ଶ୍ରୀମଦ୍ଵାଲ୍ମୀକୀୟ ରାମାୟଣେ ବାଲକାଂଡମ୍ ।
ଅଥ ଷଟ୍ସପ୍ତତିତମସ୍ସର୍ଗଃ ।
ଶ୍ରୁତ୍ଵା ତଜ୍ଜାମଦଗ୍ନ୍ୟସ୍ୟ ଵାକ୍ୟଂ ଦାଶରଥିସ୍ତଦା ।
ଗୌରଵାଦ୍ୟଂଂତ୍ରିତକଥଃ ପିତୂ ରାମମଥାବ୍ରଵୀତ୍ ॥ 1 ॥
ଶ୍ରୁତଵାନସ୍ମି ୟତ୍କର୍ମ କୃତଵାନସି ଭାର୍ଗଵ ।
ଅନୁରୁଂଧ୍ୟାମହେ ବ୍ରହ୍ମନ୍ ପିତୁରାନୃଣ୍ୟମାସ୍ଥିତମ୍ ॥ 2 ॥
ଵୀର୍ୟହୀନମିଵାଶକ୍ତଂ କ୍ଷତ୍ରଧର୍ମେଣ ଭାର୍ଗଵ ।
ଅଵଜାନାସି ମେ ତେଜଃ ପଶ୍ୟ ମେଽଦ୍ୟ ପରାକ୍ରମମ୍ ॥ 3 ॥
ଇତ୍ୟୁକ୍ତ୍ଵା ରାଘଵଃ କ୍ରୁଦ୍ଧୋ ଭାର୍ଗଵସ୍ୟ ଶରାସନମ୍ ।
ଶରଂ ଚ ପ୍ରତିଜଗ୍ରାହ ହସ୍ତାଲ୍ଲଘୁପରାକ୍ରମଃ ॥ 4 ॥
ଆରୋପ୍ୟ ସ ଧନୂ ରାମ ଶ୍ଶରଂ ସଜ୍ୟଂ ଚକାର ହ ।
ଜାମଦଗ୍ନ୍ୟଂ ତତୋ ରାମଂ ରାମଃ କ୍ରୁଦ୍ଧୋଽବ୍ରଵୀଦ୍ଵଚଃ ॥ 5 ॥
ବ୍ରାହ୍ମଣୋଽସୀତି ପୂଜ୍ୟୋ ମେ ଵିଶ୍ଵାମିତ୍ରକୃତେନ ଚ ।
ତସ୍ମାଚ୍ଛକ୍ତୋ ନ ତେ ରାମ ମୋକ୍ତୁଂ ପ୍ରାଣହରଂ ଶରମ୍ ॥ 6 ॥
ଇମାଂ ପାଦଗତିଂ ରାମ ତପୋବଲସମାର୍ଜିତାମ୍ ।
ଲୋକାନପ୍ରତିମାନ୍ଵା ତେ ହନିଷ୍ୟାମି ୟଦିଚ୍ଛସି ॥ 7 ॥
ନ ହ୍ୟୟଂ ଵୈଷ୍ଣଵୋ ଦିଵ୍ୟ ଶ୍ଶରଃ ପରପୁରଂଜୟଃ ।
ମୋଘଃ ପତତି ଵୀର୍ୟେଣ ବଲଦର୍ପଵିନାଶନଃ ॥ 8 ॥
ଵରାୟୁଧଧରଂ ରାମଂ ଦ୍ରଷ୍ଟୁଂ ସର୍ଷିଗଣା ସ୍ସୁରାଃ ।
ପିତାମହଂ ପୁରସ୍କୃତ୍ୟ ସମେତାସ୍ତତ୍ର ସଂଘଶଃ ॥ 9 ॥
ଗଂଧର୍ଵାପ୍ସରସଶ୍ଚୈଵ ସିଦ୍ଧଚାରଣକିନ୍ନରାଃ ।
ୟକ୍ଷରାକ୍ଷସନାଗାଶ୍ଚ ତଦ୍ଦ୍ରଷ୍ଟୁଂ ମହଦଦ୍ଭୁତମ୍ ॥ 10 ॥
ଜଡୀକୃତେ ତଦାଽଲୋକେ ରାମେ ଵରଧନୁର୍ଧରେ ।
ନିର୍ଵୀର୍ୟୋ ଜାମଦଗ୍ନ୍ୟୋଽସୌ ରାମୋ ରାମମୁଦୈକ୍ଷତ ॥ 11 ॥
ତେଜୋଭିହତଵୀର୍ୟତ୍ଵାଜ୍ଜାମଦଗ୍ନ୍ୟୋ ଜଡୀକୃତଃ ।
ରାମଂ କମଲପତ୍ରାକ୍ଷଂ ମଂଦଂ ମଂଦମୁଵାଚ ହ ॥ 12 ॥
କାଶ୍ୟପାୟ ମୟା ଦତ୍ତା ୟଦା ପୂର୍ଵଂ ଵସୁଂଧରା ।
ଵିଷୟେ ମେ ନ ଵସ୍ତଵ୍ୟମିତି ମାଂ କାଶ୍ୟପୋଽବ୍ରଵୀତ୍ ॥ 13 ॥
ସୋଽହଂ ଗୁରୁଵଚଃ କୁର୍ଵନ୍ ପୃଥିଵ୍ୟାଂ ନ ଵସେ ନିଶାମ୍ ।
କୃତା ପ୍ରତିଜ୍ଞା କାକୁତ୍ସ୍ଥ କୃତା ଭୂଃ କାଶ୍ୟପସ୍ୟ ହି ॥ 14 ॥
ତଦିମାଂ ତ୍ଵଂ ଗତିଂ ଵୀର ହଂତୁଂ ନାର୍ହସି ରାଘଵ ।
ମନୋଜଵଂ ଗମିଷ୍ୟାମି ମହେଂଦ୍ରଂ ପର୍ଵତୋତ୍ତମମ୍ ॥ 15 ॥
ଲୋକାସ୍ତ୍ଵପ୍ରତିମା ରାମ ନିର୍ଜିତାସ୍ତପସା ମୟା ।
ଜହି ତାନ୍ ଶରମୁଖ୍ୟେନ ମା ଭୂତ୍କାଲସ୍ୟ ପର୍ୟୟଃ ॥ 16 ॥
ଅକ୍ଷୟ୍ୟଂ ମଧୁହଂତାରଂ ଜାନାମି ତ୍ଵାଂ ସୁରେଶ୍ଵରମ୍ ।
ଧନୁଷୋଽସ୍ୟ ପରାମର୍ଶାତ୍ ସ୍ଵସ୍ତି ତେଽସ୍ତୁ ପରଂତପ ॥ 17 ॥
ଏତେ ସୁରଗଣାସ୍ସର୍ଵେ ନିରୀକ୍ଷଂତେ ସମାଗତାଃ ।
ତ୍ଵାମପ୍ରତିମକର୍ମାଣମପ୍ରତିଦ୍ଵଂଦ୍ଵମାହଵେ ॥ 18 ॥
ନ ଚେୟଂ ମମ କାକୁତ୍ସ୍ଥ ଵ୍ରୀଡା ଭଵିତୁମର୍ହତି ।
ତ୍ଵୟା ତ୍ରୈଲୋକ୍ୟନାଥେନ ୟଦହଂ ଵିମୁଖୀକୃତଃ ॥ 19 ॥
ଶରମପ୍ରତିମଂ ରାମ ମୋକ୍ତୁମର୍ହସି ସୁଵ୍ରତ ।
ଶରମୋକ୍ଷେ ଗମିଷ୍ୟାମି ମହେଂଦ୍ରଂ ପର୍ଵତୋତ୍ତମମ୍ ॥ 20 ॥
ତଥା ବ୍ରୁଵତି ରାମେ ତୁ ଜାମଦଗ୍ନୟେ ପ୍ରତାପଵାନ୍ ।
ରାମୋ ଦାଶରଥି ଶ୍ଶ୍ରୀମାନ୍ ଚିକ୍ଷେପ ଶରମୁତ୍ତମମ୍ ॥ 21 ॥
ସ ହତାନ୍ ଦୃଶ୍ୟ ରାମେଣ ସ୍ଵାଂଲ୍ଲୋକାଂସ୍ତପସାର୍ଜିତାନ୍ ।
ଜାମଦଗ୍ନ୍ୟୋ ଜଗାମାଶୁ ମହେଂଦ୍ରଂ ପର୍ଵତୋତ୍ତମମ୍ ॥ 22 ॥
ତତୋ ଵିତିମିରାସ୍ସର୍ଵା ଦିଶଶ୍ଚୋପଦିଶସ୍ତଥା ।
ସୁରା ସ୍ସର୍ଷିଗଣା ରାମଂ ପ୍ରଶଶଂସୁରୁଦାୟୁଧମ୍ ॥ 23 ॥
ରାମଂ ଦାଶରଥିଂ ରାମୋ ଜାମଦଗ୍ନ୍ୟଃ ପ୍ରଶସ୍ୟ ଚ ।
ତତଃ ପ୍ରଦକ୍ଷିଣୀ କୃତ୍ୟ ଜଗାମାତ୍ମଗତିଂ ପ୍ରଭୁଃ ॥ 24 ॥
ଇତ୍ୟାର୍ଷେ ଶ୍ରୀମଦ୍ରାମାୟଣେ ଵାଲ୍ମୀକୀୟ ଆଦିକାଵ୍ୟେ ବାଲକାଂଡେ ଷଟ୍ସପ୍ତତିତମସ୍ସର୍ଗଃ ॥
