𑌶𑍍𑌰𑍀𑌮𑌦𑍍𑌵𑌾𑌲𑍍𑌮𑍀𑌕𑍀𑌯 𑌰𑌾𑌮𑌾𑌯𑌣𑍇 𑌬𑌾𑌲𑌕𑌾𑌂𑌡𑌮𑍍 ।
𑌅𑌥 𑌷𑌟𑍍𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ।
𑌶𑍍𑌰𑍁𑌤𑍍𑌵𑌾 𑌤𑌜𑍍𑌜𑌾𑌮𑌦𑌗𑍍𑌨𑍍𑌯𑌸𑍍𑌯 𑌵𑌾𑌕𑍍𑌯𑌂 𑌦𑌾𑌶𑌰𑌥𑌿𑌸𑍍𑌤𑌦𑌾 ।
𑌗𑍌𑌰𑌵𑌾𑌦𑍍𑌯𑌂𑌂𑌤𑍍𑌰𑌿𑌤𑌕𑌥𑌃 𑌪𑌿𑌤𑍂 𑌰𑌾𑌮𑌮𑌥𑌾𑌬𑍍𑌰𑌵𑍀𑌤𑍍 ॥ 1 ॥
𑌶𑍍𑌰𑍁𑌤𑌵𑌾𑌨𑌸𑍍𑌮𑌿 𑌯𑌤𑍍𑌕𑌰𑍍𑌮 𑌕𑍃𑌤𑌵𑌾𑌨𑌸𑌿 𑌭𑌾𑌰𑍍𑌗𑌵 ।
𑌅𑌨𑍁𑌰𑍁𑌂𑌧𑍍𑌯𑌾𑌮𑌹𑍇 𑌬𑍍𑌰𑌹𑍍𑌮𑌨𑍍 𑌪𑌿𑌤𑍁𑌰𑌾𑌨𑍃𑌣𑍍𑌯𑌮𑌾𑌸𑍍𑌥𑌿𑌤𑌮𑍍 ॥ 2 ॥
𑌵𑍀𑌰𑍍𑌯𑌹𑍀𑌨𑌮𑌿𑌵𑌾𑌶𑌕𑍍𑌤𑌂 𑌕𑍍𑌷𑌤𑍍𑌰𑌧𑌰𑍍𑌮𑍇𑌣 𑌭𑌾𑌰𑍍𑌗𑌵 ।
𑌅𑌵𑌜𑌾𑌨𑌾𑌸𑌿 𑌮𑍇 𑌤𑍇𑌜𑌃 𑌪𑌶𑍍𑌯 𑌮𑍇𑌽𑌦𑍍𑌯 𑌪𑌰𑌾𑌕𑍍𑌰𑌮𑌮𑍍 ॥ 3 ॥
𑌇𑌤𑍍𑌯𑍁𑌕𑍍𑌤𑍍𑌵𑌾 𑌰𑌾𑌘𑌵𑌃 𑌕𑍍𑌰𑍁𑌦𑍍𑌧𑍋 𑌭𑌾𑌰𑍍𑌗𑌵𑌸𑍍𑌯 𑌶𑌰𑌾𑌸𑌨𑌮𑍍 ।
𑌶𑌰𑌂 𑌚 𑌪𑍍𑌰𑌤𑌿𑌜𑌗𑍍𑌰𑌾𑌹 𑌹𑌸𑍍𑌤𑌾𑌲𑍍𑌲𑌘𑍁𑌪𑌰𑌾𑌕𑍍𑌰𑌮𑌃 ॥ 4 ॥
𑌆𑌰𑍋𑌪𑍍𑌯 𑌸 𑌧𑌨𑍂 𑌰𑌾𑌮 𑌶𑍍𑌶𑌰𑌂 𑌸𑌜𑍍𑌯𑌂 𑌚𑌕𑌾𑌰 𑌹 ।
𑌜𑌾𑌮𑌦𑌗𑍍𑌨𑍍𑌯𑌂 𑌤𑌤𑍋 𑌰𑌾𑌮𑌂 𑌰𑌾𑌮𑌃 𑌕𑍍𑌰𑍁𑌦𑍍𑌧𑍋𑌽𑌬𑍍𑌰𑌵𑍀𑌦𑍍𑌵𑌚𑌃 ॥ 5 ॥
𑌬𑍍𑌰𑌾𑌹𑍍𑌮𑌣𑍋𑌽𑌸𑍀𑌤𑌿 𑌪𑍂𑌜𑍍𑌯𑍋 𑌮𑍇 𑌵𑌿𑌶𑍍𑌵𑌾𑌮𑌿𑌤𑍍𑌰𑌕𑍃𑌤𑍇𑌨 𑌚 ।
𑌤𑌸𑍍𑌮𑌾𑌚𑍍𑌛𑌕𑍍𑌤𑍋 𑌨 𑌤𑍇 𑌰𑌾𑌮 𑌮𑍋𑌕𑍍𑌤𑍁𑌂 𑌪𑍍𑌰𑌾𑌣𑌹𑌰𑌂 𑌶𑌰𑌮𑍍 ॥ 6 ॥
𑌇𑌮𑌾𑌂 𑌪𑌾𑌦𑌗𑌤𑌿𑌂 𑌰𑌾𑌮 𑌤𑌪𑍋𑌬𑌲𑌸𑌮𑌾𑌰𑍍𑌜𑌿𑌤𑌾𑌮𑍍 ।
𑌲𑍋𑌕𑌾𑌨𑌪𑍍𑌰𑌤𑌿𑌮𑌾𑌨𑍍𑌵𑌾 𑌤𑍇 𑌹𑌨𑌿𑌷𑍍𑌯𑌾𑌮𑌿 𑌯𑌦𑌿𑌚𑍍𑌛𑌸𑌿 ॥ ॥
𑌨 𑌹𑍍𑌯𑌯𑌂 𑌵𑍈𑌷𑍍𑌣𑌵𑍋 𑌦𑌿𑌵𑍍𑌯 𑌶𑍍𑌶𑌰𑌃 𑌪𑌰𑌪𑍁𑌰𑌂𑌜𑌯𑌃 ।
𑌮𑍋𑌘𑌃 𑌪𑌤𑌤𑌿 𑌵𑍀𑌰𑍍𑌯𑍇𑌣 𑌬𑌲𑌦𑌰𑍍𑌪𑌵𑌿𑌨𑌾𑌶𑌨𑌃 ॥ ॥
𑌵𑌰𑌾𑌯𑍁𑌧𑌧𑌰𑌂 𑌰𑌾𑌮𑌂 𑌦𑍍𑌰𑌷𑍍𑌟𑍁𑌂 𑌸𑌰𑍍𑌷𑌿𑌗𑌣𑌾 𑌸𑍍𑌸𑍁𑌰𑌾𑌃 ।
𑌪𑌿𑌤𑌾𑌮𑌹𑌂 𑌪𑍁𑌰𑌸𑍍𑌕𑍃𑌤𑍍𑌯 𑌸𑌮𑍇𑌤𑌾𑌸𑍍𑌤𑌤𑍍𑌰 𑌸𑌂𑌘𑌶𑌃 ॥ ॥
𑌗𑌂𑌧𑌰𑍍𑌵𑌾𑌪𑍍𑌸𑌰𑌸𑌶𑍍𑌚𑍈𑌵 𑌸𑌿𑌦𑍍𑌧𑌚𑌾𑌰𑌣𑌕𑌿𑌨𑍍𑌨𑌰𑌾𑌃 ।
𑌯𑌕𑍍𑌷𑌰𑌾𑌕𑍍𑌷𑌸𑌨𑌾𑌗𑌾𑌶𑍍𑌚 𑌤𑌦𑍍𑌦𑍍𑌰𑌷𑍍𑌟𑍁𑌂 𑌮𑌹𑌦𑌦𑍍𑌭𑍁𑌤𑌮𑍍 ॥ 10 ॥
𑌜𑌡𑍀𑌕𑍃𑌤𑍇 𑌤𑌦𑌾𑌽𑌲𑍋𑌕𑍇 𑌰𑌾𑌮𑍇 𑌵𑌰𑌧𑌨𑍁𑌰𑍍𑌧𑌰𑍇 ।
𑌨𑌿𑌰𑍍𑌵𑍀𑌰𑍍𑌯𑍋 𑌜𑌾𑌮𑌦𑌗𑍍𑌨𑍍𑌯𑍋𑌽𑌸𑍌 𑌰𑌾𑌮𑍋 𑌰𑌾𑌮𑌮𑍁𑌦𑍈𑌕𑍍𑌷𑌤 ॥ 11 ॥
𑌤𑍇𑌜𑍋𑌭𑌿𑌹𑌤𑌵𑍀𑌰𑍍𑌯𑌤𑍍𑌵𑌾𑌜𑍍𑌜𑌾𑌮𑌦𑌗𑍍𑌨𑍍𑌯𑍋 𑌜𑌡𑍀𑌕𑍃𑌤𑌃 ।
𑌰𑌾𑌮𑌂 𑌕𑌮𑌲𑌪𑌤𑍍𑌰𑌾𑌕𑍍𑌷𑌂 𑌮𑌂𑌦𑌂 𑌮𑌂𑌦𑌮𑍁𑌵𑌾𑌚 𑌹 ॥ 12 ॥
𑌕𑌾𑌶𑍍𑌯𑌪𑌾𑌯 𑌮𑌯𑌾 𑌦𑌤𑍍𑌤𑌾 𑌯𑌦𑌾 𑌪𑍂𑌰𑍍𑌵𑌂 𑌵𑌸𑍁𑌂𑌧𑌰𑌾 ।
𑌵𑌿𑌷𑌯𑍇 𑌮𑍇 𑌨 𑌵𑌸𑍍𑌤𑌵𑍍𑌯𑌮𑌿𑌤𑌿 𑌮𑌾𑌂 𑌕𑌾𑌶𑍍𑌯𑌪𑍋𑌽𑌬𑍍𑌰𑌵𑍀𑌤𑍍 ॥ 13 ॥
𑌸𑍋𑌽𑌹𑌂 𑌗𑍁𑌰𑍁𑌵𑌚𑌃 𑌕𑍁𑌰𑍍𑌵𑌨𑍍 𑌪𑍃𑌥𑌿𑌵𑍍𑌯𑌾𑌂 𑌨 𑌵𑌸𑍇 𑌨𑌿𑌶𑌾𑌮𑍍 ।
𑌕𑍃𑌤𑌾 𑌪𑍍𑌰𑌤𑌿𑌜𑍍𑌞𑌾 𑌕𑌾𑌕𑍁𑌤𑍍𑌸𑍍𑌥 𑌕𑍃𑌤𑌾 𑌭𑍂𑌃 𑌕𑌾𑌶𑍍𑌯𑌪𑌸𑍍𑌯 𑌹𑌿 ॥ 14 ॥
𑌤𑌦𑌿𑌮𑌾𑌂 𑌤𑍍𑌵𑌂 𑌗𑌤𑌿𑌂 𑌵𑍀𑌰 𑌹𑌂𑌤𑍁𑌂 𑌨𑌾𑌰𑍍𑌹𑌸𑌿 𑌰𑌾𑌘𑌵 ।
𑌮𑌨𑍋𑌜𑌵𑌂 𑌗𑌮𑌿𑌷𑍍𑌯𑌾𑌮𑌿 𑌮𑌹𑍇𑌂𑌦𑍍𑌰𑌂 𑌪𑌰𑍍𑌵𑌤𑍋𑌤𑍍𑌤𑌮𑌮𑍍 ॥ 15 ॥
𑌲𑍋𑌕𑌾𑌸𑍍𑌤𑍍𑌵𑌪𑍍𑌰𑌤𑌿𑌮𑌾 𑌰𑌾𑌮 𑌨𑌿𑌰𑍍𑌜𑌿𑌤𑌾𑌸𑍍𑌤𑌪𑌸𑌾 𑌮𑌯𑌾 ।
𑌜𑌹𑌿 𑌤𑌾𑌨𑍍 𑌶𑌰𑌮𑍁𑌖𑍍𑌯𑍇𑌨 𑌮𑌾 𑌭𑍂𑌤𑍍𑌕𑌾𑌲𑌸𑍍𑌯 𑌪𑌰𑍍𑌯𑌯𑌃 ॥ 16 ॥
𑌅𑌕𑍍𑌷𑌯𑍍𑌯𑌂 𑌮𑌧𑍁𑌹𑌂𑌤𑌾𑌰𑌂 𑌜𑌾𑌨𑌾𑌮𑌿 𑌤𑍍𑌵𑌾𑌂 𑌸𑍁𑌰𑍇𑌶𑍍𑌵𑌰𑌮𑍍 ।
𑌧𑌨𑍁𑌷𑍋𑌽𑌸𑍍𑌯 𑌪𑌰𑌾𑌮𑌰𑍍𑌶𑌾𑌤𑍍 𑌸𑍍𑌵𑌸𑍍𑌤𑌿 𑌤𑍇𑌽𑌸𑍍𑌤𑍁 𑌪𑌰𑌂𑌤𑌪 ॥ 1 ॥
𑌏𑌤𑍇 𑌸𑍁𑌰𑌗𑌣𑌾𑌸𑍍𑌸𑌰𑍍𑌵𑍇 𑌨𑌿𑌰𑍀𑌕𑍍𑌷𑌂𑌤𑍇 𑌸𑌮𑌾𑌗𑌤𑌾𑌃 ।
𑌤𑍍𑌵𑌾𑌮𑌪𑍍𑌰𑌤𑌿𑌮𑌕𑌰𑍍𑌮𑌾𑌣𑌮𑌪𑍍𑌰𑌤𑌿𑌦𑍍𑌵𑌂𑌦𑍍𑌵𑌮𑌾𑌹𑌵𑍇 ॥ 1 ॥
𑌨 𑌚𑍇𑌯𑌂 𑌮𑌮 𑌕𑌾𑌕𑍁𑌤𑍍𑌸𑍍𑌥 𑌵𑍍𑌰𑍀𑌡𑌾 𑌭𑌵𑌿𑌤𑍁𑌮𑌰𑍍𑌹𑌤𑌿 ।
𑌤𑍍𑌵𑌯𑌾 𑌤𑍍𑌰𑍈𑌲𑍋𑌕𑍍𑌯𑌨𑌾𑌥𑍇𑌨 𑌯𑌦𑌹𑌂 𑌵𑌿𑌮𑍁𑌖𑍀𑌕𑍃𑌤𑌃 ॥ 1 ॥
𑌶𑌰𑌮𑌪𑍍𑌰𑌤𑌿𑌮𑌂 𑌰𑌾𑌮 𑌮𑍋𑌕𑍍𑌤𑍁𑌮𑌰𑍍𑌹𑌸𑌿 𑌸𑍁𑌵𑍍𑌰𑌤 ।
𑌶𑌰𑌮𑍋𑌕𑍍𑌷𑍇 𑌗𑌮𑌿𑌷𑍍𑌯𑌾𑌮𑌿 𑌮𑌹𑍇𑌂𑌦𑍍𑌰𑌂 𑌪𑌰𑍍𑌵𑌤𑍋𑌤𑍍𑌤𑌮𑌮𑍍 ॥ 20 ॥
𑌤𑌥𑌾 𑌬𑍍𑌰𑍁𑌵𑌤𑌿 𑌰𑌾𑌮𑍇 𑌤𑍁 𑌜𑌾𑌮𑌦𑌗𑍍𑌨𑌯𑍇 𑌪𑍍𑌰𑌤𑌾𑌪𑌵𑌾𑌨𑍍 ।
𑌰𑌾𑌮𑍋 𑌦𑌾𑌶𑌰𑌥𑌿 𑌶𑍍𑌶𑍍𑌰𑍀𑌮𑌾𑌨𑍍 𑌚𑌿𑌕𑍍𑌷𑍇𑌪 𑌶𑌰𑌮𑍁𑌤𑍍𑌤𑌮𑌮𑍍 ॥ 21 ॥
𑌸 𑌹𑌤𑌾𑌨𑍍 𑌦𑍃𑌶𑍍𑌯 𑌰𑌾𑌮𑍇𑌣 𑌸𑍍𑌵𑌾𑌂𑌲𑍍𑌲𑍋𑌕𑌾𑌂𑌸𑍍𑌤𑌪𑌸𑌾𑌰𑍍𑌜𑌿𑌤𑌾𑌨𑍍 ।
𑌜𑌾𑌮𑌦𑌗𑍍𑌨𑍍𑌯𑍋 𑌜𑌗𑌾𑌮𑌾𑌶𑍁 𑌮𑌹𑍇𑌂𑌦𑍍𑌰𑌂 𑌪𑌰𑍍𑌵𑌤𑍋𑌤𑍍𑌤𑌮𑌮𑍍 ॥ 22 ॥
𑌤𑌤𑍋 𑌵𑌿𑌤𑌿𑌮𑌿𑌰𑌾𑌸𑍍𑌸𑌰𑍍𑌵𑌾 𑌦𑌿𑌶𑌶𑍍𑌚𑍋𑌪𑌦𑌿𑌶𑌸𑍍𑌤𑌥𑌾 ।
𑌸𑍁𑌰𑌾 𑌸𑍍𑌸𑌰𑍍𑌷𑌿𑌗𑌣𑌾 𑌰𑌾𑌮𑌂 𑌪𑍍𑌰𑌶𑌶𑌂𑌸𑍁𑌰𑍁𑌦𑌾𑌯𑍁𑌧𑌮𑍍 ॥ 23 ॥
𑌰𑌾𑌮𑌂 𑌦𑌾𑌶𑌰𑌥𑌿𑌂 𑌰𑌾𑌮𑍋 𑌜𑌾𑌮𑌦𑌗𑍍𑌨𑍍𑌯𑌃 𑌪𑍍𑌰𑌶𑌸𑍍𑌯 𑌚 ।
𑌤𑌤𑌃 𑌪𑍍𑌰𑌦𑌕𑍍𑌷𑌿𑌣𑍀 𑌕𑍃𑌤𑍍𑌯 𑌜𑌗𑌾𑌮𑌾𑌤𑍍𑌮𑌗𑌤𑌿𑌂 𑌪𑍍𑌰𑌭𑍁𑌃 ॥ 24 ॥
𑌇𑌤𑍍𑌯𑌾𑌰𑍍𑌷𑍇 𑌶𑍍𑌰𑍀𑌮𑌦𑍍𑌰𑌾𑌮𑌾𑌯𑌣𑍇 𑌵𑌾𑌲𑍍𑌮𑍀𑌕𑍀𑌯 𑌆𑌦𑌿𑌕𑌾𑌵𑍍𑌯𑍇 𑌬𑌾𑌲𑌕𑌾𑌂𑌡𑍇 𑌷𑌟𑍍𑌸𑌪𑍍𑌤𑌤𑌿𑌤𑌮𑌸𑍍𑌸𑌰𑍍𑌗𑌃 ॥
