श्रीमद्वाल्मीकीय रामायणे बालकांडम् ।
अथ षट्सप्ततितमस्सर्गः ।
श्रुत्वा तज्जामदग्न्यस्य वाक्यं दाशरथिस्तदा ।
गौरवाद्यंंत्रितकथः पितू राममथाब्रवीत् ॥ 1 ॥
श्रुतवानस्मि यत्कर्म कृतवानसि भार्गव ।
अनुरुंध्यामहे ब्रह्मन् पितुरानृण्यमास्थितम् ॥ 2 ॥
वीर्यहीनमिवाशक्तं क्षत्रधर्मेण भार्गव ।
अवजानासि मे तेजः पश्य मेऽद्य पराक्रमम् ॥ 3 ॥
इत्युक्त्वा राघवः क्रुद्धो भार्गवस्य शरासनम् ।
शरं च प्रतिजग्राह हस्ताल्लघुपराक्रमः ॥ 4 ॥
आरोप्य स धनू राम श्शरं सज्यं चकार ह ।
जामदग्न्यं ततो रामं रामः क्रुद्धोऽब्रवीद्वचः ॥ 5 ॥
ब्राह्मणोऽसीति पूज्यो मे विश्वामित्रकृतेन च ।
तस्माच्छक्तो न ते राम मोक्तुं प्राणहरं शरम् ॥ 6 ॥
इमां पादगतिं राम तपोबलसमार्जिताम् ।
लोकानप्रतिमान्वा ते हनिष्यामि यदिच्छसि ॥ 7 ॥
न ह्ययं वैष्णवो दिव्य श्शरः परपुरंजयः ।
मोघः पतति वीर्येण बलदर्पविनाशनः ॥ 8 ॥
वरायुधधरं रामं द्रष्टुं सर्षिगणा स्सुराः ।
पितामहं पुरस्कृत्य समेतास्तत्र संघशः ॥ 9 ॥
गंधर्वाप्सरसश्चैव सिद्धचारणकिन्नराः ।
यक्षराक्षसनागाश्च तद्द्रष्टुं महदद्भुतम् ॥ 10 ॥
जडीकृते तदाऽलोके रामे वरधनुर्धरे ।
निर्वीर्यो जामदग्न्योऽसौ रामो राममुदैक्षत ॥ 11 ॥
तेजोभिहतवीर्यत्वाज्जामदग्न्यो जडीकृतः ।
रामं कमलपत्राक्षं मंदं मंदमुवाच ह ॥ 12 ॥
काश्यपाय मया दत्ता यदा पूर्वं वसुंधरा ।
विषये मे न वस्तव्यमिति मां काश्यपोऽब्रवीत् ॥ 13 ॥
सोऽहं गुरुवचः कुर्वन् पृथिव्यां न वसे निशाम् ।
कृता प्रतिज्ञा काकुत्स्थ कृता भूः काश्यपस्य हि ॥ 14 ॥
तदिमां त्वं गतिं वीर हंतुं नार्हसि राघव ।
मनोजवं गमिष्यामि महेंद्रं पर्वतोत्तमम् ॥ 15 ॥
लोकास्त्वप्रतिमा राम निर्जितास्तपसा मया ।
जहि तान् शरमुख्येन मा भूत्कालस्य पर्ययः ॥ 16 ॥
अक्षय्यं मधुहंतारं जानामि त्वां सुरेश्वरम् ।
धनुषोऽस्य परामर्शात् स्वस्ति तेऽस्तु परंतप ॥ 17 ॥
एते सुरगणास्सर्वे निरीक्षंते समागताः ।
त्वामप्रतिमकर्माणमप्रतिद्वंद्वमाहवे ॥ 18 ॥
न चेयं मम काकुत्स्थ व्रीडा भवितुमर्हति ।
त्वया त्रैलोक्यनाथेन यदहं विमुखीकृतः ॥ 19 ॥
शरमप्रतिमं राम मोक्तुमर्हसि सुव्रत ।
शरमोक्षे गमिष्यामि महेंद्रं पर्वतोत्तमम् ॥ 20 ॥
तथा ब्रुवति रामे तु जामदग्नये प्रतापवान् ।
रामो दाशरथि श्श्रीमान् चिक्षेप शरमुत्तमम् ॥ 21 ॥
स हतान् दृश्य रामेण स्वांल्लोकांस्तपसार्जितान् ।
जामदग्न्यो जगामाशु महेंद्रं पर्वतोत्तमम् ॥ 22 ॥
ततो वितिमिरास्सर्वा दिशश्चोपदिशस्तथा ।
सुरा स्सर्षिगणा रामं प्रशशंसुरुदायुधम् ॥ 23 ॥
रामं दाशरथिं रामो जामदग्न्यः प्रशस्य च ।
ततः प्रदक्षिणी कृत्य जगामात्मगतिं प्रभुः ॥ 24 ॥
इत्यार्षे श्रीमद्रामायणे वाल्मीकीय आदिकाव्ये बालकांडे षट्सप्ततितमस्सर्गः ॥
