śrīmadvālmīkīya rāmāyaṇē bālakāṇḍam ।
atha ṣaṭsaptatitamassargaḥ ।
śrutvā tajjāmadagnyasya vākyaṃ dāśarathistadā ।
gauravādyanntritakathaḥ pitū rāmamathābravīt ॥ 1 ॥
śrutavānasmi yatkarma kṛtavānasi bhārgava ।
anurundhyāmahē brahman piturānṛṇyamāsthitam ॥ 2 ॥
vīryahīnamivāśaktaṃ kṣatradharmēṇa bhārgava ।
avajānāsi mē tējaḥ paśya mē'dya parākramam ॥ 3 ॥
ityuktvā rāghavaḥ kruddhō bhārgavasya śarāsanam ।
śaraṃ cha pratijagrāha hastāllaghuparākramaḥ ॥ 4 ॥
ārōpya sa dhanū rāma śśaraṃ sajyaṃ chakāra ha ।
jāmadagnyaṃ tatō rāmaṃ rāmaḥ kruddhō'bravīdvachaḥ ॥ 5 ॥
brāhmaṇō'sīti pūjyō mē viśvāmitrakṛtēna cha ।
tasmāchChaktō na tē rāma mōktuṃ prāṇaharaṃ śaram ॥ 6 ॥
imāṃ pādagatiṃ rāma tapōbalasamārjitām ।
lōkānapratimānvā tē haniṣyāmi yadichChasi ॥ 7 ॥
na hyayaṃ vaiṣṇavō divya śśaraḥ parapurañjayaḥ ।
mōghaḥ patati vīryēṇa baladarpavināśanaḥ ॥ 8 ॥
varāyudhadharaṃ rāmaṃ draṣṭuṃ sarṣigaṇā ssurāḥ ।
pitāmahaṃ puraskṛtya samētāstatra saṅghaśaḥ ॥ 9 ॥
gandharvāpsarasaśchaiva siddhachāraṇakinnarāḥ ।
yakṣarākṣasanāgāścha taddraṣṭuṃ mahadadbhutam ॥ 10 ॥
jaḍīkṛtē tadā'lōkē rāmē varadhanurdharē ।
nirvīryō jāmadagnyō'sau rāmō rāmamudaikṣata ॥ 11 ॥
tējōbhihatavīryatvājjāmadagnyō jaḍīkṛtaḥ ।
rāmaṃ kamalapatrākṣaṃ mandaṃ mandamuvācha ha ॥ 12 ॥
kāśyapāya mayā dattā yadā pūrvaṃ vasundharā ।
viṣayē mē na vastavyamiti māṃ kāśyapō'bravīt ॥ 13 ॥
sō'haṃ guruvachaḥ kurvan pṛthivyāṃ na vasē niśām ।
kṛtā pratijñā kākutstha kṛtā bhūḥ kāśyapasya hi ॥ 14 ॥
tadimāṃ tvaṃ gatiṃ vīra hantuṃ nārhasi rāghava ।
manōjavaṃ gamiṣyāmi mahēndraṃ parvatōttamam ॥ 15 ॥
lōkāstvapratimā rāma nirjitāstapasā mayā ।
jahi tān śaramukhyēna mā bhūtkālasya paryayaḥ ॥ 16 ॥
akṣayyaṃ madhuhantāraṃ jānāmi tvāṃ surēśvaram ।
dhanuṣō'sya parāmarśāt svasti tē'stu parantapa ॥ 17 ॥
ētē suragaṇāssarvē nirīkṣantē samāgatāḥ ।
tvāmapratimakarmāṇamapratidvandvamāhavē ॥ 18 ॥
na chēyaṃ mama kākutstha vrīḍā bhavitumarhati ।
tvayā trailōkyanāthēna yadahaṃ vimukhīkṛtaḥ ॥ 19 ॥
śaramapratimaṃ rāma mōktumarhasi suvrata ।
śaramōkṣē gamiṣyāmi mahēndraṃ parvatōttamam ॥ 20 ॥
tathā bruvati rāmē tu jāmadagnayē pratāpavān ।
rāmō dāśarathi śśrīmān chikṣēpa śaramuttamam ॥ 21 ॥
sa hatān dṛśya rāmēṇa svāṃllōkāṃstapasārjitān ।
jāmadagnyō jagāmāśu mahēndraṃ parvatōttamam ॥ 22 ॥
tatō vitimirāssarvā diśaśchōpadiśastathā ।
surā ssarṣigaṇā rāmaṃ praśaśaṃsurudāyudham ॥ 23 ॥
rāmaṃ dāśarathiṃ rāmō jāmadagnyaḥ praśasya cha ।
tataḥ pradakṣiṇī kṛtya jagāmātmagatiṃ prabhuḥ ॥ 24 ॥
ityārṣē śrīmadrāmāyaṇē vālmīkīya ādikāvyē bālakāṇḍē ṣaṭsaptatitamassargaḥ ॥
