ශ්රීමද්වාල්මීකීය රාමායණේ සුංදරකාංඩම් ।
අථ ද්විෂෂ්ටිතමස්සර්ගඃ ।
තානුවාච හරිශ්රේෂ්ඨෝ හනුමාන්වානරර්ෂභඃ ।
අව්යග්රමනසෝ යූයං මධු සේවත වානරාඃ ॥ 1 ॥
අහමාවාරයිෂ්යාමි යුෂ්මාකං පරිපංථිනඃ ।
ශ්රුත්වා හනුමතෝ වාක්යං හරීණාං ප්රවරෝऽංගදඃ ॥ 2 ॥
ප්රත්යුවාච ප්රසන්නාත්මා පිබංතු හරයෝ මධු ।
අවශ්යං කෘතකාර්යස්ය වාක්යං හනුමතෝ මයා ॥ 3 ॥
අකාර්යමපි කර්තව්යං කිමංග පුනරීදෘශම් ।
අංගදස්ය මුඛාච්ඡ්රුත්වාවචනං වානරර්ෂභාඃ ॥ 4 ॥
සාධුසාධ්විති සංහෘෂ්ටා වානරාඃ ප්රත්යපූජයන් ।
පූජයිත්වාංගදං සර්වේ වානරා වානරර්ෂභම් ॥ 5 ॥
ජග්මුර්මධුවනං යත්ර නදීවේග ඉව ද්රුමම් ।
තේ ප්රවිෂ්ටා මධුවනං පාලානාක්රම්ය වීර්යතඃ ॥ 6 ॥
අතිසර්ගාච්ච පටවෝ දෘෂ්ට්වා ශ්රුත්වා ච මෛථිලීම් ।
පපුස්සර්වේ මධු තදා රසවත්ඵලමාදදුඃ ॥ 7 ॥
උත්පත්ය ච තතස්සර්වේ වනපාලාන් සමාගතාන් ।
තාඩයංති ස්ම ශතශ ස්සක්තාන්මධුවනේ තදා ॥ 8 ॥
මධූනි ද්රෝණමාත්රාණි බාහුභිඃ පරිගෘහ්ය තේ ।
පිබංති සහිතා ස්සර්වේ නිඝ්නංති ස්ම තථාපරේ ॥ 9 ॥
කේචිත්පීත්වා ප්රවිධ්යංති මධූනි මධුපිංගලාඃ ।
මධූච්ඡිෂ්ටේන කේචිච්ච ජග්මුරන්යෝන්යමුත්කටාඃ ॥ 10 ॥
අපරේ වෘක්ෂමූලේ තු ශාඛාං ගෘහ්ය ව්යවස්ථිතාඃ ।
අත්යර්ථං ච මදග්ලානාඃ පර්ණාන්යාස්තීර්ය ශේරතේ ॥ 11 ॥
උන්මත්තභූතාඃ ප්ලවගා මධුමත්තාශ්ච හෘෂ්ටවත් ।
ක්ෂිපංති ච තථාන්යෝන්යං ස්ඛලංති ච තථාऽපරේ ॥ 12 ॥
කේචිත් ක්ෂ්වේලාං ප්රකුර්වංති කේචිත් කූජංති හෘෂ්ටවත් ।
හරයෝමධුනා මත්තාඃ කේචිත්සුප්තා මහීතලේ ॥ 13 ॥
කෘත්වා කේචිද්ධසංත්යන්යේ කේචිත්කුර්වංති චේතරත් ।
කෘත්වා කේචිද්වදංත්යන්යේ කේචිද්බුධ්යංති චේතරත් ॥ 14 ॥
යේऽප්යත්ර මධුපාලා ස්ස්යුඃ ප්රේෂ්යා දධිමුඛස්ය තු ।
තේऽපි තෛර්වානරෛර්භීමෛඃ ප්රතිෂිද්ධා දිශෝ ගතාඃ ॥ 15 ॥
ජානුභිස්තු ප්රකෘෂ්ටාශ්ච දේවමාර්ගං ප්රදර්ශිතාඃ ।
අබ්රුවන් පරමෝද්විග්නා ගත්වා දධිමුඛං වචඃ ॥ 16 ॥
හනූමතා දත්තවරෛර්හතං මධුවනං බලාත් ।
වයං ච ජානුභිඃ කෘෂ්ටා දේවමාර්ගං ච දර්ශිතාඃ ॥ 17 ॥
තතෝ දධිමුඛඃ ක්රුද්ධෝ වනපස්තත්ර වානරඃ ।
හතං මධුවනං ශ්රුත්වා සාංත්වයාමාස තාන් හරීන් ॥ 18 ॥
ඉහාගච්ඡත ගච්ඡාමෝ වානරාන් බලදර්පිතාන් ।
බලේන වාරයිෂ්යාමෝ මධු භක්ෂයතෝ වයම් ॥ 19 ॥
ශ්රුත්වා දධිමුඛස්යේදං වචනං වානරර්ෂභාඃ ।
පුනර්වීරා මධුවනං තේනෛව සහසා යයුඃ ॥ 20 ॥
මධ්යේ චෛෂාං දධිමුඛඃ ප්රගෘහ්ය තරසා තරුම් ।
සමභ්යධාවද්වේගේන තේ ච සර්වේ ප්ලවංගමාඃ ॥ 21 ॥
තේ ශිලාඃ පාදපාංශ්චාපි පර්වතාංශ්චාපි වානරාඃ ।
ගෘහීත්වාऽऽභ්යගමන් ක්රුද්ධා යත්ර තේ කපිකුංජරාඃ ॥ 22 ॥
තේ ස්වාමිවචනං වීරා හෘදයේෂ්වවසජ්ය තත් ।
ත්වරයා හ්යභ්යධාවංත සාලතාලශිලායුධාඃ ॥ 23 ॥
වෘක්ෂස්ථාංශ්ච තලස්ථාංශ්ච වානරාන් බලදර්පිතාන් ।
අභ්යක්රාමංස්තතෝ වීරාඃ පාලාස්තත්ර සහස්රශඃ ॥ 24 ॥
අථ දෘෂ්ට්වා දධිමුඛං ක්රුද්ධං වානරපුංගවාඃ ।
අභ්යධාවංත වේගේන හනුමත්ප්රමුඛාස්තදා ॥ 25 ॥
තං සවෘක්ෂං මහාබාහුමාපතංතං මහාබලම් ।
ආර්යකං ප්රාහරත්තත්ර බාහුභ්යාං කුපිතෝऽංගදඃ ॥ 26 ॥
මදාංධශ්ච න වේදෛනමාර්යකෝऽයං මමේති සඃ ।
අථෛනං නිෂ්පිපේෂාශු වේගවද්වසුධාතලේ ॥ 27 ॥
ස භග්නබාහූරුභුජෝ විහ්වලශ්ශෝණිතෝක්ෂිතඃ ।
මුමෝහ සහසා වීරෝ මුහූර්තං කපිකුංජරඃ ॥ 28 ॥
ස සමාශ්වස්ය සහසා සංකෘද්ධෝ රාජමාතුලඃ ।
වානරාන්වාරයාමාස දංඩේන මධුමෝහිතාන් ॥ 29 ॥
ස කථංචිද්විමුක්තස්ස්තෛර්වානරෛර්වානරර්ෂභඃ ।
උවාචෛකාංතමාශ්රිත්ය භෘත්යාන් ස්වාන් සමුපාගතාන් ॥ 30 ॥
ඒතේ තිෂ්ඨංතු ගච්ඡාමෝ භර්තා නෝ යත්ර වානරඃ ।
සුග්රීවෝ විපුලග්රීවඃ සහ රාමේණ තිෂ්ඨති ॥ 31 ॥
සර්වං චෛවාංගදේ දෝෂං ශ්රාවයිෂ්යාමි පාර්ථිවේ ।
අමර්ෂී වචනං ශ්රුත්වා ඝාතයිෂ්යති වානරාන් ॥ 32 ॥
ඉෂ්ටං මධුවනං හ්යේතත්පාර්ථිවස්ය මහාත්මනඃ ।
පිතෘපෛතාමහං දිව්යං දේවෛරපි දුරාසදම් ॥ 33 ॥
ස වානරානිමාන් සර්වාන් මධුලුබ්ධාන් ගතායුෂඃ ।
ඝාතයිෂ්යති දංඩේන සුග්රීවස්සසුහෘජ්ජනාන් ॥ 34 ॥
වධ්යා හ්යේතේ දුරාත්මානෝ නෘපාජ්ඤාපරිභාවිනඃ ।
අමර්ෂප්රභවෝ රෝෂස්සඵලෝ නෝ භවිෂ්යති ॥ 35 ॥
ඒවමුක්ත්වා දධිමුඛෝ වනපාලාන්මහාබලඃ ।
ජගාම සහසෝත්පත්ය වනපාලෛස්සමන්විතඃ ॥ 36 ॥
නිමේෂාංතරමාත්රේණ ස හි ප්රාප්තෝ වනාලයඃ ।
සහස්රාංශුසුතෝ ධීමාන් සුග්රීවෝ යත්ර වානරඃ ॥ 37 ॥
රාමං ච ලක්ෂ්මණං චෛව දෘෂ්ට්වා සුග්රීවමේව ච ।
සමප්රතිෂ්ඨාං ජගතීමාකාශාන්නිපපාත හ ॥ 38 ॥
සන්නිපත්ය මහාවීර්යස්සර්වෛස්තෛඃ පරිවාරිතඃ ।
හරිර්දධිමුඛඃ පාලෛඃ පාලානාං පරමේශ්වරඃ ॥ 39 ॥
ස දීනවදනෝ භූත්වා කෘත්වා ශිරසි චාංජලිම් ।
සුග්රීවස්ය ශුභෞ මූර්ධ්නා චරණෞ පත්යපීඩයත් ॥ 40 ॥
ඉත්යාර්ෂේ ශ්රීමද්රාමායණේ වාල්මීකීය ආදිකාව්යේ සුංදරකාංඩේ ද්විෂෂ්ටිතමස්සර්ගඃ ॥
