭𑌰𑌤𑌾𑌦𑍀𑌨𑌾𑌂 𑌭𑍍𑌰𑌾𑌤𑍍𑌰𑍂𑌣𑌾𑌂 𑌦𑍇𑌵𑌤𑌾 𑌚 𑌯𑌾 ।
𑌰𑌾𑌮𑌸𑍍𑌯 𑌚 𑌮𑌨𑌃 𑌕𑌾𑌂𑌤𑌾 𑌸𑌾 𑌕𑌥𑌂 𑌵𑌿𑌨𑌶𑌿𑌷𑍍𑌯𑌤𑌿 ॥ 25 ॥
𑌯𑌦𑍍𑌵𑌾 𑌦𑌹𑌨𑌕𑌰𑍍𑌮𑌾𑌯𑌂 𑌸𑌰𑍍𑌵𑌤𑍍𑌰 𑌪𑍍𑌰𑌭𑍁𑌰𑌵𑍍𑌯𑌯𑌃 ।
𑌨 𑌮𑍇 𑌦𑌹𑌤𑌿 𑌲𑌾𑌂𑌗𑍂𑌲𑌂 𑌕𑌥𑌮𑌾𑌰𑍍𑌯𑌾𑌂 𑌪𑍍𑌰𑌧𑌕𑍍𑌷𑍍𑌯𑌤𑌿 ॥ 26 ॥
𑌪𑍁𑌨𑌶𑍍𑌚𑌾𑌚𑌿𑌂𑌤𑌯𑌤𑍍𑌤𑌤𑍍𑌰 𑌹𑌨𑍁𑌮𑌾𑌨𑍍𑌵𑌿𑌸𑍍𑌮𑌿𑌤𑌸𑍍𑌤𑌦𑌾 ।
𑌹𑌿𑌰𑌣𑍍𑌯𑌨𑌾𑌭𑌸𑍍𑌯 𑌗𑌿𑌰𑍇𑌰𑍍𑌜𑌲𑌮𑌧𑍍𑌯𑍇 𑌪𑍍𑌰𑌦𑌰𑍍𑌶𑌨𑌮𑍍 ॥ 2 ॥
𑌤𑌪𑌸𑌾 𑌸𑌤𑍍𑌯𑌵𑌾𑌕𑍍𑌯𑍇𑌨 𑌅𑌨𑌨𑍍𑌯𑌤𑍍𑌵𑌾𑌚𑍍𑌚 𑌭𑌰𑍍𑌤𑌰𑌿 ।
𑌅𑌪𑌿 𑌸𑌾 𑌨𑌿𑌰𑍍𑌦𑌹𑍇𑌦𑌗𑍍𑌨𑌿𑌂 𑌨 𑌤𑌾𑌮𑌗𑍍𑌨𑌿𑌃 𑌪𑍍𑌰𑌧𑌕𑍍𑌷𑍍𑌯𑌤𑌿 ॥ 2 ॥
𑌸 𑌤𑌥𑌾 𑌚𑌿𑌂𑌤𑌯𑌂𑌸𑍍𑌤𑌤𑍍𑌰 𑌦𑍇𑌵𑍍𑌯𑌾 𑌧𑌰𑍍𑌮𑌪𑌰𑌿𑌗𑍍𑌰𑌹𑌮𑍍 ।
𑌶𑍁𑌶𑍍𑌰𑌾𑌵 𑌹𑌨𑍁𑌮𑌾𑌨𑍍𑌵𑌾𑌕𑍍𑌯𑌂 𑌚𑌾𑌰𑌣𑌾𑌨𑌾𑌂 𑌮𑌹𑌾𑌤𑍍𑌮𑌨𑌾𑌮𑍍 ॥ 2 ॥
𑌅𑌹𑍋 𑌖𑌲𑍁 𑌕𑍃𑌤𑌂 𑌕𑌰𑍍𑌮 𑌦𑍁𑌷𑍍𑌕𑌰𑌂 𑌹𑌿 𑌹𑌨𑍂𑌮𑌤𑌾 ।
𑌅𑌗𑍍𑌨𑌿𑌂 𑌵𑌿𑌸𑍃𑌜𑌤𑌾𑌽𑌭𑍀𑌕𑍍𑌷𑍍𑌣𑌂 𑌭𑍀𑌮𑌂 𑌰𑌾𑌕𑍍𑌷𑌸𑌵𑍇𑌶𑍍𑌮𑌨𑌿 ॥ 30 ॥
𑌪𑍍𑌰𑌪𑌲𑌾𑌯𑌿𑌤𑌰𑌕𑍍𑌷𑌃 𑌸𑍍𑌤𑍍𑌰𑍀𑌬𑌾𑌲𑌵𑍃𑌦𑍍𑌧𑌸𑌮𑌾𑌕𑍁𑌲𑌾 ।
𑌜𑌨𑌕𑍋𑌲𑌾𑌹𑌲𑌾𑌧𑍍𑌮𑌾𑌤𑌾 𑌕𑍍𑌰𑌂𑌦𑌂𑌤𑍀𑌵𑌾𑌦𑍍𑌰𑌿𑌕𑌂𑌦𑌰𑍈𑌃 ॥ 31 ॥
𑌦𑌗𑍍𑌧𑍇𑌯𑌂 𑌨𑌗𑌰𑍀 𑌸𑌰𑍍𑌵𑌾 𑌸𑌾𑌟𑍍𑌟𑌪𑍍𑌰𑌾𑌕𑌾𑌰𑌤𑍋𑌰𑌣𑌾 ।
𑌜𑌾𑌨𑌕𑍀 𑌨 𑌚 𑌦𑌗𑍍𑌧𑍇𑌤𑌿 𑌵𑌿𑌸𑍍𑌮𑌯𑍋𑌽𑌦𑍍𑌭𑍁𑌤 𑌏𑌵 𑌨𑌃 ॥ 32 ॥
𑌸 𑌨𑌿𑌮𑌿𑌤𑍍𑌤𑍈𑌶𑍍𑌚 𑌦𑍃𑌷𑍍𑌟𑌾𑌰𑍍𑌥𑍈𑌃 𑌕𑌾𑌰𑌣𑍈𑌶𑍍𑌚 𑌮𑌹𑌾𑌗𑍁𑌣𑍈𑌃 ।
𑌋𑌷𑌿𑌵𑌾𑌕𑍍𑌯𑍈𑌶𑍍𑌚 𑌹𑌨𑍁𑌮𑌾𑌨𑌭𑌵𑌤𑍍𑌪𑍍𑌰𑍀𑌤𑌮𑌾𑌨𑌸𑌃 ॥ 33 ॥
𑌤𑌤𑌃 𑌕𑌪𑌿𑌃 𑌪𑍍𑌰𑌾𑌪𑍍𑌤𑌮𑌨𑍋𑌰𑌥𑌾𑌰𑍍𑌥𑌸𑍍𑌤𑌾𑌮𑌕𑍍𑌷𑌤𑌾𑌂 𑌰𑌾𑌜𑌸𑍁𑌤𑌾𑌂 𑌵𑌿𑌦𑌿𑌤𑍍𑌵𑌾 ।
𑌪𑍍𑌰𑌤𑍍𑌯𑌕𑍍𑌷𑌤𑌸𑍍𑌤𑌾𑌂 𑌪𑍁𑌨𑌰𑍇𑌵 𑌦𑍃𑌷𑍍𑌟𑌵𑌾 𑌪𑍍𑌰𑌤𑌿𑌪𑍍𑌰𑌯𑌾𑌣𑌾𑌯 𑌮𑌤𑌿𑌂 𑌚𑌕𑌾𑌰 ॥ 34 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌸𑍁𑌂𑌦𑌰𑌕𑌾𑌂𑌡𑍇 𑌪𑌂𑌚𑌪𑌂𑌚𑌾𑌶𑌸𑍍𑌸𑌰𑍍𑌗𑌃 ॥
